ಆದಿಕಾಂಡ 19

ಸೊದೊಮೊ ಗೊಮೊರನು ಪಾಪ

1 ತೆ ದೆವದುತೊ ಕ್ಹಾಂಜ಼ನಾ ಟೈಮ್ಮಾ ಸೊದೊಮೆ ಆತಾಮಾ ಲೊಟ ಕವಾನೊ ಯಕ್ಕ ಮನಕ್ಹ ಗಾಮ್ನಾ ಬಾಕಲನಾ ಕ್ಹಾಮೊಜ಼ ಬೈಟ್ಯೊತೊ. ತೆ ತ್ಯುನೊನೆ ದೆಕ್ತಾಮಾ ಉಟಿನ ಹುಬ್ರೈನ ತ್ಯುನೊನೆ ಮಳಾನೆ ಗೈನ ಡ್ವಗ್ಗಿನ ನಮಸ್ಕಾರ ಕರ‍್ಯೊ. 2 ಲೊಯಾ ತ್ಯುನೊನೆ, 'ಸ್ವಾಮಿಯೊ ಮರ್ಗಿನ ಮರಾ ಘರೆ ಆವೊ ಮಿ ತುಮೊನೆ ಖಾವಾನೆ ದ್ಯುಸ ತುಮಾರಾ ಹತೊ ಪಗೊ ಧ್ವಯಿನ ಆಜ಼ನಾ ರಾತೆ ಮಾರಾ ಘರ್ಮಾ ರ‍್ಹವೊ. ವ್ಹಂತಾ ತುಮಾರು ಪ್ರಯಾಣ ಅಗಾ ಚ಼ಲಾವೊ ಕೈನ ಕದ್ಯೊ. ದೆವದುತೊ ಒಣಿಮಾ ಆಜ಼ನಿ ರಾತ ಕಾಡಿಯೆಸ. 3 ತೆ ನೈಸೊ ಲೊಟಾ ತಿನಾ ಘರೆ ಔಜ಼ ಕೈನ ಕದಲ ಹುತಿ ತ್ಯುನೆ ತಿನಾ ಘರೆ ಗಯಾ. ಲೊಟಾ ತ್ಯುನಾ ಹುತಿ ಖಾಟೊ ನೈಸೊ ರೊಕ್ಲೊ ಬಳೈನ ಅನ್ನ ಕರಾಯೊ. ದೆವದುತೊ ತೆ ಅನ್ನ ಖಾದ್ಯಾ. 4 ತೆ ರಾತೆ ಕ್ಹುರಾವಾತಿ ಅಗ್ದುರ ಸೊದೊಮೊನಾ ಕ್ಹಾರಾ ಡಾಣಗಾ ವರಿ ಗಡಿಯಾ ಐನ ಲೊಟಾನಾ ಘರ್ನಾ ಸುತ್ತೆ ಹುಬ್ರೈನ ಲೊಟನೆ 5 ತಾರಾ ಘರೆ ಆಯಲ ತೆ ಭಂಭಿ ದಾಣಗಾ ಕಿಜ್ಗಾ ಛೆ?. ತ್ಯುನೊನೆ ಭಾರೊ ಮೊಕಲ ಹಮೆ ತ್ಯುನೊನೆ ಸಂಭೊಗ ಕರು ಅಡ್ಡಿನ ಕದ್ಯಾ. 6 ಲೊಟಾ ಭಾರೊ ಐನ ಬಾಕಲನೆ ಚಾ಼ವಿ ಘಾಲ್ಯೊ. 