1 Yesu fí asɔre awuro berɛ kɔ ne, ye asuafoɛ nemɔ wale ye berɛ kyɛ bɛbaahyire ye sua ahoroɛ bɔ ɔwɔ asɔre awuro berɛ ne. 2 Yeɛ ɔha hyirele bɛ kyɛ: "Nnaa ɛmɔ anwu ɛhe mukoraati? Nahorɛ, meka mekyire ɛmɔ kyɛ, bɛngɔyakyi nyɔboɛ kõ wɔ nyɔboɛ so; bɛkɔdwiri ye mukoraati bɛkogua ase."

3 Na ɔte Olive Bokaa naso ne, ye asuafoɛ nemɔ wale ye berɛ kodɛɛ, na bɛha bɛhyirele ye kyɛ: "Ka kyire yɛ, mmerɛ beni yeɛ ɛhemɔ kosi ɔ, na nzu yeɛ ɔkɔyɛ wɔ walɛ ne, ɔne wiase ne awieɛ nanwo nzɛngyerɛneɛ ɔ?" 4 Yesu ha hyirele bɛ kyɛ: "Ɛmɔnea yé, na ebiala anlaka-laka ɛmɔ. 5 Ofikyɛ mmeni pee kɔfa me dumaa kɔwa kɔɔha kyɛ, ‘Me yeɛ nne Kristo ne,’ na bɛkɔlaka-laka mmeni pee. 6 Ɛmɔ kɔte koɛ ne koɛ nwo amaneɛbɔ,* nakoso, nnɛmɔ maa ɛmɔ kunu tete ɛmɔ. Odikyɛ nningyein hemɔ sisi, nakoso né awieɛ ne nya walle. 7 Na maen kɔdwɔso kotia maen, ná ahennie adwɔso atia ahennie, na ɛhɔen ne aseɛ wosolɛ kosi nekaa ahoroɛ. 8 Ɛhe mukoraati te aworɛ nu yealɛ né ahyɛaseɛ.

9 "Afei, mmenia kɔteetee ɛmɔ, ná bahu ɛmɔ, na me dumaa ti, maen-maen namukoraati kɔtane ɛmɔ. 10 Ɛhe kɔto mmeni pee sintidua maa bɛkɔye bɛ nwo bɛkɔma, na batane-tane bɛ nwo. 11 Na ngondombo adiifoɛ pee kɔwa, na bɛkɔlaka-laka mmeni pee. 12 Amumuyɛɛ bɔ ɔkɔsone nati, ɔdɔ bɔ mmeni pee le ye ne noa kodwo. 13 Nakoso bɔ okogyina nu koodwu awieɛ ne, ye yeɛ bɛkole ye ngoa ɔ. 14 Na bɛkɔha ahennie nanwo nzɛmba he wɔ wiase mukoraati, maa ɔkɔyɛ adanzeɛ kɔma maen-maen namukoraati, kora né awieɛ ne awa.

15 "Yeti, sɛ ɛmɔnwu akyiwadeɛ bɔ ɔbɔ maen, bɔ diifoɛ Daniel hane ye nwo dwirɛ ne kyɛ ogyi nekaa krongron berɛ a (odikyɛ bɔ ɔkenga ne te ye bo), 16 ɛmɔma bɛ bɔ bɛte Yudea ne nwati hɔ mmokaa so. 17 Bɔ ɔte sua ti afia ne, nnɛmaa odwu ba ase kyɛ ɔbaafa nikye biala fi ye awuro, 18 na bɔ wahɔ fiɛso ne, nnɛmaa ɔba awuro kyɛ ɔbaafa ye atadeɛ. 19 Mmrasua bɔ bɛnwonzɛ, ɔne bɛ bɔ bɛma nyɔfone ne de, bɛ yaakɔ. 20 Ɛmɔbɔ mbaeɛ, ná kyẽa bɔ ɛmɔkɔfa bɛkɔnwati ne anzi ayirɛ mmerɛ, anaa Homeda. 21 Ofikyɛ ahohiehia kandinga bie kɔwa, sɔ ahohiehia ne, ofi mmerɛ bɔ bɛbɔle wiase ne, ebie walle lle, na yesi ne, ebie nngɔwa kõ. 22 Nahorɛ, sɛ bambɛ sɔ ngyẽa naso a, sona-horɛ po nngonya ngoa, nakoso bɛ bɔ baye bɛ nati, bɛkɔpɛ sɔ ngyẽa naso. 23 Sɔ mmerɛ ne, sɛ ebie ka kyire ɛmɔ kyɛ, ‘Nea, Kristo wɔ wa’ anaa ‘Ɔwɔ dɔ’ a, nnɛmɔ dɛ́ bɛdi. 24 Ofikyɛ ngondombo Kristo ne ngondombo adiifoɛ pee kɔwa, na bɛkɔyɛ nzɛngyerɛneɛ pee bɛkɔfa bɛkɔlaka-laka mmenia, na sɛ ɔkɔyɛ yé a, balaka-laka bɛ bɔ baye bɛ ne po. 25 Ɛmɔnea, mali moa maha mahyire ɛmɔ. 26 Yeti, sɛ mmenia ka kyire ɛmɔ kyɛ, ‘Nea, ɔwɔ ɛserɛ so’ a, nnɛmɔ kɔ, na sɛ bɛka kyɛ ‘Ɔwɔ sua nu’ a, nnɛmɔ dɛ́ bɛdi. 27 Ná kyɛbɔ agralaa te yerɛm fi afiteleɛ, na ɔta kodwu atɔleɛ ne, sɔ ala yeɛ Sona Awa ne walɛ ne koso kɔyɛ ɔ. 28 Na nekaa bɔ fuin wɔ ne, ɛberɛ yeɛ mbɛtɛ nemɔ boa bɛ noa ɔ. 29 Ahohiehia ne si pɛɛ ne,

Eyia kɔkakyi awosii,

ɛsraen nngɔta,

nzramaa kɔtete kofi anwuro kogua ase,

na bɛkɔwoso anwuro tumi.

