ಉತ್ಪತ್ತಿ 43

ಜುಜೆಚಿ ಭಾವಾ ಬೆಂಜ್ಯಾಮಿನಾಕ್ ಘೆವ್ನ್ ಇಜಿಪ್ತಾಕ್ ಗೆಲ್ಲೆ

1 ಕಾನಾನ್ ದೆಸಾತ್ ಬರ್‍ಗಾಲ್ ಲೈ ಕಟಿನ್ ಹೊವ್ನ್ ಹೊತ್ತೊ. 2 ಅನಿ ಜಾಕೊಬಾಚ್ಯಾ ಲೆಕಾನಿ ಹಾನಲ್ಲೆ ದಾನೆ ತೆಚ್ಯಾ ಕುಟ್ಮಾಚ್ಯಾ ಲೊಕಾನಿ ಖಾವ್ನ್ ಸರ್ಲೆ, ಜಾಕೊಬಾನ್, ಜಾವಾ ಅನಿ ಜೆವ್ನಾಕ್ ದಾನೆ ಇಕಾತ್ ಹಾನಾ ಮಟ್ಲ್ಯಾನ್.

3 ಜುದಾನ್ ತೆಕಾ, ತ್ಯಾ ದೆಶಾಚ್ಯಾ ರಾಜ್ಯಪಾಲಾನ್ ಅಮ್ಕಾ ತುಮ್ಚ್ಯಾ ಭಾವಾಕ್ ಹಾನಿ ನಸ್ತಾನಾ ಮಾಜೆ ತೊಂಡ್ ಬಗುಕ್ ಯೆವ್ನಕಾಸಿ, ಮನುನ್ ಹುರ್ಶಾಕಿ ದಿಲಾ, ಮಟ್ಲ್ಯಾನ್. 4 ಅನಿ ತಿಯಾ ಅಮ್ಚ್ಯಾ ವಾಂಗ್ಡಾ ಬೆನ್ಯಾಮಿನಾಕ್ ಧಾಡುನ್ ದಿಲ್ಯಾರ್, ಅಮಿ ಜಾವ್ನ್ ದಾನೆ ಹಾನ್ತ್ಯಾಂವ್ ಮಟ್ಲ್ಯಾನ್. 5 ಖರೆ ಬೆನ್ಯಾಮಿನಾಕ್ ಅಮ್ಚ್ಯಾ ವಾಂಗ್ಡಾ ಧಾಡುನ್ ದಿಯ್ನಸ್ಲ್ಯಾಲ್ಯಾರ್ ಅಮಿ ಜಾವ್ನ್ ದಾನೆ ಹಾನಿನಾವ್, ಕಶ್ಯಾಕ್ ಮಟ್ಲ್ಯಾರ್, ತೆನಿ ಬೆನ್ಯಾಮಿನಾಕ್ ಬಲ್ವುನ್ ಹಾನಿನಸ್ತಾನಾ ತುಮ್ಚೆ ತೊಂಡ್ ದಾಕ್ವುನಕಾಸಿ ಮನುನ್ ಹುರ್ಶಾಕಿ ದಿಲಾ, ಮಟ್ಲ್ಯಾನಿ.

6 ತೆ ಆಯ್ಕುನ್ ಇಜ್ರಾಯೆಲಾನ್, "ಅಮ್ಕಾ ಅನಿ ಎಕ್ ಭಾವ್ ಹಾಯ್ ಮನುನ್ ತ್ಯಾ ಮಾನ್ಸಾಕ್ ಸಾಂಗುನ್ ಮಾಕಾ ಕಶ್ಯಾಕ್ ಲೈ ತರಾಸ್ ದಿವ್ಲ್ಯಾಸಿ?" ಮನುನ್ ಇಚಾರ್‍ಲ್ಯಾನಿ.