7 ತೆ ದಾಣಗಾವೊನೆ ಮಾರಾ ಭಾಯೊ ಮಿ ತುಮೊಕನ ಮಾಂಗಿವಾಡೊಸ. ಮರ್ಗಿನ ಎ ಕೆಟ್ಟ ಕಾಮ ಕರೊ ನಕೊ. 8 ದೆಕೊ ಮನೆ ಬೆ ದಿಕ್ರಿಯೊ ಛೆ. ತ್ಯುನೆ ಕೆಳಾಮಾಜ಼ ಬಿಜಾ಼ ದಾಣಗಾವೊನಾ ಕ್ಹಾತೆ ಕ್ಹುರೈಯೊ ನತ್ತಿ. ತುಮಾರು ಮನಸ ರ‍್ಹಯುಮ ತ್ಯುನೊನೆ ಭಾರೊ ಲೌಸ ತುಮೆ ತ್ಯುನೊನೆ ಸುಬಿ ಕರೊ. ತೆನೈಸೊ ಆ ದಾಣಗಾವೊನೆ ಸುಜ಼ ಕರೊ ನಕೊ. ಇವ್ನೆ ಮಾರಾ ಘರೆ ಆಯಾಸ. ಇವ್ನೊನೆ ವಚಾ಼ಡಾನು ಮಾರು ಧರಮ ವ್ಹೈ. ಕೈನ ಕದ್ಯೊ. 9 ಘರ್ನಾ ಸುತ್ತೆ ಹುಬ್ರಯಲ ದಾಣಗಾ ತಿನೆ ವಾಟ ಛೊಡ ಕೈನ ವದರ‍್ಯಾ ತೆ ಥಯಲ್ಪರ ತ್ಯುನೊಮಾ ಎ ಲೊಟಾ ಅಪ್ನಾ ಗಾಮೆ ಪ್ರವಾಸಿಯೊ ಥೈನ ಆಯಲ ಹಮ್ನಾ ಹಮೊನೆ ನ್ಯಾಯ ಕೈನ ದಿವಾಡೊಸ ಕೈನ ಕದ್ಯಾ. ತೆ ಥಯಲ್ಪರ ಲೊಟನೆ ತ್ಯುನೆ ಹಮೆ ತೆ ದಾಣಗಾವೊನೆ ಕರಾತಿ ಬಿ ಕೆಟ್ಟ ತಾರಾ ಕ್ಹಾತೆ ಕರಿಯೆಸ ಕೈನ ವದ್ರಿನ ಕೈನ ಲೊಟನಾ ನಜಿಕ ಐನ ಬಾಕಲ ಭಾಗಾನೆ ತಯ್ಯಾರ ಥಯಾ. 10 ವರಿ ತೆ ಘರ್ಮಾ ರ‍್ಹಯಲ ಭಂಬಿ ದಾಣಗಾ ಬಾಕಲ ಕಾಡಿನ ಲೊಟನೆ ಘರ್ಮಾ ಜ಼ಗ್ಗಿಲಿನ ಬಾಕಲ ಝಾಕ್ಯಾ. 11 ತೆ ಭಂಬಿ ದಾಣಗಾ ಭಾರಾ ರ‍್ಹಯಲ ಕ್ಹಾರಾ ದಾಣಗಾವೊನೆ ಕುಡ್ಡಾ ಕರಲ ಹುತಿ ತ್ಯುನೆ ಬಾಕಲನೆ ದುಂಡ್ಯಾವಾಚಿ ಗೈಪಡ್ಯಾ.

