1 Yesu hane edwirɛ he amukoraati yiele ne, ɔha hyirele ye asuafoɛ nemɔ kyɛ, 2 "Kyɛbɔ ɛmɔse ne, waha ɛlɛnyɔ né bɛdi Pɛnu ne, na bɛkɔye sona awa ne bɛkɔma maa bɛkɔbɔ ye asɛnnua nu."

3 Sɔ mmerɛ ne, né sɔfo mbanyi ne kuro nanu mbanyi ne aboa bɛ nwo noa wɔ sɔfo panyi bɔ bɛfrɛ ye Kaiafa né awuro,* 4 na bɛbɔle porɛ kyɛ bɛkɔhye Yesu kodɛɛ bɛkɔhu ye. 5 Nakoso bɛhane kyɛ: "Yɛngɔyɛ ye wɔ afahyɛ nabo, wanyɛ sɔ a, mmenia ne kɔyɛ basabasa."

6 Yesu wɔ kwataniɛ Simon awuro wɔ Betania ne, 7 maame bie wale ye nwo berɛ, né otira alabasta towaa bɔ ngoo* fona-fona bɔ ye nyɔboɛ yɛ se wɔ nu ɔ. Yesu didi ne, ohwiele ngoo ne guale ye ti so. 8 Asuafoɛ nemɔ nwuni ye sɔ ne, né ɔyɛ bɛ ahi, yeti bɛhane kyɛ: "Ɛhe bɔ ɛsɛkye ye ne, yebo yeɛ ole sɛɛ? 9 Ɛkɔhora kɔtɔne ye konya sikaa pee, na afa ama ahiafoɛ." 10 Yesu nwuni ye sɔ ne, ɔha hyirele bɛ kyɛ: "Nzuati yeɛ ɛmɔha maame ne? Nikye pa yeɛ wayɛ wama me ɔ. 11 Ahiafoɛ de, daa biala bɛwɔ ɛmɔ nwo wa, nakoso me de, ɛmɔngonya me daa. 12 Ɔfale sɔ ngoo fona-fona he guale me nwo ne, ne osiesie me nipadua ne ma kyẽa bɔ bɛkosie me ne. 13 Nahorɛ, meka mekyire ɛmɔ kyɛ, nekaa biala bɔ bɛkɔha nzɛmba he wɔ wiase mukoraati ne, bɔ maame he ayɛ ne, bɛkɔha bɛkɔkaye ye."

14 Afei, buru-ne-nyɔ nanu kõ bɔ bɛfrɛ ye Yuda Iskariot hɔle sɔfo mbanyi nemɔ berɛ, 15 yeɛ obisale bɛ kyɛ: "Sɛ meye ye mema ɛmɔ a, nzu yeɛ ɛmɔ kɔfa bɛkɔma me ɔ?" Na bɛne ye hane kyɛ bɛkɔma ye dwetɛ aburasa. 16 Yeti ofi sɔ mmerɛ ne, né ɔpena atee bɔ ɔkɔfa so kɔye Yesu kɔma ɔ.

17 Kyẽa bɔ oli moa bɔ bɛdi Paanoo bɔ Yiste nne nu ne, asuafoɛ nemɔ wale Yesu berɛ na bɛbisale ye kyɛ: "Nisua yeɛ ɛpena kyɛ yɛkosiesie maa ɛdi Pɛnu ne?" 18 Ɔha hyirele bɛ kyɛ: "Ɛmɔhɔ kuro nanu, Asomasi berɛ, na ɛmɔha behyire ye kyɛ, ‘Kyerɛkyerɛniɛ ne nwa: "Me mmerɛ ne apingye; na w'awuro wa yeɛ mene m'asuafoɛ ne koli Pɛnu ne ɔ" ’" 19 Yeti, asuafoɛ nemɔ yɛle bɔ Yesu ha hyirele bɛ ne pɛpɛɛpɛ, bɛsiesiele bɛ nwo bɛmane Pɛnu ne.