7 ತ್ಯಾ ಮಾನ್ಸಾನ್ ಅಮ್ಚ್ಯಾ ಕುಟ್ಮಾಂಚ್ಯಾ ವಿಶಯಾತ್ ಕಳ್ವುನ್ ಘೆವ್ಕ್ ಮನುನ್ ಅಮ್ಕಾ ಬರೆ ಕರುನುಚ್, ತುಮ್ಚ್ಯಾ ಘರ್‍ಹಾತ್ ತುಮ್ಚೊ ಬಾಬಾ ಅಜುನಿ ಜಿವಾನ್ ಹಾಯ್ ಕಾಯ್? ಅನಿ ತುಮ್ಕಾ ಎಕ್ ಭಾವ್ ಹಾಯ್ ಕಾಯ್ ? ಮನುನ್ ಇಚಾರ್‍ಲ್ಯಾನಿ, ತನ್ನಾ ಅಮಿ ತೆಕಾ ಹೊತ್ತೆ ಖರೆ ಸಾಂಗ್ಲಾವ್, ಅಮ್ಕಾ ತೊ ಅಮ್ಚ್ಯಾ ಭಾವಾಕ್ ಬಲ್ವುನ್ ಹಾನುಕ್ ಸಾಂಗ್ತಾ ಮನುನ್ ಗೊತ್ತ್ ನತ್ತೆ ಮಟ್ಲ್ಯಾನಿ.

8 ಮಾನಾ ಜುದಾನ್ ಅಪ್ಲ್ಯಾ ಬಾಬಾಕ್, ಅಮ್ಚ್ಯಾ ವಾಂಗ್ಡಾ ಬೆಂಜ್ಯಾಮಿನಾಕ್ ಧಾಡುನ್ ದಿ, ಅಮಿ ತೆಕಾ ಬಗುನ್ ಘೆತಾಂವ್, ಅನಿ ಅಮಿ ಇಜಿಪ್ತಾಕ್ ಜಾವ್ನ್ ದಾನೆ ಹಾನಿ ನಸ್ಲ್ಯಾರ್, ತಿಯಾ, ಅಮಿ ಅನಿ ಅಮ್ಚಿ ಪೊರಾ ಮರುನ್ ಜಾತಾಂವ್ ಮಟ್ಲ್ಯಾನ್. 9 ತೆಕಾ ಕಾಯ್ ಹೊಯ್ನಾ ಸಾರ್ಕೆ ಬಗ್ತಲಿ ಮಾಜಿ ಜವಾಬ್ದಾರಿ, ಮಾಜೊ ಜಿವ್ ಆಡು ಥವ್ನ್ ತರಿಬಿ ತೆಕಾ ಮಿಯಾ ಬೆರೆ ಕರುನ್ ಬಗುನ್ ಘೆತಾ, ಅನಿ ಮಿಯಾ ತೆಕಾ ಪರ್‍ತುನ್ ತುಜಾಕ್ಡೆ ಬಲ್ವುನ್ ಹಾನಿನಸ್ಲ್ಯಾರ್, ತುಜೊ ಶಾಪ್ ಮಾಜೆ ವರ್‍ತಿ ಕನ್ನಾಬಿ ರಾಂವ್ದಿತ್. 10 ಅಸೆ ರ್‍ಹಾತಾನಾ ಅಮಿ ತುಕಾ ಲೈ ಎಳ್ ರಾಕುಕ್ ಲಾಯ್ನಾವ್, ತಿಯಾ ಅಮ್ಕಾ ಅದ್ದಿಚ್ ಧಾಡುನ್ ದಿಲ್ಲೆ ರಾಲ್ಯಾರ್ ಅತ್ತಾ ಪತರ್ ದೊನ್ದಾ ಜಾವ್ನ್ ಯೆಯ್ ಹೊತ್ತಾಂವ್, ಮಟ್ಲ್ಯಾನ್.

