ಅಬ್ರಾಮ ಲೊಟಾನೆ ಛೊಡಾಯಲ
1 ತೆ ದಿನೊಮಾ ಅಮ್ರಾಫೆಲನ ಶಿನಾರನೊ ರಾಜೊ಼ ವ್ಹತ್ತೊ, ಅರಿಯೊಕ ಕ್ಹಾರಾ ಗಾಮೊನೊ ರಾಜೊ಼ ವ್ಹತ್ತೊ, ಕೆದೊರ್ಲಗೊಮರ ಎಲಾಮಿನೊ ರಾಜೊ಼ ವ್ಹತ್ತೊ. ತಿದ್ಗಾಲಗೊಯಿಮದನೊ ರಾಜೊ಼ ವ್ಹತ್ತೊ. 2 ಆ ರಾಜಾ ಕ್ಹಾರಾ ಸೊದೊಮಿನಾ ರಾಜೊ಼ ಥಯಲ ಬೆರಗನಿನೆ ಗೊಮೊರ ನೊ ರಾಜೊ಼ ಥಯಲ ಬಿರ್ಶಗನೆ ಅದ್ಮಾಹದನೊ ರಾಜೊ಼ ಥಯಲ ಶಿನಾಬನೆ ಚೆಬೊಯಿಮಿನೊ ರಾಜೊ಼ ಥಯಲ ಶೆಮೆಬರನೆಬಿ ಚೊಗರ ಕೈನ ಬೆಲಗಿನ ರಾಜಾನೆಬಿ ವಿರುದ್ದ ಥಯಾ. 3 ಆ ರಾಜಾ ಕ್ಹಾರಾ ಸಿದ್ದಿಮ್ ಕಣವಿಮಾ ತ್ಯುನಾ ಸೈನ್ಯಾವೊನೆ ಕ್ಹಾತೆ ಸೆರಶಾ.(ಸಿದ್ದಿಮ ಕಣವಿ ಹಮ್ನಾ ಮಿಟ್ಟಾನು ಸಮುಂದರ ಥಯುಸ). 4 ಆ ಕ್ಹಾರಾ ರಾಜಾ ಕೆದೊರ್ಲಗೊಮರನಾ ಅಧಿನಮಾ ಬಾರಾ ವರಕ್ಹ ವ್ಹತ್ತಾ. ಕಾಕದ್ಯಾಮ ತೆರಾವಾ ವರಕ್ಹಮಾ ತ್ಯುನೆ ಕ್ಹಾರಾ ತಿನೆ ವಿರೊಧ ಥಯಾ. 5 ತಿನಾಹುತಿ ಚೌದವಾ ವರಕ್ಹಮಾ ರಾಜೊ಼ ಥಯಲ ಕೆದೊರ್ಲಗೊಮರ ವರಿ ತಿನಾ ಕ್ಹಾತೆ ರ‍್ಹಯಲ ರಾಜಾವೊ ತ್ಯುನಾ ವಿರುಧ್ಧ ಥೈನ ಯುದ್ದ ಕರಾನೆ ಆಯಾ. ಕೆದೊರ್ಲಗೊಮರ ವರಿ ತಿನಾ ಕ್ಹಾತೆ ರ‍್ಹಯಲ ರಾಜಾಬಿ ಅಷ್ಟರೊತ್ ಕರ್ನಯಿಮಾ ರ‍್ಹಯಲ ರೆಫಾಯನೊ ಹಾಮಿನಮಾ ರ‍್ಹಯಲ ಜುಜ್ಯರನೊ ಶಾವೆಕೆರ್ಯಾತಯಿಮಾ ರ‍್ಹಯಲ ಎಮಿಯರೊನೆ ಸೊಲಶಾ. 6 ತೆನೈಸೊ ತ್ಯುನೆ ಹೊರಿಯರೊನೆ ಡೊಂಗರನಾ ಸಿಮೆತಾ ಉಸುಕನಿ ಜಿಮಿನ ನಜಿಕ ರ‍್ಹಯಲ ಎಲ್ಪಾರಾನಿನ ಲಕ್ಕಾ ಪಾಚಾ಼ ಮ್ಹೆಲ್ಯಾ. 