ಸೊದೊಮತೊ ಲೊಟಾ ವಾಚಿ಼ನ ಜಾ಼ವಾನು

12 ತೆ ಭಂಬಿ ದಾಣಗಾ ಲೊಟನೆ ತಾರಾ ಕುಟುಂಬನಾ ಬಿಜಾ಼ ಕುನಬಿ ಎ ಗಾಮ್ಮಾ ಛೆ ಸು?. ತುನೆ ಜ಼ಮೈ ರ‍್ಹವಾದೆ ಗಂಡ ಬಚ್ಚಾ಼ ಹೆಣ್ಣ ಬಚ್ಚಾ಼ ರ‍್ಹವಾದೆ ನ್ಹ್ಯಾ ಛೆ ಸು? ತಾರಾ ಕುಟುಂಬನಾ ಕುನಬಿ ಎ ಗಾಮ್ಮಾ ರ‍್ಹಯಾಮ ಹಮ್ನಾಜ಼ ನ್ಹ್ಯಾಂತಾ ಜಾ಼ವಾನೆ ಕೆ. 13 ಹಮೆ ಎ ಗಾಮ್ನೆ ನಾಶ ಕರಿಪಾಡಿಯೆಸ. ಎ ಗಾಮನು ದುಷ್ಠತನಾ ಯಹೊವಾ ದೆಕ್ಯೊಸ. ತಿನಾಹುತಿ ಎ ನಾಶ ಕರಾನೆ ತೆಜ಼ ಹಮ್ನೊನೆ ವಳಾಯೊಸ ಕದ್ಯಾ. 14 ತಿನಾಹುತಿ ಲೊಟಾ ಭಾರೊಗೈನ ತ್ಯುನೊನೆ ತಿನಾ ದಿಕ್ರಿಯೊನಾ ಕ್ಹಾತೆ ನಾತ್ರು ಥಯಲ ಜ಼ಮೈಯೊನಾ ಕ್ಹಾತೆ ಬೊಲ್ಲಿನ ಭೆಂಬಿ ಜ಼ನಾ ಎ ಗಾಮ್ಮ ಛೊಡಿನ ಜಾ಼ವೊ ಯಹೊವಾ ಎ ಗಾಮ್ಮ ಹಾಳಕರಸ ಕೈನ ಕದ್ಯೊ. ಲೊಟಾನಿ ಎ ವಾತ ತ್ಯುನೊನೆ ಮಸ್ಕರಿ ಲಾಗಿ. 15 ಸುರ್ಯೊ ಹುಟ್ಟಾತಿ ಪೈಲಾಜ಼ ಲೊಟನೆ ಜಾ಼ವಾನಾ ಹುತಿ ದೆವದುತೊ ಜ಼ಬರದಸ್ತಿ ಕರ‍್ಯಾ. ಎ ಗಾಮ ನಾಶಕರಿಪಡಸ. ತಿನಾಹುತಿ ತಾರಿ ಬೈಕೊನೆ ಭಂದಿ ದಿಕ್ರಿಯೊನೆ ಬಲೈಲಿನ ನ್ಹ್ಯಾಂತೊ ನ್ಹಾಟಿ ಜಾ಼, ತು ತೆಳಾಮಾ ಎ ಗಾಮನಾ ಕ್ಹಾತೆ ತುನೆ ಸುಜ಼ ನಾಶ ಥಾತೊ ನೈ ಕದ್ಯಾ. 16 ತೆ ವರಿಬಿ ಲೊಟಾ ಗಲಿಬಿಲಿ ಥೈನ ತಡಾ ಕರಲ ಹುತಿ ಎ ಭಂಬಿ ದಾಣಗಾ ಲೊಟಾನೆ ತಿನಿ ಬೈಕೊನೆ ತಿನಾ ದಿಕ್ರಿಯೊನೆ ಹತೊ ಧರಿನ ಗಾಮ್ನಾ ಭಾರಾ ಚೊ಼ಕಿ ತರಾ ಲೈನ ಛೊಡ್ಯಾ. ಇಮ ಯಹೊವಾ ಲೊಟಾನೆ ವರಿ ತಿನಾ ಕುಟುಂಬನೆ ಮರ್ಗಾ ದೆಕಾಡ್ಯೊ. 