ಅಬ್ರಾಮನಿ ಸಂತತಿನೆ ಕ್ಹುದಾ ಕರಲ ವಾಗ್ದಾನ
1 ಆ ಸಂಗತಿಯೊ ಥಯಲ್ಪರ ಅಬ್ರಾಮನೆ ದರ್ಶನಮಾ ಯಹೊವಾನು ಸಂದೆಶ ಐಯು.ಕ್ಹುದಾ ತಿನೆ,ಅಬ್ರಾಮ ಬುಚ್ಕುನಕೊ; ಮಿಜ಼ ತುನೆ ಗುರಾಣಿ ಥಯೊಸ.ಮಿ ತುನೆ ಮ್ಹೊಟ್ಟು ಪ್ರತಿಫಲ ದ್ಯುಸ ಕೈನ ಕದ್ಯೊ. 2 ತಿನಾಕ್ಹು ಅಬ್ರಾಮ ಕ್ಹುದಾ ಥಯಲ ಯಹೊವಾ,ತು ಮನೆ ಸುಬಿ ದಿದ್ಯಾರೆ ಮನೆ ಕ್ಹುಶಿ ನೈ ಥಾತಿ ಕಾಕದ್ಯಾಮ ಮನೆ ದಿಕ್ರೊ ನತ್ತಿ. ತಿನಾಹುತಿ ಮಿ ಮರಲ್ಪರ ಮಾರಿ ಆಸ್ತಿ ಕ್ಹಾರಿ ಮಾರೊ ಸೆವಕ ಥಯಲ ದಮಸ್ಕನೊ ಎಲೀಯೆಜರನಾ ಪಾಲೆ ಥಾವಸ'' ಕೈನ ಕದ್ಯೊ. 3 ವರಿ ಅಬ್ರಾಮ ತು ಮನೆ ದಿಕ್ರಾನೆ ನತ್ತಿ ದಿದ್ಯೊ.ತಿನಾಹುತಿ ಮಾರಾ ಘರಮಾ ಹುಟ್ಟಲ ಸೆವಕ ಯಕ್ಲೊ ಮಾರು ರ‍್ಹಯಲ ಕ್ಹಾರು ಪಡ್ದಿಲಿವಸ ಕೈನ ಕದ್ಯೊ. 4 ತೆಳಾಮ ಯಹೊವಾ ಅಬ್ರಾಮನೆ ತಾರಿ ಆಸ್ತಿಕ್ಹಾರಿ ಪಡ್ದಿಲಿವಾಲೊ ತಾರೊ ಸೆವಕ ನವ್ಹೈ.ತುಜ ದಿಕ್ರಾನೆ ಪಡ್ದಿಲೆಸಿ;ತಾರೊ ದಿಕ್ರೊಜ ತಾರಾ ಆಸ್ತಿಕ್ಹಾರಿ ಪಡದಸ'’ಕೈನ ಕದ್ಯೊ. 5 ತೆ ಥಯಲ್ಪರ ಕ್ಹುದಾ ಅಬ್ರಾಮನೆ ಭಾರೊ ಲಿನ ಐನ ತಿನೆ, ಹಬಾಳಕನ ಡೊಳೊ ಉಚೈನ ಚಿಕ್ಕಿಯೊನೆ ದೆಕ ತು ಹಿಸಾಬ ನೈಕರತೊ ತೆಕ್ಲಾ ಚಿಕ್ಕಿಯೊ ಛೆ.ಅಗಲ್ಯಾ ದಿನೊಮಾ ತಾರು ಕ್ಹಾಂದಾನ ತೆಜ಼ ರಿತಿಮಾ ರ‍್ಹವಸ ಕೈನ ಕದ್ಯೊ. 6 ಅಬ್ರಾಮ ಯಹೊವಾನೆ ನಂಬ್ಯೊ.ತೆ ನಂಬಿಕೆನಾ ನಿಮಿತ್ತ ಯಹೊವಾ ಅಬ್ರಾಮನೆ ನಿತಿವಂತವಾಲೊ ವ್ಹೈ ಕೈನ ತಿನೆ ವಪ್ಪಿಲಿದ್ಯೊ. 7 ತೆ ಅಬ್ರಾಮನೆ '‘ಯಹೊವಾ ಥಯಲ ಮಿ ತುನೆ ಕಲ್ದಿಯರ ಉರ್ ಗಾಮತೊ ಬಲಾವಾಲಗಾಡ್ಯೊ.