1 ಎ ಕ್ಹಾರಾ ಸಂಗತಿಯೊ ಥಯಲ್ಪರ ಖುದ್ದ ಅಬ್ರಹಾಮನಿ ಪರಿಕ್ಷಾ ಕರ‍್ಯೊ. 2 ಕಿಮ್ಮ ಕದ್ಯಾಮ ತೆ ತಿನೆ, 'ಅಬ್ರಹಾಮ" ಕೈನ ಬಲಾತಾಮಾ ತೆ, 'ದೆಕ, ನ್ಹ್ಯಾ ಛೆ" ಕದ್ಯೊ. ತೆಳಾಮಾ ತೆ, 'ತುನೆ ಮಯಾನೊ ರ‍್ಹಯಲ ಯಕ್ಲೊಜ ದಿಕ್ರೊ ಥಯಲ ಇಸಾಕನೆ ಬಲೈಲಿನ ಮೊರಿಯ ದೆಶನೆ ಗೈನ ತ್ಯಾ ತಿನೆ ಮಿ ಕವಾನಾ ಯಕ್ಕ ಡೊಂಗರಪರ ಸರ್ವಾಂಗ ಹೊಮ ಕರಿನ ಅರ್ಪಣೆ ಕರುಸ" ಕದ್ಯೊ. 3 ತಿನಾ ನಿಂಗತಜ಼ ಪಾಟೆಜ಼ ಉಟಿನ ಗದ್ಡಾಪರ ಲಾಕ್ಡಾನೊ ಭಾರೊ ಭಾಂದಿನ ಇಸಾಕನೆ ತಿನಾಕ್ಹಾತೆ ವರಿ ಬೆ ಆಳೊನೆ ತ್ಯುನಾ ಕ್ಹಾತೆ ಲಿನ ತೆ ಥಯಲ್ಪರ ಕ್ಹುದಾ ಕದಲ ಜ಼ಗಾಪರ ಚಾ಼ಲ್ಯಾ. 4 ತ್ಯುನೆ ತನ್ನ ದಿನ್ನಲಕ್ಕಾ ಪ್ರಯಾಣ ಕರ್‍ಯಾ ಅಬ್ರಹಾಮ ದೆಕ್ತಾಮಾ ತ್ಯುನೆ ಜಾ಼ವಾನಿ ಜ಼ಗಾ ನಕ್ಕರ ದುರ ದಿಕ್ಹಿ. 5 ತೆ ಥಯಲ್ಪರ ತಿನಾ ಆಳೊನೆ ತುಮೆ ನ್ಹ್ಯಾಜ಼ ಗದ್ಡಾನಾ ಕ್ಹಾತೆ ರ‍್ಹವೊ ಮಿ ಮಾರೊ ದಿಕ್ರೊ ತೆ ಜ಼ಗಾಪರ ಗೈನ ಕ್ಹುದಾನಿ ಆರಾಧನಾ ಕರಿನ ಐಯೆಸ ಕೈನ ಕದ್ಯೊ. 6 ಅಬ್ರಹಾಮ ಬಾಳಾನಾಹುತಿ ಲಾಕ್ಡಾಲಿನ ತಿನಾ ದಿಕ್ರಾನಾ ಖಂದಾಪರ ಘಾಲ್ಯೊ. ಅಬ್ರಹಾಮ ಮ್ಹೊಟೊ ಚಾ಼ಕು ವರಿ ಆಗ ಲಿನ ತ್ಯುನೆ ಭಂಬಿಜ಼ನಾ ಆರಾಧನಾ ಕರಾನಾಹುತಿ ತೆ ಜ಼ಗಾನೆ ಚಾ಼ಲ್ಯಾ. 7 ಇಸಾಕ ತಿನಾ ಬಾ ಅಬ್ರಹಾಮನೆ ಬಾ ಕೈ ಬಲಾಯೊ ಅಬ್ರಹಾಮ ಸು ವೈ ದಿಕ್ರಾ? ಕೈನ ಪುಚ್ಯೊ. ಇಸಾಕ ಲಾಕ್ಡಾವರಿ ಆಗ ಮನೆ ದಿಕ್ಹಾಡಿಸ ವರಿಬಿ ಬಲಿ ದಿವಾನಾ ದಿವಾನಿ ಬಕ್ರಾನು ಬಚ್ಚು಼ ಕಿಜಾ಼ ಛೆ? ಕೈ ಪುಚ್ಯೊ. 