1 Kristo Yesu ngoaa Paul ne Timoteo,

yɛfa krataa he yɛkɔma Kristo Yesu nu akrongronfoɛ bɔ bɛwɔ Filipi namukoraati, bɔ asafo nu mbanyi* ne asomvoɛ nemɔ koso boka so:

2 Adom ne asomdwie bɔ ofi yɛ Baba Nyameɛ ne Yesu Kristo berɛ ha ɛmɔ.

3 Sɛ ɛmɔ nwo dwirɛ pe me ti anu biala a, meda Nyameɛ ase. 4 Na mmerɛ biala bɔ ngɔbɔ mbaeɛ ngɔma ɛmɔ ne, mefa anigye meyɛ sɔ, 5 ofikyɛ, ofi kyẽa bɔ ɛmɔtele nzɛmba ne tonn bɔ ɔbaadwu ɛnɛ ne, ɛmɔ aboka maa wahɔ ye nyunu. 6 Na medɛ́ medi kyɛ, ye bɔ ɔhyɛle adwuma pa bo wɔ ɛmɔ nu ne, kyɛ dee bɔ Kristo Yesu kyẽa ne bra ne, né wayie. 7 Ɔnate kyɛ ɛmɔla m’ahone so nati, ɔte pa kyɛ ngonya sɔ adwene ne ngɔfa ɛmɔ mukoraati nwo. Ofikyɛ ɛmɔ mukoraati, né ɛmɔta me si, mmerɛ bɔ bɛfale kyenyi bɛguale me sa, ɔne mmerɛ bɔ mmɔle nzɛmba nanwo waen wɔ mmeraa atee so ne. Yeti, mene ɛmɔ mukoraati anya adom ne bie. 8 Kyɛbɔ mafe ɛmɔ mukoraati ne, Nyameɛ yeɛ odi me adanzeɛ ɔ. Na kyɛbɔ Yesu Kristo kuro ɛmɔ dwirɛ ne, sɔ ala yeɛ mekuro ɛmɔ dwirɛ ɔ. 9 Na me mbaeɛ ole kyɛ, ɔdɔ bɔ ɛmɔle ye ne, ɔkɔhɔ so konyi wɔ nimdeɛ ne ndeaseɛ mukoraati nu, 10 kyɛbɔ ɔkɔyɛ a, ɛmɔ konwu nningyein bɔ ɔte pa* ne, ná ɛmɔ ayɛ mmenia bɔ ɛmɔ abrabɔ te kama, ná ɛmɔ ando ebiala sintidua kodwu kyẽa bɔ Kristo kɔwa ne. 11 Afei koso, tenenee mmaa bɔ Yesu Kristo ma ɛmɔsu ne, okoyi ɛmɔ dɛen, na wafa anuonyam ne ayɛyie wabrɛ Nyameɛ.

12 Aliemaa mɔ, mepena kyɛ ɛmɔnwu kyɛ, bɔ wato me ne, wamaa nzɛmba ne atrɛ, 13 ofikyɛ kyenyi bɔ bafa bagua me ne, awaen ne sogyafoɛ namukoraati ne ebiala ate kyɛ, Kristo ti yeɛ nna prizin ne. 14 Na kesaalae, kyenyi bɔ bafa bagua me sa wɔ prizin wa nati, aliemaa mɔ pee anya akukuduro wɔ Awurade nu, na bɛka Nyameɛ dwirɛ ne bɔ bɛnzuro hwee.

15 Ɔte nahorɛ kyɛ, ebiemɔ fa anyeborolɛ ne akansie bɛka Kristo nwo dwirɛ ne, nakoso ebiemɔ de, adwene pa yeɛ bɛfa bɛka ɔ. 16 Bɛ bɔ bɛfa adwene pa bɛka Kristo nwo dwirɛ ne, bɛyɛ ye wɔ ɔdɔ nu, ofikyɛ bɛse kyɛ baye me kyɛ mmɔ nzɛmba nanwo waen. 17 Nakoso bɛ bɔ bɛfa anyeborolɛ ne akansie bɛka Kristo nwo dwirɛ ne de, ahoɔyaa ti yeɛ bɛyɛ sɔ ne, b’adwene yeɛ ole kyɛ, bɛyɛ sɔ a, ɔkɔmaa me nwo kɔhyere me wɔ prizin wa. 18 Nakoso, nzu yeɛ wafi nu wawa ɔ? Bɔ ɔte yeɛ ole kyɛ, sɛ bɛyɛ ye wɔ sona nye so oo, sɛ bɛyɛ ye nahorɛ nu oo, Kristo nwo dwirɛ komapɛ nala yeɛ bɛka ɔ. Na ɛhe maa me nye gye, na ngɔhɔ so ngoli ahurusi, 19 ofikyɛ mese kyɛ, ɔnate ɛmɔ mbaeɛ, ne Yesu Kristo honhom nati, ngonya ngoa. 20 Ɛhe yeɛ menea ye atee paa, na me nye la so ne, na mese kyɛ me nyunu ngogua ase lle, mmom kyɛbɔ ɔte biala ne, ngoa nu oo, ewue nu oo, ngonya akukuduro wɔ me nipadua nu ngɔye Kristo ayɛ. 21 Na me de, Kristo ti yeɛ nde ase ɔ, na sɛ mewu a, ɔte mvasoɛ ma me. 22 Na sɛ metena ase wɔ anwoɔnaen nu a, ɔkɔmaa m’adwuma kɔhɔ ye nyunu. Nakoso bɔ ngɔyɛ ne de, menze.* 23 Nningyein nyɔ ne, mennwu bɔ ɔte pa ɔ. Nyane ye a, ahaa manya me nwo matete maaboka Kristo so, ɛhene mmom yeɛ ahaa ɔte pa ɔ. 24 Nakoso ɛmɔ ti, odikyɛ metena ase wɔ anwoɔnaen nu. 25 Nne gyidie wɔ ɛhe anu, yeti mese kyɛ ngɔnwondɛ, na mene ɛmɔ mukoraati atena ase, na wamaa ɛmɔ anya ngɔsoɛ ne anigye wɔ gyidie nanu, 26 na sɛ meba ɛmɔ berɛ a, me ti, ɛmɔ ali ahurusi maa waboso wɔ Kristo Yesu nu.

27 Yeti, ɛmɔbɔ ɛmɔ bra ma ɔfata Kristo nzɛmba ne, na sɛ mebasra ɛmɔ oo, mamma oo, mate ɛmɔ nwo dwirɛ kyɛ ɛmɔ agyina pindinn wɔ honhom kõ anu, ná ɛmɔfa ɔkra kõ bɛ pere bɛma nzɛmba nanwo gyidie ne, 28 bɔ ɛmɔnzuro bɛ bɔ bɛdwɔso betia ɛmɔ ne. Ɛhe te adanzeɛ bɔ okyire kyɛ bɛkɔsɛkye bɛ, na balɛ́ ɛmɔ ngoa, na ofi Nyameɛ berɛ. 29 Na ɛmɔ yeɛ Kristo ti, bafa ye nwo atee he bama ɛmɔ ɔ, nná kyɛ ɛmɔnya yenu gyidie mbaen, mmom yeti, odikyɛ ɛmɔnwu amaneɛ. 30 Ná koɛ komapɛ bɔ ɛmɔ nwuni kyɛ mekõ, ná ɛmɔte kyɛ ndɛ́ kõ ne, ɛhene ala bie yeɛ ɛmɔ kõ ne.