1 ಅಬ್ರಹಾಮ ಗಡಿಯೊ ಥಯೊತೊ. ಯಹೊವಾ ತಿನೆ ಘನಾ ವಿಷಯಮಾ ಅಭಿವೃದ್ದಿ ಕರ‍್ಯೊತೊ. 2 ಅಮ್ಮ ರ‍್ಹತಾಮಾ ತಿನೆ ರ‍್ಹಯಲ ಆಸ್ತಿನಾ ಉಪ್ಪರ ಆಳ ಕರಾಲಾ ಮ್ಹೊಟ್ಟ ಸೆವಕನೆ ಅಬ್ರಹಾಮ, 'ತು ಮಾರಾ ಮಾಂಡಿನಾ ಹೆಟೊ ಹತ್ತ ಮ್ಹೆಲ ಕದ್ಯೊ. 3 ತೆ ಥಯಲ್ಪರ ಯಹೊವಾನಿ ಕ್ಹಮ ಮಿ ಜಿವ್ತೊ ರ‍್ಹಯಲ ಆ ಕಾನಾನ್ಯ ವಾಲಾವೊಮಾತೊ ಮಾರೊ ದಿಕ್ರೊ ಥಯಲ ಇಸಾಕನೆ ಯಕ್ಕ ಛೊಕ್ರಿ ಲೈನ ಹಿವಾ ಕರ‍್ಯಾವಾಚಿ, 4 ಮಾರಾ ದೆಶನಾ, ಮಾರಾ ಸಂಭದಿಕರೊಮಾನಿ ಯಕ್ಕ ಛೊಕ್ರಿನೆ ಲೈನ ಹಿವಾ ಕರುಸ ಕೈನ ಪರಲೊಕನೊ ವರಿ ಭುಲೊಕನೊ ಬಾ ಥಯಲ ಯಹೊವಾನಾ ಉಪ್ಪರ ಕ್ಹಮ ಘಾಲು" ಕೈನ ಕದ್ಯೊ. 5 ತಿನಾಹುತಿ ತೆ ಸೆವಕ, 'ಯಕ್ಕ ಟೈಮ ಮಾರಾ ಕ್ಹಾತೆ ಆ ದೆಶನೆ ಆವಾನೆ ತೆ ಛೊಕ್ರಿನೆ ಮನಸ ನೈ ರ‍್ಹಯಲ ರ‍್ಹಯುಮ, ತು ಛೊಡಿನ ಆಯಲ ತೆ ದೆಶನೆ ಮಿ ತಾರಾ ದಿಕ್ರಾನೆ ತ್ಯಾ ಬಲೈಲಿನ ಜೌ಼ ಸು?" ಕೈನ ಪುಚ್ಯೊ. 6 ಅಬ್ರಹಾಮ ತಿನೆ, 'ತ್ಯಾ ಮಾರಾ ದಿಕ್ರಾನೆ ಕೆಳಾಮಾಜ಼ ಬಲೈಲಿನ ಜೌ಼ ನೈ. 7 ಮಾರಾ ಬಾನಾ ಘರ್ತೊಬಿ ಮಿ ಹುಟ್ಟಲ ಘರ್ತೊಬಿ ಮನೆ ಬಲೈ ಲೈನ, ‘ತಾರಿ ಸಂತತಿನೆ ಆ ದೆಶ ದ್ಯುಸ’ ಕೈನ ಕ್ಹಮ ಘಾಲಿನ ಕದಲ ಪರಲೊಕನೊ ಕ್ಹುದಾ ಥಯಲ ಯಹೊವಾ ತಾರಾ ಕ್ಹಾಮೊ ತಿನಾ ದುತನೆ ವಳೈನ, ತು ತ್ಯಾಂತೊ ಮಾರಾ ದಿಕ್ರಾನಾ ಹುತಿ ಛೊಕ್ರಿ ಲಿನ ಆಯೆನಿಂಗತ ಅನುಕುಲ ಕರಿನದಿವಸ. 8 ತಾರಾ ಪಾಚಿ ಆವಾನೆ ತೆ ಛೊಕ್ರಿನೆ ಮನಸ ನೈ ರ‍್ಹಯುಮ ಮಿ ಘಲಾಯಲ ಕ್ಹಮಕ್ಹು ತು ಬಿಡುಗಡೆ ಹೊಂದಿಲಿವೊಶಿ. ತೆನೈಸೊ ಮಾರಾ ದಿಕ್ರಾನೆ ತ್ಯಾ ಲಿನ ಜೌ ನೈ" ಕೈನ ಕದ್ಯೊ. 