ಆದಿಕಾಂಡ 35

ಕ್ಹುದಾ ಬೆತೆಲಮಾ ಯಾಕೊಬನೆ ಆಶಿರ್ವಾದ ದಿದಲ

1 ಕ್ಹುದಾ ಯಾಕೊಬನೆ, 'ತು ಬೆತೆಲ ಗಾಮೆ ಗೈನ ತ್ಯಜ ವಾಸಸ ವರಿ ಆರಾಧನೆ ಕರಾನಾ ಹುತಿ ಯಕ್ಕ ಬಲಿ ದಿವಾನೊ ಕಟ್ಟೊ ಭಾಂದಾ ಲಗಾಡ. ತು ತಾರೊ ಭೈ ಥಯಲ ಎಸಾವ ಕಂತೊ ನ್ಹಾಟಿನ ಜಾ಼ತಾಮಾ ಕ್ಹುದಾ ಥಯಲ ‘ಎಲ’ ತುನೆ ತ್ಯಾ ದಿಕ್ಹ್ಯೊ ನೈ ಸು! ತಿನೆ ಆರಾಧನಾನಾ ಹುತಿ ತ್ಯಾ ಬಲಿನೊ ಕಟ್ಟೊ ಭಾಂದಾ ಲಗಾಡ" ಕೈನ ಕದ್ಯೊ. 2 ತಿನಾಹುತಿ ಯಾಕೊಬ ತಿನಾ ಕುಟುಮಬವಾಲಾವೊನೆಬಿ ತಿನಾ ಕ್ಹಾರಾ ಸೆವಕರೊನೆಬಿ, 'ತುಮೊಕನ ರ‍್ಹಯಲ ಜಾಡನಾ ವರಿ ಲ್ಹೊಡಾನಾ ಕ್ಹಾ ಬಿಜಾ ದೆವಸ್ಥಾನೊನೆ ನಾಶ ಕರೊ. ತುಮೊನೆ ಶುಧ್ಧ ಕರಿಲಿನ ಶುಧ್ಧ ರ‍್ಹಯಲ ವಣ್ಣಾ ಘಾಲಿವೊ. 3 ಅಪೆ ನ್ಹ್ಯಾಂತಾ ಗೈನ ಬೆತೆಲನೆ ಗೈಯೆ; ಮಿ ಕಷ್ಟಮಾ ರ‍್ಹಯಲ ಟೈಮಮಾ ಮದತ ಕರಲ ಕ್ಹುದಾನಾ ಹುತಿ ಯಕ್ಕ ಬಲಿನೊ ಕಟ್ಟೊ ತ್ಯಾ ಭಂದೌಸ. ಮಿ ಗಯೆಲ ತ್ಯಕ್ಲಿ ಜ಼ಗಾ ತೆ ಕ್ಹುದಾ ಮಾರಾ ಕ್ಹಾತೆ ವ್ಹತ್ತೊ" ಕೈನ ಕದ್ಯೊ. 4 ತಿನಾಹುತಿ ತ್ಯುನೆ ತ್ಯುನೊಕ ರ‍್ಹಯಲ ಕ್ಹಾರಾ ಬಿಜಾ ದೆವಸ್ಥಾನೊನೆ ವರಿ ತ್ಯುನಾ ಕಾನೊಮಾ ರ‍್ಹಯಲ ಜುಮ್ಕಾ ಯಾಕೊಬನೆ ದಿದ್ಯಾ. ಯಾಕೊಬ ತೆ ಕ್ಹಾರು ಶೆಕೆಮ ಗಾಮಕನ ನಜಿಕ ರ‍್ಹಯಲ ಎಲಾ*35:4 ಎಲಾ ಝಾಡನಾ ಬುಡಮಾ ಬುರಿನ ಮ್ಹೆಲ್ಯೊ. 5 ಯಾಕೊಬ ವರಿ ತಿನ ದಿಕ್ರಾ ತೆ ಜ಼ಗಾತಾ ಚಾಲ್ಯಾ. ತೆ ಪ್ರದೆಶಮಾ ರ್ಹಹಯಲ ಮನಕ್ಹೊ ಪಾಚಾ ಲಾಗಿನ ಖಲಾಸ ಕರು ಕೈನ ವ್ಹತ್ತಾ. ಲೆಕಿನ ತ್ಯುನೆ ಭುಚ್ಕಿನ ಯಾಕೊಬನಾ ಪಾಚಾ ಗಯಾ ನೈ. 6 ಯಾಕೊಬ ವರಿ ತಿನಾ ಮನಕ್ಹೊ ಲುಜಿನೆ ಗಯಾ. ಹಮ್ನಾ ಲುಜನೆ ‘ಬೆತೆಲ’ ಕೈನ ಬಲಾವಸ. ತೆ ಕಾನಾನ ದೆಶಮಾ ಛೆ. 7 ಯಾಕೊಬ ತ್ಯಾ ಐನ ಬಲಿನೊ ಕಟ್ಟೊ ಭಂದಾಯೊ. ಯಾಕೊಬ ತಿನಾ ಮ್ಹೊಟಾ ಭೈ ಕಂತೊ ನ್ಹಾಟಿನ ಜಾ಼ತಾಮಾ ಕ್ಹುದಾ ತಿನೆ ಪೈಲಾ ದಿಕ್ಹಲಜ಼ ತೆ ಜ಼ಗಾಮಾ ವ್ಹೈ. ತಿನಾಹುತಿ ಯಾಕೊಬ ತೆ ಜ಼ಗಾನೆ ‘ಎಲ ಬೆತೆಲ’ ಕೈನ ನಾಮ ಮ್ಹೆಲ್ಯೊ. 8 ರೆಬೆಕಳನಿ ದಾಸಿ ಥಯಲ ದೆಬೊರಳ ತ್ಯಾ ಮರಿ ಗೈ. ತಿನಾಹುತಿ ತ್ಯುನೆ ತಿನೆ ಬೆತೆಲಕನ್ನ ರ‍್ಹಯಲ ಎಲಾಝಾಡನಾ ಬುಡಮಾ ಸಮಾದಿ ಕರ‍್ಯಾ.ತೆ ಜ಼ಗಾನೆ 'ಅಲೊನ ಬಾಕೊತ" ಕೈನ ನಾಮ ಮ್ಹೆಲ್ಯಾ.

