1 Nyameɛ awa Yesu Kristo nwo nzɛmba né ahyɛaseɛ, 2 kyɛbɔ ɔwɔ diifoɛ Isaiah nwomaa nanu ne. Ɔhworɔle kyɛ:

"Nea, mesoma me bɔfoɛ maa odi wɔ nyunu,

ye yeɛ okosiesie atee nu kɔma wɔ ɔ."

3 "Ebie tea nu wɔ ɛserɛ naso kyɛ,

Ɛmɔsiesie Awurade atee!

Ɛmɔma ye atee ne tengyɛ."

4 Né Yohane Suboniɛ wɔ ɛserɛ so, ná ne ɔka kyire mmenia kyɛ, bɛbɔ asu bɛfa behyire kyɛ basakra b'adwene, kyɛbɔ ɔkɔyɛ a bɛkɔfa bɛ bɔne bɛkɔhyɛ bɛ. 5 Na mmenia bɔ bɛtete Yerusalem ne Yudea namukoraati hɔle ye berɛ, na bɛhane bɛ bɔne maa ɔbɔle bɛ asu wɔ Yordan nzue nanu. 6 Atadeɛ bɔ owura Yohane ne, afunum nwiaa yeɛ né bafa bayɛ ɔ, na né wafa kaka nwomaa wayɛ ye bɛlɛt.* Mmɛbɛ ne woɛ yeɛ ne odi ɔ. 7 Na ɔhyɛle yebo hane kyɛ: "Ebie li me si ɔba, na ole tumi tra me, ye mmaboa nyamaa po, menvata kyɛ me sangye. 8 Nzue yeɛ mefa mebɔ ɛmɔ asu ɔ, nakoso ye de, honhom krongron yeɛ ɔkɔfa kɔbɔ ɛmɔ asu ɔ."

9 Sɔ mmerɛ nanu ne, Yesu fili Nazerɛt bɔ ɔwɔ Galilea ne wale Yohane berɛ maa ɔbɔle ye asu wɔ Yordan nu. 10 Ofili nzue ne bo fitele nala pɛ, onwuni kyɛ anwuro abukye, ná honhom krongron ne ba ye so te kyɛ abubure. 11 Na konviɛ teane nu wɔ anwuro kyɛ: "Wɔ yeɛ ɛle mma bɔ medɔ ye ne, male wɔ mato nu."

12 Na ndɛ nala, honhom ne fale ye hɔle ɛserɛ so, 13 ɔtenane ɛserɛ naso ngyẽa 40, na Abɔnzam sɔle ye neane. Ngaka bɔ bɛ nwo yɛ suro yeɛ né ɔne wɔ berɛ ɔ, nakoso abɔfo wala bɛɛbokale ye.

14 Bɛhyele Yohane ne, Yesu hɔle Galilea ɔɔhane nzɛmba bɔ ofi Nyameɛ berɛ ne. 15 Ɔhane kyɛ: "Mmerɛ bɔ bɛhyɛle ne aso, na Nyameɛ Ahennie né apingye. Ɛmɔsakra ɛmɔ adwene na ɛmɔle nzɛmba ne bɛli."

16 Mmerɛ bɔ Yesu nate Galilea po ne noa ne, onwuni kyɛ Simon ne oliema Andrea gua bɛ nɛt wɔ ɛpo nanu, ofikyɛ né bɛkye egyein. 17 Yesu ha hyirele bɛ kyɛ: "Ɛmɔɔli me si, na ngɔmaa ɛmɔ kɔhye mmenia." 18 Na ɛberɛ ala, bɛyakyile bɛ nɛt ne berɛ bɛlili ye si.

19 Ɔhɔle ye nyunu kaa ne, onwuni Sebedeo awa Yakobo ne oliema Yohane. Né bɛne bɛ baba te ɛlɛen nu bɛpomba bɛ nɛt. 20 Na ɛberɛ ala ɔfrɛle bɛ, na bɛyakyile bɛ baba Sebedeo ne apaafoɛ nemɔ wɔ ɛlɛen na nu, na bɛlili ye si.

