1 Yesu sa yɛle mvandoho foforɛ kyɛ: 2 "Anwuro Ahennie ne te kyɛ ɔhene bie bɔ ɔyɛle paati mane ɔwa brienzua bɔ ɔyɛ ayeforɔ. 3 Ɔsomane ye ngoaa kyɛ bɛɛfrɛ bɛ bɔ bɛtole bɛ sa bɛfrɛlɛ bɛ ne, nakoso ne bɛnguro kyɛ bɛba. 4 Osa somane ngoa foforɛ, na ɔha hyirele bɛ kyɛ: ‘Ka kyerɛ bɛ bɔ yɛfrɛle bɛ ne kyɛ: "Masisie m’aleɛ ne mayie, mahu me nandwie nyii mɔ ne ngaka bɔ balɔ, na masiesie nikye biala mayie."’ 5 Nakoso, bandɛ bɛ so, na ebiala hɔle ye atee, kõ hɔle ye fiɛso, yeɛ kõ koso hɔle ye dwaa. 6 Bɛ bɔ baha ne hyele ngoaa ne, bɛguale bɛ nyunu ase, na bɛhuni bɛ. 7 Ɔhene ne fɛle yaa paa, na ɔsomane ye sogyafoɛ nemɔ maa bɛɛhuni sɔ awudifoɛ ne, na bɛyerale bɛ kuro ne. 8 Yeɛ ɔha hyirele ye ngoaa ne kyɛ, ‘Ayeforɔ ne adwu so, nakoso bɛ bɔ bɛfrɛle bɛ ne, bɛmvata. 9 Yeti, ɛmɔhɔ atee nemɔ aso, na ebiala bɔ ɛmɔ konwu ye ne, ɛmɔfrɛ ye ma ɔbra ayeforɔ ne abo.’ 10 Yeti, ngoaa ne hɔle atee nemɔ aso, na bɛfrɛle ebiala bɔ bɛnwuni ye, mmeni pa ne mmeni tɛɛ. Na sua bɔ bɛyɛ ayeforɔ wɔ nu nanu yili tɛkyɛ.

11 "Nakoso ɔhene ne wale kyɛ ɔbaanea mmenia bɔ bawa ne, onwuni biaa bie, ye de, né owurra ayeforɔ atadeɛ ne bie. 12 Obisale ye kyɛ: ‘Me damvo, ewurra ayeforɔ atadeɛ ne bie, yeti ɛyɛle sɛɛ yeɛ ɛwale wa ɔ?’ Ná wangora dwudwo. 13 Yeɛ ɔhene ne ha hyirele ye ngoaa nemɔ kyɛ, ‘Ɛmɔkyekye ye gya ne ye sa, na ɛmɔgyi ye bɛto awosii nanu wɔ aluo dɔ. Ɛberɛ yeɛ okosu ná wanwose ye gye ɔ.’ 14 Ofikyɛ bafrɛ mmeni pee, nakoso kaa bie baye bɛ ɔ."

15 Farisifoɛ nemɔ hɔle, ná bɛɛpenane atee bɔ bɛkɔfa so bɛkɔmaa ɔkɔha edwirɛ bie, ne banya ye. 16 Yeti, bɛsomane b’asuafoɛ ne, ɔne bɛ bɔ bɛta Herode si ne maa bɛɛbisale ye kyɛ: "Kyerɛkyerɛniɛ, yɛse kyɛ ɛka nahorɛ, na bɔ ɛka fa Nyameɛ nwo ne koso te nahorɛ, ɛmbena anuonyam wɔ sona nyunu, yeɛ ɛnnea ebiala nyunu koso. 17 Yeti, w’adwene yɛ wɔ sɛ: Mmeraa ma atee kyɛ yetua toɔ yɛma Kaesare, anaa ɔmma ate?" 18 Nakoso né Yesu anwu adwemmɔne bɔ otira bɛ ne, yeti ɔha hyirele bɛ kyɛ: "Nyaatwomfoɛ, nzuati yeɛ ɛmɔ baasɔ me bɛnea ne? 19 Ma nnea sikaa bɔ ɛmɔfa betua toɔ ne." Yeti, bɛmane ye dɛnare kõ. 20 Na obisale bɛ kyɛ: "Nwa foto ne ye sa noa yeɛ ɔwɔ so ne?" 21 Yeɛ bɛhane kyɛ: "Kaesare." Yeti Yesu ha hyirele bɛ kyɛ: "Ye de, ɛmɔtua Kaesare deɛ bɛma Kaesare, na ɛmɔtua Nyameɛ deɛ bɛma Nyameɛ." 22 Bɛtele sɔ dwirɛ ne, bɛ nwo dwirili bɛ pa-pa, na bɛfili berɛ bɛhɔle.

