1 ಆದಾಮ ತಿನಿ ಬೈಕೊ ಥಯಲ ಹವ್ವಾನಾ ಕ್ಹಾತೆ ಮಳತಾಮಾ ತೆ ಪೆಟೆ ರ‍್ಹೈನ ದಿಕ್ರಾನೆ ಜ಼ನ್ನಿನ, 'ಯಹೊವಾನಿ ಮದತಕ್ಹು ಪಟ್ಟಾನೆ ಪಡ್ದಿಲಿದಿಸ" ಕೈನ ಕದಿ.ತಿನಾ ಹುತಿ ತೆ ಕಾಯಿನ ಕೈನ ನಾಮ ಮ್ಹೆಲಿ. 2 ತೆ ಥಯಲ್ಪರ ಹೆಬಲ ಕವಾನಾ ವರಿ ಯಕ್ಕ ದಿಕ್ರಾನೆ ಜ಼ನ್ನಿ. ಹೆಬಲ ಬಕ್ರಾ ಚ಼ರಾವಾಲೊ ಥಯೊ; ಕಾಯಿನ ಖೆತಬಾಡಿ ಕರಾಲೊ ಥಯೊ. 3 ದಕ್ಹಾ ದಿನ್ನ ಥಯಲ್ಪರ ಕಾಯಿನ ಖೆತರಮಾ ಬೆಳದಲ ಬೆಳಿಮಾಜ಼ ದಕ್ಹಿ ಬೆಳಿ ಲೈನ ಯಹೊವಾನೆ ಕಾಣಿಕೆ ದಿವಾನೆ ಲಾಯೊ. 4 ಹೆಬಲ ತಿನಾ ನಿಂಗತಜ಼಼ ಬಕ್ರಾವೊನಾ ಹಿಂಡಮಾನು ಪೈಲಾ ಬಕ್ರಾನಾ ಬಚ್ಚಾ಼ನೆ ಲೈನ ತಿನೆ ಕತ್ರಿನ ಚೊ಼ಕು ರ‍್ಹಯಲ ಭಾಗ ಲಿನ ಹೊಮಾ ಕರ‍್ಯೊ, ಯಹೊವಾ ಹೆಬಲ ಚ಼ಡಾಯಲ ಕಾಣಿಕಿನೆ ಪಸಂದ ಕರ‍್ಯೊ. 5 ತೆನೈಸೊ ಕಾಯಿನನಿ ದಿದಲ ಕಾಣಿಕಿನೆ ಯಹೊವಾ ಪಸಂದ ಕರ‍್ಯೊ ನೈ. ತಿನಾಹುತಿ ಕಾಯಿನ ಘನ್ನೊ ಶಿಟ್ಟ ಥಯೊ, ತಿನು ಮ್ಹೊಡು ಶಿಟ್ಟಕ್ಹು ಮ್ಹೊಡು ಉತ್ರಿಗಯು. 6 ತೆಳಾಮಾ ಯಹೊವಾ ಕಾಯಿನನೆ, 'ತು ಶಿಟ್ಟ ಕಾ ಥಯೊಸ? ತಾರು ಮ್ಹೊಡು ಶಿಟ್ಟಕ್ಹು ಕಾ ಉತ್ರಿಗಯುಸ? 7 ತು ಚೊ಼ಕು ಕಾಮ ಕರತ್ತೊ ತಾರಿ ಕಾಣಿಕಿನೆ ಸ್ವಿಕಾರ ಕರ‍್ತೊತೊ. ಪಾಪ ಕವಾನು ತುನೆ ಧರಾನಾ ಹುತಿ ಬಾಕಲಮಾಜ಼ ಹುಬ್ರಯುಸ, ತೆ ತುನೆ ತಿನಾ ಹತಮಾ ಮ್ಹೆಲ್ಲಿವಸ. ತೆನೈಸೊ ತು ತಿನೆ ತಾರಾ ಹತಮಾ ಮುಕ್ಕಿಲ್ಯು" ಕೈನ ಕದ್ಯೊ. 8 ತೆ ಥಯಲ್ಪರ ಕಾಯಿನ ತಿನಾ ನ್ಹಾನಾ ಭೈನೆ, 'ಖೆತರೆ ಗೈಯೆ ಆ ಕೈನ ಬಲಾಯೊ. ಖೆತರೆ ಆತಾಮಾ ಕಾಯಿನ ತಿನಾ ನ್ಹಾನಾ ಭೈನೆ ಖಲಾಸ ಕರಿಪಾಡ್ಯೊ. 