17 ತ್ಯುನೆ ಗಾಮ್ತಾ ಭಾರಾ ಆಯಲ್ಪರ ತೆ ದಾಣಗಾವೊಮಾನೊ ಯಕ್ಲೊ ಹಮ್ನಾ ತುಮೆ ನ್ಹಾಟಿ ಜಾ಼ವೊ ತುಮಾರೊ ಜ಼ಲಮ ವಚಾ಼ಡಿಲಿವೊ. ತುಮೆ ಪಾಚಾ಼ ಫರಿನ ದೆಕೊ ನಕೊ. ಕಜಾ಼ಬಿ ಖಣಿಯೊನಾ ಜ಼ಗಾಪರ ಹುಬ್ರವೊ ನಕೊ. ಚು಼ಕೈನ ಡೊಂಗ್ರೊಪರ ನ್ಹಾಟಿ ಜಾ಼ವೊ ನೈತೊ ಎ ಗಾಮನಾ ಕ್ಹಾತೆ ತುಮೆಬಿ ನಾಶ ಥೈ ಜಾ಼ವೊಸಿ. 18 ತೆನೈಸೊ ಲೊಟಾ ತೆ ದಾಣಗಾವೊನೆ ಸ್ವಾಮಿಯೊ ಮರ್ಗಿನ ಹಮೊನೆ ದುರಲಕ್ಕಾ ನ್ಹಾಟಿನ ಜಾ಼ವೊ ಕವೊ ನಕೊ. 19 ತುಮಾರೊ ಸೆವಕ ಥಯಲ ಮನೆ ಮರ್ಗಿನ ಮನೆ ವಚಾ಼ಡ್ಯಾಸ. ತೆನೈಸೊ ಮಿ ದೊಂಗ್ರೊಲಕ್ಕಾ ನ್ಹಾಟಿಜಾ಼ತೊ ನೈ ಮಿ ಹಲ್ಲು ಜಾ಼ವಾಕ್ಹು ಕಯುಬಿ ನಾಶ ಮನೆ ಥೈನ ಮರಿ ಜೌ಼ಸ. ಕೈನ ಕದ್ಯೊ. 20 ದೆಕೊ ತ್ಯಾ ನ್ಹಾನು ಗಾಮ ಛೆ. ತೆ ಗಾಮೆ ಜಾ಼ವಾನೆ ಅಪ್ಪಣೆ ದಿವೊಮ. ಮಿ ತ್ಯಾ ನ್ಹಾಟಿನ ಗೈನ ಮಾರೊ ಜ಼ಲಮ ವಚಾ಼ಡಿಲ್ಯುಸ ಕದ್ಯೊ. 21 ತೆ ದಾಣಗೊ ಲೊಟಾನೆ ತ್ಯಾ ತುನೆ ಜಾ಼ವಾನೆ ಮಿ ಅಪ್ಪಣೆ ದಿದ್ಯೊಸ. ಮಿ ತೆ ಗಾಮನೆ ನಾಶ ನೈ ಕರ‍್ತೊ. 22 ವರಿ, ತು ತ್ಯಾ ಭೆಗಿನ ನ್ಹಾಟಿನ ಜಾ಼ ತು ತೆ ಗಾಮ ಮುಟ್ಟೆಲಕ್ಕಾ ಮಿ ಸೊದೊಮ ಗಾಮನೆ ನಾಶ ಕರ‍್ತೊ ನೈ ಕದ್ಯೊ. ತಿನಾಹುತಿ ತೆ ಗಾಮನೆ ಚೊಗೊರ ಕೈನ ನಾಮ ಪಡ್ಯು ಕಾ ಕದ್ಯಾಮ ತೆ ನ್ಹಾನು ಗಾಮ ವ್ಹತು.

ಸೊದೊಮ ವರಿ ಗೊಮೊರನು ನಾಶ

23 ಸುರ್ಯೊ ಹುಟ್ಟಾತಿಜ಼ ಪೈಲಾ ಲೊಟಾ ಚೊಗೊರ ಕವಾನಾ ಗಾಮನೆ ಮುಟ್ಯೊ. 24 ತೆಳಾಮಾ ಯಹೊವಾ ಸೊದೊಮ ವರಿ ಗೊಮೊರ ಗಾಮೊಪರ ಸ್ವರ್ಗಮಾತೊ ಆಗನು ಪಾನಿ ಅವಾ ಲಗಾಡ್ಯೊ. 