9 ತೆಳಾಮಾ ತೆ ಸೆವಕ ತಿನೊ ದಣಿ ಥಯಲ ಅಬ್ರಹಾನಾ ಮಾಂಡಿನಾ ಹೆಟೊ ಹತ್ತ ಮ್ಹೆಲಿನ ತೆ ಕದನಿಂಗತಜ಼಼ ಕ್ಹಮ ಘಾಲ್ಯೊ. 10 ತೆ ಥಯಲ್ಪರ ತೆ ಸೆವೆಕ ತಿನಾ ಮಾಲಕನ್ನ ರ‍್ಹಯಲ ಹುಂಟುಮಾ ದಕ್ಹ ಹುಂಟೊನೆ ತಯ್ಯಾರ ಕರ್ಲಿನ, ತಿನಾ ಮಾಲಕಕಂತಾ ಕ್ಹೊನಾನು ಸಾಮನಲಿನ ಚಾ಼ಲ್ಯೊ ಅರಾಮ ಸಿಮೆನೆ ಮಳಲ ನಾಹೊರ ರ‍್ಹಯಲ ಗಾಮ್ನೆ ಮುಟ್ಯೊ. 11 ಕ್ಹಾಂಜ಼ನಾ ಟೈಮ್ಮಾ ಕ್ಹಾರಿಯೊ ಬಾಕಡಿಯೊ ಪಾನಿ ಭರ್ಲಿವಾನೆ ಜ಼ಾತಾಮಾ ತೆ ಗಾಮನಿ ಇರಕನ ತಿನಾ ಹುಂಟೊನೆ ಕ್ಹುರಾಡಿನ, 12 'ಮಾರು ಮಾಲಕ ಥಯಲ ಅಬ್ರಹಾಮನಾ ಕ್ಹುದಾ ಥಯಲ ಯಹೊವಾ, ಮಿ ಕಯಾ ಕಾಮೆ ಆಯೊಸ ತೆ ಕಾಮ ತು ಥಾವಾ ವರಕ್ಹು ಕರಿನ ಮಾರೊ ಮಾಲಕ ಥಯಲ ಅಬ್ರಹಾಮನೆ ಮರಗ ಕೈನ ತುಕನ ಮಾಂಗಿಲ್ಯುಸ. 13 ದೆಕ, ಪಾನಿ ರ‍್ಹಯಲ ಜ಼ಗಾ ಹುಬ್ರಯೊಸ; ಎ ಗಾಮನಿಯೊ ಜಾಂಜಿಮಾನ ಛೊಕ್ರಿಯೊ ಪಾನಿ ಭರಾಹುತಿ ಆವಾಡಿಯೊಸ. 14 ಮಿ ಕೈ ಛೊಕ್ರಿನೆ, ತು ಮರ್ಗಿನ ತಾರೊ ಘಡೊ ಉತಾರಿನ ಮನೆ ಪಿವಾನಾಹುತಿ ಪಾನಿ ದೆ ಕೈನ ಕತಾಮಾ ತು ಪಾನಿ ಪಿ ಸಕ್ಷಿ ವರಿ ತಾರಾ ಹುಂಟೊನೆಬಿ ಪಾನಿ ದ್ಯುಸ. ಕವಸ್ತೊ, ತೆಜ಼ ತಾರೊ ದಾಸ ಥಯಲ ಇಸಾಕನೆ ತುಜ಼ ನೆಮ್ಸಲ ಛೊಕ್ರಿ ಥೌ. ಮಾರಾ ಮಾಲಕಪರ ತಾರಿ ಮರ್ಗಾ ಛೆ ಕೈನ ಕವಾನು ಇನಿಕ್ಹು ಮನೆ ಗ್ವತ್ತ ಥೌ. 