1 ರಾಹೆಳ ತೆ ಯಾಕೊಬನೆ ಬಚ್ಚಾ ಜ಼ನ್ನಿನ ನೈ ದಿವಾಕ್ಹು ತೆ ದೆಕಿನ ತಿನಿ ಮ್ಹೊಟಿ ಭೆನ್ನಾ ಉಪ್ಪರ ಸಂಗಟ ಘಾಲಿನ ಯಾಕೊಬನೆ ಮನೆ ಬಚ್ಚಾ ದೆ ನೈತೊ ಮಿ ಮರಿ ಜೌ಼ಸ ಕೈನ ಕದಿ. 2 ಯಾಕೊಬ ರಾಹೆಳನಾ ಉಪ್ಪರ ಶಿಟ್ಟ ಥೈನ ಕ್ಹುದಾ ತುನೆ ಬಚ್ಚಾ ನೈ ಥಯಲ ದಾಕ್ಹಲ ಕರ‍್ಯೊಸ ಕದ್ಯಾಮ ಮಿ ಕಿಮ ತುನೆ ಬಚ್ಚಾ ದೆ ಸಕುಸ ಕದ್ಯೊ. 3 ತಿನಾಹುತಿ ತೆ ಮಾರಿ ದಾಸಿ ಥಯಲ ಬಿಲ್ಹಾ ಛೆ ತಿನಾ ಕ್ಹಾತೆ ಕ್ಹುರೆ ತೆ ಪೆಟೆ ರ‍್ಹೈಮ ತೆ ಬಚ್ಚಾ಼ನೆ ಮಾರಾ ಕ್ಹೊಳಾಮಾ ಘಾಲಾದೆ ತೆಳಮ ಮನೆ ಬಿ ಬಚ್ಚಾ ಶೆ ಕೈನ. 4 ತಿನಿ ದಾಸಿ ಥಯಲ ಬಿಲ್ಹಳನೆ ಬೈಕೊ ಥಾವಾನೆ ಒಪ್ಸಿನ ದಿದಿ. 5 ಯಾಕೊಬ ತಿನಾ ಕ್ಹಾತೆ ಕ್ಹುರಯಲಕ್ಹು ತೆ ಪೆಟೆ ರ‍್ಹೈನ ಪಟ್ಟೊ ಜ಼ನ್ನಲ್ಪರ. 6 ರಾಹೆಳ ಕ್ಹುದಾ ಹಮ್ನಾ ಮಕನ ನ್ಯಾಯ ಕರಾಯೊಸ ತೆ ಮಾರಿ ಪ್ರಾಥನಾ ಐಕಿನ ಮನೆ ಯಕ್ಕ ದಿಕ್ರೊ ದಿದ್ಯೊಸ ಕೈನ ತೆ ಪಟ್ಟಾನೆ ದಾನ ಕೈನ ನಾಮ ಮ್ಹೆಲಿ. 7 ರಾಹೆಳನಿ ದಾಸಿ ಥಯಲ ಬಿಲ್ಹಳ ವರಿ ಪೆಟೆ ರ‍್ಹೈನ ಯಾಕೊಬನೆ ಬೆವಾ ಪಟ್ಟಾನೆ ಜ಼ನ್ನಿನ ದಿದಿ. 8 ರಾಹೆಳ ಮಾರಿ ಮ್ಹೊಟಿ ಭೆನ್ನಾ ಕ್ಹಾತೆ ಲಡೈ ಕಾಡಿನ ಜಿತ್ತಿಸ ಕೈನ ತೆ ಪಟ್ಟಾನೆ ನಫ್ತಾಲಿ ಕೈನ ನಾಮ ಮ್ಹೆಲಿ. 9 ಲೆಯಳ ತಿನೆ ಬಚ್ಚಾ ನತ್ತಿ ಥಾವಾಡಾ ಕೈನ ದೆಕಿನ ತಿನಿ ದಾಸಿ ಥಯಲ ಜಿಲ್ಪಳನೆ ಯಾಕೊಬನಿ ಬೈಕೊ ಥಾವಾನೆ ಒಪ್ಸಿನ ದಿದಿ. 10 ಲೆಯಳನಿ ದಾಸಿ ಥಯಲ ಜಿಲ್ಪಳ ಯಾಕೊಬನೆ ಪಟ್ಟೊ ಜ಼ನ್ನಿನ ದಿದಲಕ್ಹು. 11 ಲೆಯಳ ಮನೆ ಚೊ಼ಕು ಥಯು ಕೈನ ತೆ ಪಟ್ಟಾನೆ ಗಾದ ಕೈನ ನಾಮ ಮ್ಹೆಲಿ. 