ಆದಿಕಾಂಡ 13

ಅಬ್ರಾಮ ವರಿ ಲೊಟಾ ಬಿಜಾ಼ ಥಯಲ

1 ಅಬ್ರಾಮ ಇಜಿಪ್ಟತೊ ಗಯೊ, ಅಬ್ರಾಮ ತಿನಿ ಬೈಕೊನೆ ಲಿನ ತಿಕನ ರ‍್ಹಯಲ ಕ್ಹಾರು ಲಿನ ನೆಗೆವಕಂತೊ ಪ್ರಯಾಣ ಕರ‍್ಯೊ. ಲೊಟಾಬಿ ತ್ಯುನಾ ಕ್ಹಾತೆ ಗಯೊ. 2 ತೆಳಾಮ ಅಬ್ರಾಮ ಘನ್ನೊ ಸೌಕಾರ ಥಯೊತೊ ತಿನೆ ಬಕ್ರಾ ಬೊಕುಡೊ, ಢ್ಹೊರೊ ವ್ಹತ್ತಾ. ಘನ್ನು ಕ್ಹೊನು ರುಪ್ಪು ವ್ಹತ್ತು. 3 ಅಬ್ರಾಮನ ತಿನು ಪ್ರಯಾಣ ಅಗು ಚ಼ಲಾಯೊ ನೆಗೆವ ಗಾಮ ಛೊಡಿನ ಬೆತೆಲಿ ಗಾಮೆ ಪಾಚೊ಼ ಫರಿನ ಗಯೊ. ತೆ ಬೆತೆಲ ಗಾಮ ವರಿ ಆಯಿ ಗಾಮನಾ ವಚ್ಮಾ ರ‍್ಹಯಲ ಜ಼ಗಾಕನ ಗಯೊ. ಅಬ್ರಾಮ ವರಿ ತಿನು ಕುಟುಂಬ ಉತ್ರೆಲ ಜ಼ಗಾ ಎಜ಼ ವ್ಹೈ. 4 ಅಬ್ರಾಮ ಬಲಿನೊ ಕಟ್ಟೊ ಭಾಂದೆಲ ಜ಼ಗಾ ವ್ಹೈ. ಅಬ್ರಾಮ ಕ್ಹುದಾನೆ ಆರಾಧನಾ ಕರಲ ಜ಼ಗಾ ಎಜ಼ ವ್ಹೈ. 5 ಆ ಕಾಲಮಾ ಲೊಟಾಬಿ ಅಬ್ರಾಮನಾ ಕ್ಹಾತೆ ಪ್ರಯಾಣ ಕರಾಡೊತೊ. ಲೊಟಾನೆ ಬಿ ಬಕ್ರಾ ವರಿ ಢ್ಹೊರೊನು ಹಿಂಡ ವರಿ ಗುಡಾರೊ ವ್ಹತ್ತಾ. 6 ಅಬ್ರಾಮನೆ ಲೊಟಾನೆ ಘನ್ನಾ ಬಕ್ರಾ, ಬೈಲೊ, ಢ್ಹೊರೊ ರ‍್ಹಯಲಕ್ಹು ತ್ಯುನೊನೆ ರಾಕಾನೆ ತೆ ಜ಼ಗಾ ಬಸ್ಸ ಥೈ ನೈ. 7 ಅಬ್ರಾಮ ಹಿಂಡ ಕಾಯಿದಾವಾಲಾವೊನೆ ವರಿ ಲೊಟಾಬಿ ಹಿಂಡ ಕಾಯಿದಾವಾಲಾವೊನೆ ವಾದ ಕರಾನು ಚಾಲು ಕರ‍್ಯಾ ತೆ ಟೈಮ್ಮಾ ಕಾನಾನನಾ ವರಿ ಪೆರಿಜಿವಾಲಾ ತೆ ಜ಼ಗಾಪರ ವ್ಹತ್ತಾ. 8 ತಿನಾಹುತಿ ಅಬ್ರಾಮ ಲೊಟಾನೆ ತುನೆ ಮನೆ ಕಯುಜ಼ ವಾಗ್ವಾದ ರ‍್ಹೌ ನೈ. ತಾರಾ ಮನಕ್ಹೊ ಮಾರಾ ಮನಕ್ಹೊ ವಾಗ್ವದ ಕರು ನೈ, ಅಪೆ ಕ್ಹಾರಾ ಯಕ್ಕಜ಼ ಖಾಂದಾನವಾಲಾ ಥಯಾಸ. 9 ಅಪೆ ಜ಼ುದಾ ಥಯೆ ತುನೆ ಚಾ಼ಯೆ ಥಯಲ ತೆಕ್ಲಿ ಜ಼ಗಾ ಇನಿಲೆ ತು ರ‍್ವಡ್ಡಾ ಬಗಲ ಜಾವಾಲೊ ರ‍್ಹಯೊಮ ಮಿ ಸಿದಾ ಬಗಲ ಜೌಸ. ತು ಸಿದಾ ಬಗಲ ಜಾವಾಲೊ ರ‍್ಹಯೊಮ ಮಿ ರ‍್ವಡ್ಡಾ ಬಗಲ ಜೌಸ ಕೈನ ಕದ್ಯೊ. 10 ಲೊಟಾ ಡೊಳೊ ಉಚೈನ ದೆಕ್ತಾಮಾ ಜೊರ್ಡನ ಕಣಿವೆ ದಿಕ್ಹಿ. ತ್ಯಾ ಚಾ಼ಯೆ ಥಯಲ ಅಕ್ಲು ಪಾನಿ ಲೊಟಾ ದೆಕ್ಯೊ. ತೆ ಟೈಮ್ಮಾ ಸೊದೊಮ ವರಿ ಗೊಮೊರ ಗಾಮೊ ಕ್ಹುದಾಕ್ಹು ನಾಶ ಥಯಾ ನ್ಹೊತಾ. ತೆ ಟೈಮ್ಮಾ ಜೊರ್ಡನ ಕಣವಿ ಚೊಗರ ಮಟಾ ಕ್ಹುದಾನೊ ಮಳೊ ನಿಂಗತ ಬಿ ವ್ಹತ್ತು. ವರಿ ಇಜಿಪ್ಟ ನಿಂಗತ ಬಿ ವ್ಹತ್ತು. 11 ತಿನಾಹುತಿ ಲೊಟಾ ಜೊರ್ಡನ ಕಣವಿ ಇನಿ ಲಿದ್ಯೊ. ತ್ಯುನೆ ಭಂಬಿ ಜ಼ನಾ ಜ಼ುದಾ ಥಯಾ ಲೊಟಾ ಪುರ್ವ ಕನ ಪ್ರಯಾಣ ಕರ‍್ಯೊ. 12 ಅಬ್ರಾಮ ಕಾನಾನ ದೆಶಮಾ ರ‍್ಹಯೊ. ಲೊಟಾ ಬಿ ಕಣಿವಿ ರ‍್ಹಯಲ ಗಾಮೊನಾ ನಜಿಕ ಖುಲ್ಲಾ ಜ಼ಗಮಾ ವ್ಹತ್ತೊ, ದಕ್ಷಿಣ್ಮಾ ರ‍್ಹಯಲ ಸೊದೊಮವಾಲಾವೊನೆ ಗುಡಾರೊ ಭಾಂದಿನ ದಿನ ಜ಼ಗಾ ಕರಿಲಿದ್ಯೊ. 13 ಸೊದೊಮ ಗಾಮನಾ ಮನಕ್ಹೊ ಘನ್ನಾ ಕೆಟ್ಟ ವ್ಹತ್ತಾ. ತ್ಯುನೆ ಕೆಳಾಮಾಬಿ ಕ್ಹುದಾನೆ ವಿರುದ್ದ ಪಾಪ ಕರತಾತಾ

