1 Ofili berɛ wale Yudea ɛwɛen so, wɔ Yordan nzue ne si, na mmeni pee sa pɛle ye nwo yiale. Ná kyɛbɔ daa ɔyɛ ne, ohyirehyirele bɛ.

2 Ná Farisifoɛ biemɔ wale ye berɛ kyɛ bɛbaasɔ ye bɛnea, yeti bɛbisale ye kyɛ: "Mmeraa ma ate kyɛ brienzua yira ɔye anaa?" 3 Ɔha hyirele bɛ kyɛ: "Ahyɛdeɛ beni yeɛ Mose fa mane ɛmɔ ɔ?" 4 Bɛhane kyɛ: "Mose mane atee kyɛ ɛkɔhora kɔhworɔ agyaa yiralɛ krataa kɔma brasua ne, na ayira ye." 5 Yeɛ Yesu ha hyirele bɛ kyɛ: "Ɛmɔ ahone bɔ ɔyɛ se nati yeɛ ɔmane ɛmɔ sɔ mmeraa ne. 6 Nakoso ahyɛaseɛ bɔ Nyameɛ bɔle nningyein nala, ‘Ɔyɛle bɛ brienzua ne brasua.’ 7 ‘Ɛhe ati yeɛ brienzua kɔyakyi ye baba ne ye maame berɛ, na ɔne ɔye aha abɔnu 8 maa bɛ munyɔ ne ayɛ anwoɔnaen kõ,’ yeti bɛtte nyɔ kõ, mmom anwoɔnaen kõ. 9 Na bɔ Nyameɛ aha abɔnu ne, nnɛmaa sona biala tete nu."

10 Mmerɛ bɔ besa bɛhɔle awuro ne, asuafoɛ nemɔ bisale ye ɛhe anwo dwirɛ. 11 Ɔha hyirele bɛ kyɛ: "Ebiala bɔ okoyira ɔye kogya foforɛ ne, wasɛkye agyaa, na wayɛ bɔne watia ɔye ne. 12 Na sɛ brasua yira ohu na osa gya foforɛ a, wasɛkye agyaa." 13 Na né ebiemɔ fa ngwalaa berɛ ye maa ɔfa ye sa gua bɛ so, nakoso asuafoɛ nemɔ teɛteane bɛ. 14 Mmerɛ bɔ Yesu nwuni ɛhe ne, ɔfɛle bɛ so yaa, na ɔhane kyɛ: "Ɛmɔma ngwalaa nemɔ bra me berɛ; nnɛmɔsi bɛ atee, ofikyɛ bɛ yeɛ Nyameɛ Ahennie ne te bɛ deɛ ɔ. 15 Nahorɛ, meka mekyire ɛmɔ kyɛ, ebiala bɔ onne Nyameɛ Ahennie ne te kyɛ akwalaa ne, ɔngɔhɔ nu lle." 16 Afei ɔyɛle ngwalaa nemɔ atuu, na ɔfale ye sa guale bɛ so, hyirale bɛ.

17 Mmerɛ bɔ ɔnate atee so ne, biaa bie le mirika oobuli ndwerɛ wɔ ye nyunu, na obisale ye kyɛ: "Kyerɛkyerɛniɛ pa, nzu yeɛ meyɛ a, ngonya daa ngoa ɔ?" 18 Yesu ha hyirele ye kyɛ: "Nzuati yeɛ ɛka kyɛ nde sona pa* ɔ? Ebiala nne berɛ bɔ ɔte pa ɔ, sana Nyameɛ ngome. 19 Ɛse mmeraa ne: ‘Nnɛdi awue, nnɛsɛkye agyaa, nnɛwia, nnɛdi adanzewia, nnɛsisi ebiala,* bu wɔ baba ne wɔ maame.’ " 20 Biaa ne ha hyirele ye kyɛ: "Kyerɛkyerɛniɛ, mvi me ngwalaa nu, yeɛ mali ɛhe amukoraati so ɔ." 21 Afei Yesu neane ye haa, na onyane ɔdɔ mane ye, yeɛ ɔha hyirele ye kyɛ: "Waha wɔ nikye kõ: Kɔ, na kɔtɔne bɔ ɛle ye biala fa ma ahiafoɛ, na ekonya agyapadeɛ wɔ anwuro; afei bra bali me si." 22 Nakoso, edwirɛ ne hale biaa ne paa, ná ɔkɔ ne, né ye wora abɔ, ofikyɛ né ole agyapadeɛ paa.

