1 ಜುಜೆನ್ ಪರೊಹ್ ರಾಜಾಚ್ಯಾ ಜಗ್ಗುಳ್ ಯೆವ್ನ್, ಮಾಜೊ ಬಾಬಾ ಅನಿ ಭಾವಾ ಬಕ್ರಿ ಸಗ್ಳಿ ಜನಾವರಾ ಅನಿ ಫುರಾ ಆಸ್ತಿ ಗೆವ್ನ್ ಕಾನಾನಾಕ್ನಾ ಗೊಶೆನ್, ಪ್ರಾಂತ್ಯಾತ್ ಯೆಲಾತ್, ಮನುನ್ ಸಾಂಗ್ಲ್ಯಾನ್. 2 ತವ್ಡೆಚ್ ನಸ್ತಾನಾ ಅಪ್ಲ್ಯಾ ಭಾವಾತ್ನಿ ಪಾಂಚ್ ಲೊಕಾಕ್ನಿ ಬಲ್ವುನ್ ಹಾನುನ್ ಪರೊಹಾಚ್ಯಾ ಇದ್ರಾಕ್ ಇಬೆ ಕರ್ಲ್ಯಾನ್. 3 ಪರೊಹಾನ್ ತುಮ್ಚೆ ಕಾಮ್ ಕಾಯ್ ಮನುನ್ ಇಚಾರ್‍ತಾನಾ,

ತೆನಿ ತುಜಿ ಸೆವಕಾ ಅಮಿ ಅಮ್ಚ್ಯಾ ಪುರ್ವಜಾಂಚ್ಯಾ ಪದ್ದತಿ ಸಾರ್ಕೆ ಪೈಲೆಚ್ಯಾನ್ಬಿ ಬಕ್ರಿ ರಾಕ್ತಲೆ. 4 ಕಾನಾನ್ ದೆಶ್ಯಾತ್ ಲೈ ಬರ್‍ಗಾಲ್ ಯೆಲ್ಲ್ಯಾಸಾಟ್ನಿ ತುಮ್ಚ್ಯಾ ಸೆವಕಾಂಚಿ ಬಕ್ರಿ ಅನಿ ಜನಾವರಾಕ್ನಿ ಚಾರೊ ಗಾಯ್ ನಸ್ತಾನಾ ಉಲ್ಲೆ ಎಳ್ ಹ್ಯಾ ದೆಶ್ಯಾತ್ ರಾವ್ಕ್ ಯೆಲ್ಯಾಂವ್, ಸೆವಕಾಕ್ನಿ ಗೊಶೆನ್ ಸಿಮೆತ್ ರಾವ್ಕ್ ಒಪ್ಕಿ ದಿವಾ ಮನುನ್ ಮಾಗ್ಲ್ಯಾನಿ. 5 ಪರೊಹಾನ್ ಜುಜೆಕ್ ತುಜೊ ಬಾಬಾ ಅನಿ ತುಜಿ ಭಾವಾ ತುಜ್ಯಾ ಜಗ್ಗೊಳ್ ಯೆಲಾತ್. 6 ಇಜಿಪ್ತ್ ದೆಶ್ ತುಜ್ಯಾ ಇದ್ರಾಕ್ ಹಾಯ್, ತ್ಯಾತುರ್ ಬರೊ ಭಾಗ್ ತುಜ್ಯಾ ಬಾಬಾಕ್ ಅನಿ ಭಾವಾಕ್ನಿ ವಸ್ತಿ ರಾವ್ಕ್ ಮನುನ್ ನೆಮ್ಸುನ್ ಥವ್, ತೆನಿ ಪಾಜೆ ಹೊಲ್ಯಾರ್ ಗೊಶೆನ್ ಪ್ರಾಂತ್ಯಾತ್ ರಾಂವ್ದಿತ್, ಅನಿ ತೆಂಚ್ಯಾತ್ ಕೊನ್ ತರಿಬಿ ಲೈ ಗೊತ್ತ್ ಹೊತ್ತೆ ರಾಲ್ಯಾರ್ ಮಾಜಿ ಜನಾವರಾಬಿ ರಾಕುಂದಿತ್, ಮಟ್ಲ್ಯಾನ್.