15 ತೆ ಇಮ ಕೈಲೆತಾಮಾಜ಼ ಅಬ್ರಹಾಮನೊ ನ್ಹಾನೊ ಭೈ ಥಯಲ ನಾಹೊರನಿ ಬೈಕೊನಿ ಮಿಲ್ಕಾನೊ ದಿಕ್ರಾನಿ ಬೆತೊವೆಲನೆ ಹುಟ್ಟಲ ರೆಬೆಕ್ಕಳ ಖಾಂದಾಪರ ಘಡೊ ಮ್ಹೆಲ್ಲಿನ ಗಾಮ್ತಿ ಭಾರಿ ಆಯಲ ದೆಕ್ಯೊ. 16 ತೆ ಛೊಕ್ರಿ ಘನ್ನಿ ಸುಂದರ ವರಿ ಜಾಂಜಿಮಾನ ವ್ಹತಿ. ತೆ ಕಯಾಜ಼ ದಾಣಗಾನಾ ಕ್ಹಾತೆ ಶಾರಿರಿಕ ಸಂಭಂಧ ಕರಿ ನ್ಹೊತಿ. 17 ತೆ ಇರಕನ ಗೈನ ಘಡಾಮಾ ಪಾನಿ ಭರ್ಲಿನ ಉಪ್ಪರ ಆತಾಮಾ ತೆ ಸೆವಕ ನ್ಹಾಟ್ತೊ ತಿನಾ ಕ್ಹಾಮೊ ಐನ 'ಯಾ ಮನೆ ಮರ್ಗಿ ತಾರಾ ಘಡಾಮಾ ಲಾಯಲ ಪಾನಿಮಾ ಮನೆ ಪಿವಾನಾ ಹುತಿ ದಕ್ಹು ದಕ್ಹು ಪಾನಿ ದೆ. ಕತಾಮಾ ತೆ, 18 ತೆಳಾಮಾಜ಼ ಘಡೊ ಉತಾರಿನೆ 'ಪಾನಿ ಪಿ ಬಾ ಕೈನ ಪಿವಾನೆ ದಿದಿ. 19 ಪಾನಿ ದಿದಲಪರ, 'ತಾರಾ ಹುಂಟೊನೆಬಿ ಪಾನಿ ಪಿವಾನಾ ಯಕ್ಲು ಮಿ ಭರಿಲೈನ ದ್ಯುಸ" ಕೈನ, 20 ಘಡಾಮಾ ರ‍್ಹಯಲ ಪಾನಿ ತೊಟ್ಟಿಮಾ ರಿಚೈ಼ನ ವರಿ ಪಾನಿಲಾವಾನಾಹುತಿ ಇರೆ ಗೈ. ಹುಂಟೊ ಪಿವಾನಾ ಯಕ್ಲು ಪಾನಿ ಲೈನ ಘಾಲಿ. 21 ತೆಕ್ಲಾಮಾಜ಼ ತೆ ಸೆವಕ ಸುಜ಼ ಬೊಲ್ಯಾವಾಚಿ ತಿನೆ ಯಕ್ಕಜ಼ ಸಂವಾ ದೆಕ್ತೊ,ಯಹೊವಾ ತೆ ಆಯಲ ಕಾಮ ಸಫಲ ಥೈಸು ನತ್ತಿ ಕವಾನು ತಿಳದಿಲಿವಾಹುತಿ ಕೈದಾಡ್ಯೊತೊ. 22 ಹುಂಟೊ ಪಾನಿ ಪಿದಲಪರ ತೆ ಸೆವಕ ತಿನೆ ಅರ್ದೊ ತೊಲಾನಿ ಕ್ಹೊನಾನಿ ಯಕ್ಕ ಪ್ಹುಲ್ಲಿ, ವರಿ ದಕ್ಹ ತೊಲಾನಿಯೊ ಕ್ಹೊನಾನಾ ಬೆ ಕಡಾ ದಿನ, 'ತು ಕಿನಿ ದಿಕ್ರಿ ವ್ಹೈ? ಮರ್ಗಿನ ಮನೆ ಕೆ. 