12 ಲೆಯಳನಿ ದಾಸಿ ಥಯಲ ಜಿಲ್ಪಳ ಯಾಕೊಬನೆ ವರಿ ಯಕ್ಕ ಪಟ್ಟಾನೆ ಜ಼ನ್ನತಾಮಾ. 13 ಲೆಯಳ ಮಿ ಧನ್ಯ ಥೈ ಕ್ಹಾರಾ ಬಾಕ್ಡಿಯೊ ಮನೆ ಧನ್ಯ ವ್ಹೈ ಕೈನ ಕವಸ ಕೈನ ತೆ ಪಟ್ಟಾನೆ ಅಶೆರ ಕೈನ ನಾಮ ಮ್ಹೆಲಿ. 14 ಘೌನಾ ಸುಗ್ಗಿ ಕಾಲಮಾ ರುಬೆನ ರಾನ್ಮಾ ಗಯೆಲ ಟೈಮಮಾ ಕಾಮಜನಕ ಝಾಡನಾ ಫಲೊ ದೆಕಿನ ತಿನೆ ಯಾ ಥಯಲ ಲೆಯಳನೆ ಲೈನ ದೆತಾಮಾ ರಾಹೆಳ ತಿನೆ ತಾರೊ ದಿಕ್ರೊ ಲಾಯೆಲ ಕಾಮಜನಕ ಫಲೊಮಾ ಮನೆಬಿ ದಕ್ಹಾ ಫಲೊ ದೆ ಕೈನ ಪುಚ್ಚಿ಼. 15 ತಿನಾಹುತಿ ಲೆಯಳ ತು ಮಾರಾ ಮಾಟಿನೆ ಕಾಳಿದಲ ತುನೆ ಬಸ ನತ್ತಿ ಥಯು ಸು? ಹಮ್ನಾ ಮಾರೊ ದಿಕ್ರೊ ಲಾಯೆಲ ಕಾಮಜಕನಾ ಫಲೊ ಬಿ ಮಕಂತಿ ಕಾಳ್ಳಿವಾನೆ ದೆಕಾಡಿಸ ಸು? ಕೈನ ಕತಾಳೆ ರಾಹೆಳ ಚೊ಼ಕು ವ್ಹೈ ತು ಮನೆ ತಾರೊ ದಿಕ್ರೊ ಲಾಯೆಲ ಫಲೊ ಮನೆ ದಿದಿಮ ಆಜ಼ ರಾತೆ ತು ಮಾರಾ ಮಾಟಿನಾ ಕ್ಹಾತೆ ಕ್ಹುರೆಸಕಸಿ ಕದಿ. 16 ಕ್ಹಾಂಜ಼ನಾ ವಕ್ಹತಮಾ ಯಾಕೊಬ ರಾನ್ಮಾತೊ ಆತಾಳೆ ಲೆಯಳ ತಿನಾ ಕ್ಹಾಮಿ ಗೈನ ತು ಮಾರಾ ಕ್ಹಾತೆ ಕ್ಹುರೌ ಮಿ ಮಾರೊ ದಿಕ್ರೊ ಲಾಯೆಲ ಕಾಮಜಕನಾ ಫಲೊ ದಿನ ತುನೆ ಇಕ್ಕಾತಿ ಲಿದಿಸ ಕದಿ ತೆ ರಾತೆ ತೆ ತಿನಾ ಕ್ಹಾತೆ ಕ್ಹುರಾಯೊ. 17 ಕ್ಹುದಾ ಲೆಯಳನಿ ಪ್ರಾಥನಾ ಐಕ್ಯೊ. ತೆ ಪೆಟೆ ರ‍್ಹೈನ ಯಾಕೊಬನೆ ಪಾಂಚ಼ವಾ ಪಟ್ಟಾನೆ ಜ಼ನ್ನಿ. 18 ಲೆಯಳ ಮಾರಿ ದಾಸಿನೆ ಮಾರಾ ಮಾಟಿನಾ ಹತಮಾ ದಿದಲಕ್ಹು ಕ್ಹುದಾ ಮನೆ ಪ್ರತಿ ಫಲ ಕೈನ ತೆ ಪಟ್ಟಾನೆ ಇಸ್ಸಾಕಾರ ಕೈನ ನಾಮ ಮ್ಹೆಲಿ. 