7 ತೆ ಥಯಲ್ಪರ ಕೆದೊರ್ಲಗೊಮರ ರಾಜೊ಼ ಉತ್ತರಕನ ಫರಿನ ಕಾದೆಶ್ ಕವಾನು ಎನ್ಮಿಷ್ಪಾಟಿಯೆ ಐನ ಕ್ಹರಾ ಅಮ್ಮಾಲೆಕ್ಯರೊನೆ ಹಾರಾಡ್ಯೊ.ತೆನೈಸೊ ತೆ ಹಚಚೊನ್ ತಾಮರಿಮಾ ಜ್ಯುತಾ ರ‍್ಹಯಲ ಅಮ್ಮೊರಿಯೊನೆ ಹಾರಾಡ್ಯೊ. 8 ತೆ ದಿನೊಮಾ ಸೊದೊಮಿನನೊ ರಾಜೊ಼ ಗೊಮೊರನೊ ರಾಜೊ಼ ಅದ್ಮಾಹದನೊ ರಾಜೊ಼ ಚೆಬೊಯಿಮಿನನೊ ರಾಜೊ಼ ಬೆಲಗದ, ಕದ್ಯಾಮ ಚೊಗರನೊ ರಾಜೊ಼ ಕ್ಹಾತೆ ಮಳಿನ ಶತ್ರುವೊನಾ ವಿರುದ್ದ ಥೈನ ದಂಡೆ ಉಚೈಲಿನ ಸಿದ್ದಿಮ್ ಕಣವಿನೆ ಗಯಾ 9 ತ್ಯುನೆ ಎಲಾಮಿನೊ ರಾಜೊ಼ ಕೆದೊರ್ಲಗೊಮರನೆಬಿ ಗೊಯಿಮದ ರಾಜೊ಼ ತಿದ್ಗಾಲನೆಬಿ ಶಿನಾರನೊ ರಾಜೊ಼ ಅಮ್ಮ್ರಾಫೆಲನೆಬಿ, ಕ್ಹಾರಾ ಗಾಮೊನಾ ರಾಜೊ಼ ಅರಿಯೊಕನೆಬಿ ವಿರುದ್ದ ಥೈನ ಹೊರಾಡ್ಯಾ.ಅಮ್ಮಜ ಚಾರ ಜ಼ನಾ ರಜಾ ಪಾಂಚ ಜ಼ನಾ ರಾಜಾವೊನಾ ವಿರುದ್ದ ಥೈನ ಹೊರಾಡ್ಯಾ. 10 ಸಿದ್ದಿಮ್ ಕಣವಿಮಾ ಕಲ್ಲರಗಿನ ಡಾಂಬರನಿ ಖಾಡಿಮಾ ಘನ್ನಾ ವ್ಹತ್ತಾ. ಸೊದೊಮ ವರಿ ಗೊಮೊರೊನಾ ರಾಜಾ ವರಿ ತ್ಯುನಿ ಸೈನ್ಯವೊ ನ್ಹಾಟಿನ ಜಾ಼ತಾಮಾ ಆ ಖಾಡಿಮಾ ಪಡಿ ಗಯಾ. ಉಗರಲವಾಲಾ ಡೊಂಗರೊನೆ ನ್ಹಾಟಿ ಗಯಾ. 11 ಝಿತ್ತಲವಾಲಾ ಸೊದೊಮ ವರಿ ಗೊಮರನಾ ಮನಕ್ಹೊ ಹೊಂದೆಲ ಕ್ಹಾರಾ ಸಾಮನೊ ಲಿನ ಗಯಾ ತ್ಯುನೆ ಕ್ಹಾರಾವೊನೊ ಅನ್ನ ವಣ್ಣಾ ಲಿನ ಗಯಾ. 12 ಅಬ್ರಾಮನೊ ಭೈ ಥಯಲ ಲೊಟಾಬಿ ಸೊದೊಮ್ ಗಾಮಾ ವ್ಹತ್ತೊ.