ಉತ್ಪತ್ತಿ 33

ಜಾಕೊಬ್ ಎಸಾವಾಕ್ ಭೆಟ್ತಲೆ

1 ಜಾಕೊನ್ ಅಪ್ಲೆ ಡೊಳ್ಯಾನಿ ಬಗ್ತಾನಾ, ಎಸಾವ್ ಚಾರ್ಸೆ ಘೊವ್ಮಾನ್ಸಾಂಚ್ಯಾ ವಾಂಗ್ಡಾ ಯೆತಲೆ ಬಗ್ಲ್ಯಾನ್, ಅಪ್ನಾಚ್ಯಾ ಪೊರಾಕ್ನಿ ಅನಿ ಲೆಯಾಕ್ ಅನಿ ರಾಖೆಲಾಕ್ ಅನಿ ದೊನ್ ದಾಸಿಯಾಕ್ನಿ ಅನಿ ತೆಂಚ್ಯಾ ಪೊರಾಕ್ನಿ ದೊನ್ ವಾಟೆ ಕರುನ್ ಎಗ್ಳ್ಯಾನ್. 2 ಮಾನಾ ಜಾಕೊಬಾನ್ ಸೆವಕಿಯಾಕ್ನಿ ಅನಿ ತೆಂಚ್ಯಾ ಪೊರಾಕ್ನಿ ಅದ್ದಿ ಇಬೆ ಕರುನ್, ಮಾನಾ ಲೆಯಾಕ್ ಅನಿ ತಿಚ್ಯಾ ಪೊರಾಕ್ನಿ ತೆಚ್ಯಾ ಮಾನಾ, ರಾಖೆಲ್ ಅನಿ ಜೊಸೆಪಾಕ್ ಆಕ್ರಿಚ್ಯಾ ಜಾಗ್ಯಾರ್ ಇಬೆ ಕರ್ಲ್ಯಾನ್. 3 ಮಾನಾ ಜಾಕೊಬ್ ಫಿಡೆ ಯೆವ್ನ್ ಸಾತ್ ದಾ ಜಿಮ್ನಿಕ್ ಟಕ್ಲೆ ಲಾವ್ನ್ ಅಪ್ಲ್ಯಾ ಭಾವಾಕ್ ನಮಸ್ಕಾರ್ ಕರ್ಲ್ಯಾನ್. 4 ತನ್ನಾ ಜಾಕೊಬಾಕ್ ಎಸಾವಾನ್ ಬಗುನ್, ಪಳುನ್ ಯೆವ್ನ್ ದೊನಿ ಹಾತಿನ್ ಯಾಂಗ್ ಮಾರುನ್ ತೆಚ್ಯಾ ಮಾನೆಕ್ ಉಪ್ಪಾ ದಿಲ್ಯಾನ್, ಅನಿ ತೆನಿ ದೊಗೆಬಿ ರಡ್ಲ್ಯಾನಿ. 5 ಮಾನಾ ಎಸಾವಾನ್ ಬಗ್ತಾನಾ ತುಜ್ಯಾ ವಾಂಗ್ಡಾ ಹೊತ್ತಿ ಹಿ ಪೊರಾ ಅನಿ ಬಾಯ್ಕಾ ಕೊನ್? ಮಟ್ಲ್ಯಾನ್,

ತನ್ನಾ ಜಾಕೊಬಾನ್ "ದೆವ್ ಮಾಜ್ಯಾ ವಾಂಗ್ಡಾ ರ್‍ಹಾವ್ನ್ ಮಾಕಾ ದಿಲ್ಲಿ ಪೊರಾ ಹಿ" ಮಟ್ಲ್ಯಾನ್. 6 ಮಾನಾ ಸೆವಕಿಯಾ ಅನಿ ಪೊರಾ ಯೆವ್ನ್ ಡಬ್ ಪಡುನ್ ನಮಸ್ಕಾರ್ ಕರ್ಲ್ಯಾನಿ. 7 ಮಾನಾ ಲೆಯಾ ಅನಿ ತಿಚಿ ಪೊರಾ ಯೆವ್ನ್ ನಮಸ್ಕಾರ್ ಕರ್ಲ್ಯಾನಿ, ಆಕ್ರಿಕ್ ಜೊಸೆಪ್ ಅನಿ ರಾಖೆಲ್ ಯೆವ್ನ್ ತೆಕಾ ನಮಸ್ಕಾರ್ ಕರ್ಲ್ಯಾನಿ.