9 ಯಹೊವಾ ಕಾಯಿನನೆ, 'ತಾರೊ ನ್ಹಾನೊ ಭೈ ಕಿಜ್ಗಾ಼ ಛೆ? ಕೈನ ಪುಚ್ತಾ಼ಮಾ ತೆ, 'ಮನೆ ಗ್ವತ್ತ ನತ್ತಿ, ಮಾರಾ ಭೈನೆ ಮಿ ಕೈದಾಲೊ ವ್ಹೈಸು?" ಕೈನ ಕದ್ಯೊ. 10 ತೆ ವಾತೆ ಯಹೊವಾ, 'ತು ಸು ಕರ‍್ಯೊಸ? ತಾರಾ ಭೈನು ರಗತ ಜಿಮಿನಮಾತು ಮನೆ ವದ್ರಾಡುಸ. 11 ತು ತಾರಾ ಹತ್ತಕ್ಹು ಚು಼ವಾಯಲ, ತಾರಾ ಭೈನಾ ರಗತ ಕ್ಹು ಭಿಂಜಾ಼ಯಲ ಎ ಜಿಮಿನ ತಿನು ರಗತ ಪಿದಿಸ ತಿನಾಹುತಿ ತೆ ಜಿಮಿನಪರ ಖೆತಿಬಾಡಿ ನೈ ಕರಾನು ಶ್ರಾಪ ತುನೆ ಐಯು. 12 ತು ಎ ಜಿಮಿನ್ಮಾ ವ್ಯವಸಾಯ ಕರ‍್ಯೊತಬಿ, ತುನೆ ತೆ ಜಿಮಿನ ಫಲ್ಲ ದೆತಿ ನೈ. ತು ಭುಲೊಕಮಾ ಭಟ್ಕಾಲೊ ಥಾಸಿ" ಕೈನ ಕದ್ಯೊ. 13 ತೆಳಾಮಾ ಕಾಯಿನ ಯಹೊವಾನೆ, 'ಎ ಶಿಕ್ಷಾ ಮನೆ ಘನ್ನಿ ಕಟಿನ ಥೈ. ತಿನೆ ತಡ್ದಿಲಿವಾನೆ ಮನೆ ನೈ ಥಾತು. 14 ದೆಕ, ತು ಹಮ್ನಾಜ಼ ಮನೆ ಸ್ವಂತ ದೆಶತೊ ನ್ಹಟಾಡಿಪಾಡ್ಯೊಸ್ತೊ! ತಾರಿ ನಜ಼ರಮಾತೊ ಕಾಡಿಪಾಡ್ಯೊಸ. ತಿನಾಹುತಿ ಮಿ ಜಿಮಿನಪರ ಭಟ್ಕಾಲೊ ಥೈನ ದೆಶಭ್ರಶ್ಟ ಥೌ ಲಾಗ್ಯು; ಎನೈಸೊ ಮನೆ ದೆಕಲವಾಲಾ ಮನೆ ಖಲಾಸ ಕರಸ" ಕೈನ ಕದ್ಯೊ. 15 ತಿನಾಹುತಿ ಯಹೊವಾ ಉತ್ತರ ದಿದ್ಯೊ, ನೈ, ಕುನ್ನಬಿ ತುನೆ ಖಲಾಸ ಕರ‍್ಯಾಮ ತಿನಿ ಶೆಡನಾ ಹುತಿ ಕ್ಹಾತ ಪಟ್ಟ ಹಾನಿ ಥಾವಸ ಕೈನ, ಕಾಯಿನನೆ ದೆಕಲವಾಲಾ ತಿನೆ ಖಲಾಸ ಕರೆನೈಸೊ ತಿನೆ ದೆಕಿನ ಗಪ್ಪಜ಼ ಜಾ಼ವಾ ವರಕ್ಹು ತಿನಾ ಉಪ್ಪರ ವಳಕ ಮ್ಹೆಲ್ಯೊ. 16 ಕಾಯಿನ ಯಹೊವಾನಿ ಸನ್ನಿದಿಮಾತೊ ಗೈನ ಎದೆನನಾ ಪುರ್ವ ದಿಕ್ಕೆ ರ‍್ಹಯಲ ಫರಾನಿ ಜ಼ಗಾ ರ‍್ಹವಾನು ಶುರು ಕರ‍್ಯೊ.