ಅಬ್ರಾಮ ವರಿ ಹೆಬ್ರೊನನೆ ಜಾ಼ವಾನು

14 ಲೊಟಾ ಬಿ ಗಯಲ್ಪರ ಕ್ಹುದಾ ಅಬ್ರಾಮನೆ ಡೊಳಾ ಉಚೈನ ಸುತ್ತೆ ದೆಕ ಉತ್ತರ ದಕ್ಷಿಣ ಕನ ವರಿ ಪುರ್ವ ಪಶ್ಚಿಮ ಕನ ದೆಕ. 15 ತು ದೆಕಾನು ಆ ದೆಶ ತುನೆ ವರಿ ತಾರಾ ಅಗಾ ಜಿವಸಾನಾ ತಾರಾ ಸಂತತಿಯೊನೆ ದ್ಯುಸ ಇಮ್ಮ ಕೆಳಾಮಾಬಿ ತಾರು ಥಯಲ ರ‍್ಹವಸ. 16 ಮಿ ತಾರಾ ಮನಕ್ಹೊನೆ ಜಿಮಿನ್ಪರ ರ‍್ಹಯಲ ಧೂಳನಾ ಅಕ್ಲು ಹೆಚ್ಕಿ ಕರುಸ. ಕುನ್ನಬಿ ಜಿಮಿನ್ಪರ ರ‍್ಹಯಲ ಧೂಳನೆ ಹಿಸಾಬ ಕರ‍್ಯಾಮ ತಾರಿ ಸಂತತಿನಿ ಸಂಖ್ಯಾ ಇನಾ ಅಕ್ಲಿ ರ‍್ಹವಸ. 17 ತಿನಾಹುತಿ ಜಾ಼ ತಾರಾ ಜಿಮಿನ್ಪರ ಕ್ಹಾರಿ ಬಗಲ ಫರ ಲಾಂಬಾಮಾ ರುಂದಮಾ ಫರ, ಕಾ ಕದ್ಯಾಮ ಮಿ ತೆ ತುನೆ ದ್ಯುಸ ಕೈನ ಕದ್ಯೊ. 18 ತಿನಾಹುತಿ ಅಬ್ರಾಮ ತಿನಾ ಗುಡಾರೊ ಕಿತ್ತೈನ ಮ್ಹೊಟಾ ಝಾಡೊ ರ‍್ಹಯಲ ಮಮ್ರೆಯನಾ ನಜಿಕ ಗೈನ ರ‍್ಹವಾನು ಚಾಲು ಕರ‍್ಯೊ. ತೆ ಹೆಬ್ರೊನ ಗಾಮನಾ ನಜಿಕ ವ್ಹತ್ತು. ತೆ ಜ಼ಗಾಪರ ಅಬ್ರಾಮ ಕ್ಹುದಾನೆ ಆರಾಧನಾ ಕರು ಕೈನ ಬಲಿನೊ ಕಟ್ಟೊ ಭಾಂದ್ಯೊ.