1 ಯಾಕೊಬ ಡೊಳಾ ಉಚೈನ ದೆಕತಾಮಾ, ಎಸಾವ 400 ಜ಼ನಾವೊನಾ ಕ್ಹಾತೆ ಆವಾನು ದೆಕ್ಯೊ. ತೆಳಾಮಾ ತೆ ಲೆಯಳನೆಬಿ ರಾಹೆಳನೆಬಿ ಭಂಬೆ ದಾಸಿಯೊನೆಬಿ ತ್ಯುನಾ ತ್ಯುನಾ ಬಚ್ಚಾವೊನೆ ಒಪ್ಸಿನ ತ್ಯುನೊನೆ ಬಿಜಾ ಬಿಜಾ ಕರಿನ 2 ಕ್ಹಾಮೊ ದಾಸಿಯೊನೆಬಿ ತ್ಯುನಾ ಬಚ್ಚಾವೊನೆ ತ್ಯುನಾ ಪಾಚೊ಼ ಲೆಯಳನನೆ ವರಿ ತಿನಾ ಬಚ್ಚಾವೊನೆ ಲಾಸ್ಟೆ ರಾಹೆಳನೆ ವರಿ ಯೊಸೆಫನೆ ಹುಬ್ರಾಡ್ಯೊ. 3 ತೆಜ಼ ತ್ಯುನಾ ಕ್ಹಾಮೊ ಗೈನ ತಿನೊ ಮ್ಹೊಟೊ ಭೈ ಕ್ಹಾಮೊ ಆತಾಮಾ ಕ್ಹಾತ ಸಲಾ ಜಿಮಿನ ಮಟ್ಟಾ ಮಾತು ಜು಼ಕೈನ ನಮಸ್ಕಾರ ಕರ‍್ಯೊ. 4 ತೆಳಾಮಾ ಯೆಸಾವ ತಿನೆ ಮಳಾನೆ ಕೈ ಕ್ಹಾಮೊ ನ್ಹಾಟಿನ ಐನ ತಿನೆ ಗಳೆ ಮಳಿನ ಮಟ್ಟಿ ದಿದ್ಯೊ. ತ್ಯುನೆ ಭಂಬಿ ಜ಼ನಾ ರೊಯಾ. 5 ತೆ ಥಯಲ್ಪರ ಎಸಾವ ಡೊಳಾ ಉಚೈನ ತೆ ಬಾಕಡಿಯೊನೆ ಬಚ್ಚಾವೊನೆ ದೆಕಿನ, 'ತಾರಾ ಕ್ಹಾತೆ ರ‍್ಹಯಲ ಮನಕ್ಹೊ ಕುನ ವ್ಹೈ?" ಕೈನ ಪುಚ್ಚತಾಮಾ ಯಾಕೊಬ ತಿನೆ, 'ಕ್ಹುದಾ ತಾರಾ ಸೆವಕನೆ ಕೃಪಾಕ್ಹು ದಿದಲ ಬಚ್ಚಾ ಇವನೆಜ಼ ವ್ಹೈ" ಕೈನ ಕದ್ಯೊ. 6 ತೆಳಾಮಾ ತಿನಾ ಭಂಬೆ ದಾಸಿಯೊ ತ್ಯುನಾ ಬಚ್ಚಾವೊನೆ ಬಲೈಲಿನ ಕ್ಹಾಮಾ ಐನ ಅಡ್ಡ ಪಡ್ಯಾ. 7 ಪಾಚಲ್ತಿ ಲೆಯಳ ತಿನಾ ಬಚ್ಚಾವೊನಾ ಕ್ಹಾತೆ ಐನ ಅಡ್ಡ ಪಡಿ. ಲಾಸ್ಟೆ ಯೊಸೆಫ ವರಿ ರಾಹೆಳ ಐನ ಅಡ್ಡ ಪಡ್ಯಾ. 8 ಎಸಾವ, 'ಮಿ ವಾಟ್ಮಾ ದೆಕಲ ತೆ ಜಾನವರೊ ಶಾನೆ?" ಕೈನ ಪುಚ಼ತಾಮಾ ಯಾಕೊಬ, 'ಸ್ವಾಮಿಯೊನಿ ದಯಾ ಮನೆ ಚಾ಼ಯೆ ಕೈನ ಮಿ ತುಮೊನೆ ತೆ ದಿನ ವಳಾಯೊ" ಕದ್ಯೊ. 9 ಎಸಾವ ತಿನೆ ಎ ಮಾರಾ ನ್ಹಾನಾ ಭೈ, ಮನೆ ಚಾ಼ಯೆ ಥಯಲ ಅಕ್ಲಿ ಆಸ್ತಿ ಛೆ, ತಾರು ತುನೆ ರ‍್ಹವಾದೆ" ಕವಾಕ್ಹು 10 ಯಾಕೊಬ, 'ತಿಮ್ಮ ನೈ, ತುನೆ ಮಾರಾ ಉಪ್ಪರ ದಯಾ ರ‍್ಹಯಾಮ, ಮಿ ದಿವಾನಿ ಕಾಣಿಕೆ ಲಿವು. ತುನೆ ದೆಕಲಕ್ಹು ಕ್ಹುದಾನೆ ದೆಕೆನಿಂಗತ ಥಯು,ಮನೆ ಮಯಾಕ್ಹುಜ಼ ಮಳೈ ಲಿದಲಜ಼ ಘನ್ನಿ ಚೊ಼ಕಿ ಸಂಗತಿ ಥೈಸ. 11 ಕ್ಹುದಾ ಮನೆ ಕೃಪಾ ಕರಲಕ್ಹು ಮನೆ ಸಮೃದ್ಧಿ ಉಂಟ ಥಯು. ತಿನಾ ಹುತಿ ಮಿ ದಿವಾನು ಕಾಣಿಕೆ ತು ದಯಾ ಮ್ಹೆಲಿನ ಲಿವು" ತಿಮ್ಮ ಕೈನ ಎಸಾವನೆ ಜ಼ಬರದಸ್ತಿ ಕರಲಕ್ಹು ತೆ ತೆ ಕಾಣಿಕೆ ಲಿದ್ಯೊ. 