1 David awa, Abraham awa Yesu Kristo nwo abakwasɛm nwomaa:

2 Abraham wole Isaac,

Isaac wole Yakob,

Yakob wole Yuda ne oliema mɔ.

3 Yuda ne Tamar wole Peres ne Sera,

Peres wole Hesron,

Hesron wole Ram.

4 Ram wole Aminadab,

Aminadab wole Nason,

Nason wole Salmon.

5 Salmon ne Rahab wole Boas,

Boas ne Ruth wole Obed,

Obed wole Yese.

6 Yese wole Ɔhene David,

David ne Uria aye ne wole Solomon.

7 Solomon wole Rehoboam,

Rehoboam wole Abia,

Abia wole Asa.

8 Asa wole Yehosafat,

Yehosafat wole Yehoram,

Yehoram wole Uzia.

9 Uzia wole Yotam,

Yotam wole Ahas,

Ahas wole Hezekia.

10 Hezekia wole Manase,

Manase wole Amon,*

Amon* wole Yosia,

11 Kora bɔ bɛfa bɛ bɛkɔ Babilon ne,

Yosia wole Yekonia ne oliema mɔ.

12 Bɛhɔle Babilon ne si ne,

Yekonia wole Sealtiel,

Sealtiel wole Zerubabel,

13 Zerubabel wole Abihud,

Abihud wole Eliakim,

Eliakim wole Asor.

14 Asor wole Sadok,

Sadok wole Akim,

Akim wole Elihud.

15 Elihud wole Eleaser,

Eleaser wole Matan,

Matan wole Yakob.

16 Yakob wole Yosef bɔ ogyale Mary ne,

Mary yeɛ owole Yesu bɔ bɛfrɛ ye Kristo ne.

17 Yeti, aworɛ ndoɔtoasoɛ ne, ofi Abraham so ɔbaadwu David so ne te aworɛ ndoɔtoasoɛ 14; ofi David so ɔbaadwu kyɛ bɛfale bɛ bɛhɔle Babilon ne te aworɛ ndoɔtoasoɛ 14; na bɛhɔle Babilon ne ɔbaadwu Kristo so ne te aworɛ ndoɔtoasoɛ 14.

18 Atee bɔ bɛfale so bɛwole Yesu Kristo ne ɛhe: Bɛfale ye maame Mary bɛmane Yosef kyɛ ɔye bɔ ɔbaagya ye. Né onya hɔlle agyaa bo, nakoso bɛnwuni kyɛ honhom krongron amaa wanwonzɛ. 19 Né ohu Yosef te teneneeniɛ, na né onguro kyɛ ogua ye nyunu ase, yeti ɔyɛle ye adwene kyɛ okoyira ye kodɛɛ. 20 Ogu so ɔdwene ɛhe anwo ne, Awurade bɔfo yele ye nwo ali hyirele ye wɔ nnaleɛ nu, na ɔha hyirele ye kyɛ: "Yosef, David awa, nnɛsuro kyɛ ɛkɔfa ɛye Mary kɔhɔ awuro, ofikyɛ honhom krongron yeɛ wamaa wawonzɛ ɔ. 21 Ɔkɔwo baa brienzua, na odikyɛ ɛto ye dumaa Yesu, ofikyɛ ye yeɛ okole ye mmenia kofi bɛ bɔne nu ɔ."

22 Ɛhe amukoraati sili, kyɛbɔ ɔkɔyɛ a, edwirɛ bɔ Awurade nate diifoɛ naso hane ne kɔwa nu ɔ. Ɔhane kyɛ:

23 "Nea, ababunu ne kɔnwonzɛ,

ɔkɔwo baa brienzua,

na bɛkɔto ye dumaa Emmanuel,"

yebo kyire kyɛ, "Nyameɛ ne Yɛ Wɔ Berɛ."

24 Ná Yosef tingye fili nnaa nu, na ɔyɛle bɔ Awurade abɔfo ne ha hyirele ye ne, ɔfale ɔye ne hɔle awuro. 25 Nakoso Yosef ne ye anna tonn maa ɔwole baa brienzua ne, na ɔtole ye dumaa Yesu.