8 ತನ್ನಾ ಮಾನಾ ಎಸಾವಾನ್, "ಮಿಯಾ ವಾಟೆರ್ ಯೆತಾನಾ ಲೊಕಾಕ್ನಿ ಬಗ್ಲೊ ತೆನಿ ಕೊನ್ ? ಅನಿ ತಿ ಸಗ್ಳಿ ಜನಾವಾರಾ ಕಶ್ಯಾಕ್ ?" ಮಟ್ಲ್ಯಾನ್, ತನ್ನಾ ಜಾಕೊಬಾನ್, "ತಿಯಾ ಮಾಕಾ ಸ್ವಿಕಾರ್ ಕರುಂದಿತ್ ಮನುನ್ ಹೆ ಮಿಯಾ ತುಕಾ ಆಯಾರಾ ದಿಲೊ" ಮಟ್ಲ್ಯಾನ್.

9 ತನ್ನಾ ಎಸಾವಾನ್; "ಭಾವಾ, ಮಾಜ್ಯಾಕ್ಡೆ ಪಾಜೆ ತವ್ಡಿ ಆಸ್ತಿ ಹಾಯ್; ತುಜೆ ತುಕಾಚ್ ರಾವ್ನಂದಿತ್" ಮಟ್ಲ್ಯಾನ್.

10 ತನ್ನಾ ಜಾಕೊಬಾನ್, ತಸೆ ಮನುನಕ್ಕೊ, ತಿಯಾ ಮಾಜ್ಯಾ ವರ್‍ತಿ ದಯಾ ದಾಕ್ವುನ್ ಹಿ ಆಯಾರಾ ಘೆವ್ಚೊ, ಅನಿ ತಿಯಾ ಮಾಕಾ ಪ್ರೆಮಾನ್ ಸ್ವಿಕಾರ್ ಕರ್‍ಲೆ, ಅನಿ ತುಚೆ ತೊಂಡ್ ಬಗ್ತಾನಾ ದೆವಾಚಿ ತೊಂಡ್ ಬಗಲ್ಯಾ ಸಾರ್ಕೆ ಹೊಲೆ, 11 ದೆವಾನ್ ಮಾಕಾ ಕಾಯ್ ಪಾಜೆ ತೆ ದಿಲಾ ತಿಯಾ ದಯಾ ಕರುನ್ ಮಿಯಾ ತುಜ್ಯಾ ಸಾಟ್ನಿ ಮನುನ್ ಹಾನಲ್ಲೆ ಘೆ ಮನುನ್ ಒತ್ತಾಯ್ ಕರ್ತಾನಾ ಇಸಾವಾನ್ ಘೆಟ್ಲ್ಯಾನ್.

12 ಮಾನಾ ಎಸಾವಾನ್ ತೆಕಾ, "ತುಜೊ ಪ್ರಯಾನ್ ಫಿಡೆ ಜಾಂವ್ದಿತ್ ಅಮಿ ತುಚ್ಯಾ ವಾಂಗ್ಡಾ ಯೆತಾಂವ್" ಮಟ್ಲ್ಯಾನ್.

13 ತನ್ನಾ ಜಾಕೊಬಾನ್ ತೆಕಾ, "ಮಾಜಿ ಪೊರಾ ಬಾಳಾ ಲೈ ಬಾರಿಕ್ ಹಾತ್ ಅನಿ ಜನಾವಾರಾಂಚೆ ಪೆಟೆಬಿ ಬಾರಿಕ್ ಹಾತ್ ತೆಂಕಾ ಮಿಯಾ ಎಕ್ ದಿಸ್ ಪತರ್ ಚಲಸ್ಲ್ಯಾರ್ ತೆ ಮರುನ್ ಜಾತಾತ್ ಮಟ್ಲ್ಯಾನ್. 14 ತನ್ನಾ ತಿಯಾ ಫಿಡೆ ಜಾ, ಮಿಯಾ ಫಾಟ್ನಾ ಮಾಜ್ಯಾ ಪೊರಾಕ್ನಿ ಅನಿ ಜನಾವಾರಾಂಚ್ಯಾ ಪೆಟ್ಯಾಕ್ನಿ ಕಾಯ್ಬಿ ತರಾಸ್ ಹೊಯ್ನಾ ಸಾರ್ಕೆ ಕರುನ್ ಆರಾಮಾನ್ ಯೆವ್ನ್ ಮಿಯಾ ತುಕಾ ಸೆರಿಯಿ ಮನ್ತಲ್ಯಾ ಗಾಂವಾತ್ ಭೆಟ್ತಾ" ಮಟ್ಲ್ಯಾನ್.