20 Odwuli nnɔsoa ne, Yesu ne buru-ne-nyɔ ne tenane tɛbulu nwo. 21 Bɛguso bɛdidi ne, ɔhane kyɛ: "Nahorɛ dwirɛ yeɛ ole kyɛ, ɛmɔ nu kõ kɔye me kɔma." 22 Edwirɛ ne maa bɛ wora bɔle, yeti, bɛhyɛle yebo bɛbisale ye ngoko-ngoko kyɛ: "Awurade, me anaa?" 23 Yeɛ ɔha hyirele bɛ kyɛ: "Bɔ ɔne me to asaa didi wɔ kyɛnzee kõ anu ne, ye yeɛ ɔkɔye me kɔma ne. 24 Nahorɛ, sona Awa ne kɔ, kyɛbɔ bahworɔ bafa ye nwo ne, nakoso bɔ ɔkɔye ye kɔma ne, ye yaakɔ! Sɛ banwo sɔ sona ne po a, ahaa ɔte pa." 25 Yeɛ Yuda bɔ ɔkɔye ye kɔma ne hane kyɛ: "Rabi, me anaa?" Yesu ha hyirele ye kyɛ, "Wɔ bɔbɔ yeɛ aha ne."

26 Bɛguso bɛdidi ne, Yesu fale paanoo, na oyirale so yiele ne, obubule nu, yeɛ ɔfa mane asuafoɛ nemɔ hane kyɛ: "Ɛmɔle bɛli. Ɛhe gyi berɛ ma me nwonaen." 27 Yeɛ ɔfale kwangoa ne, na ɔlale ase, yeɛ ɔfa mane bɛ hane kyɛ: "Ɛmɔ mukoraati, ɛmɔ no. 28 Ɛhe gyi berɛ ma me ‘mogya bɔ bɛfa bɛyɛ apam’ ne, bɔ mmeni pee bɔne-fakyɛ ti, bɛkɔhwie bɛkogua ne. 29 Na meka mekyire ɛmɔ kyɛ: Ofi ɛnɛ bɔ ɔkɔ ne, mengɔno bobe nzãa he kõ, kodwu kyɛ mene ɛmɔ kɔno ye bieku wɔ me Baba Ahennie nu ɔ."

30 Afei, bɛtole ayɛyie dwein bɛyiele ne, bɛfili berɛ bɛhɔle Olive Bokaa naso. 31 Yeɛ Yesu ha hyirele bɛ kyɛ, "Bɔ ɔkɔto me ɛnɛ nnɔsoa ne, ɔkɔto ɛmɔ mukoraati sintidua, ofikyɛ bahworɔ kyɛ:

‘Ngopira bɔ ɔnea mmoan ne,

na mmoan namukoraati kɔbɔ kɔsande.’

32 Nakoso bɛtingye me a, ngoli ɛmɔ nyunu mmoa ngɔhɔ Galilea." 33 Nakoso, Petro ha hyirele ye kyɛ: "Ɔwɔ nu, bɔ okosi ne kɔto bɛ mukoraati sintidua, nakoso me de, ɔngɔto me sintidua lle." 34 Yesu ha hyirele ye kyɛ: "Nahorɛ dwirɛ yeɛ ole kyɛ, ‘kɔngɔen he, kora bɔ akɔ kɔbɔ ne, né aha ye pɛn nza kyɛ ɛnze me.’" 35 Petro yele yenoa kyɛ: "Sɛ odikyɛ mene wɔ wu po a, mengɔha ye lle kyɛ menze wɔ." Na sɔ ala yeɛ asuafoɛ bɔ baha ne koso hane ɔ.

