1 Yesu dwudwo hyirele asuafoɛ 12 ne yiele ne, ofili berɛ kyɛ ɔkwaayɛ ngyerɛkyerɛ na ɔka nzɛmba ne wɔ nguro nemɔ nu.

2 Né Yohane ate nningyein bɔ Kristo ne yɛ nanwo dwirɛ wɔ prizin dɔ, yeti ɔsomane ye asuafoɛ ne kyɛ bɛbra ye brɛ, 3 na beebisa ye kyɛ: "Wɔ yeɛ ɛle bɔ ɔba ne, anaa yɛnea sona foforɛ atẽ?" 4 Yesu ha hyirele bɛ kyɛ: "Ɛmɔhɔ, na ɛmɔha bɔ ɛmɔte na ɛmɔnwu ye nanwo dwirɛ behyire Yohane kyɛ: 5 ‘Anyesiniwaafoɛ sa nwu nikye, bɛ bɔ babubu ne nate, akwatafoɛ nwo te, na bɛ bɔ bɛ so ati ne te edwirɛ, awufo dwɔso, na baha nzɛmba ne bahyire ahiafoɛ;’ 6 anigye yeɛ ole ebiala bɔ mendo ye sintidua ne. "

7 Yohane asuafoɛ nemɔ kɔ ne, Yesu hyɛle yebo kyɛ ɔka Yohane nwo dwirɛ kyire mmenia nemɔ. Ɔhane kyɛ: "Nzu yeɛ ɛmɔhɔle ɛserɛ naso kyɛ ɛmɔ kwaanea ne? Elemmire bɔ mvrama woso ye anaa? 8 Nná sɔ a, nzu yeɛ ɛmɔhɔle dɔ bɛɛneane ne? Biaa bie bɔ owura atadeɛ pa? Ɛmɔnea, bɛ bɔ bɛwura ndadeɛ pa ne tete ahemvie. 9 Ye de, nzu deinn yeɛ ɛmɔhɔle dɔ kyɛ ɛmɔ kwaanea ne? Diifoɛ? Amba, meka mekyire ɛmɔ, ɔtra diifoɛ po. 10 Ɛhe yeɛ bɛhworɔle ye nwo dwirɛ kyɛ:

‘Nea, mesoma me bɔfoɛ maa odi wɔ nyunu,

Ye yeɛ okosiesie atee nu kɔma wɔ’ ne.

11 Nahorɛ, meka mekyire ɛmɔ kyɛ, bɛ bɔ mmrasua awo bɛ ne, ebiala nne berɛ bɔ ɔte piri tra Yohane Suboniɛ ɔ; nakoso bɔ ɔte kaa wɔ anwuro ahennie nanu ne, ɔte piri tra ye. 12 Ofi Yohane Suboniɛ aberɛ so bɔ ɔbaadwu ɛnɛ ne, anwuro Ahennie ne yeɛ ebiala pere kyɛ okodwu ye nwo ɔ, na bɛ bɔ bɛ nye aboro ne yeɛ bɛ sa ka ye ɔ. 13 Ofikyɛ Adiifoɛ ne Mmeraa namukoraati hyɛle ngɔm oodwuli Yohane so; 14 Na sɛ ɛmɔkole bɛkɔto nu a, ye yeɛ ole Elia bɔ bɛhane kyɛ ɔba ne. 15 Bɔ ole asoɛ ne, ma otie.

16 "Nwamɔ po yeɛ mva sɔ aworɛ ndoɔtoasoɛ he ndoto bɛ nwo ɔ? Bɛte kyɛ ngwalaa bɔ bɛte dwaaso, na bɛfrɛ bɛ mmango mɔ kyɛ:

17 ‘Yɛhule awɛen yɛmane ɛmɔ,

nakoso, ɛmɔ ango;

yɛpɛle awuye,

nakoso, ɛmɔ wora ammɔ.’

18 Sɔ ala koso yeɛ Yohane wale ne, wannidi, na wanno nzãa, ná bɛnwa ‘Ole sunzummɔne.’ 19 Sona awa ne wale ne, ye de odidi, na ɔno, nakoso mmenia ka kyɛ, ‘Ɛmɔnea adufum ne kɔwenzaniɛ ne, bɛ bɔ bɛdide ɛtoɔ ne abɔnefoɛ damvo ne!’ Nakoso nningyein bɔ ɔyɛ ne maa bɛnwu ye kyɛ ɔse nworɛ." 20 Nguro bɔ Yesu yɛle anwanwadeɛ pee wɔ nu ne, banzakra, yeti ɔhyɛle yebo hwili bɛ nyunu kyɛ: 21 "Due Korasin! Due Betsaida! Ofikyɛ anwanwadeɛ bɔ bɛyɛle ye wɔ wɔ nu ne, sɛ bɛyɛle ye wɔ Tiro ne Sidon a, ahaa basakra bahra brisie bafa nzoen bayɛ bɛ nwo dada. 22 Yeti, meka mekyire ɛmɔ kyɛ, Atemmuda ne, bɔ ɔkɔto ɛmɔ ne, ɔkɔtra Tiro ne Sidon deɛ ne. 23 Na wɔ, Kapernaum, ɛse kyɛ bɛkɔfa wɔ bɛkɔhɔ anwuro? Daabi oo! Kumaa nu tɔnn yeɛ bɛkɔfa wɔ bɛkɔhɔ ɔ. Ofikyɛ anwanwadeɛ bɔ bɛyɛle ye wɔ wɔ nu ne, sɛ bɛyɛle ye wɔ Sodom a, ahaa ɔbaadwu bekye, ɔtɛ́ wɔ berɛ. 24 Meka mekyire wɔ kyɛ, Atemmuda ne, bɔ ɔkɔto wɔ ne, Sodom deɛ ne po te kaa."

25 Sɔ mmerɛ ne, Yesu hane kyɛ: "Baba, anwuro ne aseɛ Wura, meye wɔ ayɛ wɔ badwanu, ofikyɛ afa ɛhe afea anyanzafoɛ ne bɛ bɔ bɛse nwomaa ne, na ala ye ali ahyire ngwalaa mmaa-mmaa. 26 Baba, ɔte nahorɛ, ofikyɛ ɛhe yeɛ ɔsɔ wɔ nye ɔ. 27 Me Baba afa nikye biala awura me sa, na ebiala nze Baa ne yé, sana Baba ne; yeɛ ebiala nze Baba ne yé, sana Baa ne, ɔne ebiala bɔ Baa ne pena kyɛ ɔda ye ali kyire ye ne. 28 Ɛmɔ bɔ ɛmɔ afɛ, na bafa nningyein* nnunɛ-nnunɛ* basoa ɛmɔ ne, ɛmɔbra me berɛ, na ngɔmaa ɛmɔkole ɛmɔ nwomeɛ. 29 Ɛmɔfa me kɔnnua bɛto ɛmɔ nwo so, na ɛmɔsuesua me, ofikyɛ medwo, na mebrɛ me nwo ase wɔ ahone nu, na ɛmɔ konya ahotɔ bɛkɔma ɛmɔ kra.* 30 Ofikyɛ me kɔnnua ne soalɛ nnyɛ se, na m'adesoa nu yɛ nyera." *