9 ಯಾಕೊಬ ಪದ್ದನ ಅರಾಮತೊ ಫರಿನ ಆಯೆಲ್ಪರ, ಕ್ಹುದಾ ತಿನೆ ವರಿ ದಿಕ್ಹಿನ ತಿನೆ ಆಶಿರ್ವಾದ ಕರ‍್ಯೊ. 10 ಕ್ಹುದಾ ಯಾಕೊಬನೆ, 'ತಾರು ನಾಮ ಯಾಕೊಬ ವ್ಹೈ. ಲೆಕಿನ ಮಿ ತೆ ನಾಮನೆ ಬದಲುಸ. ಇನಾ ಉಪ್ಪರ ತು ಯಾಕೊಬ ಕೈನ ಕವೈಲೆತೊ ನೈ. ತಾರು ನೌ ನಾಮ ‘ಇಸ್ರಾಯೆಲ’ ಕರಿನ ಕೈನ ತಿನೆ ‘ಇಸ್ರಾಯೆಲ’ ಕೀನ ನಾಮ ಮ್ಹಲ್ಯೊ. 11 ಕ್ಹುದಾ ತಿನೆ, 'ಮಿಜ ಸರ್ವಶಕ್ತ ಥಯಲ ಕ್ಹುದಾ ವ್ಹೈ. ತು ಘನ್ನಾ ಬಚ್ಚಾವೊನೆ ಪಡ್ದಿನ ಮ್ಹೊಟು ಜನಾಂಗ ಥೈನ ಬ್ಯಳದಶಿ. ಘನ್ನಾ ಜನಾಂಗೊ ರಾಜಾವೊ ತಾರಮಾತ ಆವಸ. 12 ಮಿ ಅಬ್ರಹಾನೆ ಬಿ ಇಸಾಕನೆ ಬಿ ಖಾಸ ರ‍್ಹಯಲ ದೆಶ ದಿದ್ಯೊಸ. ಹಮ್ನಾ ಮಿ ತೆ ದೆಶ ತುನೆ ದ್ಯುಸ. ಮಿ ತೆ ದೆಶನೆ ತಾರಿ ಅಗ್ಲಿ ಸಂತತಿವಾಲವೊ ಮಟ್ಟಾ ಬಿ ದ್ಯುಸ" ಕೈನ ಕದ್ಯೊ. 13 ಪಾಚ಼ಲ್ತೊ ಕ್ಹುದಾ ತೆ ಜ಼ಗಾತೊ ಗೈಪಡ್ಯೊ. 14 ಯಾಕೊಬ ಎ ಜ಼ಗಾಮಾ ಶೆ ದಿಲಾವಾನಾ ಹುತಿ ಯಕ್ಕ ದಗಡಾನೆ ಹುಬ್ರಾಡಿನ ತಿನಾ ಉಪರ ದ್ರಾಕ್ಷಾ ರ‍್ಹಕ್ಹ ವರಿ ತೆಲ ರಿಚಾಯೊ. ಎ ಯಕ್ಕ ಖಾಸ ರ‍್ಹಯಲ ಜ಼ಗಾ ವ್ಹೈ. 15 ಕಾ ಕದ್ಯಾಮ ತ್ಯಾ ಯಾಕೊಬನೆ ಕ್ಹುದಾ ಬೊಲ್ಯೊ. ಯಾಕೊಬ ತೆ ಜ಼ಗಾನೆ 'ಬೆತೆಲ" ಕೈನ ನಾಮ ಮ್ಹಲ್ಯೊ.