7 ಮಾನಾ ಜುಜೆನ್ ಅಪ್ಲೊ ಬಾಬಾ ಜಾಕೊಬಾಕ್ ಹಾನುನ್ ಪರೊಹಾಚ್ಯಾ ಇದ್ರಾಕ್ ಇಬೆ ಕರ್ಲ್ಯಾನ್, ತನ್ನಾ ಜಾಕೊಬಾನ್ ಪರೊಹಾಕ್ ಆಶಿರ್ವಾದ್ ದಿಲ್ಯಾನ್. 8 ಪರೊಹಾನ್ "ತುಕಾ ಕವ್ಡೆ ವರಿಸ್?" ಮನುನ್ ಇಚಾರ್‍ತಾನಾ,

9 ತನ್ನಾ ಜಾಕೊಬಾನ್ ಮಾಜ್ಯಾ ಬಾಳ್ವಿಚ್ಯಾ ಪರ್ಯಾನಾಚಿ ಎಕ್ಸೆತಿಸ್ ವರಿಸ್ ತವ್ಡಿಚ್, ಮೆಜುನ್ ಬಗಟ್ಲ್ಯಾರ್ ತೆ ಕಮ್ಮಿಚ್ ಅನಿ ಲೈ ತರಾಸಾತ್ನಿ, ಮಾಜ್ಯಾ ಪುರ್ವಜ್ ಲೊಕಾನಿ ಜಿವನ್ ಕರಲೆ ತವ್ಡೆ ದಿಸ್ಬಿ ಮಾಕಾ ಹೊವ್ಕ್ನಾ, 10 ಮನುನ್ ಪರೊಹಾಕ್ ಆಶಿರ್ವಾದ್ ದಿವ್ನ್, ತೆಚ್ಯಾ ಇದ್ರಾಕ್ನಾ ಗೆಲೊ, 11 ಪರೊಹಾ ರಾಜಾನ್ ಸಾಂಗಲ್ಯಾ ಸಾರ್ಕೆ ಜುಜೆನ್ ಅಪ್ಲ್ಯಾ ಬಾಬಾಕ್ ಅನಿ ಭಾವಾಕ್ನಿ ರಾವ್ಕ್ ಜಾಗೊ ನೆಮ್ಸುನ್ ತ್ಯಾತುರ್ಬಿ ಬರೊ ಹೊತ್ತೊ ರಾಮ್ಸೆಸ್ ಜಾಗ್ಯಾರ್ ಆಸ್ತಿ ದಿಲ್ಯಾನ್. 12 ಬಾಬಾಕ್ ಅನಿ ತೆಚ್ಯಾ ಘರಾಚ್ಯಾ ಸಗ್ಳ್ಯಾಕ್ನಿಬಿ ತೆಂಚ್ಯಾ ತೆಂಚ್ಯಾ ಕುಟ್ಮಾಂಚ್ಯಾ ಪರ್ಕಾರ್ ತೆಂಕಾ ಜೆವ್ನಾಕ್ ದಿವ್ನ್ ಬಾಳಗ್ಲ್ಯಾನ್.

