1 Ɔhyɛle yebo fale mvandoho hyirehyirele bɛ kyɛ: "Biaa bie yɛle bobe boo, olɛle ye nwo, otule nekaa bɔ bɛtwi nzãa wɔ nu, na osili awaen tendee wɔ nu. Afei ɔfa yakyile ahwɛsofoɛ, na otuli atee. 2 Mmerɛ bɔ bɛtele bobe ne, ɔsomane ye akoaa kyɛ ɔhɔ ahwɛsofoɛ ne berɛ, na oole ye kyɛfa deɛ berɛ ye. 3 Nakoso, bɛhyele akoaa ne. Bɛbole ye, yeɛ bɛmaa ɔfale ye sa nzaa-nzaa hɔle ɔ. 4 Ɔsomane akoaa foforɛ, na bɛfale nikye bɛbɔle ye ti anu, na bɛguale ye nyunu ase. 5 Osa somane akoaa foforɛ, na ye de, bɛhuni ye. Ɔsomane mmeni pee, na bɛbole ebiemɔ, yeɛ bɛhuni bɛ ngaa ne. 6 Né waha sona kõ, ye dɔba ne. Ɔsomane ye dɔ, na ɔhane kyɛ: ‘Mma ne de, bɛkɔfɛle ye.’ 7 Nakoso, ahwɛsofoɛ nemɔ ha hyirele bɛ nwo kyɛ: ‘Koliagyaa ne ɛhe. Ɛmɔbra ma yɛhu ye, na afei agyapadeɛ ne ayɛ yɛ deɛ.’ 8 Yeti, bɛhyele ye bɛhuni ye, na bɛgyili ye bɛtole ɛboo ne si. 9 Nzu yeɛ ɛboo ne wura ne kɔfa kɔyɛ bɛ ɔ? Okohu ahwɛsofoɛ nemɔ, ná wafa bobe boo ne wama mmeni foforɛ. 10 Aso ɛmɔ kenngale sɔ tworɔnzɛm he lle:

‘Nyɔboɛ bɔ brekyafoɛ ne gyi tole ne,

ɛhene yeɛ waayɛ nyɔboɛ bɔ ye nwo hia paa ne.

11 Ɛhe fi Awurade berɛ,

na ɔyɛ yɛ nwanwa’? "

12 Ɛhe ati, né bɛpena kyɛ bɛkye ye, ofikyɛ né bɛse ye paa kyɛ bɛ ti yeɛ ɔyɛle sɔ mvandoho ne. Nakoso né bɛsuro mmenia ne, yeti bɛyakyile ye berɛ bɛhɔle.

13 Ye si ne, bɛsomane Farisifoɛ nanu biemɔ ne bɛ bɔ bɛta Herode si ne bie, kyɛ bɛyɛ ma ɔha edwirɛ bie, na wamaa banya ye. 14 Bɛdwuli berɛ ne, bɛha bɛhyirele ye kyɛ: "Kyerɛkyerɛniɛ, yɛse kyɛ ɛka nahorɛ, na ɛmbena anuonyam wɔ ebiala nyunu, ofikyɛ ɛnnea sona nyunu, na bɔ ekyirekyire fa Nyameɛ nwo ne koso te nahorɛ. Mmeraa ma atee kyɛ yɛtua toɔ yɛma Kaesare, anaa ɔmma ate? 15 Yɛ tua, anaa nnɛmaa yɛtua?" Nakoso, Yesu nwuni bɛ nyaatwom ne, na ɔhane kyɛ: "Nzuati yeɛ ɛmɔ baasɔ me bɛnea ne? Ɛmɔma me dɛnare ne kõ ma nnea." 16 Yeti bɛbrɛle ye kõ, yeɛ obisale bɛ kyɛ: "Nwa foto ne ye sa noa yeɛ ɔwɔ so ne?" Bɛhane kyɛ: "Kaesare." 17 Yeɛ Yesu ha hyirele bɛ kyɛ: "Ɛmɔtua Kaesare deɛ bɛma Kaesare, na ɛmɔtua Nyameɛ deɛ bɛma Nyameɛ." Na ye nwo yɛle bɛ nwanwa paa.

18 Afei Sadukifoɛ bɔ bɛnwa bɛngɔtingye awufo ne wale ye berɛ, na bɛbisale ye kyɛ: 19 "Kyerɛkyerɛniɛ, Mose hworɔle kyɛ,* sɛ brienzua bie anwo mmaa na owu a, odikyɛ oliema brienzua gya ɔye ne, na ɔwo mmaa ma oliema ne. 20 Né aliemaa mmrienzua nzoo bie wɔ berɛ. Bɔ oli moa ne gyale braa, nakoso ɔne ye annwo, yeɛ owuli ɔ. 21 Bɔ ɔtɔ so nyɔ ne gyale kunaniɛ ne, na ye koso ɔne ye annwo, bɔ ɔtɔ so nza ne koso yɛle sɔ ala. 22 Mmrienzua nzoo namukoraati ne ye annwo. Afei brasua ne wuli. 23 Sɛ bɛtingye bɛ a, nwa yeɛ okogya brasua ne ɔ? Ofikyɛ mmrienzua nzoo namukoraati gyale ye."