23 ತಾರಾ ಬಾನಾ ಘರ್ಮಾ ಮನೆ ರ‍್ಹವಾನೆ ಜ಼ಗಾ ಛೆ ಸು?" ಕೈನ ಪುಚ್ತಾ಼ಮಾ, 24 ತೆ ತಿನೆ 'ಮಿ ನಾಹೊರನೆ ಮಿಲ್ಕಾನೆ ಹುಟ್ಟಲ ಬೆತೊವೆಲನಿ ದಿಕ್ರಿ ವ್ಹೈ. ಕೈನ ಕದಿ. 25 ಎ ನೈಸೊ ತಿನೆ, 'ಚಾ಼ರೊ ಘನ್ನು ಛೆ ವರಿ ತುನೆ ರ‍್ಹವಾನಾ ಹುತಿ ಜ಼ಗಾಬಿ ಛೆ" ಕದಿ. 26 ತೆ ಸೆವಕ ಎ ಕ್ಹಾರು ಐಕಿನ ಅಡ್ಡ ಪಡಿನ ಯಹೊವಾನೆ ನಮಸ್ಕಾರ ಕರ‍್ಯೊ. 27 'ಮಾರಾ ಮಾಲಕನೊ ಕ್ಹುದಾ ಥಯಲ ಯಹೊವಾನೆ ಸ್ತೊತ್ರಾ ಥಾವಾದೆ. ಮಾರಾ ಮಾಲಕನಾ ಖಾಂದಾನನಾ ಘರೆಜ಼ ಶಿದಾ ಬಲೈಲಾಯೊಸ" ಕದ್ಯೊ. 28 ತೆ ಛೊಕ್ರಿ ನ್ಹಾಟಿನ ಗೈನ ಥಯಲ ಕ್ಹಾರಿ ಸಂಗತಿ ತಿನಿ ಯಾ ಕನ ವರಿ ಘರ್ಮಾ ಕ್ಹಾರಾವೊಕನ ಕದಿ. 29 ರೆಬೆಕ್ಕನೆ ಲಾಬಾ ಕವಾಲೊ ಭೈ ವ್ಹತೊ.ತೆ ಇರಕನ ರ‍್ಹಯಲ ಹುಂಟೊಕನ ಹುಬ್ರಯಲ ತೆ ಮನಕ್ಹನ ನ್ಹಾಟಿನೆ ಆಯೊ. 30 ತಿನಿ ನ್ಹಾನಿ ಭೆನ್ಕನ ರ‍್ಹಯಲ ಪ್ಹುಲ್ಲಿ ದೆಕಿನ, ತೆ ಮನಕ್ಹ ಮಾರಾ ಕ್ಹಾತೆ ಕಿಮ ಬೊಲ್ಯೊಸ ಕೈನ ರೆಬೆಕ್ಕಾ ಕದಲ ಐಕಿನ, ಇರಕನ ಹುಬ್ರಯಲ ತೆ ಮನಕ್ಹಕನ ಆಯೊ. 31 ತಿನೆ, 'ಯಹೊವಾನು ಆಶಿರ್ವಾದ ಹೊಂದಲವಾಲಾ, ಮ್ಹೈ ಆ; ಕಾ ಭಾರೊ ಹುಬ್ರಯೊ? ತಾರಾ ಹುತಿಬಿ ವರಿ ಹುಂಟೊನಾಹುತಿ ಚಾ಼ಯೆಥಯಲ ಯಕ್ಲಿ ಜ಼ಗಾ ಕರ‍್ಯೊಸ" ಕೈನ ಕದ್ಯೊ. 32 ತೆ ಮನಕ್ಹ ಘರ್ಮಾ ಆತಾ ಲಾಬಾನ ಭಾರಾ ರ‍್ಹಕಾಡಿನೆ ತ್ಯುನೊನೆ ಖಾವಾನಾಹುತಿ ಚಾ಼ರೊ ದಿಲೈನ ತೆ ಮನಕ್ಹನೆ ವರಿ ತಿನಾ ಕ್ಹಾತೆ ರ‍್ಹಯಲವಾಲೊವೊನೆ ಪಗೊ ಧವಾಹುತಿ ಪಾನಿ ದಿದ್ಯೊ. 