36 Yesu ne ye asuafoɛ nemɔ wale nekaa bɔ bɛfrɛ ɛberɛ Getsemane ne, yeɛ ɔha hyirele bɛ kyɛ: "Ɛmɔtena wa kaa, mekɔ anyunu dɔ mekɔbɔ mbaeɛ." 37 Na ɔfale Petro ne Sebedeo mmaa nyɔ ne bokale ye nwo so, na ye wora hyɛle yebo bɔle, na ne ye nwo teetee ye. 38 Yeɛ ɔha hyirele bɛ kyɛ: "Me wora abɔ pa-pa, ɔfa me kɔ ewue nu po. Ɛmɔtena ɛwa, na ɛmɔ ne me nwondɛ." 39 Ɔhɔle anyunu kaa ne, ɔfale ye nyunu butule berɛ, na ɔbɔle mbaeɛ kyɛ: "Me Baba, sɛ ɔkɔyɛ yé a, ahaa ma kwangoa he sã me nwo. Nakoso, nná bɔ mekuro yeɛ ɔyɛ berɛ ɔ, bɔ ɛkuro mmom yeɛ ɔyɛ berɛ ɔ." 40 Afei Yesu wale asuafoɛ nemɔ nwo berɛ, na onwuni kyɛ bala. Yeɛ obisale Petro kyɛ: "Yeti, ɛmɔ angora ne me anzi pɛ dɔnhwere kõ po? 41 Ɛmɔma ɛmɔ nye la berɛ,* na ɛmɔbɔ mbaeɛ, ná ɛmɔ angɔ nzɔhwɛ nu. Honhom ne de, okuro, nakoso nipadua ne yɛ mmerɛ." 42 Osa hɔle ɔɔbɔle mbaeɛ ne bieku kyɛ: "Me Baba, sɛ kwangoa ne ngɔhora nngosa me nwo, na odikyɛ meno a, ye de, bɔ ekuro yeɛ ɔyɛ berɛ ɔ." 43 Na osa wale ne, né bala, ofikyɛ ne bɛ nye kõ paa. 44 Yeti ɔyakyile bɛ berɛ hɔle, na ɔɔbɔle mbaeɛ bieku, ye pɛn nza so, na ɔhane edwirɛ komapɛ nala. 45 Na ɔwale asuafoɛ nemɔ nwo berɛ ne, ɔha hyirele bɛ kyɛ: "Sɔ mmerɛ he yeɛ ɛmɔda bedɛ ɛmɔ nwomeɛ ɔ? Ɛmɔnea, mmerɛ aso kyɛ bɛfa sona Awa ne bɛwura abɔnefoɛ sa. 46 Ɛmɔ dwɔso ma yɛhɔ! Nea, bɔ ɔkɔye me kɔma ne adwu ɛwa ayie."

47 Ogu so odwudwo ne, bɛkwaanea a, Yuda bɔ ɔboka buru-ne-nyɔ naso ne nyunu ɛhe, na né mmeni pee li ye si, bɔ bɛtire-tira dadeɛ ne mmo-kuro-mma. Sɔfo mbanyi ne kuro nanu mbanyi yeɛ né basoma bɛ ɔ. 48 Né bɔ ɔbaaye ye ma ne ali moa ama bɛ nzɛngyerɛneɛ bie kyɛ: "Sona bɔ ngɔfe ye noa ne, ye ane, ɛmɔhye ye." 49 Yeti, ɔhɔle Yesu nwo berɛ tee, yeɛ ɔhane kyɛ: "Rabi, asomdwie ha wɔ!" Na ɔfele ye noa. 50 Yeɛ Yesu bisale ye kyɛ: "Me damvo, w'amaneɛ wa?"* Yeti mmenia nemɔ wale Yesu so, na bɛɛhyele ye. 51 Sɔ mmerɛ ne, bɛ bɔ bɛboka Yesu so nanu kõ hwene ye dadeɛ hɔle sɔfo panyi ne akoaa naso, na ɔpɛle ye so kõ. 52 Yeɛ Yesu ha hyirele ye kyɛ: "Fa wɔ dadeɛ ne wura ye boso. Ofikyɛ ebiala bɔ ɔtwe dadeɛ ne, dadeɛ noa yeɛ okowu ɔ. 53 Anaa ɛnze kyɛ ngɔhora ngɔserɛ me Baba kyɛ ɔma me abɔfo pee* kesaalae? 54 Ye de, ahaa ɔkɔyɛ sɛɛ ne bɔ Tworɔnzɛm ne hane ne awa nu kyɛ, sɔ yeɛ odikyɛ ɔba ɔ?" 55 Sɔ mmerɛ nala, Yesu ha hyirele mmenia ne kyɛ: "Dadeɛ ne mmo-kuro-mma yeɛ ɛmɔ afa bawa me so, kyɛ ɛnwa ɛmɔ baahye awieniɛ ne? Daa biala, asɔre awuro berɛ yeɛ ne metena mekyirekyire ɔ, nakoso, ɛmɔ angye me. 56 Na ɛhe amukoraati asi, kyɛbɔ ɔkɔyɛ a, edwirɛ bɔ adiifoɛ ne hane ne kɔwa nu ɔ." Yeɛ asuafoɛ namukoraati nwati yakyile ye ɔ.

