1 ಅಬ್ರಾಹಾಮ್ ಮಾಮ್ರೆತ್ನಾ ಕಾನಾನ್ ದೆಶಾಚ್ಯಾ ದಕ್ಷಿನ್ ಸಿಮೆಕ್ ಜಾವ್ನ್ ಕಾದೆಶ್ ಅನಿ ಶುರಿಚ್ಯಾ ಮದ್ದಿ ವಸ್ತಿ ಕರುನ್ಗೆತ್ ಉಲ್ಲೊ ಎಳ್ ಗೆರಾರಿ ಮನ್ತಲ್ಯಾ ಗಾಂವಾತ್ ಹೊತ್ತೊ. 2 ಗೆರಾರಿತ್ ರ್‍ಹಾತಾನಾ ಅಬ್ರಾಹಾಮಾನ್ ಸಾರ್‍ಹಾ ಮಾಜಿ ಭೆನ್ ಮನುನ್ ಸಾಂಗಟ್ಲ್ಯಾನ್, ತನ್ನಾ ಸಾರಾಕ್ ಅಪ್ನಾಚ್ಯಾಕ್ಡೆ ಥವ್ನ್ ಗೆವ್ಚೆ ಮನುನ್ ಗೆರಾರಿಚ್ಯಾ ರಾಜಾ ಅಬಿಮೆಲೆಕಾನ್ ಮನ್ ಕರ್ಲ್ಯಾನ್, 3 ಅಬಿಮೆಲೆಕಾಚ್ಯಾ ಸಪ್ನಾತ್ ತ್ಯಾ ದಿಸಿ ರಾತ್ತಿನ್ ಸರ್ವೆಸ್ಪರ್ ದೆವಾನ್ ಬೊಲುನ್, ತಿಯಾ ಮರ್ತೈಯ್, ಕಶ್ಯಾಕ್ ಮಟ್ಲ್ಯಾರ್ ತಿಯಾ ಹಾನಲ್ಯಾ ಹ್ಯಾ ಬಾಯ್ಕೊಚೆ ಲಗಿನ್ ಹೊಲಾ ಮನುನ್ ಸಾಂಗ್ಲ್ಯಾನ್.

4 ಖರೆ ಅಬಿಮೆಲೆಕಾನ್ ತಿಚ್ಯಾ ಜಗೊಳ್ಬಿ ಜಾವ್ಕ್ ನಾ ಅನಿ ತೆನಿ, ದೆವಾ ಮಿಯಾ ಚುಕ್ ಕರಲ್ಲೊ ನೈ ಹೊಲ್ಯಾರ್ಬಿ ಮಾಕಾ ಅನಿ ಮಾಜ್ಯಾ ಲೊಕಾಕ್ನಿ ನಾಶ್ ಕರ್‍ತೆ ಕಾಯ್? 5 ಅಬ್ರಾಹಾಮಾನ್ ಸ್ವತಾ ಅಪ್ನಿಚ್ ತಿ ಮಾಕಾ ಭೆನ್ ಹೊವ್ಚೆ ಮಟ್ಲ್ಯಾನ್, ಅನಿ ತಿನಿಬಿ ಹೊ ಮಾಕಾ ಭಾವ್ ಹೊವ್ಚೆ ಮಟ್ಲಿನ್, ಮಿಯಾ ಚುಕ್ ಕರುಕ್ ನಾ ಮಿಯಾ ಚುಕ್ ಕರುಕ್ ಲಾಗ್ಲಾ ಮನುನ್ ಮಾಕಾ ಗೊತ್ತ್ ನತ್ತೆ, ಮಿಯಾ ಹೆ ಸಗ್ಳೆ ಬರ್‍ಯಾ ಮನಾನ್ ಅನಿ ಬರ್‍ಯಾ ಹಾತಿನ್ ಕರ್‍ಲೊ, ಮನುನ್ ಸಾಂಗ್ಲ್ಯಾನ್.