23 Afei, Yesu tole ye nye neane mmenia bɔ bɛwɔ berɛ ne, na ɔha hyirele ye asuafoɛ ne kyɛ: "Nea kyɛbɔ ɔkɔyɛ se kɔma asikafoɛ kyɛ bɛkɔhɔ Nyameɛ Ahennie nu ɔ!" 24 Nakoso ye dwirɛ ne yɛle asuafoɛ ne nwanwa. Yeɛ Yesu sa hane kyɛ: "Me mmaa mɔ, ɛmɔnea kyɛbɔ ɔkɔyɛ se kyɛ ebiemɔ kɔhɔ Nyameɛ Ahennie nanu ɔ. 25 Ɔkɔyɛ mmerɛ kyɛ afupɔngɔ kowura paneɛ bɔen nu, tra kyɛ sikaniɛ kɔhɔ Nyameɛ Ahennie nu ɔ." 26 Ɛhe po de bɔle bɛ pusa, na bɛbisale kyɛ: "Ye de, nwa yeɛ okonya ngoa ɔ?" 27 Yesu neane bɛ haa, yeɛ ɔhane kyɛ: "Ɔhale sona ngome a, ahaa ɔngɔyɛ yé, nakoso nná Nyameɛ ɔ. Ofikyɛ Nyameɛ afa nu de, nikye biala kora kɔyɛ yé." 28 Petro ha hyirele ye kyɛ: "Yayakyi nikye biala berɛ yaali wɔ si." 29 Yesu ha hyirele ye kyɛ: "Nahorɛ, meka mekyire ɛmɔ kyɛ, ebiala nne berɛ bɔ mene nzɛmba nati, wayakyi awuro, aliemaa mmrienzua, aliemaa mmrasua, maame mɔ, baba mɔ, mmaa, ne aseɛ, 30 bɔ bɛngɔbɔ ye nwo 100 bɛngɔma ye ɔ. Okonya aliemaa mmrienzua, aliemaa mmrasua, maame mɔ, baba mɔ, mmaa, ne aseɛ wɔ wiase he anu, na bɛkɔtane ye nye koso. Na okonya daa ngoa wɔ wiase foforɛ bɔ ɔba nanu. 31 Nakoso bɛ bɔ bɛli moa nanu pee kɔha siɛ, ná bɛ bɔ baha siɛ ne koli moa."

32 Mmerɛ bɔ bɛnate atee so bɛfo bɛkɔ Yerusalem ne, Yesu tele ye nwo lili moa, na ɔyɛle asuafoɛ nemɔ nwanwa. Na né bɛ bɔ bɛli ye si ne suro. Osa fale buru-ne-nyɔ ne hɔle ahameɛ, na ɔhyɛle yebo hane nningyein bɔ ɔbaato ye ne hyirele bɛ kyɛ: 33 "Ɛmɔnea, yɛfo yɛkɔ Yerusalem, na bɛkɔfa Sona Awa ne bɛkowura sɔfo mbanyi ne atwerɛfoɛ ne sa. Bɛkobu ye kumfɔ, na bafa ye bawura Maen-maen nanufoɛ ne sa, 34 na sɔ mmenia nemɔ kɔgoro ye nwo, bɛkɔtete ngɔserɛ bɛkogua ye nyunu, bɛkogwa ye, na bahu ye. Nakoso ɛlɛsa si ne, okotingye."