30 Afei, bɛkonwu Sona Awa ne nwo nzɛngyerɛneɛ wɔ anwuro, na aseɛ so mmusuakue mukoraati kɔbɔ awuye. Na bɛkonwu kyɛ Sona Awa ne nate munungum* nu ɔba, bɔ ole tumi ne anuonyam kandinga. 31 Na ɔkɔsoma ye abɔfo maa bɛkɔhu awɛen* bɔ yenoa yɛ se paa bɛkoli ye nyunu, na bɛkɔboɔboa bɛ bɔ baye bɛ ne noa bɛkofi mvrama nná nanu, fi anwuro noa kodwu ye noa.

32 "Afei, ɛmɔsua nikye bie bɛfi borɔdoma bakaa ne berɛ: Sɛ onya fa nyaa a, ɛmɔse kyɛ, ɔngɔhyɛ ne ahuhuro awa. 33 Sɔ ala yeɛ ɛmɔ koso, sɛ ɛmɔnwu ɛhemɔ a, ɛmɔnwu ye kyɛ wadwu anoa ne noa pɛɛ. 34 Nahorɛ, meka mekyire ɛmɔ kyɛ, sɔ aworɛ ndoɔtoasoɛ ne nngɔpɛ nu, sana edwirɛ he amukoraati awa nu kora. 35 Anwuro ne aseɛ kɔpɛ nu, nakoso me dwirɛ ne de, ɔngɔpɛ nu lle.

36 "Kyẽa ne né dɔnhwere ne de, ebiala nze, abɔfo bɔ bɛwɔ anwuro ne Baa ne po nze, Baba ne ngome yeɛ ɔse ɔ. 37 Na kyɛbɔ Nowa ngyẽa ne yɛle ne, sɔ ala yeɛ sona Awa ne walɛ ne koso kɔyɛ ɔ. 38 Sɔ mmerɛ ne, kora bɔ nzuyiri ne ba ne, bɛdidili, bɛnone, mmrienzua gyale, na bɛfale mmrasua bɛmane agyaa tonn oodwuli kyɛ Nowa wurale alaka nanu ɔ. 39 Ná bannwu ye nwo hwee oodwuli kyɛ nzue ne yi fale bɛ mukoraati hɔle ɔ. Sɔ ala yeɛ sona awa ne walɛ ne koso kɔyɛ ɔ. 40 Mmenia nyɔ kɔhɔ fiɛso, bɛkɔfa kõ, na bayakyi kõ. 41 Mmrasua nyɔ kotĩ nikye wɔ nyɔboɛ kõ so, bɛkɔfa kõ, na bayakyi kõ. 42 Yeti, ɛmɔma ɛmɔ nye la berɛ, ofikyɛ ɛmɔnze kyẽa bɔ ɛmɔ Wura ne kɔwa ɔ. 43 Nakoso ɛmɔkaye kyɛ: Sɛ efiewura ne se mmerɛ bɔ awieniɛ ne kɔwa a, ahaa okosi pɛ, kyɛbɔ ɔkɔyɛ a awieniɛ ne ngonya atee ngɔwa ye awuro berɛ ɔ. 44 Ye sɔ nati, ɛmɔ koso, ɛmɔsiesie ɛmɔ nwo besie, ofikyɛ mmerɛ bɔ ɛmɔ nye nne so nanu yeɛ sona Awa ne kɔwa ɔ.

45 "Nwa po yeɛ ole akoaa bɔ odi nahorɛ na ɔse nworɛ* ne? Ye yeɛ ye wura aye ye kyɛ ɔma ye asomvoɛ aleɛ wɔ mmerɛ bɔ ɔsɛ nu ne. 46 Anigye yeɛ ole akoaa bɔ ye wura kɔwa kɔɔto ye kyɛ ogu so ɔyɛ sɔ ne. 47 Nahorɛ, meka mekyire ɛmɔ kyɛ, ɔkɔmaa ɔkɔnea bɔ ole ye namukoraati so. 48 Nakoso sɛ akoaa bɔ ɔttemaye ne ka ye wɔ ye ahone nu kyɛ, ‘Me wura mia, onya walle,’ 49 na ɔhyɛ yebo bo ye mmango ngoaa nemɔ, na ɔne akɔwenzafoɛ didi na bɛno a, 50 ye de, kyẽa bɔ ye nye nne ye nwo so, ɔne dɔnhwere bɔ ɔnnea atee nanu yeɛ ye wura ne koofu ye nu ɔ. 51 Ɔkɔhwe ye so paa,* na wafa ye waboka nyaatwomfoɛ nemɔ so. Ɛberɛ yeɛ okosu kɔnwose ye gye ɔ."