6 ತನ್ನಾ ದೆವಾನ್ ಅಬೆಮೆಲೆಕಾಚ್ಯಾ ಸಪ್ನಾತ್ ಯೆವ್ನ್ , ಹೊಯ್, ತಿಯಾ ತೆ ಬರ್‍ಯಾ ಮನಾನ್ ಅನಿ ಬರ್‍ಯಾ ಹಾತಿನ್ ಕರ್‍ಲೆ ಮನುನ್ ತಿಕಾ ವಿರೊದ್ ಹೊವ್ನ್ ತಿಯಾ ಪಾಪ್ ಕರಿನಾ ಸಾರ್ಕೆ ಅಡ್ವುನ್ ತಿಯಾ ತಿಕಾ ಅಪ್ಡಿನಾ ಸಾರ್ಕೆ ಕರಲ್ಲೊ.

7 ತೆಚ್ಯಾ ವೈನಾ ತೆಚಿ ಬಾಯ್ಕೊ ತೆಕಾ ಒಪ್ಸುನ್ ದಿ, ತೊ ಎಕ್ ಪ್ರವಾದಿ ತೊ ತುಜ್ಯಾ ಸಾಟ್ನಿ ಮಾಗ್ನಿ ಕರ್ತಾ ತನ್ನಾ ತಿಯಾ ವಾಚ್ತೆಯ್, ತಿಯಾ ತಿಕಾ ದಿಯ್ನಸ್ಲ್ಯಾರ್, ತಿಯಾ ಅನಿ ತುಜಿ ಲೊಕಾ ಮರುನ್ ಜಾತ್ಯಾಸಿ ಮನುನ್ ಹುರ್ಶಾಕಿ ದಿಲ್ಯಾನ್.

8 ಮಾನಾ ದುಸ್ರೆ ದಿಸಿ ಸಕ್ಕಾಳಿ ಅಬಿಮೆಲೆಕಾನ್ ತೆಚೆ ಸಫಾನ್ ಕಾಮ್ಗಾರ್ಯಾಕ್ನಿ ಸಾಂಗ್ಲ್ಯಾನ್, ತೆನಿ ಆಯ್ಕುನ್ ಬ್ಹಿಂವ್ಲ್ಯಾನಿ. 9 ಮಾನಾ ತೆನಿ ಅಬ್ರಾಹಾಮಾಕ್ ಬಲ್ವುನ್: ತಿಯಾ ಅಮ್ಕಾ ಅಸೆ ಕಶ್ಯಾಕ್ ಕರ್‍ಲೆ ? ಅಸ್ಲಿ ಚುಕ್ ಮಾಜ್ಯಾ ವರ್‍ತಿ ಅನಿ ಮಾಜ್ಯಾ ರಾಜಾಚ್ಯಾ ವರ್‍ತಿ ಕಶ್ಯಾಕ್ ಘಾಟಲೈ? ಮಿಯಾ ಕರುಕ್ ನಸಲ್ಲ್ಯಾ ಕಾಮಾಚಿ ಅಪರಾದ್ ಕರುಕ್ ಲಾವ್ಲೆ. 10 ಕಶ್ಯಾಕ್ ತಿಯಾ ಅಸೆ ಕರ್‍ಲೆ? ಮನುನ್ ಇಚಾರ್‍ಲ್ಯಾನಿ.

11 ಮಾನಾ ಅಬ್ರಾಹಾಮಾನ್ ತೆಕಾ, ಹ್ಯಾ ಜಾಗ್ಯಾಚಿ ಲೊಕಾ ದೆವಾಚೆ ಬ್ಹಿಂಯೆ ನಸ್ತಾನಾ ಮಾಜ್ಯಾ ಬಾಯ್ಕೊಚ್ಯಾ ವೈನಾ ಮಾಕಾ ಜಿವಾನಿ ಮಾರ್ತಿಲ್ ಮನುನ್ ಚಿಂತಲ್ಲೊ. 12 ಖರೆಚ್ ಸಾಂಗುಚೆ ಹೊಲ್ಯಾರ್, ತಿ ಮಾಜಿ ಭೆನ್, ಮಾಜ್ಯಾ ಬಾಬಾಚಿ ಲೆಕ್ ಖರೆ ಮಾಜ್ಯಾ ಬಾಯ್ಚಿ ಲೆಕ್ ನೈ, ಅನಿ ಮಿಯಾ ತಿಕಾ ಲಗಿನ್ ಹೊಲೊ. 13 ದೆವಾನ್ ಮಾಕಾ ಮಾಜ್ಯಾ ಬಾಬಾಚ್ಯಾ ಘರ್‍ಹಾತ್ನಾ ಧಾಡುನ್ ದುಸ್ರಾ ಜಾಗ್ಯಾರ್ ಜಾಯ್ ಸಾರ್ಕೆ ಕರಲ್ಯಾಕ್ ಮಿಯಾಚ್ ಸಾರಾಕ್, ತಿಯಾ ಕವ್ಡಿ ಬರ್‍ಯಾ ಮನಾಚಿ ಮನುನ್ ದಾಕ್ವುಕ್ ಮಾಕಾ ಎಕ್ ಉಪ್ಕಾರ್ ಕರುಚೆ ತೆ ಕಾಯ್ ಮಟ್ಲ್ಯಾರ್, ಅಮಿ ಖೈ ಜಾತಾಂವ್ ಥೈ ಮಿಯಾ ತುಕಾ ಭಾವ್ ಹೊವ್ಚೆ ಮನುನ್ ತಿಕಾ ಸಾಂಗಟಲ್ಲೊ.