ರಾಹೆಳನು ಮರಣ

16 ಯಾಕೊಬ ವರಿ ತಿನಾ ಮನಕ್ಹೊ ಬೆತೆಲತಾ ಗೈನ ಎಫ್ರಾತ ಗಾಮೆ ಆವಾತಿ ದಕ್ಹಿ ದುರ ಪೈಲಾ ರಾಹೆಳನೆ ಜನ್ನಾನು ತ್ರಾಸನೊ ದಿನ್ನ ನಜಿಕ ಐಯುತು. 17 ಲೆಕಿನ ರಾಹೆಳ ಎಸಲಾ ಜ಼ಂತಾಮಾ ಘನ್ನು ತ್ರಾಸ ಖೌ ಲಗ್ಯು. ತಿನೆ ಘನ್ನು ದುಕ್ಕ ವ್ಹತ್ತು. ರಾಹೆಳನಿ ಬುಡಿ ಎ ದೆಕಿನ, ತಿನೆ, 'ರಾಹೆಳ, ಬುಚ್ಕುನಕೊ. ತು ವರಿ ಯಕ್ಕ ದಿಕ್ರಾನೆ ಜನ್ನಾಡಿಸ" ಕೈನ ಕದಿ. 18 ರಾಹೆಳ ದಿಕ್ರಾನೆ ಜ಼ಂತ್ತಾಮಾ ಮರಿ ಗೈ; ಮರಾತಿ ಪೈಲಾ, ರಾಹೆಳ ತೆ ಬಚ್ಚಾನೆ ಬೆನೊನಿ ಕೈನ ನಾಮ ಮ್ಹೆಲಿ. ಲೆಕಿನ ಯಾಕೊಬ ತಿನೆ ಬೆನ್ಯಾಮಿನ ಕೈನ ನಾಮ ಮ್ಹೆಲ್ಯೊ. ತಿಮ್ಮ ರಾಹೆಳ ಮರಿ ಗೈ. 19 ರಾಹೆಳನೆ ಬೆತ್ಲೆಹೆಮ ಕವಾನಾ ಎಫ್ರಾತನೆ ಜಾವಾನಿ ವಾಟ್ಮಾಜ ಮಜಾರ ಕರ‍್ಯಾ. 20 ಯಾಕೊಬ ರಾಹೆಳನಾ ಮಜಾರಪರ ಖಾಸ ರ‍್ಹಯಲ ಯಕ್ಕ ದಗಡೊ ಮ್ಹೆಲಯೊ. ಹಜುನಬಿ ತೆ ದಗಡೊ ತ್ಯಾಜ಼ ಛೆ. 21 ಪಾಚಲ್ತೊ ಇಸ್ರಾಯೆಲ ಪ್ರಯಾಣ ಅಗೊ ಬಡೈನ 'ಮಿಗ್ದಲ ಎದರ" ನಾ ಡೊಂಗರಕನ ದಕ್ಷಿಣಮಾ ತಿನಾ ಗುಡಾರೊ ಘಲಾಯೊ. 22 ಇಸ್ರಾಯೆಲ ದಕ್ಹಾ ದಿನ್ನಾ ತ್ಯಾ ರ‍್ಹಯೊ. ತೆ ತ್ಯಾ ರ‍್ಹತಾಮಾ ರೊಬೆನ ಇಸ್ರಾಯೆಲನಿ ದಾಸಿ ಥಯಲ ಬಿಲ್ಹಳನಾ ಕ್ಹಾತೆ ಕ್ಹುರಯೊ. ಇಸ್ರಾಯೆಲ ಇನಾ ಹುತಿ ಐಕಲ್ಪರ ಘನ್ನೊ ಶಿಟ್ಟ ಥಯೊ. ಯಾಕೊಬನೆ ಬಾರಾ ದಿಕ್ರಾ ವ್ಹತಾ.

