ಯೊನಾ ಯಹೊವಾನೆ ಅವಿಧೆಯ ಥಯಲ
1 ಯಕ್ಕ ದಿನ್ನ ಯಹೊವಾನಿ ವಾಕ್ಯಾ ಅಮತ್ಯನಾ ದಿಕ್ರಾನೆ ಯೊನ ಕವಾಲಾನೆ ಮಳಿ. ತೆ ಸವೈ ಕದ್ಯಾಮ, 2 ತು ಉಟ, ತೆ ನೆನಿವಿ ಕವಾಲಾ ಮ್ಹೊಟಾ ಗಾಮೆ ಗೈನ ಗಾಮನಾ ವಿರುಧ್ದ ಪ್ರಸಂಗ ಕರ ಕಾಕದ್ಯಾಮ ತ್ಯುನಾ ಕೆಟ್ಟ ಕಾಮೊ ಯಹೊವಾನಾ ಕ್ಹಾಮಾ ಭರಿಗಯಾಸ 3 ತೆ ನೈಸೊ ಯೊನಾ ಯಹೊವಾನೆ ಕ್ಹಾಮಾತೊ ದುರ ಜಾ಼ವಾನಾಹುತಿ ತಾರಷಿಸಿ ಗಾಮೆ ನಾಟಿ ಜಾವಾಹುತಿ ಯೊಪ್ಪಮಾ ಉತ್ರಿನ ತಾರ್ಷಿಶಿನೆ ಜಾ಼ವಾನಾಹುತಿ ಹಡಗಾಮಾ ಬೈಟೊ ವರಿ ತಿನಾಹುತಿ ತೆ ಪ್ರಯಾಣನಿ ಕಿಮ್ಮತ ದಿದ್ಯೊ.
4 ತೆಳಾಮಾ ಯಹೊವಾ ಮ್ಯೊಟೊ ವಾರೊ ಸಮುಂದರಪರ ಆವಾ ವರಕ್ಹು ಕರ‍್ಯೊ. ಸಮುಂದರಪರ ಮ್ಹೊಟು ತುಫಾನ ಐನ ಹಡಗೊ ಫುಟಿಜಾವಾ ವರಕ್ಹು ವ್ಹತ್ತೊ. 5 ತೆಳಾಮಾ ಹಡಗೊ ಚ಼ಲಾವಾಲಾ ಭುಚ಼ಕ್ಯಾ, ವರಿ ಯೆಕಕಲಾ ತಿವ್ನಾ ತಿವಾನಾ ದಿವಸ್ತಾನೊನೆ ವದರ‍್ಯಾ ಹಡಗೊ ಶಾಂತ ಕರುಕೈನ ವರಿ ಹಡಗಾನು ವಜ್ಜು ಕಮ್ಮ ಕರಾನಾ ಹುತಿ ತಿಮಾ ರ‍್ಹಯಲ ಸಾಮಾನ ಸಮುಂದರಮಾ ನಾಕ್ಯಾ ತೆಳಾಮಾ ಯೊನ ಹಡಗಾನಾ ಹೆಟ್ಲೆಭಾಗಮಾ ಗೈನ ಘನಿ ನಿಂದರ ಕರಾಡೊತೊ.
6 ಹಡಗಾನು ಖಾಸ ಅದಿಕಾರಿ ತಿಕನ ಐನ ಕದ್ಯೊ ತು ಕಾ ಕ್ಹುರೊಯೊಸ?. ತು ಉಟಿನ ಗೈನ ತಾರಾ ಯಹೊವಾನೆ ಪ್ರಾಥನಾ ಕರ ವರಿ ತಾರೊ ಯಹೊವಾ ಎ ನಾಶಕ್ಹು ಹಮ್ನೊನೆ ವಚಾ಼ಡ್ಸ.
7 ತೆಳಾಮಾ ಹಡಗಾ ಚಲಾವಾಲಾ ತ್ಯುನೊಮಾಜ಼ ಬಿಲ್ಲಿದ್ಯಾ. ಎ ತ್ರಾಸ ಆವಾನೆ ಕುನ್ನ ಕಾರಣ ವಸ ಕೈನ ಬೊಲ್ಲಿದ್ಯಾ? ಆವೊ ಚಿಟಿಯೊ ಘಾಲ್ಲಿನ ದೆಕಿಯೆ ಕೈಲೆತಾಮಾ ತಿಮ್ಮ ಕರ್ತಾಮಾ ಯೊನಾನಾ ನಾಮನಿ ಚಿಟಿ ನಿಕ್ಹಳಿ. 8 ತೆಳಮಾ ಹಡಗಾ ಚ಼ಲಾವಾಲಾ ಎ ದುರಂತನೆ ಕಾರಣ ಕುನ್ನ ವ್ಹೈ ಕೆ? ಕಯಾ ಕಾಮೆ ಆಯೊಸ? ತು ಕಜ್ಗಾತೊ ಆಯೊಸ? ತುಯಾ ಜನಂಗನೊ ವ್ಹೈ?. ತು ಕಯಾ ದೆಶ ವ್ಹೈ? ಕೈನ ಪುಚ್ಯಾ.