19 ಲೆಯಳ ವರಿ ಪೆಟೆ ರ‍್ಹೈ ಯಾಕೊಬನೆ ಛೆವಾ ಪಟ್ಟಾನೆ ಜ಼ನ್ನಿನ ದಿದಿ. 20 ಲೆಯಳ ಕ್ಹುದಾ ಮನೆ ಚೊ಼ಕು ಆಶಿರ್ವಾದ ದಿದ್ಯೊಸ ಮೆ ಮಾರಾ ಮಾಟಿನೆ ಛೆವಾ ಪಟ್ಟಾ ಜ಼ನ್ನಿನ ದಿದಿಲಕ್ಹು ತೆ ಮಾರಾ ಕ್ಹಾತೆಜ಼ ಜಿವ್ನಾ ಕರಸ ಕೈನ ತೆ ಪಟ್ಟಾನೆ ಜೆಬುಲೊನ ಕೈನ ನಾಮ ಮ್ಹೆಲಿ. 21 ತೆ ಥಯಲ್ಪರ ತೆ ಯಕ್ಕ ಚೊ಼ಕ್ರಿ ಜ಼ನ್ನಿನ ತಿನೆ ದಿನಾ ಕೈನ ನಾಮ ಮ್ಹೆಲಿ. 22 ಪಾಚಲ್ತೊ ಕ್ಹುದಾ ರಾಹೆಳನೆ ಶೆ ಕರಿನ ತಿನಿ ಪ್ರಾಥನಾ ಐಕಿನ ತಿನೆ ಬಚ್ಚಾ ಥಾವಾ ವರಕ್ಹು ಕರ‍್ಯೊ. 23 ತೆ ಪೆಟೆ ರ‍್ಹೈನ ಪಟ್ಟಾನೆ ಜ಼ನ್ನಿನ, ಕ್ಹುದಾ ಮಪರ ರ‍್ಹಯಲ ಕಲಂಕ ಕಾಡಿಪಾಡ್ಯೊ. 24 ತೆ ನೈ ತೆ ಯೆಹೊವ ಮನೆ ವರಿ ಯಕ್ಕ ಪಟ್ಟೊ ದಿದ್ಯೊಸ. ಕೈನ ತಿನು ನಾಮ ಯೊಸೆಫ ಕೈನ ನಾಮ ಮ್ಹೆಲಿ.

25 ಯೊಸೆಫ ಹುಟ್ಟಲ್ಪರ ಯಾಕೊಬ ಲಾಬಾನನೆ ಮಿ ಹಮ್ನಾ ಮಾರಾ ಸ್ವಂತ ಗರೆ ಜಾ಼ವಾನೆ ಅನುಮತಿ ದೆ, 26 ಮಾರಿಯೊ ಬಾಕ್ಡಿಯೊನೆ ಬಚ್ಚಾ಼ವೊನೆ ಮನೆ ದೆ ಮಿ ತಾರಿ ಸೆವೆ ಕರಿನ ತ್ಯುನೊನೆ ಗಳಸಿ ಲಿದ್ಯೊಸ. ಮಿ ತುನೆ ಚೊ಼ಕಿ ಸೆವೆ ಕರ‍್ಯೊಸ ಕವಾನು ತುನೆ ಗ್ವತ್ತ ಛೆ. ಕೈನ ಕದ್ಯೊ. 27 ಲಾಬಾನ ತಿನೆ ಮಿ ಕವಾನು ಐಕ ಯಹೊವಾ ತಾರಿಕ್ಹು ಮನ ಆಶಿರ್ವಾದ ದಿದ್ಯೊಸ ಕವಾನು ಮನೆ ಗ್ವತ್ತ ಛೆ. 28 ಕೆ ಮಿ ತುನೆ ಕೆಕ್ಲೊ ಪಗಾರ ದ್ಯು? ತು ಕದಲ ತೆಕ್ಲು ದ್ಯುಸ ಕೈನ ಕದ್ಯೊ. 