1 Aliemaa mɔ, ɛhe te krataa bɔ ɔtɔ so nyɔ bɔ metworɔ mebrɛ ɛmɔ ɔ. Na kyɛbɔ nyɛle ye wɔ bɔ oli moa nanu ne, mefa mekaye-kaye ɛmɔ, na metwe ɛmɔ adwene mesie edwirɛ so, 2 ná wamaa ɛmɔ akaye edwirɛ bɔ adiifoɛ bɔ bɛte krongron nemɔ hane,* ɔne ahyɛdeɛ bɔ Awurade ne Agyenkwa nate asomafoɛ naso hane ne. 3 Ɛmɔli moa bɛkaye ɛhe, awieɛ mmerɛ nanu ne, bɛbɔ bɛka ayinga koli b’akɔnnɔ si kɔgoro ɛmɔ nwo. 4 Bɛkɔha kyɛ: "Bɛhyɛle bɔ kyɛ ɔba, na ɔwɔ ni? Ofi mmerɛ bɔ yɛ nana mɔ wuli ne, kyɛbɔ nningyein te fi mmerɛ bɔ bɛbɔle aseɛ ne, sɔ ala yeɛ ɔte ɔ." 5 Nakoso bahyɛ da babu bɛ nye bagua nahorɛ dwirɛ he aso kyɛ, ofi teteete ne, né anwuro wɔ berɛ, na Nyameɛ noa dwirɛ ti aseɛ fili nzue nanu wale, na nzue apɛ ye nwo ayia; 6 na ɔnate so ala yeɛ nzue yi sɛkyele wiase bɔ né ɔwɔ berɛ sɔ mmerɛ ne. 7 Na sɔ dwirɛ komapɛ nala so yeɛ wasiesie anwuro ne aseɛ bɔ ɔwɔ berɛ ne wama see, na ɔfa nwondɛ kyẽa bɔ okobu atɛn na wasɛkye abɔnefoɛ ne.

8 Aliemaa mɔ, nnɛmaa ɛmɔ wora fi ɛhe, Awurade nye so de, ɛlɛho te kyɛ afoɛ 1,000, na afoɛ 1,000 koso te kyɛ ɛlɛho. 9 Awurade ngyɛ ye bɔhyɛ nwo, kyɛbɔ ebiemɔ adwene yɛ bɛ kyɛ wahyɛ ne, mmom wanya ɛmɔ nwo aboterɛ, ofikyɛ onguro kyɛ sona biala kɔsɛkye, bɔ okuro yeɛ ole kyɛ ebiala kɔsakra y’adwene. 10 Awurade kyẽa ne kɔwa te kyɛ awieniɛ, na enu yeɛ anwuro kɔbobɔ nu kuru-dudu kɔpɛ nu, ná nningyein bɔ wayɛ hye paa ne kohuro, na aseɛ ne, ɔne enu nningyein bɔ wafea namukoraati nwo kɔla berɛ.

11 Ɔnate kyɛ ɛhe amukoraati kɔsɛkye nati, mmenia beni yeɛ odikyɛ ɛmɔyɛ ɔ? Odikyɛ ɛmɔma ɛmɔ abrabɔ nwo te, na ɛmɔfa nyamesom pa bɛtena ase, 12 mmerɛ bɔ ɛmɔ nwondɛ, na ɛmɔma Awurade kyẽa ne ba ndɛ wɔ ɛmɔ adwene nu ne. Sɔ kyẽa ne, see kɔtɔ anwuro nu kɔyera ye, na nningyein bɔ ɔwɔ nu namukoraati kohuro. 13 Na kyɛbɔ wahyɛ bɔ ne, yɛnwondɛ anwuro foforɛ ne aseɛ foforɛ, na ɛhene anu yeɛ tenenee kɔtena ɔ.

14 Ye de, aliemaa mɔ, ɔnate kyɛ ɛmɔ nwondɛ ɛhemɔ nati, ɛmɔyɛ bɔ ɛmɔ kɔhora biala maa onwu ɛmɔ kyɛ mmenia bɔ dɛm ne ngekayɛɛ biala nne ɛmɔ nwo, bɔ ɛmɔte asomdwie nu ɔ. 15 Afei koso, ɛmɔnwu ye kyɛ, aboterɛ bɔ Awurade anya ye ne kɔmaa yekonya ngoa, na sɔ ala yeɛ yɛliema Paul bɔ yɛdɔ ye ne nate nyanza bɔ bafa bama ye naso hworɔ brɛle ɛmɔ ne. 16 Ɔhane ɛhemɔ nwo dwirɛ kyɛbɔ ɔyɛ ye wɔ ye ngrataa namukoraati nu ne. Nakoso ɛyɛ a né ɔyɛ se kyɛ yɛkɔte ye dwirɛ ne biemɔ bo, na ɛhe yeɛ bɛ bɔ bɛssuane hwee, ɔne bɛ bɔ bɛ bo timunne ne kyirekyire nu a, bɛ kyeɛ-kyea ye, kyɛbɔ bɛyɛ Tworɔnzɛm bɔ waha ne, nakoso ɔfa bɛ kɔ sɛkyelɛ nu. 17 Yeti aliemaa mɔ, ɛmɔse ɛhe dada, yeti ɛmɔnea yé, ná mvomsoɛ bɔ mmeratofoɛ ne yɛ ne anlaka-laka ɛmɔ, na mmerɛ bɔ ɛmɔ bo atimu ne, ɛmɔ amvi ase. 18 Na mmom ɛmɔhɔ so benyi wɔ y’Awurade ne y’Agyenkwa Yesu Kristo adom ne nimdeɛ nu, Ye yeɛ anuonyam ha ye ɛnɛ, ɔne daa.

Amen.