12 ಪಾಚಲ್ತೊ ಎಸಾವ, 'ಅಪೆ ಪ್ರಯಾಣ ಅಗಾ ಬಡೈಯೆ. ಮಿ ಕ್ಹಾಮೊ ಜೌ಼ಸ ಕೈನ" ಕದ್ಯೊ. 13 ತಿನಾಹುತಿ ಯಾಕೊಬ, 'ಮಾರಾ ಬಚ್ಚಾ ಜಾಂಜಿಮಾನ ಅರಾಮ ನೈಸೊ ಛೆ ತೆನೈಸೊ ಅರಾಮ ನೈಸೊ ಬೈಲೊ ಬಕ್ರಾ ಮಕನ ರ‍್ಹಯಲ ಪ್ರಭುನೆ ತಿಳದ್ಯುಸ. ಯಕ್ಕ ದಿನ್ನ ಜಾಸ್ತ ತ್ಯುನೊನೆ ಚಲಾಯಾರೆ ಬಕ್ರಾವೊನಾ ಕ್ಹಾರಾ ಹಿಂಡೊ ಮರಿ ಜಾ಼ವಸ. 14 ತುಮೆ ದಯಾ ಮ್ಹೆಲಿನ ಸೆವಕತಿ ಪೈಲಾ ಜಾ಼ ಸಕೊಶಿ ಮಿ ಮಾರಾ ಕ್ಹಾಮಾ ರ‍್ಹಯಲ ಬಕ್ರಾ ಬಕ್ರಿಯೊ ಚಾ಼ಲಾನಿ ವರಿ ಬಚ್ಚಾವೊನಿ ಶಕ್ತಿ ನಾ ಕ್ಹಾತೆಜ಼ ಹಲ್ಲು ಹಲ್ಲು ಚಾ಼ಲ್ತೊ ಮಾರಾ ಪ್ರಭುನಿ ಸಿಮೆ ಥಯಲ ಸೆಯಿರನೆ ಔಸ" ಕದ್ಯೊ. 15 ಎಸಾವ, 'ಮಾರಾ ಆಳೊಮಾ ದಕ್ಹಾ ಜ಼ನಾವೊನೆ ತಾರಾ ಕ್ಹಾತೆ ಚ಼ೊಡಿನ ಜೌ಼ಸ" ಕತಾಮಾ ಯಾಕೊಬ, 'ತ್ಯುನಿ ಸು ಜರುರತ ಛೆ? ಮಾಲಕ, ತುಮಾರಿ ದಯಾ ಮಾರಾ ಉಪ್ಪರ ರ‍್ಹೈಮ ಬಸ" ಕೈನ ಕದ್ಯೊ. 16 ಅಮ್ಮ ಎಸಾವ ತೆ ದಿನ್ನೆಜ಼ ಸೆಯಿರನೆ ಗೈಪಡ್ಯೊ. 17 ಯಾಕೊಬ ಪ್ರಯಾಣ ಕರಿನ ಸುಕ್ಕೊತನೆ ಆಯೊ. ತ್ಯಾ ತಿನಾ ಹುತಿ ಘರ ವರಿ ಬೈಲೊನಾ ಹುತಿ ಜ಼ೊಪಡು ಬಂದಾಯೊ.ತಿನಾ ಹುತಿ ತೆ ಜ಼ಗಾನೆ 'ಸುಕ್ಕೊತ" ಕೈನ ನಾಮ ಥಯು. 18 ಯಾಕೊಬ ಪದ್ದನ ಅರಾಮತೊ ಐನ, ಕಾನಾನ ದೆಶನಾ ಶೆಕೆಮ ಗಾಮೆ ಚೊ಼ಕಿತರಾ ಆಯೊ. ತೆ ಗಾಮಕನ್ನ ತಿನಾ ಗುಡಾರೊ ಘಲೈಲಿದ್ಯೊ. 19 ತೆ ತಿನಾ ಗುಡಾರೊ ಘಲಾಯಲ್ಪರ ಜ಼ಗಾನೆ ಹಮೊರನಾ ಬಚ್ಚಾವೊನೆ ಕ್ಹೊ ಬಿಲ್ಲಾ ದಿನ ತ್ಯುನೊಕಂತೊ ಲಿದ್ಯೊ. ಹಮೊರ ಶೆಕೆಮನೊ ಬಾ ವ್ಹೈ. 20 ತ್ಯಾ ಯಾಕೊಬ ಯಹೊವಾನೆ ಬಲಿನೊ ಕಟ್ಟೊ ಭಂದಾಯೊ ತಿನೆ 'ಎಲ ಎಲೊಹೆ ಇಸ್ರಾಯೆಲ" ಕೈನ ನಾಮ ಮ್ಹೆಲ್ಯೊ.