11 ತೆಂಚೊ ಬಾಬಾ ಜಾಕೊಬಾನ್, ತುಮಿ ಸಾಂಗ್ತಲೆ ಖರೆ ಹೊಲ್ಲೆ ರಾಲ್ಯಾರ್ ತುಮ್ಚ್ಯಾ ವಾಂಗ್ಡಾ ಬೆನ್ಯಾಮಿನಾಕ್ ಬಲ್ವುನ್ ಘೆವ್ನ್ ಜಾವಾ, ಅನಿ ತ್ಯಾ ರಾಜ್ಯಪಾಲಾಕ್ ಮನುನ್ ಅಮ್ಚ್ಯಾ ದೆಸಾತ್ ಗಾವ್ತಲಿ ಬರಿ ಆಯಾರಾ ಬರ್‍ಯಾವಾಸೆಚೆ ತೆಲ್, ಮಾವ್, ರಗ್ತ್ ಬೊಳ್, ಗೊಡ್ಲೆ ಅಂಟ್, ಅನಿ ಮಸಾಲೆ, ಪಿಸ್ತಾ, ಬಾದಾಮ್ ಕಾಜು ಬಿಂಯ್ಯಾ ಘೆವ್ನ್ ಜಾವಾ. 12 ಅನಿ ಅತ್ತಾ ಜಾತಾನಾ ದೊನ್ ಪಟ್ಟ್ ಪೈಸೆ ಘೆವ್ನ್ ಜಾವಾ, ಅದ್ಲ್ಯಾ ಪಟಿಚೆ ತುಮ್ಚ್ಯಾ ವಾಂಗ್ಡಾ ಪರ್‍ತುನ್ ಯೆಲ್ಲೆ ಪೈಸೆಬಿ ಘೆವ್ನ್ ಜಾವಾ, ಕಶ್ಯಾಕ್ ಮಟ್ಲ್ಯಾರ್ ರಾಜ್ಯ್ ಪಾಲಾನ್ ಚುಕುನ್ ತೆ ದಿಲಾಕಿ ಕಾಯ್ಕಿ ಮಟ್ಲ್ಯಾನ್. 13 ಅನಿ ಬೆನ್ಯಾಮಿನಾಕ್ಬಿ ಘೆವ್ನ್ ಜಾವಾ, ಸಗ್ಳೆಬಿ ಯೆಗ್ದಾಚ್ ಪರ್‍ತುನ್ ಯೆವಾ ಮಟ್ಲ್ಯಾನ್. 14 ಮಾನಾ ತುಮಿ ತ್ಯಾ ಮಾನ್ಸಾಚ್ಯಾ ಇದ್ರಾಕ್ ಇಬೆ ಹೊತ್ತ್ಯಾ ತನ್ನಾ ಸರ್ವೆಸ್ಪರ್ ತುಮ್ಕಾ ಮಜತ್ ಕರುಂದಿತ್ ಅನಿ ತೆಚಿ ದಯಾ ತುಮ್ಚೆ ವರ್‍ತಿ ಯೆಂವ್ದಿತ್ ಸಿಮಿಯೊನಾಕ್ ಅನಿ ಬೆಂಜ್ಯಾಮಿನಾಕ್ ತೊ ಧಾಡುನ್ ದಿಂವ್ದಿತ್ ಮನುನ್ ಮಿಯಾ ಮಾಗ್ನಿ ಕರ್ತಾ, ನಾತರ್, ಅನಿಬಿ ಮಿಯಾ ಮಾಜ್ಯಾ ಲೆಕಾಕ್ ನಾ ಕರುನ್ ಘೆವ್ನ್ ಲೈ ದುಕ್ಕಾತ್ ರ್‍ಹಾತಾ, ಮಿಯಾ ಲೆಕಾಕ್ನಿ ಕಳ್ದುನ್ ಘೆವ್ನ್ ರಾತಲೊ ಹೊಲ್ಯಾರ್ ತಸೆಚ್ ಹೊಂವ್ದಿತ್ ಮಟ್ಲ್ಯಾನ್.

15 ತೆಚ್ಯಾ ವೈನಾ ರಾಜ್ಯ್ ಪಾಲಾಕ್ ಮನುನ್ ದಿವ್ಕ್ ಆಯಾರಾ ಘೆವ್ನ್; ಅದ್ದಿ ಗೆಲ್ಲ್ಯಾ ತನ್ನಾ ನೆಲ್ಲ್ಯಾ ಕಿಂತಾ ದೊನ್‍ಪಟ್ ಪೈಸೆ ಅನಿ ಬೆಂಜ್ಯಾಮಿನಾಕ್ ಬಲ್ವುನ್ ಘೆವ್ನ್ ಗೆಲ್ಯಾನಿ,

16 ಜುಜೆನ್ ಅಪ್ಲೊ ಭಾವ್ ಬೆಂಜ್ಯಾಮಿನ್ ತೆಂಚ್ಯಾ ವಾಂಗ್ಡಾ ಯೆತಲೊ ಬಗುನ್ ಅಪ್ಲೆ ಘರ್ ಬಗುನ್ ಘೆತಲ್ಯಾ ಸೆವಕಾಕ್, ಹ್ಯಾ ಲೊಕಾಕ್ನಿ ಮಾಜ್ಯಾ ಘರಾಕ್ ಬಲ್ವುನ್ ಘೆವ್ನ್ ಜಾ; ತೆನಿ ದೊಪಾರ್ಚೆ ಅಮ್ಚ್ಯಾ ವಾಂಗ್ಡಾ ಮಾಂಸಾಚೆ ಜೆವಾನ್ ಕರುಂದಿತ್, ತೆಚ್ಯಾ ಸಾಟ್ನಿ ಜನಾವರ್ ಮಾರುನ್ ಮಾಂಸ್ ಕರುನ್ ರಾಂದಾಪ್ ಕರಾ, ಮನುನ್ ಸಾಂಗ್ಲ್ಯಾನ್. 17 ಜುಜೆನ್ ಹುಕುಮ್ ದಿಲ್ಲ್ಯಾಸಾರ್ಕೆ ಸೆವಕಾನಿ ತೆಚ್ಯಾ ಭಾವಾಕ್ನಿ ಘರ್‍ಹಾತ್ ಬಲ್ವುನ್ ನೆಲ್ಯಾನ್.