9 ತೆ ವಾತೆ ಯೊನಾ "ಮಿ ಹಿಬ್ರಿಯವಾಲೊ ವ್ಹೈ. ಸಮುದ್ರ ಭುಮಿ ತಯ್ಯಾರಕರಲ ಪರಲೊಕನೊ ಯಹೊವಾ ಥಯಲ ಸರ್ವೆಶಕ್ತನೊ ಭೆಮಾ ರ‍್ಹವಾಲೊ ವ್ಹೈ ಕೈನ ಕದ್ಯೊ. 10 ತೆ ನೈಸೊ ತೆ ಆ ಸ್ವಾಮಿನಾ ಸನ್ನಿಧಿಮಾತೊ ನ್ಹಾಟಿ ಚಾ಼ಲ್ಯೊಸ ಕೈನ ಕದ್ಯೊ.
ಎ ಐಕಲ ತ್ಯುನೆ ಘನ್ನಾ ಭುಚ್ಕಿನ ತಿನಿ "ತು ಆ ಸುಕರ‍್ಯೊ! ಕೈನ ಪುಚ್ಯಾ. 11 ತೆಳಾಮಾ ಸುಮುದ್ರಪರ ವರಿ ಝೊರ ವಾರೊ ಥಾವಾಡ್ಯಾತು. ತಿನಾಹುತಿ ತ್ಯುನೆ ತಿನೆ ಪುಚ್ಯಾ ನಾವಿಕೊ ಯೊನಾನೆ ಸಮುದ್ರ ಶಾಂತ ಥಾವಾದೆ ಕದ್ಯಾಮ ಹಮೆ ತುನೆ ಸು ಕರಿಯೆ" ಕೆ ಕೈನ ಪುಚ್ಯಾ.
12 ತೆಳಾಮಾ ಯೊನಾ ತ್ಯುನೊನೆ ಮನೆ ಉಚೈನ ಸಮುಂದರಮಾ ನಾಕೊ ತೆಳಾಮಾ ತುಫಾನ ಶಾಂತ ಥಾವಸ ಎ ತುಫಾನ ಆವಾನೆ ಕಾರಣಜ಼ ಮಿ ವ್ಹೈ ಕೈನ ಕದ್ಯೊ.
13 ಹಡಗಾಮಾ ರ‍್ಹಯಲವಾಲಾ ತೆ ವಾತೆ ವಪ್ಯಾವಾಚಿ಼ ಹಡಗಾನೆ ದಂಡಿಯೆ ವಾಪಾಸ ನಿಂಜಾವು ಕೈನ ಘನ್ನಿ ಕೊಶಿಶ ಕರ‍್ಯಾ ತ್ಯುನೊನೆ ಥಯು ನೈ ಕಾದ್ಯಾಮ ಸಮುಂದರ ಅಲ್ಲೊಲ ಕಲ್ಲೊಲ ಥಾವಾಡ್ಯುತು. 14 ಇಮ್ಮ ರ‍್ಹತಾಮಾ ತ್ಯುನೆ ಯಹೊವಾನೆ ಪ್ರಾಥನಾ ಕರ‍್ಯಾ ಹಮೆ ಆ ಮನಕ್ಹೊನು ಜ಼ಲಮ ಹಮಾರಾಹುತಿ ನಾಶ ಥಾವುನೈ ಅಪರಾದ ನೈಸೊ ರಗತ ಹಮೊಪರ ಚ಼ಡು ನಕೊ ಯಹೊವಾ ಆ ಕ್ಹಾರೊ ಆಯಲ ತಾರಿ ಚಿತ್ತ. 15 ಪಾಚಾ಼ತಾ ತ್ಯುನೆ ಯೊನಾನೆ ಉಚೈನ ಸಮುದ್ರಮಾ ನಾಕ್ಯಾ ತೆಳಾನಾ ತೆಳೆಜ಼ ಸುಮುದ್ರ ತಿನು ಅರ್ಭಾಟ ಹುಬ್ರಾಡಿನ ಶಾಂಥ ಥಯು. 16 ತೆಳಾಮಾ ತೆ ಮನಕ್ಹೊ ಯೆಹೊವಾಕ್ಹು ಘನ್ನಾ ಭುಚ಼ಕಿನ ಯಹೊವಾನೆ ಬಲಿ ಚಡಾಯಾ ವರಿ ಯೆಹೊವಾನೆ ಮನ್ನತ ಮಾಂಗ್ಯಾ.
17 ತೆ ಥಯಲಪರ ಯಹೊವಾ ಯೊನನೆ ಗಳಾನಾಹುತಿ ಮ್ಹೊಟಿ ಮಚ಼ಲ ಕರ‍್ಯೊ ಯೊನ ತೆ ಮಚಲಿನಾ ಪೆಟಮಾ ತನ್ನ ದಿನ್ನ ತನ್ನ ರಾತ ವ್ಹತ್ತೊ.