ಯಾಕೊಬನಾ ದಿಕ್ರಾ

23 ಲೆಯಳನಾ ದಿಕ್ರಾ: ಯಾಕೊಬನೊ ಮ್ಹೊಟೊ ದಿಕ್ರೊ ಥಯಲ ರೊಬೆನ, ಸಿಮೆಯೊನ, ಲೆವಿ, ಯೆಹುದ, ಇಸ್ಸಾಕಾರ ವರಿ ಜೆಬುಲೊನ. 24 ರಾಹೆಳನಾ ದಿಕ್ರಾ: ಯೊಸೆಫ ವರಿ ಬೆನ್ಯಾಮಿನ. 25 ಬಿಲ್ಹಳ ರಾಹೆಳನಿ ದಾಸಿ ವ್ಹೈ. ಬಿಲ್ಹಳನಾ ದಿಕ್ರಾ: ದಾನ ವರಿ ನಫ್ತಾಲಿನ. 26 ಜಿಲ್ಪಳ ಲೆಯಳನಿ ದಾಸಿ ವ್ಹೈ, ಜಿಲ್ಪಳನಾ ದಿಕ್ರಾ: ಗಾದ ವರಿ ಆಶೆರ. ಇವನೆ ಕ್ಹಾರಾ ಯಾಕೊಬನೆ ಪದ್ದನ ಅರಾಮಮಾ ಹುಟ್ಟಲ ದಿಕ್ರಾ ವ್ಹೈ.

ಯಾಕೊಬನು ಮರಣ

27 ಯಾಕೊಬ ತಿನೊ ಬಾ ಥಯಲ ಇಸಾಕ ಕನ್ನ ಹೆಬ್ರೊನಕವಾನಾ ಕಿರ್ಯತರ್ಬಮಾ ರ‍್ಹಯಲ ಮಮ್ರೆನೆ ಆಯೊ. ಅಬ್ರಹಾಮ ವರಿ ಇಸಾಕ ವಾಸ ಥಯಲ ನ್ಯಜ ವ್ಹೈ. 28 ಇಸಾಕ ಯಕ್ಹೊನ ಐಂಶಿ ವರಕ್ಹ ಲಕ್ಕಾ ಜಿವಿಶ್ಯೊ. 29 ತೆ ಥಯಲ್ಪರ ಇಸಾಕ ದಿನೊ ಭರಲ ಗಡಿಯೊ ಥಯಲ್ಕಕ ಜಿವಸಿನ ಮರ್xಯೊ. ತಿನಾ ದಿಕ್ರಾ ಥಯಲ ಎಸಾವ ವರಿ ಯಾಕೊಬ ತ್ಯುನಾ ಬುಡಾನೆ ಮಜಾರ ಕರಲ ಜ಼ಗಾಜ ತ್ಯುನಾ ಬಾನಿ ಮಜಾರ ಕರ‍್ಯಾ.