25 ಇಮ ಯಹೊವಾ ತೆ ಭಂಬಿ ಗಾಮೊನಾ ಸುತ್ತೆ ರ‍್ಹಯಲ ಗಾಮೊ ಗಾಮ್ಮಾ ರ‍್ಹಯಲ ಮನಕ್ಹೊನೆ ವರಿ ಬೆಳೆನೆ ಹಾಳ ಕರಿಪಡ್ಯೊ. 26 ತ್ಯುನೆ ನ್ಹಾಟಿನ ಜಾ಼ತಾಮಾ ಲೊಟಾನಿ ಬೈಕೊ ಪಾಚಿ ಫರಿನ ಗಾಮ್ನೆ ದೆಕಿ ತೆಳಾಮಾಜ಼ ತೆ ಮಿಟ್ಟಾನೊ ಖಂಬೊ ಥೈ ಗೈ. 27 ಬಿಜಾ ದಿನ್ನೆ ಪಾಟೆ ನಸ್ಕೆ ಅಬ್ರಹಾಮ ಉಟ್ಟಿನ ತೆ ಯಹೊವಾನಾ ಕ್ಹಾಮೊ ಹುಬ್ರಯಲ ಜ಼಼ಗಾ ಪರ ಗಯೊ. 28 ಅಬ್ರಹಾಮ ಸೊದೊಮ ವರಿ ಗೊಮೊರ ಗಾಮೊನಾ ಸುತ್ತೆ ದೆಕ್ತಾಮಾ ತೆ ಗಾಮ್ನೊ ಧವಾಂಡೊ ಉಪ್ಪರ ಆವಾನೊ ದೆಕ್ಯೊ ಧಗ ಧಗ ಲಾಗಲ ಆಗ್ಮಾತೊ ಆವಾನೊ ಧವಾಂಡೊ ದಿಕ್ಹ್ಯೊ. 29 ಕ್ಹುದಾ ತೆ ಗಾಮ ನಾಶ ಕರ‍್ಯೊತುಬಿ ಅಬ್ರಹಾಮನೆ ಶೆಂ ಕರಿನ ಲೊಟಾನೊ ಜ಼ಲಮ ವಚಾ಼ಡ್ಯೊ. ಯಹೊವಾ ಇಮ್ಮ ತೆ ಗಾಮೊನೆ ವರಿ ಲೊಟಾ ರ‍್ಹಯಲ ಗಾಮನೆ ಬಿ ನಾಶ ಕರ‍್ಯೊ.

ಮೊವಾಬ್ಯರೊ, ಅಮ್ಮೊನಿಯರೊ ಲೊಟಾಕ್ಹು ಹುಟ್ಟಲ

30 ಚೊಗರ ಗಾಮಮಾ ರ‍್ಹವಾನೆ ಲೊಟಾನೆ ಭೆಂ ವಾಟ್ಯು. ತಿನಾಹುತಿ ತೆ ವರಿ ತಿನಿಯೊ ದಿಕ್ರಿಯೊ ಡೊಂಗರಪರ ರ‍್ಹಯಲ ಗಾಮೆ ಗೈನ ಗುಹೆಮಾ ರ‍್ಹವಾನೆ ಶುರು ಕರ‍್ಯಾ. 31 ಯಕ್ಕ ದಿನ್ನ ತಿನಿ ಮ್ಹೊಟಿ ದಿಕ್ರಿ ತಿನಿ ನ್ಹಾನಿ ಭೆನ್ನೆ ಭುಲೊಕಮಾ ಕ್ಹಾರಾ ಛೊಕ್ರಿಯೊ ಡಾಣಗಾ ಹಿವಾ ಕರಿಲಿವಸ, ತೆನೈಸೊ ಅಪೆ ಹಿವಾಕರಿಲಿವಾನೆ ಕಯೊಜ಼ ದಾಣಗೊ ನತ್ತಿ. ಅಪ್ನಾ ಬಾನೆ ಬಿ ವೈಸ ಥೈಸ. 32 ತೆನೈಸೊ ಅಪೆ ಬಚ್ಚಾವೊನೆ ಅಪ್ನಾ ಬಾ ಕ್ಹುಜ಼ ಪಡ್ದಿಲಿಯೆ ತೆಳಾಮಾ ಅಪ್ನು ಕುಟಂಬ ಖಲಾಸ ಥಾತು ನೈ. ಅಪ್ನಾ ಬಾನೆ ದ್ರಾಕ್ಷಿಯೊನು ರಕ್ಹ ಪಿಲೈನ ನಿಶಾ ಕರೈನ ತಿನಾ ಕ್ಹಾತೆ ಕ್ಹುರೈನ ಅಪ್ನಾ ಬಾನಾ ವಂಶನೆ ವಚಾ಼ಡಿನ ಮ್ಹೆಲಿಯೆ ಕೈನ ಕದಿ. 