33 ತ್ಯುನೊನೆ ಖಾವಾನಾ ಹುತಿ ಅನ್ನ ಖಾವಾನೆ ಘಾಲ್ತಾಮಾ, 'ಮಿ ಆಯಲ ಕಾಮನಾ ಹುತಿ ಮಿ ತುಮೊಕನ ಕಯೆ ಲಕ್ಕಾ ಮಿ ಅನ್ನ ಖಾತೊ ನೈ" ಕತಾಮಾ ಲಾಬಾನ ಕೆ ಕದ್ಯೊ. 34 ತೆಳಾಮಾ ತೆ ಮಿ ಅಬ್ರಹಾಮನೊ ಸೆವಕ ವ್ಹೈ. 35 ಯಹೊವಾ ಮಾರಾ ಮಾಲಕನೆ ಘನ್ನೊ ಸೌಕಾರ ಕರ‍್ಯೊಸ. ತಿಕನ ಬಕ್ರಾ ಢೊರೊ, ಕ್ಹೊನು ರುಪ್ಪು ಆಳೊ ಹುಂಟೊ ಗದ್ಡಾ ದಿದ್ಯೊಸ. 36 ಮಾರಾ ಮಾಲಕನಿ ಬೈಕೊ ಥಯಲ ಸಾರಳಾನೆ ವೈಸ ಥಯಲ್ಪರ ತಿನಾಹುತಿ ಪಟ್ಟಾನೆ ಜ಼ನ್ನಿ; ತೆ ದಿಕ್ರಾನೆ ಮಾರಾ ಮಾಲಕಕನ ರ‍್ಹಯಲ ಕ್ಹಾರುಜ಼ ತಿನೆ ದಿದ್ಯೊಸ. 37 ಯಕ್ಲುಜ಼ ನೈಸೊ ಮಾರೊ ಮಾಲಕ ಪ್ರಯಾಣ ಕರೈನ, 'ಮಿ ರ‍್ಹಯಲ ಕಾನಾನ ದೆಶವಾಲಾವೊಕ್ಹು ಮಾರಾ ದಿಕ್ರಾನೆ ಛೊಕ್ರಿ ಲಿದ್ಯಾವಾಚಿ, 38 ಇನಾ ಬದಲಿ ಮಾರಾ ಬಾನಾ ಘರೆ ಮಾರಾ ಘರ್ದಾನಾವಾಲಾವೊಕನ ಗೈನ ತ್ಯುನೊಕಂತಿ ಛೊಕ್ರಿ ಲಿನ ಔ ಕೈನ ಮನೆ ಮೊಕಲ್ಯೊಸ. 39 ಮಿ ಮಾರಾ ಮಾಲಕನೆ, 'ಯಕ್ಕ ಟೈಮ್ಮ ಮಾರಾಪಾಚಿ಼ ತೆ ಛೊಕ್ರಿನೆ ಮನಸ ನೈ ರ‍್ಹಯುಮ ಮನೆ ಕದಿಮ 40 ತೆ ಮನೆ 'ಮಿ ಆರಾಧನಾ ಕರ್ತೊ ಆಯಲ ಮಾರೊ ಕ್ಹುದಾ ಥಯಲ ತೆ ಯಹೊವಾ ತಿನಾ ದುತೊನೆ ತಾರಾ ಕ್ಹಾತೆ ಮೊಕ್ಲಿನ ತು ಮಾರಾ ಖಾಂದಾನವಾಲಾ ರ‍್ಹಯಲ ಮಾರಾ ದಿಕ್ರಾನೆ ಛೊಕ್ರಿಲಿವಾನಾ ಹುತಿ ಮದತ ಕರಸ. 41 ತೆ ಥಯಲ್ಪರ ಮಿ ಕರಾಯಲ ಪ್ರಯಾಣಕ್ಹು ತು ಜಾ಼ತಾಮಾ ತು ಬಿಡುಗಡೆ ಛೆ" ಕೈನ ಕದ್ಯೊ. 