1 Ɛlɛsia si ne, Yesu fale Petro, Yakobo ne oliema Yohane bokale ye nwo so hɔle bokaa tendee bie so. 2 Ɔsesane ye nwo wɔ bɛ nyunu, ye nyunu tale te kyɛ eyia, na ye atadeɛ ne tale hyireinn te kyɛ kanea. 3 Na Mose ne Elia yele bɛ nwo ali wɔ berɛ, na né bɛne ye bɔ ngɔmmɔ. 4 Yeɛ Petro ha hyirele Yesu kyɛ: "Awurade, ɔte pa paa kyɛ yɛwɔ wa ɔ. Sɛ ɛkuro a, ngosi tɛnt nza wɔ wa, wɔ deɛ kõ, Mose deɛ kõ, yeɛ Elia deɛ kõ." 5 Petro gu so odwudwo ne, munungum hyɛn-hyɛn bie katale bɛ so, na konviɛ bie fili munungum nanu wale kyɛ: "Ɛhe yeɛ ole mma bɔ medɔ ye, na male ye mato nu ne, ɛmɔtie ye." 6 Asuafoɛ nemɔ tele ɛhe ne, esuronyi hane bɛ, na bɛfale bɛ nyunu bɛbutule ase. 7 Yeɛ Yesu wale bɛ nwo berɛ, na ɔsɔle bɛ nu hane kyɛ: "Ɛmɔdwɔso, nnɛmɔ suro." 8 Na bɛdwɔsole ne, Yesu ngome yeɛ bɛnwuni ye ɔ, banwu ebiala kõ.

9 Na bɛtoro bokaa ne bɛba ne, Yesu ha hyirele bɛ kyɛ: "Nnɛmɔ ka anisoadehu he anwo dwirɛ bɛkyire ebiala kodwu kyɛ sona awa ne kotingye kofi ewue nu ɔ." 10 Yeɛ asuafoɛ ne bisale ye kyɛ: "Nzuati yeɛ atwerɛfoɛ nemɔ ka kyɛ, odikyɛ Elia di moa ba ne?" 11 Yesu yele bɛ noa kyɛ: "Amba, Elia koli moa kɔwa, ná waatoto nningyein. 12 Nakoso meka mekyire ɛmɔ kyɛ Elia awa dada, nakoso bannwu ye, na bɔ bɛkuro biala yeɛ bɛfa bɛyɛle ye ɔ. Na sɔ ala yeɛ sona Awa ne konwu amaneɛ wɔ bɛ sa nu ɔ." 13 Ɛberɛ yeɛ asuafoɛ ne nwuni kyɛ Yohane Suboniɛ nwo dwirɛ yeɛ ɔka ne.

14 Bɛwale mmenia nanu ne, baba bie wale Yesu berɛ, na obuli ndwerɛ wɔ ye nyunu hane kyɛ: 15 "Awurade, nwu mma ne anwunvo, ɔpɛ na anwonyerɛ ne teetee ye paa. Ɔtaa tɔ see ne nzue nu. 16 Mvale ye mmerɛle w'asuafoɛ nemɔ, nakoso, bangora bannza ye anwonyerɛ." 17 Yesu hane kyɛ: "Ɛnɛ mmerɛ mmenia* abɔnefoɛ bɔ bɛlle gyidie, mmerɛ nyɛɛ yeɛ mene ɛmɔ tena ɔ? Mmerɛ nyɛɛ yeɛ nya ɛmɔ nwo aboterɛ ɔ? Fa akwalaa ne bra." 18 Yeɛ Yesu hwili sunzummɔne ne nyunu, na ofili akwalaa ne nu, na ɛberɛ ala ye nwo tɔle ye. 19 Yesi ne, asuafoɛ nemɔ wale Yesu berɛ kokoanu, na bɛbisale ye kyɛ: "Nzuati yeɛ yangora sunzum ne tu ne?" 20 Ɔha hyirele bɛ kyɛ: "Ɛmɔ gyidie bɔ ɔte kaa nati ɔ. Nahorɛ dwirɛ yeɛ ole kyɛ, sɛ ɛmɔle gyidie bɔ ye piri te kyɛ sinapi mmaa a, ahaa ɛmɔka bɛkyire bokaa he kyɛ, ‘Tu fi wa kɔ dɔ’ a, ɔkɔtu, ná nikye biala nne berɛ bɔ ɔngɔyɛ yé ngɔma ɛmɔ ɔ." 21 *—

22 Bɛboale bɛ nwo noa wɔ Galilea ne, Yesu ha hyirele bɛ kyɛ: "Bɛkɔfa sona Awa ne bɛkowura mmenia sa 23 maa bɛkɔhu ye, na ɛlɛsa si ne, ɔkɔtingye." Sɔ dwirɛ ne maa bɛ wora bɔle paa.

24 Bɛdwuli Kapernaum ne, bɛ bɔ bɛdide drakma nyɔ toɔ ne wale Petro berɛ, na bɛbisale ye kyɛ: "Ɛmɔ kyerɛkyerɛniɛ ne, otua drakma nyɔ toɔ ne anaa?" 25 Ɔhane kyɛ: "Yoo." Petro wurale awuro berɛ ne, Yesu li moa bisale ye kyɛ: "Simon, enwu ye sɛ? Nwamɔ yeɛ odikyɛ aseɛ naso ahemvo ne de toɔ fi bɛ berɛ ɔ, bɛ mmaa, anaa ɛwɔfoɛ mɔ berɛ?" 26 Petro hane kyɛ: "Ɛwɔfoɛ mɔ." Yeɛ Yesu hane kyɛ: "Ye de nnaa mmaa nemɔ bokka so. 27 Nakoso bɔ ɔkɔyɛ na yando ebiala sintidua ne, kɔto koaa wɔ ɛpo nanu. Egyein bɔ ɛkoli moa kɔhye ye ne, bukye ye noa nu, ekonwu dwetɛ sikaa. Ye bra, na fa batua yɛ munyɔ deɛ."