1 Afei nniema mɔ, ɛmɔli ahurusi wɔ Awurade nu, ɔnha me kyɛ ngɔhworɔ nikye komapɛ nala ngɔ berɛ ɛmɔ bieku ɔ, ɛhene mmom yeɛ ɔkɔbɔ ɛmɔ nwo waen ɔ.

2 Ɛmɔnea ɛmɔ nwo yé wɔ sɔ ngyea nemɔ nwo, ɛmɔnea ɛmɔ nwo yé wɔ bɛ bɔ bɛpira mmenia* nanwo, ɛmɔnea ɛmɔ nwo yé wɔ bɛ bɔ basɔ toa pɛlɛ nu twann nanwo. 3 Ofikyɛ yɛ mmom yeɛ bapɛ yɛ toa paa ɔ, yɛ bɔ yɛnate Nyameɛ honhom naso yɛyɛ ɔsom adwuma, yɛ bɔ yɛhoɔhoa yɛ nwo wɔ Kristo Yesu nu, ná yɛmva yɛ nwo yɛndo anwoɔnaen so ne. 4 Ahaa ngɔhora ngɔfa me nwo ngɔto sɔ nningyein naso. Sɛ ebie adwene yɛ ye kyɛ, ole nikye bɔ ɔkɔfa kɔhoɔhoa ye nwo anwoɔnaen nu a, nne pee: 5 Bɛwole me ne, kyẽa bɔ ɔtɔ so mmɔtwɛ ne yeɛ bɛpɛle me toa ɔ; nde Israelniɛ bɔ ofi Bengyamin abusua nu, Hebriniɛ paa;* sɛ ɔba mmeraa nu koso a, nde Farisiniɛ, 6 sɛ bɛka ebie bɔ ɔbɔ ye nwo mmɔden a, nduli me nye nziele asafo naso paa; na sɛ ɔba mmeraa nanwo tenenee a, nde ebie bɔ edwirɛ nne ye nwo. 7 Nakoso nningyein bɔ né menwu ye kyɛ mvasoɛ wɔ so ne, Kristo ti, menwu ye kyɛ mvasoɛ nne so.* 8 Bɔ ɔte yeɛ ole kyɛ, m'Awurade Kristo Yesu nwo nimdeɛ bɔ waboso nati, mebu nningyein mukoraati kyɛ mvasoɛ nne so. Ye ti, mebu nningyein mukoraati kyɛ bɔla bie, kyɛbɔ ɔkɔyɛ a me sa kɔha Kristo, 9 na wanwu kyɛ mene ye ayɛ kõ. Nakoso ɔtte me bɔbɔ me tenenee bɔ ɔnate mmeraa naso ne, mmom tenenee bɔ ɔnate Kristo nu gyidie so, Nyameɛ tenenee bɔ ogyi gyidie so ne. 10 Bɔ ogyi me nye so yeɛ ole kyɛ ngonwu Kristo, ngonwu tumi bɔ bɛfa bɛtingyele ye ne, ngonwu ye amaneɛ ne bie, ná mawu ye wue bie, 11 na sɛ ɔkɔyɛ yé a, maboka bɛ bɔ bɛkoli moa bɛkotingye bɛ naso.

12 Ɔtte kyɛ ebia manya ɛhe dada, anaa mali mu mayie, na mmom bɔ yeti yeɛ Kristo Yesu yele me ne, mebɔ mmɔden menea sɛ́ ngodwu ye nwo a. 13 Aliemaa mɔ, mennwu me nwo kyɛ me sa aha ye dada, mmom nikye kõ yeɛ ole kyɛ, me maa me wora fi bɔ wapɛ nu ne, na metwe me nu kyɛ ngodwu bɔ ɔwɔ me nyunu nanwo, 14 mebɔ mmɔden kyɛ ngodwu botae nanwo, na wamaa me sa aha abasobɔdeɛ ne. Sɔ abasobɔdeɛ ne yeɛ ole anwuro frɛlɛ ne, na Nyameɛ kɔfa kɔma bɛ bɔ ɔnate Kristo Yesu so afrɛ bɛ ne. 15 Yeti, yɛbɔ yɛ nwo akwokwa ne, ɛmɔma yɛnya sɔ adwene ne, na sɛ ɛmɔle adwene foforɛ bie a, Nyameɛ kɔmaa ɛmɔ konwu adwene bɔ ɔfata ne. 16 Na nekaa bɔ yanya ngɔsoɛ yadwu ne, ɛmɔma yɛhɔ so yɛnate sɔ atee naso pɛpɛɛpɛ.

17 Aliemaa mɔ, ɛmɔ mukoraati ɛmɔsuesua me, na bɛ bɔ bɛbɔ bɛ bra kyɛbɔ yɛyɛle ye nwo nneasoɛ yɛmane ɛmɔ ne, ɛmɔnea bɛ koso. 18 Ebiemɔ wɔ berɛ a né metaa mebɔ bɛ dumaa, nakoso kesaalae, mebɔ bɛ dumaa a, né mesu, ofikyɛ bayɛ Kristo asɛnnua nanwo atamfo. 19 Bɛ awieɛ kɔyɛ sɛkyelɛ, bɛ nyameɛ yeɛ ole bɛ ko, na bɛ anuonyam yeɛ ole animguaseɛ. B'adwene wɔ aseɛ he aso nningyein so. 20 Nakoso yɛ de, anwuro yeɛ ɔte yɛ maen, na ɛberɛ yeɛ yɛnwondɛ paa kyɛ Awurade Yesu Kristo bɔ ɔte y'Agyenkwa ne kofi kɔwa ɔ. 21 Ye yeɛ ɔkɔfa ye tumi bɔ ɔkora maa ɔfa nningyein mukoraati wura ye bo naso kɔsesa yɛ nipadua bɔ ɔba ase he, maa ɔkɔyɛ kyɛ ye deɛ bɔ ole anuonyam ne.