24 Yesu ha hyirele bɛ kyɛ: "Ɛhe ati yeɛ ɛmɔdi mvomsoɛ ne, ofikyɛ ɛmɔnde tworɔnzɛm nabo, ná ɛmɔnze Nyameɛ tumi. 25 Sɛ bɛtingye awufo a, mmrienzua ngogya, na bɛngɔfa mmrasua koso bɛngɔma agyaa. Bɛkɔyɛ kyɛ abɔfo bɔ bɛwɔ anwuro ne. 26 Na ɔfa awufo bɔ bɛkotingye bɛ nanwo ne, ɛmɔ kenngale Mose nwomaa ne, edwirɛ bɔ ɔfa ndire nanwo ne? Ɛberɛ yeɛ Nyameɛ ha hyirele ye kyɛ: ‘Nde Abraham Nyameɛ, Isaac Nyameɛ, ne Yakob Nyameɛ’ ne. 27 Ɔtte awufo Nyameɛ, mmom ateasefoɛ Nyameɛ. Ɛmɔdi mvomsoɛ paa."

28 Atwerɛfoɛ nanu kõ tole b'aporowaa naso. Na mmerɛ bɔ onwuni kyɛ Yesu ama bɛ mmuayɛ bɔ ɔtɔ asoɛ nu ne, obisale ye kyɛ: "Mmeraa nanu beni yeɛ oli moa ɔ?"* 29 Yesu hane kyɛ: "Bɔ oli moa yeɛ ole ɛhe, ‘O Israel tie, Awurade yɛ Nyameɛ te Awurade kõ, 30 na odikyɛ ɛfa w'ahone mukoraati, wɔ kra mukoraati, w'adwene mukoraati, ne w'anwoserɛ mukoraati dɔ Awurade wɔ Nyameɛ.’ 31 Bɔ ɔtɔ so nyɔ yeɛ ole ɛhe: ‘Dɔ wɔ mmango kyɛ wɔ nwo.’ Mmeraa biala nne berɛ bɔ ɔtra ɛhemɔ ɔ." 32 Ɔha hyirele Yesu kyɛ: "Kyerɛkyerɛniɛ, bɔ aha ne te nahorɛ turoloo, ‘Ɔte komapɛ,’ na ebiala nne berɛ bɔ ɔte kyɛ ye, 33 na sɛ ɛfa w'ahone mukoraati, w'adwene mukoraati, ne w'anwoserɛ mukoraati dɔ ye, na ɛdɔ wɔ mmango kyɛ wɔ nwo a, ɔtra ngaka afɔleɛ* ne afɔleɛ biala." 34 Yesu nwuni kyɛ biaa ne mmuayɛ nanu la berɛ, yeti ɔha hyirele ye kyɛ: "Ɛne Nyameɛ Ahennie n'afia nnwale." Na ebiala annya akukuduro ammisa ye dwirɛ biala kõ.

35 Na mmerɛ bɔ Yesu yɛ ngyerɛkyerɛ wɔ asɔre awuro berɛ ne, obisale kyɛ: "Nzuati yeɛ atwerɛfoɛ nemɔ ka kyɛ Kristo ne te David awa ɔ? 36 Ofikyɛ honhom krongron ne maa David hane kyɛ:

‘Awurade ha hyirele me wura kyɛ:

"Tena me sa famaa so,

kodwu kyɛ ngɔfa w'atamfo

ngogua wɔ gya bo." ’

37 Yeti, David bɔbɔ frɛle ye me wura; ye de, ɔwale ye sɛ yeɛ ɔte ɔwa ɔ?" Na né mmeni lɔen ne fa anigye tie ye.

38 Ogu so okyirekyire ne, ɔhane kyɛ: "Ɛmɔnea ɛmɔ nwo yé wɔ atwerɛfoɛ nemɔ nwo, bɛ de, bɛkuro ndadeɛ ndendee wuralɛ ne dwaaso ngyeaa. 39 Na sɛ bɛkɔ sua bɔ beyia nu nanu a, bɛkuro anyunu bia, ná bɛpena mbanyi bia wɔ paati bo. 40 Nakoso bɛsisi kunaniɛ bedɛ ye nwo nningyein, na nyaatwom ti, bɛbɔ mbaeɛ tendebaa. Asotwe bɔ ɔkɔwa bɛ so ne, ɔkɔtra ebiala deɛ."

41 Yesu tenane ase, na né ye nye tua sikaa alaka ne, né ɔnea bɛ bɔ bɛfa sikaa bɛgua alaka nanu ne. Ná asikafoɛ pee fale sikaa pee guale nu. 42 Na brasua kunaniɛ hianiɛ bie wale, na ɔfale ngaprɛ nyɔ bɔ ɔngora hwee tɔ guale nu. 43 Yeɛ Yesu frɛle ye asuafoɛ nemɔ wale ye nwo berɛ, na ɔha hyirele bɛ kyɛ: "Nahorɛ dwirɛ yeɛ ole kyɛ,* bɛ bɔ bafa sikaa bagua alaka nanu ne, kunaniɛ hianiɛ he deɛ ne yeɛ ɔsone ɔ. 44 Ofikyɛ bɛ mukoraati, bɔ banya ye maa wabo bɛ so ne bie yeɛ bɛfa bɛguale nu ɔ, nakoso maame ne de, ofi ye hiaa nu wafa bɔ ole ye biala, bɔ ɔkɔfa kɔnea ye nwo namu, yeɛ wafa wagua nu ne."