21 Yesu ne bɛ bɔ bɛboka ye so ne hɔle Kapernaum, na odwuli homeda ne, ɔhɔle sua bɔ beyia nu nanu, na ɔhyɛle yebo kyɛ okyirekyire. 22 Ná ye ngyerɛkyerɛ ne yɛle bɛ nwanwa, ofikyɛ ne okyirekyire bɛ kyɛ ebie bɔ ole tumi, ɔtte kyɛ atwerɛfoɛ nemɔ. 23 Né biaa bie bɔ sunzummɔne wɔ ye so wɔ berɛ, na ɔteane nu kyɛ: 24 "Nazerɛtniɛ Yesu, nzu yeɛ yafa yayɛ wɔ ɔ?* Awa kyɛ ɛbaasɛkye yɛ hɔ? Mese wɔ, wɔ yeɛ ɛte Krongroniɛ bɔ ofi Nyameɛ berɛ ne!" 25 Nakoso, Yesu teane ye kyɛ: "Yɛ konn, na fi ye nu!" 26 Na sunzummɔne ne maa biaa ne senzene, ɔteane nu serɛ-serɛ, na ofili ye nu. 27 Ɛhe yɛle mmenia ne nwanwa, na bɛhyɛle yebo bɛbisale bɛ nwo kyɛ: "Nzu ane? Ɛhe te ngyerɛkyerɛ foforɛ hɔ? Ɔfa tumi dwudwo kyire sunzummɔne mɔ po maa betie ye." 28 Na Yesu nwo dwirɛ trɛle ndɛ-ndɛ hɔle Galilea mandanu berɛ mukoraati.

29 Na Yesu ne Yakobo ne Yohane fili sua nanu, na bɛhɔle Simon ne Andrea awuro. 30 Né fiiva* ahye Simon sia ato berɛ, na bɛhane ye nwo dwirɛ behyirele Yesu. 31 Yeti ɔhɔle ye nwo berɛ, na ɔsɔle ye sa nu maa odwɔsole, na fiiva ne hɔle. Na maame ne hyɛle yebo kyɛ ɔsõ ye.

32 Sɔ kyẽa ne nnɔsoa, eyia né tɔle ne, bɛfale bɛ bɔ bafokyɛ ne bɛ bɔ sunzummɔne wɔ bɛ so bɛbrɛle ye; 33 na kuro nanufoɛ mukoraati boale bɛ nwo noa wɔ anoa ne nyunu. 34 Yeti, ɔsale bɛ bɔ anwonyerɛ pee ha bɛ ne anwonyerɛ, na otuli sunzummɔne pee, nakoso, wamma sunzummɔne nemɔ andwudwo, ofikyɛ ne bɛse kyɛ yeɛ ole Kristo ne.

35 Ngyerɛmɔ tutuutu bɔ ewienu tettele ne, Yesu dwɔsole, na oowurale nekaa bie konn bɔle mbaeɛ. 36 Simon ne bɛ bɔ bɛboka ye so ne penane ye, 37 na mmerɛ bɔ bɛnwuni ye ne, bɛha bɛhyirele ye kyɛ: "Ebiala pena wɔ." 38 Nakoso ɔha hyirele bɛ kyɛ: "Ɛmɔma yɛhɔ nekaa foforɛ, yɛhɔ nguro bɔ wapɛ yɛ nwo wayia nanu, na ngɔnga edwirɛ ne wɔ berɛ, ofikyɛ ɛhe ati yeɛ mmale ɔ." 39 Yeti, ohyinini Galilea mukoraati, ɔyɛle ngyerɛkyerɛ wɔ sua bɔ beyia nu nemɔ nu, na otuli sunzummɔne pee.

40 Na kwataniɛ bie wale Yesu berɛ, na obuli ndwerɛ srɛle ye kyɛ: "Sɛ ekuro a, ɛkɔhora kɔmaa me nwo kɔtɔ me."* 41 Edwirɛ ne yɛle ye aworabɔ, yeti ɔtengyɛle ye sa sɔle ye nu, yeɛ ɔhane kyɛ: "Mekuro, wɔ nwo tɔ wɔ"* 42 Na ɛberɛ ala, kwata ne hɔle, na biaa ne nwo tɔle ye. 43 Ɛberɛ ala, Yesu maa ɔhɔle, na ɔhyɛle ye kitii kyɛ: 44 "Nea na ammɔ so angyire ebiala, nakoso kɔ, na kɔfa wɔ nwo kyire sɔfo nemɔ. Na ɔnate kyɛ wɔ nwo atɔ wɔ nati, fa akyɛdeɛ bɔ Mose hane ne ma bɛ, na ɔyɛ adanzeɛ ma bɛ." 45 Nakoso biaa ne hɔle ne, ɔhane ye nwo dwirɛ hyirele ebiala. Ɛhe ati, né Yesu ngora nye ye nyunu ngɔ kuro biala nu, mmom, ɔtele ye nwo tenane nekaa bie wɔ kuro ne si. Nakoso, mmenia fili nekaa pee wale ye berɛ.