42 ಮಿ ಎ ಟೈಮ್ಮಾ ಎ ಗಾಮ್ನಿ ಇರಕನ ಆತಾಮಾ, ಮಾರಾ ಮಾಲಕನೊ ಅಬ್ರಹಾಮನೊ ಕ್ಹುದಾ ಥಯಲ ಯಹೊವಾಜ಼, ಪಾನಿನಿ ಇರಕನ ಕ್ಹಾಲಿ ಹುಬ್ರಯೊತೊ; ತು ಮಾರಾ ಪ್ರಯಾಣ ಸಫಲ ಕರಾನೊ ರ‍್ಹಯೊಮ 43 ಪಾನಿನಾ ಹುತಿ ಆವಾನಿ ಕೈ ಛೊಕ್ರಿನೆ, ತು ಮರ್ಗಿನ ತಾರಾ ಘಡಾಮಾನು ದಕ್ಹು ಪಾನಿ ಪಿವಾನಾ ದೆ ಯಾ, ಕೈನ ಪುಚ್ತಾ಼ಮಾ ತೆ, 44 ಪಿ ಬಾ ವರಿ ತಾರಾ ಹುಂಟೊನೆಬಿ ಪಾನಿ ಲೈನೆ ದ್ಯುಸ. ಕವಸ ತೆಜ಼ ಛೊಕ್ರಿ ಯಹೊವಾಕ್ಹು ಇನಿಲಿದಲ ಮಾರಾ ಮಾಲಕನಾ ದಿಕ್ರಾನೆ ನೆಮ್ಸಲ ಛೊಕ್ರಿ ಥಾವಾದೆ. ಕೈನ 45 ಮಿ ಮಾರಾ ಮನಸ್ಮಾ ಕೈಲೆತಾಮಾಜ಼, ರೆಬೆಕ್ಕ ಖಾಂದಾಪರ ಘಡೊಲಿನ ಆವಾನು ಮಿ ದೆಕ್ಯೊ. ತೆ ಇರಮಾ ಉತ್ರಿನ ಪಾನಿಲಿನ ಆತಾಮಾ ಮಿ ತಿನೆ, ಮನೆ ಪಿವಾನಾಹುತಿ ಪಾನಿ ದೆ ಕೈನ ಕದ್ಯೊ. 46 ತೆಳಾಮಾಜ಼ ತೆ ಮನೆ ಪಾನಿ ಪಿವಾನೆ ದಿದಿ ವರಿ ಹುಂಟೊನೆಬಿ ಪಾನಿ ದಿದಿ. 47 ತು ಕಿನಿ ದಿಕ್ರಿ ವ್ಹೈ ಕೈನ ಮಿ ಪುಚ್ತಾ಼ಮಾ ತೆ ಮಿ ನಾಹೊರನೆ ಮಿಲ್ಕಾನನೆ ಹುಟ್ಟಲ ಬೆತೊವೆಲನಿ ದಿಕ್ರಿ ವ್ಹೈ ಕೈನ ಕದಿ. 48 ತೆಳಾಮಾ ಮಿ ತಿನೆ ನಾಕಮಾ ಘಾಲ್ಲಿವಾನಾಹುತಿ ಪ್ಹುಲ್ಲಿ ವರಿ ತಿನೆ ಹತಮಾ ಘಾಲ್ಲಿವಾನಾ ಹುತಿ ಕಡಾ ದಿನ ಮಾರೊ ಮಾಲಕ ಥಯಲ ಅಬ್ರಹಾಮನೊ ಕ್ಹುದಾ ಥಯಲ ಯಹೊವಾನೆ ನಮಸ್ಕಾರ ಕರಿನ ತೆ ಮಾರೊ ಮಾಲಕ ಥಯಲ ಅಬ್ರಹಾಮನೆ ದಿಕ್ರಾನಾ ಹುತಿ ತಿನಾ ಭೈನಿ ಲಿವಾನಾಹುತಿ ಮನೆ ಕ್ಹರಿನಿ ವಾಟ್ಮಾ ಬಲೈಲಾಯಲ ಹುತಿ ತಿನೆ ಕೊಂಡಾಡ್ಯೊ. 