13 ದೆಶ್ಯಾತ್ ಖೈಬಿ ಜೆವ್ನಾಕ್ ಗಾಯ್ನಸಲೊ ತವ್ಡೊ ಲೈ ವೈಟ್ ಬರ್‍ಗಾಲ್ ಹೊತ್ತೊ, ಅಸೆ ಹೊವ್ನ್ ಕಾನಾನ್ ಅನಿ ಇಜಿಪ್ತತ್ ದೆಶಾಚ್ಯಾಕ್ನಿ ಜೆವ್ನಾಕ್ ಗಾವ್ಕ್ ನಾ. 14 ಜುಜೆನ್ ಇಜಿಪ್ತ್ ದೆಶ್ಯಾಚ್ಯಾಕ್ನಿ ಅನಿ ಕಾನಾನ್ ಗಾಂವ್ಚ್ಯಾಕ್ನಿ ಜೆವ್ನಾಕ್ ಪಾಜೆ ಹೊಲ್ಲೆ ಇಕಾತ್ ದಿವ್ನ್ ಪೈಸೆ ಹಾನುನ್ ಪರೊಹಾಚ್ಯಾ ಘರಾಕ್ ದಿಲ್ಯಾನ್. 15 ಇಜಿಪ್ತಾಚ್ಯಾಂಚೆ ತೆನಿ ಕಾನಾನಾಚ್ಯಾಂಚೆ ಪೈಸೆ ಸರುನ್ ಗೆಲ್ಲ್ಯಾ ತನ್ನಾ ಐಗುಪ್ತಾಚ್ಯಾನಿ ಜುಜೆಕ್ಡೆ ಯೆವ್ನ್, "ಅಮ್ಚೆ ಪೈಸೆ ಸರ್ಲೆ ತಿಯಾ ನ್ಯಾಯಾನುಚ್ ಅಮ್ಕಾ ಜೆವ್ನಾಕ್ ದಿವ್ಚೊ ಅಮ್ಕಾ ಮರುಕ್ ಸೊಡುನಕ್ಕೊ" ಮಟ್ಲ್ಯಾನಿ. 16 ಜುಜೆನ್ ತೆಂಕಾ "ಪೈಸೆ ನಸ್ಲ್ಯಾರ್ ತುಮ್ಚಿ ಜನಾವರಾ ಹಾನುನ್ ದಿವಾ ತಿ ಘೆವ್ನ್ ತುಮ್ಕಾ ಜೆವ್ನಾಕ್ ದಿತಾ" ಮಟ್ಲ್ಯಾನ್, 17 ತೆನಿ ಅಪ್ಲಿ ಬಕ್ರಿ ಗೊರಾ, ಗಾಡ್ವಾ, ಘೊಡೆ ಅನಿ ಶೆಳಿಯಾ ಹೆ ಸಗ್ಳೆ ತೆಂಚ್ಯಾಕ್ನಾ ಜುಜೆನ್ ಘೆವ್ನ್ ತೆಂಕಾ ಜೆವ್ನಾಕ್ ದಿಲ್ಯಾನ್.

18 ತೊ ವರಿಸ್ಬಿ ಕಳ್ದುನ್ ತಿನ್ವೆಚ್ಯಾ ವರ್ಸಾತ್ ತೆನಿ ಜುಜೆಕ್ಡೆ ಯೆವ್ನ್, ಅಮ್ಚಿ ಜನಾವರಾ ಯಜ್ಮಾನಾಚೊ ವಾಟೊ ಹೊಲಿ ಅನಿ ಪೈಸೆಬಿ ಸರ್ಲೆ ಅತ್ತಾ ಅಮ್ಚೆ ಜಾಗೆ ಅನಿ ಆಂಗಾ ತವ್ಡಿಚ್ ಹುರ್ಲಿ ಮನುನ್ ಅಮ್ಚ್ಯಾ ಯಜ್ಮಾನಾಕ್ ನಿಪ್ವುನ್ ಥೈನಸ್ತಾನಾ ಸಾಂಗ್ತಲೆ ಹೊಲೆ, 19 ಅಮಿ ಉಪ್ಪಾಸಿ ಮರ್ತಲೆ ಅನಿ ಅಮ್ಚೆ ಜಾಗೆ ಹಾಳ್ ಪಡುನ್ ರ್‍ಹಾತಲ್ಯಾ ವಾಟ್ಯಾಕ್ ಅಮ್ಕಾ ಅನಿ ಅಮ್ಚ್ಯಾ ಜಾಗ್ಯಾಕ್ನಿ ಪರೊಹಾಕ್ ದಿವ್ನ್ ತೆಕಾ ಗುಲಾಮಾ ಹೊವ್ನ್ ರ್‍ಹಾತಾಂವ್, ಅಮಿ ಮರಿನಸ್ತಾನಾ ಜಿವಾನಿ ರಾವ್ಕ್ ಅನಿ ಜಾಗೆ ಹಾಳ್ ಪಡಿನಸ್ತಾನಾ ರಾವ್ಕ್ ಅಮ್ಕಾ ಜೆವ್ನಾಕ್ ದಿ, ಅನಿ ಫಿರುಕ್ ಬ್ಹಿಯಾ ದಿವ್ಚೆ ಮಟ್ಲ್ಯಾನಿ. 