15 ತನ್ನಾ ಎಸಾವಾನ್, ತೆಕಾ "ಮಾಜ್ಯಾ ಉಲ್ಲ್ಯಾ ಸೆವಕಾಕ್ನಿ ತುಜ್ಯಾ ವಾಂಗ್ಡಾ ಸೊಡುನ್ ಜಾತಾ" ಮಟ್ಲ್ಯಾನ್ ಖರೆ ಜಾಕೊಬಾನ್ ತೆಕಾ; "ನಕ್ಕೊ" ತುಮ್ಚಿ ದಯಾ ಅಮ್ಚಾ ವರ್‍ತಿ ರಾಲ್ಯಾರ್ ಫಿರೆ ಮನುನ್ ಜಬಾಬ್ ದಿಲ್ಯಾನ್. 16 ತನ್ನಾ ಎಸಾವಾನ್ ತ್ಯಾ ದಿಸಿ ಸೆಯಿರಾಕ್ ಪಾಟಿ ಪರ್‍ತುನ್ ಗೆಲೊ. 17 ಖರೆ ಜಾಕೊಬ್ ಸುಕ್ಕೊತಿ ಮನ್ತಲ್ಯಾ ಗಾಂವಾಕ್ ಜಾವ್ನ್ ಅಪ್ನಾ ಸಾಟ್ನಿ ಎಕ್ ಝೊಪ್ಡೆ ಅನಿ ಜನಾವಾರಾಂಚ್ಯಾ ಸಾಟ್ನಿ ಎಕ್ ಗೊಟೊ ಭಾಂದ್ಲ್ಯಾನ್, ತೆಚ್ಯಾ ವೈನಾ ತ್ಯಾ ಜಾಗ್ಯಾಕ್ "ಸುಕ್ಕೊತ್" ಮನುನ್ ನಾವ್ ಯೆಲೆ.

18 ಮಾನಾ ಜಾಕೊಬ್ ಪದ್ದನ್ ಆರಾಮಿಕ್ನಾ ಕಾನಾನ್ ದೆಶಾಚ್ಯಾ ಶೆಕೆಮ್ ಶಾರಾಕ್ ಯೆವ್ನ್ ತ್ಯಾ ಶಾರಾಚ್ಯಾ ಇದ್ರಾಕ್ ಎಕ್ ಸೆತಾತ್ ಝೊಪ್ಡೆ ಭಾಂದ್ಲ್ಯಾನ್. 19 ತೆನಿ ಶೆಕೆಮಾಚೊ ಬಾಬಾ ಹಾಮೊರಾಚ್ಯಾ ಪಿಳ್ಗಿಂಚ್ಯಾಕ್ನಾ ಸೆಂಬರ್ ಚಾಂದಿಚೆ ಪೈಸೆ ದಿವ್ನ್ ಸೆತ್ ಇಕಾತ್ ಘೆಟಲ್ಯಾನ್. 20 ಅನಿ ಸರ್ವೆಸ್ಪರ್ ದೆವಾಕ್ ಆರಾದನ್ ಕರುಕ್ ಮನುನ್ ಎಕ್ ಬಲಿ ಭೆಟ್ವುತಲೊ ಕಟ್ಟೊ ಭಾಂದುನ್ ತ್ಯಾ ಜಾಗ್ಯಾಕ್ "ಎಲ್ ಎಲೊಹಿ ಇಜ್ರಾಯೆಲ್" ಮನುನ್ ನಾವ್ ಥವ್ಲ್ಯಾನ್.