1 Me Yakobo, nde Nyameɛ ne Yesu Kristo akoaa,

metworɔ krataa he mekɔma abusuakue 12 bɔ babɔ bapete ne.

Mekyea ɛmɔ.

2 Nniema mɔ, sɛ ɛmɔyia nzɔhwɛ a, ɛmɔma ɛmɔ nye gye paa,* 3 ofikyɛ ɛmɔse kyɛ, sɛ bɛsɔ ɛmɔ gyidie bɛnea a, ɔkɔmaa ɛmɔ kɔfa animia bɛkogyina ɔhaw nu. 4 Ɛmɔma animia yie ye adwuma, kyɛbɔ ɔkɔyɛ a, ɛmɔ koli mu wɔ nikye biala nu, bɔ hwee ngohia ɛmɔ ɔ.

5 Sɛ ɛmɔ nu bie hia nyanza a, ma obisa Nyameɛ, na ɔkɔma ye bie. Ofikyɛ ofia ye kunu kyɛ ebiala nikye, bɔ animguaseɛ biala bokka so ɔ. 6 Nakoso ɔfa gyidie bisa, nnɛmaa ye adwene nu yɛ ye naa, ofikyɛ sona bɔ ye adwene nu yɛ ye naa ne, ɔte kyɛ ɛpo asorɔkye bɔ mvrama fa ye di akɔ-ne-aba ne. 7 Nnɛmaa sɔ sona ne nya adwene lle kyɛ okonya nikye bie kofi Awurade berɛ; 8 ɔte ebie bɔ y’adwene yɛ ye nyɔ-nyɔ, na ɔngora nzi ye adwene pi wɔ nikye biala nu.

9 Aliemaa bɔ ɔyɛ anwunvo* ne, ma oli ahurusi kyɛ bama ye so, 10 na sikaniɛ koso, oli ahurusi kyɛ babrɛ ye ase, ofikyɛ ɔkɔpɛ nu kɔhɔ te kyɛ flawa. 11 Kyɛbɔ eyia fite a, ɔbɔ gyein-gyein yera ndire ma ye flawa poro gua, ná ye anwo nyemene sɛkye ne, sɔ ala yeɛ sikaniɛ kɔyakyi ye ahonyadeɛ berɛ kɔhɔ ɔ.

12 Sona bɔ omia ye nye gyina nzɔhwɛ nu ne, onya anigye, ofikyɛ sɛ ɔkora gyina nzɔhwɛ nanu a, okonya ngoa abotire bɔ Awurade ahyɛ bɔ kyɛ ɔkɔfa kɔma bɛ bɔ bɛdɔ ye ne. 13 Sɛ ɛmɔ nu bie yia nzɔhwɛ a, nnɛmaa ɔka kyɛ, "Nyameɛ yeɛ ɔsɔ me nea ɔ." Ofikyɛ ɛngɔhora ngɔfa nikye tɛɛ* ngɔsɔ Nyameɛ ngɔnea, na ye koso, ɔnzɔ ebiala nnea. 14 Mmom bɔ ɔsɔ ebie nea yeɛ ole ye bɔbɔ ye akɔnnɔ bɔ ɔtwetwe ye, na ɔlaka-laka ye ne. 15 Sɛ akɔnnɔ ne nwonzɛ a, ɔwo bɔne, na sɛ bɔne ne nyi a, ɔwo ewue.

16 Aliemaa mɔ, nnɛmɔ maa bɛlaka-laka ɛmɔ. 17 Akyɛdeɛ pa, ne akyɛdeɛ bɔ odi mu biala fi anwuro; ofi kanea Baba ne berɛ, ye de ɔnzesa, na ɔtte kyɛ wawoɛ bɔ ɔkakyi-kakyi ne. 18 Ye bɔbɔ ye pɛ nu yeɛ ɔfale nahorɛ dwirɛ ne wole yɛ, kyɛ yɛɛyɛ ye abɔdeɛ nu nikye bɔ oli moa.

19 Aliemaa mɔ, ɛmɔtie ɛhe yé: Ebiala yɛ ndɛ tie edwirɛ, nnɛmaa ɔpere ye nwo dwudwo, na nnɛmaa ɔfɛ yaa ndɛ, 20 ofikyɛ sona fɛ yaa a, ɔnyɛ nikye bɔ ɔtengyɛ wɔ Nyameɛ nye so.* 21 Yeti, ɛmɔgyi efiɛ biala ne bɔne mukoraati bɛgua, na ɛmɔbrɛ ɛmɔ nwo ase ma bɛlua edwirɛ ne wɔ ɛmɔ nu, na ɛhene yeɛ ɔkɔhora kole ɛmɔ ngoa ɔ.

22 Ɛmɔfa edwirɛ ne bɛyɛ adwuma, ná nnɛmɔ tie ye mbaen, wanyɛ sɔ a, né ɛmɔ laka-laka ɛmɔ nwo. 23 Ofikyɛ ebie bɔ otie edwirɛ ne, na ɔmva nnyɛ adwuma ne, ɔte kyɛ ebie bɔ ɔnea ye nyunu wɔ ahwehwɛ nu. 24 Ɔnea yie a, né wahɔ, na ɛberɛ nala, ye wora fi kyɛbɔ ɔte ne. 25 Nakoso bɔ ɔpena ahofadie mmeraa bɔ ɔte pɛ, na ɔtena nu ne, ɔte ebie bɔ ɔfa edwirɛ ne yɛ adwuma, na ɔtte ebie bɔ otie edwirɛ ne a, né ye wora afi ɔ; na ye nye kɔgye kyɛ ɔyɛ sɔ ɔ.

26 Sɛ ebie nwu ye nwo kyɛ ɔsõ Nyameɛ, ná ɔnnea ye dwudwolɛ yé a, né ɔlaka-laka ye nwo.* Sɔ sona ne, ye som te mbaen. 27 Nyamesom bɔ odi mu, na efiɛ biala nne ye nwo wɔ yɛ Nyameɛ, ne yɛ Baba ne nyunu ɛhe: Kyɛ ebie kɔnea nyisiaa* ne akunafoɛ bɔ bɛ nwo ahyere bɛ ne, na wahwe ye nwo wafi wiase ngekayɛɛ nwo.