ತುನೆ ಆ ದೆಶ ದ್ಯುಕೈನ ತು ಆ ದೆಶ ಹೊಂದಿಲ್ಯು ಕೈನ ಮಿ ತುನೆ ಬಲಾವಾಲಗಾಡ್ಯೊ'’ ಕೈನ ಕದ್ಯೊ. 8 ತಿನಾಕ್ಹು ಅಬ್ರಾಮ, ಯಹೊವಾ, ಮಾರಾ ಒಡೆಯಾ,ಮನೆ ಆ ದೆಶ ಮಳಸ ಕೈನ ಖಚಿತ ಕರಲಿವಾನು ಕಿಮ್ಮ ವ್ಹೈ?'‘ ಕೈನ ಪುಚ್ಯೊ. 9 ಕ್ಹುದಾ ಅಬ್ರಾಮನೆ ಹಮೆ ಯಕ್ಕ ವಡಂಬಡಿಕೆ ಕರಲಿಯೆ ತನ್ನ ವರಕ್ಹನು ಯಕ್ಕ ಬೈಲ ತನ್ನ ವರಕ್ಹನು ಯಕ್ಕ ಬಕ್ರು ವರಿ ತನ್ನ ವರಕ್ಹನು ಯಕ್ಕ ಟಗರನೆ ಲಿನ ಆ. ತೆನೈಸೊ ಯಕ್ಕ ಬಗಲ್ಯು ಯಕ್ಕ ಕ್ಹಬುತರ ಲಿನ ಆ ಕೈನ ಕದ್ಯೊ. 10 ಅಬ್ರಾಮ ಕ್ಹುದಾನಾ ವಾಸ್ತರ ತೆ ಕ್ಹಾರು ಲಿನ ಆಯೊ ಅಬ್ರಾಮ ತೆ ಕ್ಹಾರು ಕತ್ರಿನ ಬೆ ಬೆ ತುಕ್ಡಾ ಕರ‍್ಯೊ. ಪಾಚಲ್ತೊ ಅಬ್ರಾಮ ತುಕ್ಡಾನೆ ತುಕ್ಡೊ ಕ್ಹಾಮೊ ಮ್ಹೆಲ್ಯೊ. ಅಬ್ರಾಮ ಪಕ್ಷಿಯೊನೆ ಮಾತ್ರ ಬೆ ತುಕ್ಡಾ ಕರ‍್ಯೊ ನೈ. 11 ದಕ್ಹೊ ಟೈಮ ಥಯಲ್ಪರ ಮ್ಹೊಟಾ ಪಕ್ಷಿಯೊ ತೆ ಜಾನವರನು ಮಾಕ್ಹ ಕ್ಹಾವಾನೆ ಉಡಿನ ಆಯಾ. ಅಬ್ರಾಮ ತ್ಯುನೊನೆ ನ್ಹಟಾಡಿಪಾಡ್ಯೊ. 12 ಕ್ಹಾಂಜ ಥೈ,ಸುರ್ಯೊ ಡುಬಿಲ್ಪರ ಅಬ್ರಾಮನೆ ಘನ್ನಿ ನಿಂದರ ಐ.ತೆ ನಿಂದರಮಾ ರ‍್ಹತಾಮಾ ಘನ್ನು ಖತರನಾಕ ಅಂದಾರು ಥೈಯು. 13 ತೆಳಾಮಾ ಯಹೊವಾ ಅಬ್ರಾಮನೆ ತುನೆ ಆ ವಿಷಯ ತಿಳ್ದೆಲ ರ‍್ಹೌ.ತಾರಾ ಕ್ಹಾಂದಾನ ವಾಲಾ ಪರದೆಶಿ ಥೈನ ತ್ಯುನು ನೈರ‍್ಹಯೆಲ ದೆಶಮಾ ರ‍್ಹವಸ ತ್ಯಾನಾ ಮನಕ್ಹೊ ತ್ಯುನೊನೆ ಗುಲಾಮೊ ಕರಲಿವಸ ತ್ಯಾ ತುನೆ ಚಾರಕ್ಹೊ ವರಕ್ಹ ಲಕ್ಕಾ ಭಾಧೆಪಡದಸ. 14 ತೆನೈಸೊ ಚಾರಕ್ಹೊ ವರಕ್ಹ ಥಯಲ್ಪರ ದೊರೆತನ ಕರಲ ಆ ದೆಶನೆ ಮಿ ದಂಡ ದ್ಯುಸ; ತಾರಾ ಮನಕ್ಹೊ ದೆಶನೆ ಛೊಡಿನ ಜಾ಼ವಸ.