1 Ngoaa koso, odikyɛ bɛkɔ so bɛfa nidie bɔ ɔfata bɛma bɛ wuramɔ, ná wamma mmenia angẽka Nyameɛ dumaa ne ye ngyerɛkyerɛ nanwo dwirɛ tɛɛ biala. 2 Ná ngoaa bɔ bɛ wuramɔ te gyidifoɛ ne, nnɛmaa bɛfa ye kyɛ bɛte gyidifoɛ nati, bɛbu bɛ animtia. Mmom, odikyɛ bɛyere bɛ nwo bɛsõ bɛ yé, ofikyɛ bɛbɔ benya bɛ soen pa naso mvasoɛ ne te gyidifoɛ ne aliemaa mɔ.* Kɔ so kyirekyire sɔ nningyein hemɔ, na fa ye nwo afutuo ma.

3 Ebiala bɔ okyirekyire ngyerɛkyerɛ foforɛ, ná onne edwirɛ pa bɔ ofi y’Awurade Yesu Kristo berɛ anaa ngyerɛkyerɛ bɔ ɔne nyamesom pa yia ne ndonu ne, 4 wama ye nwo so, na ɔnde hwee bo. Na aporowaa ne edwirɛ nwo manzoin ali ye ti; na bɔ ofi nu ba yeɛ ole anyeborolɛ, mbakye-mbakye-muɛ, dumaa sɛkyelɛ, mmenia nwo adwemmɔne, 5 ɔne manzoin bɔ ɔkɔ so wɔ bɛ bɔ b’adwene asɛkye na bɛnde nahorɛ ne bo kõ ne afia ne. B’adwene yɛ bɛ kyɛ, bɛfa nyamesom pa bɛpena mvasoɛ.

6 Bɔ ɔte yeɛ ole kyɛ, sɛ ebie yɛ bɔ Nyameɛ kuro, na ɔmaa ye nye sɔ bɔ ole ye a, mvasoɛ wɔ so paa. 7 Ofikyɛ yamva hwee yamma wiase, na yɛngɔfa hwee yɛngɔfi nu yɛngɔhɔ. 8 Yeti, sɛ yɛle bɔ yɛkoli, ne bɔ yɛkowura a, odikyɛ yɛmaa yɛ nye sɔ ɛhene ala. 9 Bɛ bɔ bɛ nye aboro, ná bɛpena kyɛ bɛyɛ asikafoɛ ne, bɛtɔ nzɔhwɛ, ngaen, ɔne ngwasea akɔnnɔ pee bɔ opira sona nu; na ɛhene yeɛ ɔsɛkye bɛ koraa ne. 10 Na bɔne mukoraati ndii yeɛ ole sikaa anyeborolɛ. Na ɛhene yeɛ ebiemɔ ali ye si maa yeti, bahwe bɛ nwo bafi gyidie nanwo, na bafa ɔhaw pee bawa bɛ nwo so ne.

11 Nakoso, wɔ, Nyameɛ sona de, nwati fi ɛhemɔ nwo. Na yere wɔ nwo di tenenee, nyamesom pa, gyidie, ɔdɔ, animia, ne nningyein bɔ ɔkɔmaa ɛkɔdwo si. 12 Kõ gyidie koɛ pa ne; ná daa ngoa bɔ yeti bɛfrɛle wɔ, na ɛhane ye nwo dwirɛ wɔ adanzefoɛ pee nyunu ne, sɔ nu serɛ-serɛ. 13 Ngyi Nyameɛ bɔ ɔma nningyein mukoraati ngoa, ɔne Yesu Kristo, adanzeniɛ bɔ ogyinane Pontio Pilato nyunu lili ye adanzeɛ wɔ badwanu kama-kama ne nyunu mehyɛ wɔ kyɛ, 14 di sɔ ahyɛdeɛ hemɔ so, na nnɛmaa efiɛ ne ngekayɛɛ biala ba wɔ nwo, kodwu kyɛ bɛkɔla y’Awurade Yesu Kristo ali. 15 Na sɛ mmerɛ ne so a, Ɛdangama komapɛ twen bɔ ole anigye ne kɔla ye ali. Ye yeɛ ɔte ahemvo nu Hene, ne awura mɔ nu Awurade ne; 16 ye ngome yeɛ onwu lle, na ɔte kanea bɔ ebiala ngora mbingye ye nu, bɔ ebiala nwuni ye lle, na ebiala ngɔhora ngonwu ye ɔ. Ye yeɛ nidie ne daa tumi te ye deɛ ɔ. Amen.

17 Tu bɛbɔ bɛ te asikafoɛ wɔ sɔ wiase he anu ne fo kyɛ, nnɛmaa bɛma bɛ nwo so, na nnɛmaa bɛfa bɛ nye bɛto b’ahonyadeɛ bɔ ɔndena berɛ ngyɛ naso. Mmom bɛfa bɛ nye bɛto Nyameɛ, bɔ ɔmaa yɛ sa ka nningyein bɔ yɛhia maa obu so naso. 18 Ka kyire bɛ kyɛ bɛyɛ pa, bɛyɛ asikafoɛ wɔ nyumaa pa nu, bɛbukye bɛ sa nu, na bɛhyɛ nikye, 19 sɛ bɛyɛ sɔ a, né bɛto fapem pa besie yé bɛma kyẽabie. Ɛhe kɔmaa bɛkɔsɔ ngoa paa* nanu yé.

20 Timoteo, bɔ bafa bawura wɔ sa ne, bɔ ye nwo waen, twe wɔ nwo fi dwudwolɛ bɔ mvasoɛ nne so bɔ otia bɔ ɔte krongron nanwo, na twe wɔ nwo fi edwirɛ bɔ ɔtte nahorɛ bɔ bɛfrɛ ye "nimdeɛ" nanwo. 21 Ɛhe yeɛ ebiemɔ fa hoahoa bɛ nwo, bɔ wamaa bahwe bɛ nwo bafi gyidie nanwo ne.

Adom ha ɛmɔ.