ಅಬ್ರಹಾಮ ವರಿ ಅಭಿಮೆಲೆಕ
1 ಅಬ್ರಹಾಮ ತ್ಯಾಂತೊ ಐನ ಕಾನಾನ ದೆಶನಾ ದಕ್ಷಿಣ ಸಿಮೆನೆ ಜಾ಼ತಾ ಜಾ಼ತಾ ಕಾದೆಶಿನಾ ಶುರಿನಾ ವಚ್ಮಾ ರ‍್ಹೈನ ವರಿ ದಕ್ಹಾ ದಿನ್ನ ಗೆರಾರಿಮಾ ಬಿ ರ‍್ಹಯೊತೊ. 2 ತೆ ತಿನಿ ಬೈಕೊ ಥಯಲ ಸಾರಳನೆ ಭೆನ ವ್ಹೈ ಕೈನ ಕೈಲಿದಲಕ್ಹು ಗೆರಾರನೊ ರಾಜೊ಼ ಅಭಿಮೆಲೆಕ ತಿನೆ ಬಲೈನ ತಿನಾ ಘರಮಾ ಮ್ಹೆಲಿದ್ಯೊ. 3 ತೆನೈಸೊ ತೆ ರಾತೆ ಕ್ಹುದಾ ಅಭಿಮೆಲೆಕನಾ ಕ್ಹಪನಮಾ ಐನ, 'ತು ತೆ ಬಾಕಡಿನೆ ಮಳೈಲಿದಲಕ್ಹು ಮರಿಜ಼ಾಶಿ; ತೆ ಬಿಜೆ಼ಕಲಾ ಡಣಗಾನಿ ಬೈಕೊ ವ್ಹೈ" ಕದ್ಯೊ. 4 ಅಬಿಮೆಲೆಕ ತಿನೆ ಸಂಗಮಿಸ್ಯೊ ನ್ಹೊತೊ. ತೆ, 'ಕರ್ತಾ, ನಿತಿವಂತ ರ‍್ಹಯೆಲ ಮನಕ್ಹೊನೆ ನಾಶ ಕರಶಿ ಸು? 5 ತೆ ಮನಕ್ಹ ಆ ಮನೆ ನ್ಹಾನಿ ಬ್ಹೆನ ಥೌ ಕೈನ ಕದ್ಯೊ. ಆ ಬಿ ತೆ ಮನೆ ಮ್ಹೊಟೊ ಬ್ಹೈ ಥೌ ಕೈನ ಕದಿ. ಮಿ ಯಥಾರ್ಥ ಮನಸಕ್ಹು ಬಿ, ಶುದ್ಧ ಹತ್ತ ಕ್ಹು ಬಿ ಅಮ್ಮ ಕರ‍್ಯೊಸ" ಕದ್ಯೊ. 6 ತಿನಾಹುತಿ ಕ್ಹುದಾ ತಿನಾ ಕ್ಹಪನ್ಮಾ , 'ತು, ಆ ಯಥಾರ್ಥ ಮನಸಕ್ಹು ಕರ‍್ಯೊಸ ಕವಾನು ಮನೆ ಗ್ವತ ಛೆ; ತಿನಾಹುತಿ ತು ಮನೆ ವಿರುದ್ಧ ಥೈನ ಪಾಪ ಕರು ನೈ ಕೈನ ಮಿ ತುನೆ ಹುಬ್ರಾಡಿನ ತಿನೆ ಮುಟ್ಟಾನೆ ದಿದ್ಯೊ ನೈ. 7 ಅಮ್ಮ ರ‍್ಹಯೆಲ ಕ್ಹು ತೆ ಮನಕ್ಹನಿ ಬೈಕೊನೆ ತಿನೆ ವಪ್ಸಿಪಡ. ತೆ ಪ್ರವಾದಿ, ತಾರಾ ಹುತಿ ಮಕನ ತೆ ಪ್ರಾಥನಾ ಕರಸ ವರಿ ತು ಜಿವ್ತೊ ರ‍್ಹಶಿ. ತಿನೆ ನೈ ವಪ್ಪಸ್ಯೊಮ ತು ವರಿ ತಾರಾ ಕ್ಹಾರಾ ಜ಼ನಾ ಮರಣ ಹೊಂದೊಶಿ ವರಿ ಆ ಥಾವಸಜ ಕೈನ ತಿಳದಿಲೆ" ಕೈನ ಕ್ಹಪನಮಾ ಕದ್ಯೊ. 8 ಪಾಟೆ ಅಬಿಮೆಲೆಕ ತಿನಾ ಕ್ಹಾರಾ ಕಾಮ ಕರಾಲಾವೊನೆ ಕುಡಸಿನ ಎ ಕ್ಹಾರಾ ಸಂಗತಿಯೊ ತಿಳಸಾತಾಮಾ ತ್ಯುನೆ ಘನ್ನಾ ಬುಚಕ್ಯಾ. 