49 ಇಮ ರ‍್ಹತಾಮಾ ಮಾರಾ ಮಲಕನೆ ಮಯಾಕ್ಹು ಬರೊಕ್ಹಾಕ್ಹು ಚಾ಼ಲಾನಾ ಹುತಿ ಒಪ್ಯಾಮ ಮನೆ ಕವೊ. ನೈತೊ ನೈ ಕವೊ, ಮಿ ತೆಳಾಮಾ ಸಿದಾ ಹತೆ ನೈ ತೊ ಡಾವಾ ಬಗಲ ಮಿ ಅಗೊ ಜ಼ೌಸ. ಕೈನ ಕದ್ಯೊ. 50 ತೆ ವಾತೆ ಲಾಬಾನ, ಬೆತೊವೆಲ 'ಕ್ಹಾರೊ ಯಹೊವಾಕ್ಹುಜ಼ ಥಯು; ಹಮೆತೊ ಹೊ ಕೈನವರಿ ನೈಕೈನ ಕತಾ ನೈ. ರೆಬೆಕ್ಕನೆ ತಾರಾ ಹತ್ಮಾ ವಪ್ಸಿನೆ ದಿಯೆಸ. 51 ಬಲೈಲಿನ ಜಾ಼ ಸಕ್ಷಿ.ಯಹೊವಾ ಕದಲ ತಿಮ್ಮಜ಼ ರೆಬೆಕ್ಕ ತಾರಾ ಮಾಲಕನಾ ದಿಕ್ರಾನೆಜ಼ ಬೈಕೊ ಥಾವಾದೆ. ಕದ್ಯಾ. 52 ಅಬ್ರಹಾಮನೊ ಸೆವಕ ತ್ಯುಯೊ ವಾತೊ ಐಕ್ತಾಮಾ ಯಹೊವಾನೆ ಮನಸ್ಕಾರ ಕರ‍್ಯೊ. 53 ತೆ ತೆ ಲಾಯಲ ಕ್ಹೊನು ರುಪ್ಪು ವಣ್ಣಾ ಲಿನ ರೆಬೆಕ್ಕನೆ ದಿದ್ಯೊ. ತಿನಾ ಭೈನೆ ತಿನಿ ಯಾನೆ ಬಿ ಮೊಗಾನು ಸಾಮನ ದಿದ್ಯೊ. 54 ತೆ ಥಯಲ್ಪರ ತಿನಾ ಕ್ಹಾತೆ ಆಯಲ ಸೆವಕೊನೆಬಿ ಉಪಚಾರ ಮುಗ್ಸಿನ ಕ್ಹಾರಿ ರಾತ ತ್ಯಾಜ಼ ರ‍್ಹೈನ ಪಾಟೆ ಉಟಿನ ತಿನಾ ಮಾಲಕ ಕನ ಜಾ಼ವಾನೆ ಅಪ್ಪಣೆ ದೆ ಕೈನ ಕತಾಮಾ 55 ರೆಬಕ್ಕನೊ ಭೈ, ತಿನಿ ಯಾ ತಿನೆ ಛೊಕ್ರಿತೊ ಹಜು಼ನ ದಕ್ಹ ದಿನ್ನ ತಬಿ ಹಮಾರಾ ಕ್ಹಾತೆ ರ‍್ಹವಾದೆ ಪಾಚಾ಼ತಿ ತೆ ಜಾ಼ ಸಕಸ ಕೈನ ಕದ್ಯಾ. 56 ತೆ ತ್ಯುನೊನೆ ಯಹೊವಾ ಮಾರು ಪ್ರಯಾಣ ಸಫಲ ಕರ‍್ಯೊಸ. ತಿನಾಹುತಿ ಮನೆ ತರಬೊನಕೊ ಮಾರಾ ಮಾಲಕಕನ ಮನೆ ಅಪ್ಪಣೆ ಥಾವಾದೆ ಕೈನ ಕತಾಮಾ 57 ಹಮೆ ಛೊಕ್ರಿನೆ ಬಲೈನ ತಿನಿ ಅಬಿಪ್ರಾಯ ತಿಳದಿಲಿಯೆಸ ಕದ್ಯಾ. 58 ತೆ ನೈಸೊ ರೆಬರಕ್ಕನೆ ಬಲೈನ ' ಯಾ ಆ ಮನಕ್ಹನಾ ಕ್ಹಾತೆ ತು ಜಾ಼ಶಿಸು? ಕೈನ ಪುಚ್ಯಾ. ತೆಳಾಮಾ ತೆ ಜೌ಼ಸ ಕದಿ. 