18 ತೆಂಕಾ ಘರಾಕ್ ಘೆವ್ನ್ ಗೆಲ್ಲ್ಯಾಸಾಟ್ನಿ ತೆನಿ ಫಾಟ್ಲ್ಯಾ ಪಟಿ ಅಮ್ಚ್ಯಾ ಪಿಸ್ವಿಯಾತ್ನಿ ಪೈಸೆ ಪರ್‍ತುನ್ ಗೆಲ್ಲ್ಯಾ ವೈನಾ ಅಮ್ಕಾ ಹಿತ್ತೆ ಬಲ್ವುನ್ ಅನಿ ಅಮ್ಚ್ಯಾ ಗಾಡ್ವಾಕ್ನಿ ಕಾಡುನ್ಗೆವ್ನ್, ಅಮ್ಕಾ ಗುಲಾಮ್ ಕರುನ್ ಘೆತಾತ್ ಮನುನ್ ಬೊಲುನ್ ಘೆವ್ನ್ ಲೈ ಭಿಂವ್ಲ್ಯಾನಿ. 19 ತಸೆ ಹೊವ್ನ್ ತೆನಿ ಜುಜೆಚ್ಯಾ ಘರ್ ರಾಕ್ವಾಲಿ ಹೊವ್ನ್ ದಾರಾಕ್ಡೆ ರ್‍ಹಾತಲ್ಯಾ ಸೆವಕಾಕ್ಡೆ ಬೊಲುನ್, 20 ಸಾಯ್ಬಾ ದಯಾ ಕರುನ್ ಆಯ್ಕ್, ತುಜ್ಯಾ ಧನಿಕ್ಡೆಬಿ ಅಮಿ ಮಾಗ್ತಲೆ ಹೆಚ್ ಅಮಿ ಅದ್ದಿ ಎಗ್ದಾ ದಾನೆ ನೆವ್ಕ್ ಮನುನ್ ಯೆಲ್ಲ್ಯಾಂವ್ ತನ್ನಾ, 21 ಅಮಿ ಘರಾಕ್ ಪಾಟಿ ಪರ್‍ತುನ್ ಜಾತಾನಾ ಎಕ್ ಜಾಗ್ಯಾರ್ ವಸ್ತಿ ಹೊತ್ಯಾಂವ್, ಥೈ ಅಮ್ಚಿ ಪಿಸ್ವಿಯಾ ಉಗ್ಡುನ್ ಬಗ್ತಾನಾ, ಅಮಿ ದಾನೆ ಘೆವ್ನ್ ದಿಲ್ಲೆ ಪೈಸೆ ಪಿಸ್ವಿಯಾತ್ನಿ ಹೊತ್ತೆ, ತೆ ಅಮಿ ದಿವ್ಚೆ ಮನುನ್ ಪರ್‍ತುನ್ ಹಾನ್ಲಾವ್. 22 ಅನಿ ಖರೆ ಅತ್ತಾ ದಾನೆ ನೆವ್ಕ್ ಮನುನ್ ಜಾಸ್ತಿಚೆ ಪೈಸೆ ಘೆವ್ನ್ ಯೆಲ್ಯಾಂವ್, ತೆ ಪೈಸೆ ಅಮ್ಚ್ಯಾ ಪಿಸ್ವಿಯಾತ್ನಿ ಪರ್‍ತುನ್ ಕೊನಿ ಥವಲ್ಲೆ ಮನುನ್ ಅಮ್ಕಾ ಗೊತ್ತ್ ನಾ ಮಟ್ಲ್ಯಾನಿ.