29 ಯಾಕೊಬ ಮಿ ತಾರಾ ಹುತಿ ತ್ರಾಸ ಖೈನ ಕಾಮ ಕರ‍್ಯೊಸ ಕವಾನು ತುನೆ ಗ್ವತ್ತ ಛೆ. ಮಿ ತಾರಾ ಬಕ್ರಾವೊನೆ ದೆಕ್ರಾಣಕಿ ಕರಲ ಹುತಿ ತೆ ಜಾಸ್ತಿ ಥಯಾಸ. 30 ಮಿ ಆತಾಮಾ ಬಕ್ರಾ ದಕ್ಹಾಜ಼ ವ್ಹತಾ. ಹಮ್ನಾತೊ ತುಕನ ಘನ್ನಾ ಬಕ್ರಾ ಛೆ. ಮಿ ತಾರಾಹುತಿ ಕರಲ ಕ್ಹಾರಾನೆ ಯಹೊವಾ ಆಶಿರ್ವಾದ ದಿದ್ಯೊಸ. ಮಿ ಖುದ್ದನಾ ಹುತಿ ಕಾಮ ಕರಾನು ಟೈಮ ಛೆ ಮಾರಾ ಸ್ವಂತ ಘರೆ ಜಾ಼ವಾನೆ ಟೈಮ ಛೆ ಕದ್ಯೊ. 31 ಲಾಬಾನ ತಿಮ ರ‍್ಹಯೊಮ ಮಿ ತುನೆ ಸು ದ್ಯು ಕೆ ಕೈನ ಪುಚ್ಯೊ. ಯಾಕೊಬ ತು ಮನೆ ಸುಜ಼ ದ್ಯು ನಕೊ ತು ಮಾರಾಹುತಿ ಯಕ್ಕ ಕಾಮ ಕರ‍್ಯೊಮ ಬಸ್ಸ, ಪ್ಹರಿನ ಮಿ ತಾರಾ ಬಕ್ರಾವೊನೆ ರಾಕುಸ. 32 ತೆ ಸುವೈ ಕದ್ಯಾಮ ಹಮ್ನಾಜ಼ ಮಿ ತಾರಾ ಬಕ್ರಾವೊನಾ ಗುಂಪಮಾ ಗೈನ ಬಕ್ರಾವೊಮಾ ಚಿಕ್ಕಿಯೊ ವರಿ ಮಚ್ಚ ರ‍್ಹಯಲ ಬಕ್ರಾವೊಮಾ ಕಾಳಾ ರ‍್ಹಯಲ ಬಕ್ರಿಯೊಮಾ ಚಿಕ್ಕಿಯೊ ವರಿ ಮಚ್ಚ ರ‍್ಹಯಲ ಜು಼ದಾ ಕರುಸ ತೆ ಮಾರೊ ಪಗಾರ ವ್ಹೈ. 33 ಇಮ್ಮ ರ‍್ಹಯಮ ಅಗಲ್ಯಾ ದಿನೊಮಾ ಮಾರಾ ಪಗಾರಾನಾ ಹುತಿ ತುಕನ ಆತಾಮಾ ಮಿ ರ‍್ಹಯಲ ಕ್ಹರಿಕ್ಹು ಮನೆ ಸಾಕ್ಷಿ ಥಾವಸ. ಬಕ್ರಿಯೊಮಾ ಚಿಕ್ಕಿಯೊ ವರಿ ಮಚ್ಚ ರ‍್ಹಯಲ ರ‍್ಹಯುಮ ಬಕ್ರಾಮಾ ಕಾಳಾ ನೈಸೊ ಮಕನ ಮಳ್ಯಾಮ ತೆ ಚೊ಼ರಿ ಕರ‍್ಯೊಸ ಕೈನ ಕೌ ನೈ ಕದ್ಯೊ. 34 ತೆ ವಾತೆ ಲಾಬಾನ ಮಿ ತೆ ವಾತೆ ಮಿ ವಪ್ಪಿಲಿದ್ಯೊಸ ತು ಕದಲ ತಿಮ್ಮಜ಼ ಅಪೆ ಕರಿಯೆ ಕದ್ಯೊ. 35 ತೆ ದಿನೆ ಲಾಬಾನ ಚಿಕ್ಕಿಯೊ ರ‍್ಹಯಲ ಕ್ಹಾರಾ ಬಕ್ರಿಯೊನಾ ಬಚ್ಚಾ ವರಿ ಬಕ್ರಿಯೊ ಕಾಳಾ ಬಕ್ರಾ ಜು಼ದಾ-ಜು಼ದಾ ಕರ‍್ಯೊ. ಲಾಬಾನ ತಿನಾ ಪಟ್ಟಾವೊನೆ ತೆ ಬಕ್ರಾವೊನೆ ದೆಕ್ರಾಣಕಿ ಕರಾನೆ ಕದ್ಯೊ. 