1 Yeti, sɛ ɛmɔ kɔhora bɛkɔhyɛ ebie nguraen wɔ Kristo nu, sɛ ɛmɔ kɔkyekye ebie wora wɔ ɔdɔ nu, sɛ honhom nu adamvoa bie wɔ berɛ, na sɛ ahunu-ndetelɛ ne anwunvoin bie wɔ berɛ a, 2 ye de, sɛ ɛmɔnya adwene kõ, ɛmɔdodɔ ɛmɔ nwo, ɛmɔyɛ kõ, na ɛmɔnya botae kõ a, na ɔkɔmaa m'anigye koli mu. 3 Nnɛmɔfa manzoin* anaa nduhoɛ* bɛyɛ nikye fee, mmom ɛmɔbrɛ ɛmɔ nwo ase, na ɛmɔbu afoforɛ kyɛ bɛtra ɛmɔ. 4 Nná bɔ ohia ɛmɔ ngome yeɛ odikyɛ ɛmɔdwene ye nwo ɔ, mmom ɛmɔdwene ɛmɔ mmango mɔ nwo.

5 Ɛmɔnya adwene bɔ ne Kristo Yesu le ye ne bie:

6 Ɔwɔ nu, né ye tebea ne ayɛ kyɛ Nyameɛ,

nakoso, wannya adwene lle,

kyɛ ɔne Nyameɛ kɔyɛ pɛ.

7 Mmom, ɔyakyile nikye biala berɛ,

yɛle ye nwo te kyɛ akoaa,

na ɔwa maa bɛwole ye kyɛ kuro sona.

8 Na mmerɛ bɔ onwuni kyɛ ɔte sona ne,

ɔbrɛle ye nwo ase,

na ɔyɛle sotie tonn oodwule ewue nu,

asɛnnua so wue nu.

9 Yeti, Nyameɛ apagya ye ahɔ anwuro paa,

na wama ye dumaa bɔ ɔtra dumaa biala.

10 Yeti, Yesu dumaa nu yeɛ odikyɛ ebiala* koto ɔ,

bɛ bɔ bɛwɔ anwuro, aseɛ so, ɔne aseɛ bo mukoraati.

11 Ná odikyɛ temverema biala ka kyɛ Yesu Kristo te Awurade,

na ɔfa hyɛ Baba Nyameɛ anuonyam.

12 Yeti adɔfo, kyɛbɔ daa ɛmɔyɛ sotie mmerɛ bɔ nwɔ berɛ, na nne berɛ po a, ɛmɔyɛ maa ɔbo so ne, ɛmɔhɔ so bɛfa esuronyi ne ahopopo bɛyɛ ɛmɔ bɔbɔ ɛmɔ ngoa nwo adwuma. 13 Ofikyɛ Nyameɛ yeɛ ɔyɛ adwuma wɔ ɛmɔ nu, kyɛbɔ ɔkɔyɛ a, ɛmɔ konya ye nwo anigye, ná ɛmɔ anya anwoserɛ bɔ ɛmɔ kɔfa bɛkɔyɛ bɔ okuro ɔ.

14 Nnɛmɔfa anwii-nwii ne aporowaa bɛyɛ nikye fee, 15 ná wamaa ɛmɔ ayɛ mmenia bɔ edwirɛ nne bɛ nwo, ná ɛmɔte kronn, Nyameɛ mmaa bɔ ngekayɛɛ biala nne bɛ nwo wɔ aworɛ ndoɔtoasoɛ bɔ wakondo na wahyea he anu, na ɛmɔ ata kyɛ kanea wɔ wiase, 16 bɔ ɛmɔtira ngoa dwirɛ nanu. Ná kyẽa bɔ Kristo kɔwa ne, me koso mahora mali ahurusi, ofikyɛ mese kyɛ manndu mirika ne mbaen, na mamvɛ mangua. 17 Na sɛ ɔba kyɛ bɛhwie me kyɛ nzãa afɔleɛ bɛgua ɛmɔ afɔleɛ, ne ɔsom adwuma bɔ ɛmɔ gyidie ti ɛmɔyɛ naso a, ɔyɛ me fɛ, na mene ɛmɔ mukoraati di ahurusi. 18 Yeti, ɛmɔ koso, ɛmɔma ɛmɔ nye gye, na ɛmɔ ne me li ahurusi.

19 Me nye la so wɔ Awurade Yesu nu kyɛ, ɔngɔhyɛ ngɔsoma Timoteo ngɔwa ɛmɔ berɛ, na sɛ ɔmaa mete ɛmɔ nga a, m'ahone kɔtɔ me kunu. 20 Nnne ebiala bɔ ɔkofia ye kunu koli ɛmɔ haw nwo dwumaa te kyɛ ye ɔ. 21 Bɛ ngaa ne de, bɛ ngome bɛ nwo yeɛ bɛdwene ɔ, bɛndwene Yesu Kristo adwene. 22 Kyɛbɔ ɛmɔse ne, Timoteo de, ɔne me yɛle adwuma te kyɛ akwalaa ne ye baba maa yɛtrɛle nzɛmba nanu. 23 Me nye la so kyɛ, sɛ menya menwu bɔ ɔkɔ ala pɛ, ngɔsoma ye. 24 Na nne gyidie wɔ Awurade nu kyɛ, me bɔbɔ ngɔwa dɔ.

25 Nakoso, kesaalae de, menwu ye kyɛ odikyɛ mesoma Epafrodito meba ɛmɔ berɛ. Ɔte nniema bɔ mene ye yɛ adwuma, ná wayɛ kyɛ me mmango sogyaniɛ; matu ye kyɛ ɔɔso ɛmɔ. 26 Wafe ɛmɔ paa; na ɔha ye kyɛ ɛmɔtele kyɛ ne wafokyɛ ɔ. 27 Né wafokyɛ paa, ahaa owu, nakoso Nyameɛ nwuni ye anwunvo, nná ye ngome, me koso onwuni me anwunvo, na wamma me wora ammɔ soma. 28 Yeti mesoma ye ndɛ meba ɛmɔ berɛ, na sɛ ɛmɔnwu ye bieku a, ɛmɔ nye kɔgye, na m'adwene-dwene so ate. 29 Yeti, ɛmɔfa anigye bɛle ye kama wɔ Awurade nu, na ɛmɔfa nidie bɛma mmenia bɔ bɛte sɔ ne, 30 ofikyɛ Kristo adwuma nati, ɔhale dɛ́, ahaa owu, na ɔfale ye ngoa tole asane nu sili ɛmɔ gya nu sone me, ofikyɛ ne ɛmɔnne wa.