1 Yeti, nniema mɔ, medɔ ɛmɔ, na mafe ɛmɔ paa, ɛmɔte meanigye ne m'abotire. Adɔfo, ɛmɔgyina pindinn sɔ ala wɔ Awurade nu.

2 Mesrɛ Euodia ne Sintike kyɛ benya adwene kõ wɔ Awurade nu. 3 Na me damvo bɔ mene wɔ yɛ adwuma,* mesrɛ wɔ, boka sɔ mmrasua hemɔ; né bɛboka me so mmerɛ bɔ né meyɛ nzɛmba nanwo adwuma ne; bɛne Klɛment ne me mmango mɔ bɔ mene bɛ yɛ adwuma namu. Bɛ mukoraati bɛ dumaa wɔ ngoa nwomaa nanu.

4 Ɛmɔli ahurusi wɔ Awurade nu daa, meka ye bieku: Ɛmɔli Ahurusi! 5 Ɛmɔma ebiala nwu ye kyɛ ɛmɔte edwirɛ bo. Awurade apingye. 6 Nnɛmɔ maa dadwene biala hyɛ ɛmɔ so, mmom nikye biala nu ne, ɛmɔfa mbaebɔ, ngotosrɛ, ne asennaa so bɛfa bɔ ohia ɛmɔ ne bɛto Nyameɛ nyunu. 7 Na Nyameɛ asomdwie bɔ ɔbo ndeaseɛ mukoraati so ne, ɔnate Yesu Kristo so kɔbɔ ɛmɔ ahone ne ɛmɔ adwene nwo waen.

8 Afei aliemaa mɔ, nikye biala bɔ ɔte nahorɛ, nikye biala bɔ odi mu, nikye biala bɔ ɔtengyɛ, nikye biala bɔ ye nwo te, nikye biala bɔ ɔyɛ nyemene, nikye biala bɔ ole dumaa pa, ɔne nikye biala bɔ ɔfata ayɛyie ne, ɛhene yeɛ ɛmɔdwene ye nwo ɔ. 9 Bɔ ɛmɔ asua bafi me berɛ, bɔ ɛmɔ alɛ́ bato nu, bɔ ɛmɔ ate, ɔne bɔ ɛmɔ anwu wɔ me nwo ne, ɛhene yeɛ ɛmɔyɛ ɔ. Na asomdwie Nyameɛ ne, ɔne ɛmɔ kɔtena.

10 Ɔyɛ me fɛ paa wɔ Awurade nu kyɛ, afei de ɛmɔsa bɛdwene me nwo bieku ɔ. Né ɛmɔdwene me nwo, nakoso, ɛmɔ annya atee banna ye ali. 11 Ɔtte kyɛ me nwo ahyere me ti yeɛ meka ɛhe ɔ, ofikyɛ masua kyɛ, kyɛbɔ tebea ne te biala ne, ngɔmaa me nye kɔsɔ bɔ nne ye biala. 12 Mese hiaa di paa, na mese atee bɔ bɛfa so benya bɛ nwo ɔ. Nikye biala nu, ne tebea biala nu ne, sɛ me ko ayi oo, mekye ɛhɔen oo, nne bie oo, wahia me oo, masua kyɛbɔ ngɔtena ɔ. 13 Kristo bɔ ɔma me anwoserɛ nati, mekora meyɛ nikye biala.

14 Ɛmɔ ayɛ nikye paa kyɛ ɛmɔ anwu m'amaneɛ ne bie ɔ. 15 Filipifoɛ, ɛmɔse ye koso kyɛ, mmerɛ bɔ ɛmɔli moa bɛtele nzɛmba ne, mmerɛ bɔ mvili Makedonia ne, asafo biala nne berɛ bɔ ɔne me hyɛle nningyein ɔ, sana ɛmɔ ngome. 16 Na mmerɛ bɔ ne nwɔ Tɛsalonika ne po, ɛmɔ fale bɔ mehia bɛbrɛle me, ɛmɔ anyɛ kõ, mmom ɛmɔ yɛle ye pɛnyɔ. 17 Nná akyɛdeɛ yeɛ mepena ɔ, mmom mmaa bɔ ɔkɔmaa ɛmɔ konya mvasoɛ yeɛ ohia me ɔ. 18 Manya bɔ mehia biala maa wabu so, na kesaalae bɔ me sa aha ɛmɔ akyɛdeɛ bɔ ofi Epafrodito dɔ ne po de, hwee nhia me kõ. Bɔ ɛmɔfa bɛwale ne, ɔbo fona, na ɔte afɔleɛ bɔ ɔfata na ɔsɔ Nyameɛ nye. 19 Na ɔnate kyɛ, me Nyameɛ ahonyadeɛ sone nati, ɔkɔmaa ɛmɔ sa kɔha bɔ ɛmɔ hia biala, nate Yesu Kristo so. 20 Yɛ Nyameɛ ne yɛ Baba ne, ye yeɛ anuonyam ha ye daa daa. Amen.

21 Ɛmɔhyea akrongronfoɛ bɔ bɛwɔ Kristo Yesu nu namukoraati bɛma me.

Aliemaa mɔ bɔ bɛwɔ me nwo wa ne nwa bɛkyea ɛmɔ.

22 Akrongronfoɛ namukoraati nwa bɛkyea ɛmɔ, ɛnga-nga bɛ bɔ bɛwɔ Kaesare awuro berɛ ne.

23 Y'Awurade Yesu Kristo adom ha ɛmɔ, mmerɛ bɔ ɛmɔda suban pa ali ne.