17 ಕಾಯಿನ ತಿನಿ ಬೈಕೊ ನೆ ಕುಡ್ತಾಮಾ ತೆ ಪೆಟೆ ರ‍್ಹೈನ ದಿಕ್ರಾನೆ ಜ಼ನ್ನಿ. ತಿನು ನಾಮ ಹನೊಕ ವ್ಹೈ. ಯಕ್ಲುಜ಼ ನೈಸೊ ಯಕ್ಕ ಗಾಮ ಭಾಂದಿನ ತೆ ಗಾಮನೆ ತಿನಾ ದಿಕ್ರಾನು ನಾಮ ಮ್ಹೆಲ್ಯೊ. 18 ಹನೊಕನೆ ಇರಾದ ಕವಾನಾ ನಾಮನೊ ದಿಕ್ರೊ ಹುಟ್ಯೊ. ಇರಾದನೆ ಮೆಹುಯಾಯೆಲ ದಿಕ್ರೊ ವ್ಹೈ. ಮೆಹುಯಾಯೆಲನೊ ದಿಕ್ರೊ ಮೆತುಶಾಯೆಲ ವ್ಹೈ. ಮೆತುಶಾಯೆಲನೊ ದಿಕ್ರೊ ಲೆಮೆಕ ವ್ಹೈ. 19 ಲೆಮೆಕ ಆದಾ ವರಿ ಚಿಲ್ಲಾ ಕವಾಲಿಯೊ ಬೆ ಬಾಕ್ಡಿಯೊನೆ ಕರ್ಲಿದ್ಯೊ. 20 ಆದಾಳ ಯುಬಾಲನೆ ಜ಼ನ್ನಿ; ತೆ ಢೊರೊ ರಾಕಾಲಾವೊನೆ ವರಿ ಗುಡಾರಮಾ ರ‍್ಹಯವಾಲಾವೊನೆ ಮೊಲ ಪುರಶ ಎಜ಼ ವ್ಹೈ. 21 ತಿನಾ ನ್ಹಾನಾ ಭೈನು ನಾಮ ಯುಬಾಲ ವ್ಹೈ. ಎ ಪಾಂಯೊ ವಜಾ಼ಡಾಲಾವೊಮಾ ಎಜ಼ ಮುಲ ಪುರುಶ ವ್ಹೈ. 22 ಚಿಲ್ಲಾ ಕವಾಲಿ ತುಬಲ ಕಾಯಿನನೆ ಜ಼ನ್ನಿ; ತೆ ಕುಲುಮೆ ಕರಿ ಲ್ಹೊಡಾನು ವರಿ ತಾಂಬಾನು ಸಾಮನೊ ಕರಾಲೊ ಥಯೊ. ತುಬಲ ಕಾಯಿನನಿ ಭೆನನು ನಾಮ ನಯಮಾ ವ್ಹೈ. 23 ಲೆಮಕ ತಿನಿಯೊ ಬೈಕೊನೆ ಅಮ್ಮ ಕದ್ಯೊ ಆದಾ, ಚಿಲ್ಲಾ, ಮಾರಿ ವಾತ ಐಕೊ, ಲೆಮಕನಿ ಬಾಕ್ಡಿಯೊ, ಮನೆ ದುಕ್ಕ ಕರಲ ಯಕ್ಕ ಮನಕ್ಹನೆ ಖಲಾಸ ಕರ‍್ಯೊ; ಮನೆ ಮಾರಲ ಯಕ್ಕ ಜಾಂಜಿಮಾನನೆ ಖಲಾಸ ಕರ‍್ಯೊ. 24 ಕಾಯಿನನೆ ಖಲಾಸ ಕರಲವಾಲಾನೆ ಕ್ಹಾತ ಪಟ್ಟ ಯಕ್ಲು ದಂಡ ಆವಾನು ರ‍್ಹಯುಮ ಮನೆ ಮಾರಾಲಾನೆ ಸತ್ತರಪರ ಕ್ಹಾತ ಯಕ್ಲು ಥಾವಸ ನೈ.

25 ಆದಾಮ ತಿನಿ ಬೈಕೊನೆ ಫರಿನೆ ವರಿ ಕುಡ್ತಾಮಾ ತೆ ಪಟ್ಟೊ ಹುಟ್ಯೊ. ಕಾಯಿನನೆ ಖಲಾಸ ಕರಲ ಹೆಬಲನಾ ಬದಲಿ ಮನೆ ಕ್ಹುದಾ ಬಿಜೊ಼ ದಿಕ್ರೊ ದಿದ್ಯೊ ಕೈನ ತೆ ಪಟ್ಟಾನೆ ಸೆತ ಕೈನ ನಾಮ ಮ್ಹೆಲಿ. 26 ತೆ ಥಯಲ್ಪರ ಸೆತಬಿ ಪಟ್ಟಾನೆ ಪಡ್ದಿನ ತಿನು ನಾಮ ಎನೊಶ ಕೈನ ಮ್ಹೆಲ್ಯೊ; ಮನಕ್ಹೊ ತೆಳಾಮಾ 'ಯಹೊವಾನಾ" ನಾಮಪರ ಆರಾಧನಾ ಕರಾನು ಶುರು ಕರ‍್ಯಾ.