9 ಅಬಿಮೆಲೆಕ ಅಬ್ರಹಾಮನೆ ಬಲೈನ, 'ತು ಹಮೊನೆ ಕರಲ ಸು ವೈ? ಮಿ ಕಯೊ ಪಾಪ ಕರಲಕ್ಹು ತು ಮನೆ ವರಿ ಮಾರಾ ರಾಜ್ಯನೆ ಮಹಾಪಾತ ಲಕುನ್ ಮ್ಹೈ ಘಾಲ್ಯೊಸ? ತು ನೈ ಕರಾನಾ ಕರಾನೆ ಮಿ ತುನೆ ಸು ಕರ‍್ಯೊತೊ" ಕೈನ, 10 'ತು ಕಯಾ ಉದ್ದೆಶಕ್ಹು ಆ ಕಾರ್ಯ ಕರ‍್ಯೊ" ಕೈನ ಅಬಿಮೆಲೆಕ ಅಬ್ರಹಾಮನೆ ಪುಚ್ಯೊ. 11 ತೆಳಾಮಾ ಅಬ್ರಹಾಮ, 'ಎ ಜ಼ಗಾನಾ ಕ್ಹುದಾನ ಭ್ಹೆ ಭಕ್ತಿಮಾ ನೈ ರ‍್ಹೈನ ಮಾರಿ ಬೈಕೊನಾ ನಿಮತ್ತಕ್ಹು ಮನೆ ಖಲಾಸ ಕರಸ ಕೈನ ಸೊಚ್ಯೊತೊ. 12 ತೆನೈಸೊ ತೆ ಕ್ಹರಿಮಾಜ ಮಾರಿ ನ್ಹಾನಿ ಬ್ಹೆನ ವ್ಹೈ, ಮಾರಾ ಬಾನಿಜ ದಿಕ್ರಿ ವ್ಹೈ; ತೆನೈಸೊ ಮಾರಿ ಯಾನಿ ದಿಕ್ರಿ ನೈ ರ‍್ಹಯಲಕ್ಹು ಮನೆ ಬೈಕೊ ಥೈಸ. 13 ಮಿ ಕ್ಹುದಾನಿ ಚಿತ್ತಕ್ಹುಜ ಬಾನಾ ಘರನೆ ಚೊಡಿನ ದೆಶಾಂತರೊನೆ ಜಾವಾನಾಹುತಿ ಜಾ಼ತಾಮಾ ಮಿ ತಿನೆ, 'ಹಮೆರ ಜಾವಾನಾ ಕ್ಹಾರಾ ಜಗವೊಮಾ ಮನೆ ತಾರಾಕ್ಹು ಯಕ್ಕ ಮರ್ಗಾ ಥೌ. ತೆ, ಸು ವ್ಹೈ ಕದ್ಯಾಮ ತು ಮನೆ ಮ್ಹೊಟೊ ಬ್ಹೈ ವ್ಹೈ ಕೈನ ಕೌ’ ಕೈನ ತಿಳಸಾಯೊ" ಕದ್ಯೊ. 14 ತೆಳಾಮಾ ಅಬಿಮೆಲೆಕ ಅಬ್ರಹಾಮನೆ ಬೈಲೊ-ಬಕ್ರಿಯೊನೆ ದಾಸ-ದಾಸಿಯೊನೆ ದಿನ, ತಿನಿ ಬೈಕೊ ಥಯಲ ಸಾರಳನೆ ತಿನೆ ವಪ್ಸಿನ, 15 'ದೆಕ, ಆ ಮಾರು ದೆಶ; ಇಮಾ ತುನೆ ಪಸಂದ ರ‍್ಹಯಲ ಜ಼ಗಾ ತು ರ‍್ಹೆಸಕಶಿ" ಕೈನ ಅಬಿಮೆಲೆಕ ಕದ್ಯೊ. 16 ತೆನೈಸೊ ತೆ ಸಾರಳನೆ, 'ತಾರ ಮ್ಹೊಟಾ ಬ್ಹೈನೆ ಯಕ್ಕ ಹಜಾ಼ರ ರುಪ್ಪಾನಾ ಬಿಲ್ಲಾ ದಿದ್ಯೊಸ; ಥಯಲ ಕ್ಹಾರಾ ಸಂಗತಿಯೊ ಶೆಂ ಕರಿಲಿದ್ಯಾವಾಚಿ ಆ ಪ್ರಾಯಶ್ಚಿತ ರ‍್ಹವಾದೆ; ತು ಮಾನಸಿಕ ವೈ ಕೈನ ಇಕ್ಹು ಕ್ಹಾರ ತಿಳ್ದಿಲಿವಸ" ಕೈನ ಕದ್ಯೊ. 17 ತೆ ಥಯಲ್ಪರ ಅಬ್ರಹಾಮ ಕ್ಹುದಾಕನ ಮಾಂಗಿಲಿದಲಕ್ಹು ಅಬಿಮೆಲೆಕನೆ, ತಿನಿ ಬೈಕೊನೆ ವರಿ ತಿನಾ ದಾಸಿಯೊನೆ ವಾಸ ಕರಲಕ್ಹು ತ್ಯುನೊನೆ ಬಚ್ಚಾ ಥಯಾ. 18 ಅಬ್ರಹಾಮನಿ ಬೈಕೊ ಥಯಲ ಸಾರಳಕ್ಹು ಯಹೊವಾ ಅಬಿಮೆಲೆಕನಾ ಘರಮಾ ರ‍್ಹಯೆಲ ಕ್ಹಾರಾ ಬಾಕಡಿಯೊನೆ ಗ್ವಡವಾಲಿಯೊ ಕರ‍್ಯೊ.