20 ಜುಜೆನ್ ಇಜಿಪ್ತಾತ್ಲಿ ಫುರಾ ಜಮಿನ್ ಇಕಾತ್ ಘೆವ್ನ್ ಪರೊಹಾಚ್ಯಾ ತಾಬೆತ್ ದಿಲ್ಯಾನ್, ಬರ್‍ಗಾಲ್ ಹೊತ್ತ್ಯಾ ಸಾಟ್ನಿ ಸಗ್ಳ್ಯಾನಿಬಿ ಅಪ್ಲಿ ಅಪ್ಲಿ ಸೆತಾ ಇಕಾತ್ ದಿಲ್ಯಾನಿ ಅಸೆ ಪಿಕ್ ಕಾಡುಕ್ ಹೊತಲಿ ಫುರಾಜಿಮಿನ್ ಪರೊಹಾಚೊ ವಾಟೊ ಹೊಲಿ, 21 ಜುಜೆನ್ ಇಜಿಪ್ತಾತ್ ಎಕ್ ತುದಿಚ್ಯಾನ್ ಅನಿ ಎಕ್ ತುದಿಪತರ್ಬಿ ಲೊಕಾಕ್ನಿ ಫುರಾ ಪರೊಹಾಕ್ ಗುಲಾಮಾ ಕರ್ಲ್ಯಾನ್. 22 ಯಾಜಕಾಂಚಿ ಜಿಮಿನ್ ಮಾತ್ರಾ ಘೆವ್ಕ್ನಾ ತೆಂಕಾ ಪರೊಹಾಕ್ನಾ ಮಜತಿಚೆ ಪೈಸೆ ಗಾವ್ತಲ್ಯಾ ಪೈಸ್ಯಾನಿ ತೆನಿ ಜೆವ್ನಾಕ್ ಪಾಜೆಹೊಲ್ಲೆ ಘೆಟ್ಲ್ಯಾನಿ. 23 ತನ್ನಾ ಜುಜೆನ್ ತೆಂಕಾ, ಆಯ್ಕಾ, ಅಜ್ ಮಿಯಾ ತುಮ್ಚಿ ಜಿಮಿನ್ ಪರೊಹಾಸಾಟ್ನಿ ಇಕಾತ್ ಘೆಟ್ಲಾ, ತುಮ್ಕಾ ಬ್ಹಿಯಾ ದಿತಾ ಪೆರಾ, 24 ಕಾತ್ರನಿಚ್ಯಾ ಎಳಾರ್ ಪಾಂಚಾತ್ಲೊ ಎಕ್ ಭಾಗ್ ಪರೊಹಾಕ್ ದಿವ್ಚೆ, ಹುರಲ್ಲೆ ತುಮ್ಕಾ ಅನಿ ತುಮ್ಚ್ಯಾ ಕುಟ್ಮಾಚ್ಯಾ, ಪೊರಾಕ್ನಿ ಅನಿ ಲೊಕಾಂಚ್ಯಾ ಸಾಟ್ನಿ ಜೆವ್ನಾಕ್ ಥವ್ನ್ ಘೆವಾ, ಮಟ್ಲ್ಯಾನ್. 25 ತನ್ನಾ ತೆನಿ ತಿಯಾ ಅಮ್ಚಿ ಜಿವಾ ರಾಕ್ಲ್ಯಾಸಿ, ತುಜಿ ದಯಾ ಅಮ್ಚೆ ವರ್‍ತಿ ರಾಂವ್ದಿತ್ ತಿಯಾ ಅಮ್ಚೊ ಯೆಜ್ಮಾನ್, ಅಮಿ ಪರೊಹಾಕ್ ಗುಲಾಮಾ ಹೊವ್ನ್ ರ್‍ಹಾತಾಂವ್ ಮಟ್ಲ್ಯಾನಿ. 26 ಜುಜೆನ್ ಇಜಿಪ್ತ್ ದೆಶ್ಯಾಚೆ ಖಾಯ್ದೊ ಹೊವ್ನ್ ಪಿಕೆತ್ ಪಾಂಚಾತ್ಲೊ ಎಕ್ ಭಾಗ್ ಪರೊಹಾಕ್ ಪಾವ್ಚೆ ಮನುನ್ ಕರ್ಲ್ಯಾನ್, ಆಜ್ ಪತರ್ಬಿ ಹ್ಯೊ ಖಾಯ್ದೊ ಚಾಲ್ತಿ ಹಾಯ್, ಯಾಜಕಾಂಚಿ ಜಿಮಿನ್ ಪರೊಹಾಚ್ಯಾ ವಾಟ್ಯಾಕ್ ಜಾವ್ಕ್ನಾ.