8 ಅಬ್ರಹಾಮ ಬಲಿ ದಿವಾನ ಬಕ್ರಾನು ಬಚ್ಚು಼ ಕ್ಹುದಾಜ಼ ದಿವಸ. ಕೈನ ಕದ್ಯೊ. ಇಮ ಅಬ್ರಹಾಮ ವರಿ ತಿನೊ ದಿಕ್ರೊ ತ್ಯಾ ಗಯಾ. 9 ತೆ ಜ಼ಗಾಪರ ಐನ ತ್ಯಾ ಅಬ್ರಹಾಮ ಯಕ್ಕ ಬಲಿನೊ ಕಟ್ಟೊ ಭಾಂದಿನ ತಿಪರ ಲಾಕ್ಡಾ ವಟ್ಯೊ. ತಿಪರ ತಿನಾ ದಿಕ್ರಾನಾ ಪಗೊ ಹತೊ ಭಾಂದಿನ ತೆ ಲಾಕ್ಡವೊಪರ ತಿನೆ ಕ್ಹುರಾಡ್ಯೊ 10 ತೆಳಾಮಾ ತಿನಾ ದಿಕ್ರಾನೆ ಬಲಿದಿವಾನಾ ಹುತಿ ಚಾ಼ಕು ಉಪ್ಪರ ಉಚಾತಾಮಾ 11 ಯಹೊವಾನು ದುತ ಸ್ವರಗತೊ ಅಬ್ರಹಾಮ-ಅಬ್ರಹಾಮ ಕೈನ ವದರ‍್ಯೊ. ಅಬ್ರಹಾಮ ಒ ಮಿ ನ್ಹ್ಯಾ ಛೆ ಕೈನ ಕದ್ಯೊ. 12 ಯಹೊವಾನು ದುತ ತಾರಾ ದಿಕ್ರಾನೆ ಕತ್ರು ನಕೊ ತಿನೆ ದುಖ ಕರು ನಕೊ ತು ಮಾರಾಹುತಿ ತಾರಾ ರ‍್ಹಯಲ ಯಕ್ಕಜ಼ ದಿಕ್ರಾನೆ ಬಲಿ ದಿವಾನೆಬಿ ಅಗೊ ಪಾಚೊ಼ ಕರ‍್ಯೊ ನೈ. ತಿನಾಹುತಿ ಕ್ಹುದಾಮಾ ಭೆ ವರಿ ಭಕ್ತಿವಾಲೊ ವ್ಹೈ ಕೈನ ದಿಕ್ಹ್ಯೊಸ. 13 ಅಬ್ರಹಾಮ ಡೊಳಾ ಉಚೈನ ದೆಕ್ತಾಮಾ ಯಕ್ಕ ಟಗರ ದಿಕ್ಹ್ಯು ತಿನಾ ಶಿಂಗ್ಡಾ ಯಕ್ಕ ಕಂಟಿಮಾ ಕ್ಹಾಪಡ್ಯಾತಾ ತೆಳಾಮಾ ತೆ ಟಗರನೆ ಜಗ್ಗಿಲೈನ ತಿನಾ ದಿಕ್ರಾನಾ ಬದಲಿ ತೆ ಟಗರನೆ ಕ್ಹುದಾನೆ ಬಲಿ ದಿದ್ಯೊ. 14 ತೆಳಾಮಾತೊಜ಼ ತೆ ಜ಼ಗಾನೆ ಯಹೊವಾ ಯೆರೆ ಕೈನ ನಾಮ ಮ್ಹೆಲ್ಯೊ. ಹುಜ಼ುನಬಿ ಮನಕ್ಹೊ ಯಹೊವಾ ಡೊಂಗರ್ಪರ ದಿವಸ ಕೈನ ಹಜ಼ನಬಿ ಕವಸ. 15 ಯಹೊವಾನು ದುತ ಸ್ವರ್ಗತೊ ವರಿ ಯಕ್ಕೆಮ ಅಬ್ರಹಾಮನೆ ವದ್ರಿನ 16 ತು ಮಾರಾ ಹುತಿ ಬಲಿ ದಿವಾನೆ ತಯ್ಯಾರ ಥಯೊತೊ ತಿನಾಹುತಿ ಮಿ ತಾರಾ ಕ್ಹಾತೆ ವಾಗ್ದಾನ ಕರುಸ. 17 ಮಿ ತುನೆ ಕ್ಹರಿಮಾಜ಼ ಆಶಿರ್ವಾದ ದ್ಯುಸ ತಾರು ಸಂತಾನ ಜಾಸ್ತಿ ಕರುಸ. ತಾರಿ ಸಂತತಿ ಹಬಾಳಮಾನಿಯೊ ಚಿಕ್ಕಿಯೊ ಯಕ್ಲಿಲಿಯೊ ಸಮುದ್ರನಿ ದಂಡಿಮಾ ರ‍್ಹಯಲ ಉಸುಕ ಯಕ್ಲು ಲೆಕ್ಕೊ ನೈಸೊ ಯಕ್ಲು ಕರುಸ. ತ್ಯುನೆ ದುಶ್ಮನೊನಾ ಗಾಮೊ ತ್ಯುನಾ ಅದಿಕಾರಮಾ ಕರ್ಲಿವಸ. 18 ತು ಮನೆ ವಿದೆಯ ಥಯಲ ಹುತಿ ತಾರಿ ಸಂತಿಯೊನಾ ಮುಲಕ ಜಿಮಿನ್ಪರ ರ‍್ಹಯಲ ಹರಿಯಕ್ಕ ಜನಾಂಗ ಆಶಿರ್ವಾದ ವ್ಹಂದಿಲಿವಸ. 19 ತೆ ಥಯಲ್ಪರ ಅಬ್ರಹಾಮ ತಿನಾ ಆಳೊಕನ ಫರಿನ ಆಯೊ ತ್ಯುನೆ ಕ್ಹಾರಾ ಬೆರ್ಷೆಬೆ ಫರಿನ ಚಾ಼ಲ್ಯಾ. ತೆಳಾಮಾ ಅಬ್ರಹಾಮ ತ್ಯಾಜ಼ ರ‍್ಹಯೊ.

20 ಎ ಕ್ಹಾರೊ ಥಯಲ್ಪರ ಅಬ್ರಹಾಮನೆ ಯಕ್ಕ ಸುದ್ದಿ ಐ ತೆ ಸುದ್ದಿ ಅಮ ವ್ಹತಿ ತಾರೊ ನ್ಹಾನು ಭೈ ನಾಹೊರ ವರಿ ತಿನಿ ಬೈಕೊನೆ ಮಿಲ್ಕಾ ಕವಾಲಿನೆ ತ್ಯುನೊನೆ ಬಚ್ಚಾ಼ ಥಯಾ. 21 ಪಸ್ಟಲ್ಯೊ ದಿಕ್ರಾನು ನಾಮ ಉಜ಼ ಇನೊ ನ್ಹಾನೊ ಭೈ ಬುಜ಼ ತನ್ವಾನೊ ನಾಮ ಕೆಮುವೆಲ, ಆರಾಮನೊ ಬಾ ವ್ಹೈ. 22 ಇವ್ನೆ ನೈಸೊ ಕೆಸೆದ ಹಜೊ ಪಿಲ್ದಾಶ ಇದ್ಲಾಫ ಬೆತುವೆಲ ಕವಾಲಾಬಿ ಛೆ. 23 ಬೆತೊವೆಲ ರೆಬೆಕ್ಕನೊ ಬಾ ವ್ಹೈ. ಮಿಲ್ಕಾ ಎ ಆಟ ಜ಼ನಾವೊನಿ ಮಾ ವ್ಹೈ. ನಾಹೊರ ತ್ಯುನೊ ಬಾ ವ್ಹೈ. ನಾಹೊರ ಅಬ್ರಹಾಮನೊ ಭೈ ವ್ಹೈ. 24 ಎವ್ನೆ ನೈಸೊ ನಾಹೊರನೆ ತಿನಿ ಬೈಕೊ ರುಮ ಕವಾಲಿನೆ ಚಾರ ಪಟ್ಟ ವ್ಹತಾ. ತ್ಯುನೆ ಕುನ್ನ ವ್ಹೈ ಕದ್ಯಾಮ ಟೆಬಹ, ಗಹಮ, ತಹಶ, ಮಾಕಾ, ಕವಾಲಾ ವ್ಹೈ.