33 ತೆ ರಾತೆ ತ್ಯುನೆ ತಿನಾ ಬಾನೆ ದ್ರಾಕ್ಷಿಯೊನು ರಕ್ಹ ಪಿಲೈನ ನಿಶಾ ಕರೈಯ್ಯೊ ಪಾಚಾಲ್ತಿ ಮ್ಹೊಟಿ ದಿಕ್ರಿ ತಿನಾ ಬಾನಾ ವಚ್ಚಾನಾಮಾ ಗೈನ ತಿನಾ ಕ್ಹಾತೆ ಕ್ಹುರೈ ಲೊಟಾ ನಿಶಾಮಾ ರ‍್ಹಯಲಕ್ಹು ತಿನಿ ದಿಕ್ರಿ ತಿನಾ ಕ್ಹಾತೆ ಕ್ಹುರಯಲ ತಿನೆ ಗ್ವತ್ತ ಥಯು ನೈ. 34 ಮರ್ನಾ ದಿನ್ನೆ ಮ್ಹೊಟಿ ದಿಕ್ರಿ ತಿನಿ ನ್ಹಾನಿ ಭೆನ್ನೆ ಕಾಲ ರಾತೆ ಮಿ ಬಾನಾ ಕ್ಹಾತೆ ಕ್ಹುರೈ ಆಜ಼ನಾ ರಾತೆಬಿ ತಿನೆ ದ್ರಾಕ್ಷಾರಸ ಪಿಲೈನ ನಿಶಾ ಕರೈಯೆ ತೆಳಾಮಾ ತು ತಿನಾ ವಚ್ಚಾ಼ನಾಮಾ ಗೈನ ತಿನಾ ಕ್ಹಾತೆ ಕ್ಹುರೆಸಕ್ಷಿ ಹಮ್ನಾ ಅಪೆ ಅಪ್ನಾ ಬಾನಾ ವಂಶನೆ ವಚಾ಼ಡಿಲಿಯೆಸ ಕದಿ. 35 ತೆ ರಾತೆ ತಿನಾ ಬಾನೆ ದ್ರಾಕ್ಷಾರಸ ಪಿಲೈನ ನಿಶಾ ಕರೈಯೊ ತೆಳಾಮಾ ತಿನಿ ನ್ಹಾನಿ ದಿಕ್ರಿ ತಿನಾ ವಚ್ಚಾನಾಮಾ ಗೈನ ತಿನಾ ಕ್ಹಾತೆ ಕ್ಹುರೈ. ತೆ ಕ್ಹುರಯಲ ಲೊಟಾನೆ ಗ್ವತ್ತ ಥಯು ನೈ. 36 ಇಮ ಲೊಟಾನಿಯೊ ಭಂಬಿ ದಿಕ್ರಿಯೊ ತಿನಾ ಬಾ ಕ್ಹುಜ಼ ಪೆಟೆ ರ‍್ಹೈಯೊ. 37 ಮ್ಹೊಟಿ ದಿಕ್ರಿ ಪಟ್ಟಾನೆ ಜ಼ನ್ನಿ ತಿನೆ ಮೊವಾಬ ಕೈನ ನಾಮ ಮ್ಹೆಲಿ ಹಮ್ನಾ ಜಿವ್ತಾ ರ‍್ಹಯಲ ಕ್ಹಾರಾ ಮೊವಾಬ್ಯೊನೆ ಮೊವಾಬಜ಼ ಮುಲ ಪುರುಶ ವ್ಹೈ. 38 ನ್ಹಾನಿ ದಿಕ್ರಿಬಿ ಪಟ್ಟಾನೆ ಜ಼ನ್ನಿ ತೆ ತಿನು ನಾಮ ಬೆನಮ್ಮಿ ಕೈನ ಮ್ಹೆಲಿ ಹಮ್ನಾ ಜಿವ್ತಾರ‍್ಹಯಲ ಅಮ್ಮೊನಿವಾಲಾವೊನೆ ಬೆನಮ್ಮಿಜ಼ ಮುಲ ಪುರುಷ ವ್ಹೈ.