ಶತ್ರುವೊ ತಿನೆ ಧರೆಲ ತಿಕನ ರ‍್ಹಯಲ ಕ್ಹಾರು ಕಾಳಿಲಿನ ಗಯಾ. 13 ಚುಕೈಲಿನ ಯಕ್ಲೊ ಇಬ್ರಿಯನೊ ಅಬ್ರಾಮಕನ ಥಯಲ ವಿಷಯನಾಹುತಿ ತಿಳಷ್ಯೊ. ಅಬ್ರಾಮ ಅಮ್ಮೊರಿಯ ಥಯಲ ಮಮ್ರೆಯನಾ ತೊಪಕನ ವ್ಹತ್ತೊ. ಮಮ್ರೆ, ಎಷ್ಕೊಲ ವರಿ ಆನೆರ ಯಕ್ಲಾನೆ ಯಕ್ಲೊಮದತ ಕರಾನೆ ಒಪ್ಪಂದ ಕರಲಿದ್ಯಾ ತೆನೈಸೊ ಅಬ್ರಾಮನೆ ಮದತಕರಾನಾ ಹುತಿ ಯಕ್ಕ ಒಪ್ಪಂದ ಕರೆಟ್ಟ ಕರ‍್ಯಾತಾ. 14 ಲೊಟಾ ಜೆಲ್ಮಾ ರ‍್ಹಯಲ ಅಬ್ರಾಮನೆ ತಿಳದ್ಯು.ತಿನಾಹುತಿ ಅಬ್ರಾಮ ತಿನಾ ಘರಮಾ ಹುಟ್ಟಲ ಗಂಡ ಆಳೊನೆ ಯಕ್ಕ ಜ಼ಗಾ ಮಳಾಯೊ. ತ್ಯುನಾಮಾ 318 ಮನಕ್ಹೊತರಬೆತಿ ಹೊಂದೆಲ ಸೈನಿಕೊ ವ್ಹತ್ತಾ. ಅಬ್ರಾಮನ ತಿನಾಕ್ಹಾತೆ ಗೈನ ಶತ್ರುವೊನೆ ದಾನ ಗಾಮಲಕ್ಕಾಬಿ ಪಾಚೊ ಮ್ಹೆಲ್ಯೊ. 15 ತೆ ರಾತೆ ತೆ ವರಿ ತಿನಾ ಸೆವಕೊ ಹಠಾತ್ತನ ಶತ್ರುವೊನೆ ಸೊಲಸ್ಯಾ. ದಮಸ್ಕನೆ ಉತ್ತರಮಾ ರ‍್ಹಯಲ ಹೊಬಾದ ಅಕ್ಲಾ ದುರ ಮ್ಹೆಲ್ಯಾ. 16 ಪಾಚಾತಾ ಶತ್ರುವೊ ಅಪಹರಿಸಿದ್ದ ಕ್ಹಾರಾ ಸಾಮನೊನೆ ವರಿ ಲೊಟಾನಿ ಆಸ್ತಿ ಅಬ್ರಾಮ ಲಿನ ಲೊಟಾನಾ ಕ್ಹಾತೆ ಆಯೊ.ತೆನೈಸೊ ಜೆಲಮಾ ಧರೆವಾಲಾ ಬಾಕ್ಡಿಯೊ ವರಿ ಮನಕ್ಹೊನೆ ಪಾಚೊ ಬಲೈಲಿನ ಆಯೊ. 17 ತೆಳಾಮಾ ಅಬ್ರಾಮ ಕೆದೊರ್ಲಗೊಮರನೆ ವರಿ ತಿನಾಕ್ಹಾತೆ ರ‍್ಹಯಲ ರಾಜಾವೊನೆ ಹಾರಾಡೆಲ್ಪರ ತಿನಾ ಘರೆ ಗಯೊ.ತೆಳಾಮಾ ಸೊದೊಮಿನೊ ರಾಜೊ಼ ಅಬ್ರಾಮನ ಮಳಾನೆ ಶಾವ ಎ ಕಣವಿಯೆ ಗಯೊ ಹಮ್ನಾ ಅನೆ ರಾಜಾನಿ ಕಣವಿ ಕೈನ ಬಲಾವಸ.)
