Atos 16

10 ಪೌಲಾನೆ ಎ ದರ್ಶನ ಥಯಲ ತೆಳಾಮಾಜ಼ ತೆ ಮನಕ್ಹೊನೆ ಚೊ಼ಕು ಸಂದೆಶ ಕವಾನೆ ಕ್ಹುದಾ ಹಮೊನೆ ಬಲಾಯೊಸ ಹಮೆ ತಿಳ್ದಿಲಿನ ಮೆಕೆದೊನಿಯಾನೆ ಜ಼ವಾನೆ ತಯ್ಯಾರ ಥಯಲ ಥಯಾ.

ಫಿಲಿಪ್ಪಿಮಾ

11 ಹಮೆ ತ್ರೊವಾಮಾ ಹಡಗೊ ಚ಼ಡಿನ ಸಮುಂದರಮಾತಾ ಸಿದಾ ಐನ ಸಮೊಥ್ರಾನೆ ಆಯಾ. ಮರ್ನಾ ದಿನ್ನೆ ನೆಯಪೊಲ ಮುಟ್ಟಿನ 12 ತ್ಯಾಂತಾ ಮೆಕೆದೊನಿಯಾನೆ ಖಾಸ ಗಾಮ ರ‍್ಹಯಲ ಪಿಲಿಪ್ಪಿನೆ ಆಯಾ. ಎ ರೊಮವಾಲಾವೊನೆ ಪ್ರವಾಸನೆ ಜ಼ಗಾ ಥಯುಸ. 13 ನದಿನಾ ದಂಡಿಯೆ ರ‍್ಹಯಲ ಕ್ಹುದಾನಿ ಪ್ರಾಥನಾ ಕರಾನಿ ಜ಼ಗಾ ಛೆ ಕೈನ ತಿಳ್ದಿನ ಸಬ್ಬತ ದಿನ್ಮಾ ಗಾಮ್ನಾ ಭಾರಾ ಗೈನ ತ್ಯಾ ಮಳಿನ ಆಯಲ ಬಾಕ್ಡಿಯೊನಾ ಕ್ಹಾತೆ ಬೈಟಿನ ಬೊಲ್ಯಾ. 14 ಹಮಾರಿಯೊ ವಾತೊ ಐಕಲವಾಲಾವೊಮಾ ಲುದ್ಯ ಕವಾಲಿ ಬಾಕ್ಡಿ ವ್ಹತ್ತಿ. ತೆ ಜಾ಼ಂಬ್ಳಾನೊ ಕಲರ್ನು ವಣ್ಣಾ ಇಕ್ಕಾಲಿ ಥುವತೈರ ಕವಾನಿ ಗಾಮವಾಲಿ ಕ್ಹುದಾನಿ ಪೌಲಾ ಕವಾನಿಯೊ ವಾತೊನೆ ಧ್ಯಾನ ದಿವಾಹುತಿ ಕರ್ತಾ ತಿನೆ ಮನಸ ಖುಲ್ಲಾ ಕರ‍್ಯೊ. 15 ತಿನಾ ಘರವಾಲಾ ಬಾಪ್ತಿಸ್ಮ ಕರೈಲಿದಲಪರ ತೆ ಕರ್ತಾನೆ ಬರೊಕ್ಹೊ ಕರಾಲಿ ವ್ಹೈ ಖಯನ ತುಮೆ ಮಾರಾ ಹುತಿತಿಳ್ದಿಲಿದಲ ರ‍್ಹವಾಮಾ ಮಾರಾ ಘರ್ಮಾ ಐನ ರ‍್ಹೌ ಕೈನ ಮಾಂಗಿಲಿನ ಹಮೊನೆ ವತ್ತಾಯ ಕರ‍್ಯೊ.

ಪೌಲಾ ವರಿ ಸಿಲಾನೆ ಜೆಲ್ಮಾ ಘಾಲಲ

16 ತೆ ತಯಲ್ಪರ ಪ್ರಾಥನಾ ಥಾವಾನಿ ಜ಼ಗಾಪರ ಅಪೆ ಜಾ಼ತಾಮಾ ಸಕ್ಣಾ ಕವಾಲಿ ಯಕ್ಕ ಹೆಣ ಮನಕ್ಹ ತ್ಯುನಾ ಕ್ಹಾಮಿ ಐ. ತೆ ಬಾಕ್ಡಿ ಸಕಾಣಾ ಕವಾಕ್ಹು ತಿನಾ ಮಾಲಕನೆ ಘನ್ನಿ ಆದಾಯಾ ಥಾತಿತಿ. 17 ಹಮೆ ಜಾ಼ತಾಮಾ ತೆ ಬಾಕ್ಡಿ ಹಮಾರಾ ಪಾಚಿ಼ ಐನ ಎ ಮನಕ್ಹೊ ಪರಾತ್ಪರ ಥಯಲ ಕ್ಹುದಾನಾ ಸೆವಕೊ ವ್ಹೈ; ತುಮೊನೆ ರಕ್ಷಣೆನು ಮಾರ್ಗ ದೆಕಾಡಾತಾ ರ‍್ಹವಸ. ಕೈನ ವದ್ರಿನ ಕತಿತಿ.