59 ತೆಳಾಮಾ ತ್ಯುನೆ ತಿನಿ ಭೆನ ಥಯಲ ರೆಬೆಕ್ಕನೆ ತಿನಿ ದಾಸಿಯೊನೆ ಬಲೈಲ ಅಬ್ರಹಾಮನಾ ಮಕ್ಹನಾ ಕ್ಹಾತೆ ಮೊಕಲ್ಯಾ. 60 ವರಿ ರೆಬೆಕ್ಕಳನೆ ಭೆನ ತಾರಾಕ್ಹು ಹಜಾ಼ರ ದಕ್ಹ ಹಜಾ಼ರ ಸಂತಾನ ಥಾವಾದೆ ತಾರಿ ಸಂತಾನ ತ್ಯುನಾ ದುಶ್ಮನೊನೆ ಹರಾವಾದೆ ಕೈನ ಕದ್ಯಾ. 61 ರೆಬೆಕ್ಕಳ ವರಿ ತಿನಿ ದಾಸಿಯೊ ಹುಂಟಪರ ಚ಼ಡಿನ ಜಾ಼ತಾಮಾ ಅಬ್ರಹಾಮನೊ ಸೆವಕ ತ್ಯುನಾ ಪಾಚೊ಼ ಗಯೊ. ಇನಾನಿಂಗತ ರೆಬೆಕ್ಕನೆ ಬಲೈಲಿನ ಗಯಾ. 62 ಯಕ್ಲಾಮಾಜ಼ ಇಸಾಕ ಬೆರ ಲಹೈರೊಹಿ ಕವಾನಿ ಇರಕನ ಆಯೊತೊ ತೆ ಕಾನಾನ ದೆಶನಿ ದಕ್ಷಿಣ ಸಿಮೆಮಾ ವ್ಹತೊ. 63 ಇಸಾಕ ಕ್ಹಾಂಜ಼ನಾ ಟೈಮ್ಮಾ ಧ್ಯಾನ ಕರಾಹುತಿ ಖುಲ್ಲಾ ರ‍್ಹಯಲ ಜ಼಼ಗಾಕನ ಗಯೊ. ತ್ಯಾ ತೆ ದೆಕ್ತಾಮಾ ಹುಂಟೊ ಆವಾನು ದೆಕ್ಯೊ. 64 ರೆಬೆಕ್ಕಳ ಇಸಾಕನೆ ದೆಕಿನ ಹುಂಟಪರ್ತಿ ಹೆಟಿ ಉತ್ರಿ. 65 ತೆ ರೆಬೆಕ್ಕಳ ತೆ ಸೆವಕನೆ ಅಪ್ನಾ ಕ್ಹಾಮೊ ರಾನ್ಮಾ ಚಾ಼ಲ್ತೊ ಆವಾಲೊ ಐಲೊ ಮನಕ್ಹೊ ಕುನ್ನ ವ್ಹೈ.? ಕೈನ ಪುಚ್ಚಿ. ತೆಜ಼ ಮಾರೊ ಮಾಲಕನೊ ದಿಕ್ರೊ ವ್ಹೈ ಕೈನ ಕತಾಮಾ ತೆ ಘುಮುಸ ಘಾಲ್ಲಿದಿ. 66 ತೆ ಸೆವಕ ತೆ ಕರಲ ಕ್ಹಾರುಜ಼ ಇಸಾಕನೆ ಕತಾಮಾ ತಿನೆ ತಿನಿ ಯಾ ರ‍್ಹಯಲ ಸಾರಾಳನಿ ಗುಡಾರೆ ಬಲೈಲಿನ ಗಯೊ. 67 ಇನಾನಿಂಗತ ಇಸಾಕ ರೆಬೆಕ್ಕಳ ಹಿವಾ ಕರ್ಲಿನ ಮಳ್ಯಾ ತೆ ತಿನಿ ಬೈಕೊ ಥೈ ತೆ ತಿನೆ ಮಯಾ ಕರಿನ ತಿನಿ ಯಾ ಮರಲ ದುಖ ಕದ್ಯೊ ವರಿ ಇಕ್ಹರ‍್ಯೊ.