ಮೆಲ್ಕಿಜೆದಕ ಅಬ್ರಾಮನೆ ಆಶಿರ್ವಾದ ದಿದಲ
18 ಸಾಲೆಮಿನೊ ರಾಜೊ಼ ರ‍್ಹಯಲ ಮೆಲ್ಕಿಚೆದೆಕಬಿ ಅಬ್ರಾಮನೆ ಮಳಾನೆ ಗಯೊ. ಮಹೊನ್ನತ ಥಯಲ ಕ್ಹುದಾನೊ ಯಾಜಕ ಥಯಲ ತೆ ರೊಕ್ಲೊ ದ್ರಾಕ್ಷಾ ರಕ್ಹ ಕಾಡಿನಲಿನ ಐನ 19 ಅಬ್ರಾಮನೆ ಅಮ್ಮ ಆಶಿರ್ವಾದ ಕರ‍್ಯೊ; ಅಬ್ರಾಮ ಮಹೊನ್ನತ ಥಯಲ ಕ್ಹುದಾ ತುನೆ ಆಶಿರ್ವಾದ ಕರಾದೆ. ಹಬಾಳನೆ ಜಿಮಿನೆ ಸೃಷ್ಟಿ ಕರಲ ತೆಜ಼ ವ್ಹೈ. 20 ತಾರೊ ಶತ್ರುವೊನೆ ಸೊಲಸಾ ನೆ ತುನೆ ಮದತ ಕರಲ ಮಹೊನ್ನತ ಥಯಲ ಕ್ಹುದಾನೆ ಸ್ತೊತ್ರಾ ಥಾವಾಂದೆ'‘ ಅಬ್ರಾಮ ಯುದ್ದ ಲಾಯೆಲ ಕ್ಹಾರಾ ಸಾಮನೊಮಾ ದಕ್ಹವಾನು ಯಕ್ಕ ಭಾಗ ಮೆಲ್ಕೀಚೆದೆಕನೆ ದಿದ್ಯೊ. 21 ತೆ ಥಯಲ್ಪರ ಸೊದೊಮಿನೊ ರಾಜೊ಼ ಅಬ್ರಾಮನೆ ,ಆ ಸಾಮನೊ ಕ್ಹಾರಾ ತುಜ ಮ್ಹೆಲ್ಲೆ. ತು ವಶಮಾ ಕರಿಲಿದಲ ಮಾರಾ ಮನಕ್ಹೊ ಯಕ್ಕಜ಼ ಮನೆ ದೆ ಕೈನ ಕದ್ಯೊ. 22 ತಿನಾಹುತಿ ಅಬ್ರಾಮ ತಿನೆ ಹಬಾಳ ಜಿಮಿನ ನೆ ಸೃಷ್ಟಿ ಕರಲ ಮಹೊನ್ನತ ಥಯಲ ಕ್ಹುದಾ ಥಯಲ ಯಹೊವಾನೆ ಘಮ್ಮ ಘಾಲಿನ ಕವಾನು ಸುವೈ ಕದ್ಯಾಮ , 23 ತಾರು ಥಯಲ ಸುಜ಼ ಮಿ ಮ್ಹೆಲ್ಲೆತೊ ನೈ; ತೆ ದೊರೊ ರೈತೊಬಿ ಚಪಲೊ ರೈತೊಬಿ ಮಿ ನೈ ಮ್ಹೆಲ್ಲೆತೊ. ಮಿ ಅಬ್ರಾಮನೆ ಸೌಕಾರ ಕರ‍್ಯೊ.ಕೈನ ತು ಕವಾನು ಮನೆ ನಕೊ. 24 ಮಾರಾ ಯೌವನಸ್ಥೊ ಕ್ಹಾದೆಲ ಅನ್ನ ಹೊರತು ಬಿಜು ಸುಜ಼ ನೈ ಸ್ವಿಕಾರ ನೈ ಕರತೊ.ತಿನಾಹುತಿ ಬಿಜಾ಼ ಮನಕ್ಹೊನೆ ತ್ಯುನು ಪಾಲ ದೆ. ಅಪೆ ಯುದ್ದಮಾ ಝಿತ್ತಲ ಸಾಮನೊ ಲೆ ಆನೆರ, ಎಷ್ಕೊಲ ವರಿ ಮಮ್ರೆಯವಾಲಾವೊನೆ ತ್ಯುನು ಪಾಲ ದೆ. ತೆ ಮನಕ್ಹೊ ಯುದ್ದಮಾ ಮನೆ ಮದೆತ ಕರ‍್ಯಾ ಕೈನ ಕದ್ಯೊ.