1 Homeda ne si, dapɛn nanu kyẽa bɔ oli moa né alobahene ne, Mary Magdalene ne Mary kõhene wale asieleɛ naso. 2 Na aseɛ ne wosole serɛ-serɛ, ofikyɛ ne Awurade bɔfo adwu afi anwuro waaye nyɔboɛ ne wafi berɛ, na né ɔte so. 3 Né ɔbɔfo ne ta hyireinn te kyɛ agralaa bɔ wate yerɛm ne, na né ye atadeɛ te fufue hyɛnn te kyɛ asukɔtwea. 4 Ye nwo suronyi ti, sogyafoɛ nemɔ nwo woso-wosole bɛ, na bɛyɛle kyɛ ebie bɔ wawu ne. 5 Nakoso, abɔfo ne ha hyirele mmrasua nemɔ kyɛ: "Nnɛmɔ maa esuronyi ka ɛmɔ, ofikyɛ mese kyɛ ɛmɔpena Yesu, bɔ bɛbɔle ye asɛnnua nu ne. 6 Ɔnne wa, ofikyɛ batingye ye, kyɛbɔ ɔhane nala. Ɛmɔbra, ɛmɔɔnea nekaa bɔ ne ɔla ne. 7 Yeti ɛmɔha ɛmɔ nwo, na ɛmɔɔbɔ asuafoɛ nemɔ amaneɛ kyɛ batingye ye. Na odi ɛmɔ nyunu moa kɔ Galilea. Ɛberɛ yeɛ ɛmɔ konwu ye ɔ. Ɛmɔnea, maha mahyire ɛmɔ." 8 Yeti, bɛyɛle ndɛ bɛfili asieleɛ naso, na bɛfale esuronyi ne anigye bɛtuli mirika kyɛ bɛkwaabɔ asuafoɛ nemɔ amaneɛ. 9 Na mvum nu, Yesu yiale bɛ, yeɛ ɔha hyirele bɛ kyɛ: "Asomdwie ha ɛmɔ!" Yeti, bɛhɔle ye nwo berɛ bɛɛsɔle ye gya nu bɛkotole ye. 10 Yeɛ Yesu ha hyirele bɛ kyɛ: "Nnɛmɔ suro, ɛmɔhɔ bɛɛbɔ nniema nemɔ amaneɛ kyɛ, bɛhɔ Galilea, na bɛkonwu me wɔ berɛ."

11 Bɛnate atee so bɛkɔ ne, sogyafoɛ* nemɔ bie hɔle kuro nanu, na bɛɛhane bɔ wasi namukoraati bɛhyirele sɔfo mbanyi nemɔ. 12 Na sɔfo mbanyi ne kuro nanu mbanyi ne yiale nu bɔle porɛ ne, bɛmane sogyafoɛ nemɔ sikaa kandinga, 13 na bɛha bɛhyirele bɛ kyɛ: "Ɛmɔha kyɛ, ‘Kɔngɔen bɔ yɛlale ne, ye asuafoɛ nemɔ wale berɛ bɛɛwiale ye.’ 14 Na sɛ amrado ne te a, yɛ ne ye kodwudwo, yeti nnɛmaa ɔha ɛmɔ." 15 Yeti, sogyafoɛ ne lɛle sikaa ne, na bɛyɛle bɔ bɛha bɛhyirele bɛ ne. Ná sɔ dwirɛ ne atrɛ wɔ Yudafoɛ nu waadwu ɛnɛ.

16 Nakoso 11 ne hɔle Galilea, bɛhɔle bokaa bɔ ne Yesu aha ahyire bɛ kyɛ beeyia ye wɔ so naso. 17 Bɛnwuni ye ne, bɛkotole ye, nakoso, né ebiemɔ nne nni. 18 Yeɛ Yesu wale bɛ nwo berɛ, na ɔha hyirele bɛ kyɛ: "Bafa anwuro ne aseɛ so tumi mukoraati bama me, 19 Yeti, ɛmɔhɔ, na ɛmɔɔyɛ maen mukoraati m'asuafoɛ, ɛmɔbɔ bɛ asu wɔ Baba ne, Baa ne, ɔne honhom krongron ne dumaa nu, 20 na ɛmɔ hyirehyire bɛ maa bɛli bɔ mahyɛ ɛmɔ namukoraati so. Nea, mmoka ɛmɔ so daa biala, kodwu kyɛ wiase né awieɛ kɔwa ɔ."