14 ಮಾನಾ ಅಬಿಮೆಲೆಕಾನ್ ಸಾರ್‍ಹಾಕ್ ಪರ್‍ತುನ್ ಅಬ್ರಾಹಾಮಾಕ್ ದಿಲ್ಯಾನ್ ಅನಿ ತನ್ನಾ ಗೊರಾ ಬಕ್ರಿಯಾ, ಆಳಾ ತೆಕಾ ಒಪ್ಸುನ್, 15 ಅಬಕ್ ಮಾಜೊ ದೆಶ್ ತುಕಾ ಖೈ ಮನಾಕ್ ಲಾಗ್ತಾ ಥೈ ಬಾಳ್ವಿ ಕರುನ್ ಖಾ, ಮಟ್ಲ್ಯಾನ್. 16 ಅನಿ ತೆನಿ ಸಾರ್‍ಹಾಕ್, ಬಗ್ ತುಜ್ಯಾ ಭಾವಾಕ್ ಮಿಯಾ ಎಕ್ ಹಜಾರ್ ರುಪೈಚಿ ಚಾಂಧಿಚೆ ಪೈಸೊ ದಿಲಾ. ಹಿತ್ತೆ ಹೊಲ್ಲ್ಯಾ ವಿಶಯಾತ್ ಹೆ ಚುಕ್ ಸಮಾ ಕರುನ್ ಘೆವ್ಕ್ ದಿಲ್ಲೆ ಹಾಯ್, ತಿಯಾ ಪವಿತ್ರ್ ಮನಾಚಿ ಮನುನ್ ಹರ್ ಎಕ್ಲ್ಯಾಕ್ನಿ ಹೆ ಸಾಕ್ಷಿ ಹೊವ್ನ್ ರ್‍ಹಾತಾ ಮಟ್ಲ್ಯಾನ್.

17 ಮಾನಾ ಅಬ್ರಾಹಾಮಾನ್ ದೆವಾಕ್ಡೆ ಮಾಗ್ನಿ ಕರ್ತಾನಾ, ದೆವಾನ್ ಅಬಿಮೆಲೆಕಾಕ್ ತೆಚ್ಯಾ ಬಾಯ್ಕೊಕ್ ಅನಿ ದಾಸಿಯಾಕ್ನಿ ಗುನ್ ಕರ್ಲ್ಯಾನ್ ಅನಿ ತೆಂಕಾ ಪೊರಾ ಹೊಲಿ. 18 ಕಶ್ಯಾಕ್ ಮಟ್ಲ್ಯಾರ್, ಅಬ್ರಾಹಾಮಾಚಿ ಬಾಯ್ಕೊ ಸಾರಾಚ್ಯಾ ವೈನಾ ಸರ್ವೆಸ್ಪರ್ ದೆವಾನ್ ಅಬಿಮೆಲೆಕಾಚ್ಯಾ ಘರ್‍ಹಾತ್ ಹೊತ್ತ್ಯಾ ಬಾಯ್ಕಾಮಾನ್ಸಾಕ್ನಿ ಪೊರಾ ಹೊಯ್ನಾ ಸಾರ್ಕೆ ಕರಲ್ಲ್ಯಾನ್.