23 ತೆಕಾಚ್ ತ್ಯಾ ಸೆವಕಾನ್ ತೆಂಕಾ, ತುಮಿ ಭಿವ್ನಕಾಸಿ ತುಮ್ಚ್ಯಾ ಅನಿ ತುಮ್ಚ್ಯಾ ಬಾಬಾಚ್ಯಾ ದೆವಾನ್ ಆಯಾರಾ ಹೊವ್ನ್ ತುಮ್ಚ್ಯಾ ಪಿಸ್ವಿಯಾತ್ನಿ ಥವ್ಲಾ ಕಾಯ್ಕಿ, ತುಮಿ ಅದ್ದಿ ಯೆಲ್ಲ್ಯಾತನ್ನಾ ಮಿಯಾ ಪೈಸೆ ಘೆಟಲ್ಲೊ, ಮಟ್ಲ್ಯಾನ್ ಅನಿ ಸಿಮೊನಾಕ್ ತೆಂಚ್ಯಾಕ್ಡೆ ಹಾನುನ್ ಪಾವೈಲ್ಯಾನ್.

24 ಮಾನಾ ತ್ಯಾ ಸೆವಕಾನ್ ತೆಂಕಾ ಜುಜೆಚ್ಯಾ ಘರಾಚ್ಯಾ ಭುತ್ತುರ್ ಬಲ್ವುನ್ ಘೆವ್ನ್ ಗೆಲ್ಯಾನ್, ಅನಿ ತೆಂಕಾ ಪಾನಿ ದಿಲ್ಯಾನ್ ತೆನಿ ಹಾತ್ ಪಾಂಯಾ ಧುವ್ನ್ ಘೆಟ್ಲ್ಯಾನಿ ಮಾನಾ ತ್ಯಾ ಸೆವಕಾನ್ ತೆಂಚ್ಯಾ ಘಾಡ್ವಾಕ್ನಿ ಖಾವ್ಕ್ ಚಾರೊ ದಿಲ್ಯಾನ್. 25 ತೆನಿ ತೆಂಕಾ ತುಮಿ ಜುಜೆಚ್ಯಾ ವಾಂಗ್ಡಾ ಜವಾನ್ ಕರ್‍ತಲೆ ಹಾಸಿ ಮಟ್ಲ್ಯಾನ್, ದೊಪಾರಿ ಪತರ್ ದಿವ್ಕ್ ಮನುನ್ ಹಾನಲಿ ಸಗ್ಳಿ ಆಯಾರಾ ತಯಾರ್ ಕರುನ್ಗೆಟ್ಲ್ಯಾನಿ. 26 ಮಾನಾ ಜುಜೆ ಘರಾಕ್ ಯೆಲ್ಲ್ಯಾ ಮಾನಾ ತೆನಿ ತೆಕಾ ಹಾನಲ್ಲಿ ಆಯರಾ ಸಗ್ಳಿ ದಿವ್ನ್ ತೆಚ್ಯಾ ಭೊತ್ಯಾನಿ ಡಬ್ಬ್ ಪಡುನ್ ನಮಸ್ಕಾರ್ ಕರ್ಲ್ಯಾನಿ. 27 ಜುಜೆನ್ ತೆಂಕಾ ಆರಾಮ್ ಹಾಸಿ ಕಾಯ್ , ಅನಿ ತುಮ್ಚೊ ಮ್ಹಾತಾರೊ ಬಾಬಾ ಆರಾಮ್ ಹಾಯ್ ಕಾಯ್? ಅಜುನಿ ಜಿವಾನಿ ಹಾಯ್ ಕಾಯ್? ಮನುನ್ ಇಚಾರ್‍ಲ್ಯಾನಿ.

28 ತನ್ನಾ ತೆನಿ, "ತುಜಿ ಸೆವಕಾ ಅಮ್ಚೊ ಬಾಬಾ ಜಿವಾನಿ ಅನಿ ಆರಾಮಬಿ ಹಾಯ್" ಮಟ್ಲ್ಯಾನಿ, ಅನಿ ತೆನಿ ಜುಜೆಕ್ ಮಾನ್ ಬಾಗ್ವುನ್ ನಮಸ್ಕಾರ್ ಕರ್ಲ್ಯಾನಿ.