27 ಇಜ್ರಾಯೆಲ್ ಲೊಕಾನಿ ಇಜಿಪ್ತಾಚ್ಯಾ ಗೊಶೆನ್ ಪ್ರಾಂತ್ಯಾತ್ ವಸ್ತಿ ರಾಲ್ಯಾನಿ, ತೆನಿ ಆಸ್ತಿ ಕರುನ್ ಲೈ ಸಾವ್ಕಾರಾ ಹೊಲ್ಯಾನಿ ಅನಿ ತೆಂಕಾ ಲೈ ಪೊರಾಬಾಳಾ ಹೊಲಿ. 28 ಇಜ್ರಾಯೆಲ್ ಇಜಿಪ್ತಾತ್ ಸತ್ರಾ ವರಿಸ್ ರಾಲೊ, ತೆ ಒಟ್ಟು ಝಿತ್ತೊ ಹೊತ್ತಿ ವರ್ಸಾ ಎಕ್ಸೆ ಚಾಳಿಸಾರ್ ಸಾತ್. 29 ಜಾಕೊಬಾಕ್ ಮರ್ತಲೊ ಎಳ್ ಜಗ್ಗೊಳ್ ಯೆಲ್ಲ್ಯಾ ತನ್ನಾ ತೆನಿ ಅಪ್ಲೊ ಲೆಕ್ ಜುಜೆಕ್ ಬಲ್ವುಕ್ ಲಾವ್ನ್, ತುಕಾ ಮಾಜೆವರ್‍ತಿ ಪ್ರೆಮ್ ಹೊತ್ತೆ ಹೊಯ್ ಜಾಲ್ಯಾರ್, ಮಾಜ್ಯಾ ಜಾಂಗೆಚ್ಯಾ ಬುಡಿ ಹಾತ್ ಥವ್ನ್ ಆನ್ ಕರುನ್, ಮಿಯಾ ಸಾಂಗ್ತಲಿ ಗೊಸ್ಟಿಯಾ ಪ್ರೆಮಾನ್ ಅನಿ ಖರೆಪಾನಾನ್ ಚಾಲ್ವುನ್ ದಿವ್ಚೆ, ತೆ ಕಾಯ್ ಮಟ್ಲ್ಯಾರ್; ಮಾಕಾ ಐಗುಪ್ತಾತ್ ಮಾಟಿ ದಿವ್ ನಕ್ಕೊ, 30 ಮಿಯಾ ಮರಲ್ಲ್ಯಾ ತನ್ನಾ ಮಾಜೆ ಮ್ಹಡೆ ಹ್ಯಾ ದೆಶ್ಯಾತ್ನಾ ನ್ಹೆವ್ನ್ ಮಾಜ್ಯಾ ಪುರ್ವಜಾಂಚ್ಯಾ ಸಮಾದಿಕ್ಡೆಚ್ ಸಮಾದಿ ಕರುಚೆ,

ತಸೆಚ್ ಕರ್ತಾ ಮನುನ್ ಮಾಜ್ಯಾ ಜಾಂಗೆಚ್ಯಾ ಬುಡಿ ಹಾತ್ ಥವ್ನ್ ಗೊಸ್ಟ್ ದಿ ಮನುನ್ ಸಾಂಗ್ಲ್ಯಾನ್, ತೆನಿಬಿ ತಸೆಚ್ ಗೊಸ್ಟ್ ದಿಲ್ಯಾನ್.

31 ತನ್ನಾ ಜಾಕೊಬಾನ್, ತ್ಯಾ ಹಾತ್ರಾನಾತ್ ಟಕ್ಲ್ಯಾಚ್ಯಾ ಭಾಜುಕ್ ಬಾಗುನ್ ದೆವಾಕ್ ಸ್ತುತಿ ಕರ್ಲ್ಯಾನ್.