23 Sɔ ɛlɛho nala, Sadukifoɛ bɔ bɛnwa bɛngɔtingye awufo ne wale ye berɛ, na bɛbisale ye kyɛ: 24 "Kyerɛkyerɛniɛ, Mose hane kyɛ: ‘Sɛ brienzua bie anwo mmaa na owu a, odikyɛ oliema brienzua gya ɔye ne, na ɔwo mmaa ma oliema ne.’ 25 Ye de, né yɛne aliemaa mmrienzua nzoo bie wɔ wa. Bɔ oli moa ne gyale braa, ɔne ye annwo yeɛ owuli ɔ. Yeti ɔyakyile ɔye ne mane oliema bɔ oli berɛ ne. 26 Sɔ ala yeɛ ɔtole bɔ ɔtɔ so nyɔ ne bɔ ɔtɔ so nza ne, maa oodwuli bɔ ɔtɔ so nzoo naso ɔ. 27 Afei, brasua ne wuli. 28 Yeti sɛ bɛtingye bɛ a, mmenia nzoo ne, nwa yeɛ okogya braa ne ɔ? Ofikyɛ bɛ nu biala gyale ye."

29 Yeɛ Yesu ha hyirele bɛ kyɛ: "Ɔnate kyɛ ɛmɔnde Tworɔnzɛm nabo, na ɛmɔnze Nyameɛ tumi nati, ɛmɔdi mvomsoɛ. 30 Ofikyɛ bɛtingye awufo a, mmrienzua ngogya, na bɛngɔfa mmrasua bɛngɔma agyaa. Mmom bɛkɔyɛ kyɛ abɔfo bɔ bɛwɔ anwuro ne. 31 Na ɔfa awufo bɔ bɛkotingye bɛ nanwo ne, ɛmɔ kenngale bɔ Nyameɛ ha hyirele ɛmɔ ne? Ɔhane kyɛ: 32 ‘Nde Abraham Nyameɛ, Isaac Nyameɛ, ne Yakob Nyameɛ.’ Ɔtte Awufo Nyameɛ, mmom ateasefoɛ Nyameɛ." 33 Mmenia ne tele ɛhe ne, ye ngyerɛkyerɛ ne yɛle bɛ nwanwa. 34 Farisifoɛ nemɔ tele kyɛ wamaa Sadukifoɛ nemɔ aha bɛ noa ato nu ne, bɛboale bɛ nwo noa. 35 Na bɛ nu kõ bɔ ɔse mmeraa nanu paa bisale ye dwirɛ kyɛ ɔfa sɔ ye nea. Obisale ye kyɛ: 36 "Kyerɛkyerɛniɛ, mmeraa ne, enu beni yeɛ ɔte piri ɔ?" 37 Ɔha hyirele ye kyɛ: "‘Fa w’ahone mukoraati, wɔ kra mukoraati, ne w’adwene mukoraati dɔ Awurade, wɔ Nyameɛ.’ 38 Sɔ ahyɛdeɛ he yeɛ oli moa ɔ, na ye yeɛ ye nwo hia paa ɔ. 39 Bɔ ɔtɔ so nyɔ ne, ɔte kyɛ ɛhene ala, yeɛ ole kyɛ: ‘Dɔ wɔ mmango kyɛ wɔ nwo.’ 40 Mmeraa ne né adiifoɛ namukoraati gyi ahyɛdeɛ nyɔ he aso."

41 Farisifoɛ ne boale bɛ noa ne, Yesu bisale bɛ kyɛ: 42 "Ɛmɔnwu Kristo ne sɛ? Nwa awa ɛne?" Bɛhane kyɛ: "David." 43 Yeɛ Yesu bisale bɛ kyɛ: "Ye de nzuati yeɛ honhom ne maa David frɛle ye me wura ɔ? Ofikyɛ ɔhane kyɛ:

44 ‘Awurade ha hyirele me wura kyɛ:

"Tena me sa famaa so

kodwu kyɛ ngɔfa w’atamfo

ngogua wɔ gya bo." ’

45 Yeti, sɛ David frɛ ye me wura de a, ɔwale ye sɛ yeɛ ɔte ɔwa ɔ?" 46 Ebiala angora anye ye noa. Na ofi sɔ kyẽa ne, ebiala ammɔ ye nwo mmusue ammisa ye dwirɛ biala kõ.