35 Na Sebedeo mmaa Yakobo ne Yohane wale Yesu berɛ, na bɛha bɛhyirele ye kyɛ: "Kyerɛkyerɛniɛ, bɔ yɛkɔfa yɛkɔto wɔ nyunu biala, yɛpena kyɛ ɛyɛ ma yɛ." 36 Obisale bɛ kyɛ: "Nzu yeɛ ɛmɔpena kyɛ meyɛ mema ɛmɔ ɔ?" 37 Bɛhane kyɛ: "Yɛpena kyɛ ɛmaa yɛ nu kõ tena wɔ bɛen, na kõ tena wɔ famaa wɔ w'anuonyam nu." 38 Nakoso, Yesu ha hyirele bɛ kyɛ: "Ɛmɔnze nikye bɔ ɛmɔ bisa ne. Kwangoa bɔ mebaano ne, ɛmɔ kɔhora ye no? Na asu bɔ bɛbaabɔ me ne, ɛmɔ kɔhora bie bɔ?" 39 Bɛhane kyɛ: "Yoo, yɛkɔhora." Yeɛ Yesu ha hyirele bɛ kyɛ: "Kwangoa ne de, ɛmɔ kɔno, na asu ne koso, ɛmɔ kɔbɔ. 40 Nakoso, me bɛen so ne me famaa so de, ɔtte me deɛ, ná mafa mama ɛmɔ; ɔte bɛ bɔ me Baba asiesie ama bɛ ne deɛ." 41 Buru bɔ baha ne tele ɛhe ne, bɛfɛle Yakobo ne Yohane so yaa paa. 42 Yeti Yesu frɛle bɛ, yeɛ ɔha hyirele bɛ kyɛ: "Ɛmɔse kyɛ bɛ bɔ bɛdi maen-maen nanufoɛ naso ne de, bɛdi mmenia naso bakoma, na atitire ne fa bɛ tumi hyɛ bɛ so. 43 Nakoso, ɛmɔ de, nnɛmɔ maa ɔba ye sɔ; mmom ebiala bɔ ɔpena kyɛ ɔyɛ titire ne, odikyɛ ɔsõ bɛ bɔ baha ne, 44 na bɔ ɔpena kyɛ odi anyunu ne, odikyɛ ɔyɛ ɛmɔ mukoraati akoaa. 45 Ofikyɛ, Sona Awa ne po amma kyɛ bɛsõ ye, mmom ɔwale kyɛ ɔbaasõ na ɔfa ye ngoa* yɛ agyedeɛ, fa dɛ́ mmeni pee."

46 Afei, ɔwale Yeriko. Na mmerɛ bɔ ɔne ye asuafoɛ nemɔ ne mmeni lɔen ne fi berɛ kɔ ne, né Timeo awa Bartimeo, anyesiniwaaniɛ bɔ ɔsrɛ-srɛ nikye ne te atee né noa. 47 Mmerɛ bɔ ɔtele kyɛ Nazerɛtniɛ Yesu yeɛ ɔkɔ ne, ɔhyɛle yebo teɛteane nu kyɛ: "Yesu, David awa, nwu me anwunvo!" 48 Mmeni pee teɛteane ye, na bɛha bɛhyirele ye kyɛ, omua ye noa, nakoso ɔteɛteanu nu serɛ kyɛ: "Yesu, David awa, nwu me anwunvo!" 49 Yeti Yesu gyinane, na ɔhane kyɛ: "Ɛmɔfrɛ ye bɛma me." Yeti, bɛfrɛle anyesiniwaaniɛ ne, na bɛha bɛhyirele ye kyɛ: "Ka w'ahone to wɔ kunu, dwɔso, yenwa ɛbra." 50 Ogyile ye atadeɛ ne guale nekaa bie, yeɛ ɔdwɔso hɔle Yesu nwo berɛ ɔ. 51 Yesu bisale ye kyɛ: "Nzu yeɛ ɛpena kyɛ meyɛ mema wɔ ɔ?" Anyesiniwaaniɛ ne hane kyɛ: "Rabboni, ma nwu nikye." 52 Yesu ha hyirele ye kyɛ: "Kɔ, wɔ gyidie amaa wɔ nwo atɔ wɔ." Na ɛberɛ nala ye nye ne tele, na olili ye si wɔ atee naso.