ತಾರಾ ಮನಕ್ಹೊ ತೆ ಛೊಡ್ತಾಮಾ ತ್ಯುನಾ ಕ್ಹಾತೆ ಸಂಪತ್ತ ಲಿನ ಜಾ಼ವಸ. 15 ತು ಘನ್ನೊಗಡಿಯೊ ಥಯೆ ಲಕ್ಕಾ ರೈನ ಸಮಾಧಾನಕ್ಹೊ ಮರಸಿ; ತುನೆ ತಾರಾ ಕ್ಹಾಂದಾನಾವಾಲಾವೊನಾ ಕ್ಹಾತೆ ಮಜಾರ ಕರಸ. 16 ಚಾರ ತಲೆಮಾರ ಥಯಲ್ಪರ ತಾರಾ ಮನಕ್ಹೊ ಆ ಗಾಮೆನೆ ಪಾಚಾ಼ ಫರಸ. ತೆ ಕಾಲಮಾ ತಾರಾ ಮನಕ್ಹೊ ಅಮ್ಮೊರಿಯೆನೆ ಹರಾಡಸ. ಯ್ಹಾ ರ‍್ಹವಾನಾ ಅಮ್ಮೊರಿಯೊ ತಾರಾ ಮನಕ್ಹೊನಾ ಮೂಲಕ ಮಿಜ಼ ಶಿಕ್ಷಾದ್ಯುಸ. ಆ ಅಗಾ ಚಾಲಾನಾ ಸಂಗತಿ ಕಾಕದ್ಯಾಮ ತೆ ಟೈಮಾ ಅಮ್ಮೊರಿಯೊ ಹೈ ಶಿಕ್ಷಾ ಅನುಭವ ಕರಾ ಅಕ್ಲಾ ಕೆಟ್ಟ ನತ್ತಿ ಕೈನ ಕದ್ಯೊ. 17 ಸುರ್ಯೊ ಡುಬೆಲ್ಪರ ಘನ್ನು ಅಂದಾರು ಥಯು.ಕತ್ರಿನ ಘಾಲೆಲ ಹರಯಕ್ಕ ಜಾನವರ ಅಂಗ ಬೆ ತುಕ್ಡಾ ಹಜುಬಿ ಜಿಮಿನ್ಪರ ವ್ಹತ್ತಾ.ತೆ ಟೈಮಾ ಅಚಾನಕ ಧವಾಂಡೊ ವರಿ ಆಗಕ್ಹು ಮಳೆಲ ದಿವಿಟಿಗೆ ಆ ತುಕ್ಡಾನಾ ವಚ್ಮಾತು ಐನ ಗಯು. 18 ತಿನಾಹುತಿ ಯಹೊವಾ ಯಕ್ಕ ವಾಗ್ದಾನ ಕರಿನ ಅಬ್ರಾಮನಾ ಕ್ಹಾತೆ ಯಕ್ಕ ವಡಂಬಡಿಕೆ ಕರಲಿದ್ಯೊ.ಯಹೊವಾ ತಿನೆ, ಮಿ ತಾರಾ ಕ್ಹಾಂದಾನವಾಲಾವೊನೆ ಆ ಗಾಮ ದ್ಯುಸ ಮಿ ತ್ಯುನೊನೆ ಇಜಿಪ್ಟ ನದಿತೊ ಯೂಫ್ರೆಟಿಸ ಮಹಾನದಿ ಲಕ್ಕಾ ರ‍್ಹವಾನು ಗಾಮ ನೆ ದ್ಯುಸ. 19 ಆ ಕೆನಿಯರ, ಕೆನಿಜೀಯರ, ಕದ್ಮೊನಿಯರ, 20 ಹಿತ್ತಿಯರ, ಪೆರಿಜೀಯರ, ರೆಷಾಯರ, 21 ಅಮ್ಮೊರಿಯರ,ಕಾನಾನ್ಯರ, ಗಿರ್ಗಾಷಿಯರ ವರಿ ಯೆಬುಸಿಯರ ಗಾಮ'‘ ಕೈನ ಕದ್ಯೊ.