29 ಮಾನಾ ಜುಜೆನ್ ಅಪ್ಲ್ಯಾ ಸ್ವಂತ್ ಬಾಯ್ಚೊ ಲೆಕ್ ಬೆಂಜ್ಯಾಮಿನಾಕ್ ಬಗುನ್, ತುಮಿ ಸಾಂಗಲೊ ತುಮ್ಚೊ ಧಾಕ್ಲೊ ಭಾವ್ ಹ್ಯೊಚ್ ಕಾಯ್? ಮನುನ್ ತೆಕಾ ತುಕಾ ದೆವ್ ಬರೆ ಕರುಂದಿತ್ ಮಾಜ್ಯಾ ಲೆಕಾ ಮಟ್ಲ್ಯಾನ್. 30 ಜುಜೆ ಅಪ್ಲ್ಯಾ ಭಾವಾಕ್ ಲೈ ಪ್ರೆಮ್ ಕರ್‍ತಲ್ಯಾ ವೈನಾ ತೆಕಾ ಬರೆ ಕರುನ್ ಬಗುನ್ ಖುಸಿನ್ ಡೊಳ್ಯಾತ್ನಾ ಪಾನಿ ಭರುನ್, ಅಪ್ಲ್ಯಾ ಖೊಲಿತ್ ಜಾವ್ನ್ ಲೈ ರಡ್ಲ್ಯಾನ್.

31 ಮಾನಾ ತೊಂಡ್ ಧುವ್ನ್ ಘೆವ್ನ್, ಅಪ್ನಾಕುಚ್ ಅಪ್ನಿ ಸಂಬಾಳುನ್ ಘೆವ್ನ್, ಭಾಯ್ರ್ ಯೆವ್ನ್, "ಜೆವಾವ್ನಾಕ್ ವಾಡಾ" ಮನುನ್ ಹುಕುಮ್ ದಿಲ್ಯಾನ್. 32 ಜೆವಾನ್ ಕರ್ತಾನಾ ಜುಜೆನ್ ಎಕ್ ಮೆಜಾ ವರ್‍ತಿ ಜೆವಾನ್ ಕರ್ಲಾನ್, ಅನಿ ತೆಚ್ಯಾ ಭಾವಾನಿ ದುಸ್ರಾ ಮೆಜಾ ವರ್‍ತಿ ಜೆವಾನ್ ಕರ್ಲ್ಯಾನಿ, ಇಜಿಪ್ತಾಚ್ಯಾ ಲೊಕಾನಿ ಅನಿ ದುಸ್ರಾ ಮೆಜಾ ವರ್‍ತಿ ಜೆವಾನ್ ಕರ್ಲ್ಯಾನಿ, ಕಶ್ಯಾಕ್ ಮಟ್ಲ್ಯಾರ್ ಇಬ್ರಿಯಾಂಚಿ ಲೊಕಾ ತೆಂಚ್ಯಾ ವಾಂಗ್ಡಾ ಬಸುನ್ ಜೆವಾನ್ ಕರ್ಲ್ಯಾರ್ ಅಪ್ಲಿ ಕಿಮ್ಮತ್ ಕಮ್ಮಿ ಹೊತಾ ಮನುನ್ ಚಿಂತಲ್ಯಾನಿ. 33 ಜುಜೆನ್ ಅಪ್ಲ್ಯಾ ಭಾವಾಕ್ನಿ ಥೊರ್ಲ್ಯಾಕ್ನಾ ಬಾರಿಕ್ಲ್ಯಾ ಪತರ್ ಸಮಾ ಬಸಿ ಸಾರ್ಕೆ ಕರುನ್ ಥವಲ್ಯಾನ್ ತೆ ಬಗುನ್ ಭಾವಾನಿ ಅಜಾಪ್ ಹೊವ್ನ್ ಎಕಾ ಮೆಕಾಕ್ ಬಗುನ್ ಘೆಟ್ಲ್ಯಾನಿ. 34 ಮಾನಾ ಸೆವಕಾನಿ ಜುಜೆಕ್ನಾ ಲಾಗುನ್ ವಾಡಿತ್ ಯೆಲ್ಯಾನಿ ಖರೆ ಜುಜೆಚ್ಯಾ ಮೆಜಾಕ್ನಾ ಬೆಂಜ್ಯಾಮಿನಾಕ್ ಪಾಂಚ್ ಪಟ್ಟ್ ಜಾಸ್ತಿಚೆ ಧಾಡ್ಲ್ಯಾನ್, ಮಾನಾ ಭಾವಾನಿ ಪೊಟ್ ಭರುನ್ ಜೆವಾನ್ ಕರುನ್ ಪಾನಿ ಫಿಲ್ಯಾನಿ.