57 Bɛ bɔ bɛhyele Yesu ne fale ye hɔle Kaiafa berɛ, nekaa bɔ né atwerɛfoɛ ne maen nanu mbanyi nemɔ ayia ne. 58 Nakoso Petro de, olili ye si ngaka-ngaka* oodwuli sɔfo panyi ne aluo berɛ. Na owurale nu ne, ɔɔtenane asomvoɛ nemɔ nu, kyɛ ɔnea bɔ okosi ɔ. 59 Afei, né sɔfo mbanyi ne Sanhendrin namukoraati pena edwirɛ* bie bɛto Yesu so, ná bagyina so bahu ye. 60 Nakoso, bannya bie. Ɔwɔ nu, mmeni pee wale bɛɛlili adanzeɛ betiale ye. Ye si ne, mmenia nyɔ bie wale, 61 na bɛhane kyɛ: "Sɔ biaa he hane kyɛ, ‘Ngɔhora ngɔdwiri Nyameɛ asɔre awuro ne ngogua, na mafa ɛlɛsa masi.’" 62 Yeti, sɔfo panyi ne dwɔsole, na obisale ye kyɛ: "Nzue yeɛ ɛle ye ka ɔ? Adanzeɛ beni yeɛ mmenia hemɔ di tia wɔ ne?" 63 Nakoso, Yesu ammukye ye noa. Yeti, sɔfo panyi ne ha hyirele ye kyɛ: "Mefa Nyameɛ teasefoɛ ne meta ndaen megua wɔ so kyɛ, sɛ wɔ yeɛ ɛle Kristo ne, Nyameɛ Awa ne a, ka kyire yɛ." 64 Yesu ha hyirele ye kyɛ: "Ye ala yeɛ aha ne. Nakoso, meka mekyire ɛmɔ kyɛ, ofi ɛnɛ bɔ ɔkɔ ne, ɛmɔ konwu Sona Awa ne kyɛ ɔte Otumvoɛ* ne sa famaa so, na ɔnate anwuro munungum nu ɔba." 65 Ɛhe maa sɔfo panyi né sunzuale ye atadeɛ nu, na ɔhane kyɛ: "Wabɔ mmusue!* Ye de, yɛpena adanzefoɛ bieku yɛyɛ nzu? Nea, nná ɛmɔ ate mmusue dwirɛ ne. 66 Ɛmɔ adwene yɛ ɛmɔ sɛ?" Bɛha bɛhyirele ye kyɛ: "Odikyɛ beku ye." 67 Afei, bɛtetele ngɔserɛ bɛguale ye nyunu, na bɛbobɔle ye. Yeɛ ebiemɔ bobɔle ye nye so, 68 na bɛha bɛhyirele ye kyɛ: "Kristo, hyɛ ngɔm. Nwa yeɛ ɔbɔle wɔ ne?"

69 Petro de, né ɔte aluo dɔ, yeɛ abaawa bie wale ye nwo berɛ, na ɔha hyirele ye kyɛ: "Wɔ koso, né ɛboka Galileaniɛ Yesu so." 70 Nakoso, ɔhane ye wɔ bɛ mukoraati nyunu kyɛ: "Menze bɔ ɛka nanwo hwee." 71 Ɔhɔle awuro né atee ne noa dɔ ne, abayaa foforɛ nwuni ye, yeɛ ɔha hyirele bɛ bɔ bɛwɔ berɛ ne kyɛ: "Né sɔ akoaa he boka Nazerɛtniɛ Yesu so." 72 Na ɔhane ndaen wɔ bɛ mukoraati nyunu kyɛ: "Menze biaa ne!" 73 Mmerɛ bie si ne, bɛ bɔ bɛgyigyi berɛ ne wale Petro berɛ, na bɛha behyirele ye kyɛ: "Nahorɛ dwirɛ yeɛ ole kyɛ, ɛboka bɛ so, na wɔ dwudwolɛ po maa yɛnwu ye sɔ." 74 Na ɛwa de, olili amoen hane ndaen kyɛ: "Menze biaa ne!" Na ɛberɛ ala, akɔ bɔle. 75 Yeɛ Petro kayele edwirɛ bɔ Yesu ha hyirele ye ne, ɔhane kyɛ: "Kora bɔ akɔ kɔbɔ ne, né aha ye pɛn nza kyɛ ɛnze me." Na ofitele oosuni paa.