Mateus 2

ಪುರ್ವ ದಿಕ್ತಾ ಗ್ಯಾನಿಯೊ ದೆಕಾನೆ ಆಯಲ

1 ಹೆರೊದ ರಾಜೊ ಥಯಲ ಟೈಮಮಾ ಯೆಸು ಯುದಾಯನಾ ಬೆತ್ಲೆಹೆಮ ಕವಾನಾ ಗಾಮಮಾ ಹುಟ್ಯೊ. ಯೆಸು ಹುಟ್ಟಲ್ಪರ, ಪುರ್ವ ದೆಶನಾ ದಕ್ಹಾ ಗ್ಯಾನಿಯೊ ಯೆರುಸಲೆಮೆ ಆಯಾ. 2 ತೆ ಗ್ಯಾನಿಯೊ ಮನಕ್ಹೊನೆ, ಯೆಹುದಿಯೊನೊ ರಾಜೊ ಹುಟ್ಯೊಸ ತೆ ಕಿಜಾ ಛೆ? ತೆ ಹುಟ್ಯೊಸ ಕೈನ ದೆಕಾಡಾನಿ ಚಿಕ್ಕಿ ಪುರ್ವ ದಿಕ್ಕಮಾ ಹುಟ್ಟಲ ದೆಕಿನ ತಿನೆ ಆರಾಧನಾ ಕರಾನೆ ಆಯಾಸ ಕದ್ಯಾ.

3 ಯಹುದಿಯೊನಾ ಎ ನಯಾ ರಾಜಾ಼ನಿ ವಿಶಯ ಗ್ವತ್ತ ಥಯಲ್ಪರ ಹೆರೊದ ವರಿ ಯೆರುಸಲೆಮನಾ ಕ್ಹಾರಾ ಮನಕ್ಹೊ ಗಲಿಬಿಲಿ ಥಯಾ. 4 ತೆಳಾಮಾಜ಼, ಹೆರೊದ ಕ್ಹಾರ ಖಾಸ ಯಾಜಕೊನೆ ಶಾಸ್ತ್ರಿಯೊನೆ ಸಭೆ ಮಳೈನ ಕ್ರಿಸ್ತ ಹುಟ್ಟನಿ ಜ಼ಗಾ ಕೈ ವ್ಹೈ? ಕೈನ ಪುಚ್ಯೊ.

5 ತ್ಯುನೆ, ಯುದಾಯನಾ ಬೆತ್ಲೆಹೆಮ ಕವಾನಾ ಗಾಮಮಾ ಹುಟ್ಟಸ. ಕಾಕದ್ಯಾಮ ಪ್ರವಾದಿ ಪವಿತ್ರ ಗ್ರಂಥಮಾ ಇಮ್ಮ ಬರದ್ಯೊಸ.

6 ಯಹುದ ಸಿಮೆನಿ ಬೆತ್ಲೆಹೆಮ,

ಯಹುದನಾ ಖಾಸ ಗಾಮೊಮಾ ತು ನಕ್ಕರಬಿ ನ್ಹಾನು ನ್ಹವೈ.

ಯಕ್ಕ ಅದಿಪತಿ ತಾರಾಮಾತೊಜ಼ ಆವಸ,

ತೆ ಮಾರಾ ಮನಕ್ಹೊ ಥಯಲ ಇಸ್ರಾಯೆಲೊನೆ ಆಳಾಲೊ ವ್ಹೈ

ಕವಾನು ಪ್ರವಾದಿನಾ ಮುಲಕ ಬರ್ದಲ ಛೆ ಕೈನ ಕದ್ಯಾ.

7 ತೆಳಾಮಾ ಹೆರೊದ ಪುರ್ವ ದಿಕ್ಕನಾ ದೆಶನಾ ಗ್ಯಾನಿಯೊನೆ ಚೊ಼ರಿಕ್ಹು ಬಲೈನ, ತ್ಯುನೆ ತೆ ಚಿಕ್ಕಿನೆ ದೆಕಲ ಕರೆಕ್ಟ ಟೈಮ ತ್ಯುನೊಕಂತೊ ಗ್ವತ್ತ ಕರಿಲಿದ್ಯೊ. 8 ಹೆರೊದ ತೆ ಗ್ಯಾನಿಯೊನೆ, ತುಮೆ ಗೈನ ಚೊ಼ಕಿತರಾ ಪುಚ್ಚಿಲಿನಿ ತೆ ಬಚ್ಚು ಕಜಾ ಶೆ ಕೈನ ಗ್ವತ್ತ ಥಯಲ್ಪರ ಐನ ಮನೆ ತಿಳಸಾವೊ. ತೆಳಾಮಾ ಮಿ ಗೈನ ತಿನೆ ಆರಾಧನಾ ಕರುಸ ತಿಮ್ಮ ಕೈನ ತ್ಯುನೊನೆ ಬೆತ್ಲೆಹೆಮನೆ ವಳೈನ ದಿದ್ಯೊ. 9 ತೆ ಗ್ಯಾನಿಯೊ ರಾಜಾ಼ನಿ ವಾತ ಐಕಿನ ತ್ಯಾಂತಾ ಗಯೆಲ್ಪರ, ಪುರ್ವ ದಿಕ್ಕಮಾ ಹುಟ್ಟಲ ಚಿಕ್ಕಿನೆ ವರಿ ದೆಕ್ಯಾ. ತ್ಯುನೆ ತೆ ಚಿಕ್ಕಿನಾ ಪಾಚಾ಼ ಗಯಾ. ತೆ ಚಿಕ್ಕಿ ತ್ಯುನಾ ಅಗಿ ಜಾ಼ತಿ ಪಟ್ಟೊ ರ‍್ಹಯಲ ಜ಼ಗಾಪರ ಗೈನ ಹುಬ್ರೈ. 10 ತ್ಯುನೆ ತೆ ಚಿಕ್ಕಿನೆ ದೆಕಿನ ಘನ್ನಾಕಿ ಕ್ಹುಶಿ ಥಯಾ. 11 ತ್ಯುನೆ ತೆ ಘರೆ ಆಯೆಲ್ಪರ, ಪಟ್ಟಾನೆ ಮರಿಯಳಕನ ದೆಕಿನ, ಸಾಷ್ಟಾಂಗ ಥೈನ ಆರಾಧನಾ ಕರ‍್ಯಾ ತೆನೈಸೊ ತ್ಯುನೆ ತೆ ಪಟ್ಟಾನಾಹುತಿ ಲಾಯಲ ಕಾಣಿಕೆ ಕಾಡಿನ ಕ್ಹೊನು, ಉದ ವರಿ ಬಾಸನಾ ದ್ರವ್ಯೊನೆ ದಿದ್ಯಾ. 12 ತೆನೈಸೊ ಕ್ಹುದಾ ತೆ ಗ್ಯಾನಿಯೊನಾ ಕ್ಹಪನ್ಮಾ ಐನ, ತುಮೆ ಹೆರೊದಕನ ಫರಿನ ಜೌ಼ ನೈ ಕೈನ ಹುಶಾರ ಕರ‍್ಯೊ. ತ್ಯುನೆ ಬಿಜಿ಼ ಯಕ್ಕ ಜ಼ಗಾನಾ ಮುಲಕ ತ್ಯುನಾ ದೆಶನೆ ಫರಿನ ಗಯಾ.