36 ತಿನಾಹುತಿ ತಿನಾ ಪಟ್ಟಾ ಚಿಕ್ಕಿಯೊ ರ‍್ಹಯಲ ತ್ಯುನಾ ಕ್ಹಾತೆ ಬಿಜೆಕ ಜ಼ಗಾಕನ ಗಯಾ ತ್ಯುನೆ ತನ್ನ ದಿನ್ನ ಲಕ್ಕಾ ಪ್ರಯಾಣ ಕರ‍್ಯಾ ಯಾಕೊಬ ತ್ಯಾ ರ‍್ಹೈನ ಉಗ್ರಲ ಕ್ಹಾರಾವೊನೆ ದೆಕ್ರಾಣಕಿ ಕರಾನು ಶುರು ಕರ‍್ಯೊ. 37 ತಿನಾಹುತಿ ಯಾಕೊಬ ಚಿನಾರ ಬಾದಾಮಿ ಅರ್ಮೊನ ಕವಾನು ಝಾಡೊನಿ ಜ಼ಗಾ ಕಚ್ಚಿಯೊ ಲಾಕ್ಡಿಯೊ ಕೆತ್ತಿನ ಧೊಳಿಯೊ ಕರಿನ. 38 ಯಾಕೊಬ ತೆ ಠೊಂಗಿಯೊನೆ ಬಕ್ರಾ ಪಾನಿ ಪಿವಾನಿ ಜ಼಼ಗಾ ಮ್ಹೆಲ್ಯೊ. ಜಾ಼ನವರೊ ಪಾನಿ ಪಿವಾನೆ ಆತಾಮಾ ತೆ ಜ಼ಗಾಕನ ಸಂಗಮ ಕರ್ತಾತಾ. 39 ಬಕ್ರಿಯೊ ತೆ ಠೊಂಗಿಯೊನ ಕ್ಹಾಮಿಯೊ ಸಂಗಮ ಕರ್ತಾಮಾ ತ್ಯುನೊಮಾ ಹುಟ್ಟಲ ಕ್ಹಾರಾ ಬಚ್ಚಾ಼ ಚಿಕ್ಕಿಯೊ ವರಿ ಮಚ್ಚಿಯೊ ರ‍್ಹಯಲ ವರಿ ಕಾಳಾ ರಂಗನಾ ವ್ಹತಾ. 40 ಯಾಕೊಬ ತೆ ಬಕ್ರಾವೊನಾ ಬಚ್ಚಾ಼ವೊನೆ ಲಾಬಾನಾ ಹಿಂಡಮಾ ಮಳಾಯಾವಾಚಿ ತಿನಾ ವ್ಹೈ ಕೈನ ಜು಼ದಾ ಕರ‍್ಯೊ ವರಿ ಲಾಬಾನನಾ ಬಕ್ರಾವೊನಾ ಮ್ಹೊಡಾ ಘೆರಿಯೊ ರ‍್ಹಯಲ ತೆ ಬಕ್ರಾ ವರಿ ಕಾಳಾ ರ‍್ಹಯಲ ಬಕ್ರಾವೊ ಬಗಲ ಪ್ಹರಾಯೊ. 41 ವರಿ ಘಟ್ಟಮುಟ್ಟ ರ‍್ಹಯಲ ಬಕ್ರಾ ಸಂಗಮ ಕರ್ತಾಮಾ ತೆ ಲಾಕ್ಡಿಯೊನೆ ದೆಕ್ತಾ ಸಂಗಮ ಕರಾತೆ ಕೈನ ಯಾಕೊಬ ಟೊಪ್ಲಿಯೊಮಾ ಲಾಕ್ಡಿಯೊ ಮುಕ್ಯೊ. ವರಿಬಿ ತೆ ಬಕ್ರಾ ವರಿ ಬಕ್ರಿಯೊ ಬಲಹಿನ ರ‍್ಹತಾಮಾ ಲಾಕ್ಡಿಯೊ ಟೊಪ್ಲಿಯೊಮಾ ಮುಕ್ತೊ ನ್ಹೊತೊ. 42 ಇಮ ಬಲಹಿನ ರ‍್ಹಯಲ ಗುಂಪ ಲಾಬಾನನಾ ಪಾಲ್ಮಾ ಆಯಾ. ಘಟ್ಟಮುಟ್ಟ ರ‍್ಹಯಲ ಯಾಕೊಬನಾ ಪಾಲೆ ಆಯಾ. 43 ಇನಾನಿಂಗತ ಯಾಕೊಬ ಘನ್ನೊ ಸೌಕಾರ ಥಯೊ.ತಿನೆ ಬಕ್ರಾವೊನು ಹಿಂಡ ಆಳೊ ಹುಂಟೊ ಗದ್ಡಾ ಘನ್ನು ವ್ಹತು.