1 ಇಸಾಕ ಲಾಸ್ಟಮ್ಮಾ ಡೊಳಾ ನೈ ದಿಕ್ಹೆ ಅಕ್ಲಾ ಮೊಬ್ಬ ಥಯಲಕ್ಹು ತೆ ತಿನೊ ಮ್ಹೊಟೊ ದಿಕ್ರೊ ಥಯಲ ಎಸಾವನೆ ಬಲೈನ ದಿಕ್ರಾ ಕತಾಮಾ ಎಸಾವ ದೆಕ ಮಿ ನ್ಹ್ಯಾ ಛೆ ಕದ್ಯೊ. 2 ಇಸಾಕ ತಿನೆ ಮಿ ಗಡಿಯೊ ಥಯೊಸ ಕೆಳಾಮಾ ಮರುಸ ಕವಾನು ಗ್ವತ ನತ್ತಿ. 3 ತಿನಾ ಹುತಿ ತು ಬಿಲ್ಲು ಬಾಣಾ ವರಿ ಕ್ಹಾರ ಆಯುಧೊ ಲಿನ. 4 ರಾನ್ಮಾ ಗೈನ ಶಿಕಾರ ಕರಿನ ಶಿಕಾರ ಕರಲ ಮಾಕ್ಹ ಕ್ಹು ಮನೆ ಪಸಂದ ರ‍್ಹಯಲ ಚೊ಼ಕು ಅನ್ನ ಕರೈನ ಮನೆ ಖಾವನೆ ತಯ್ಯಾರ ಕರ, ಮನೆ ಮೌತ ಆವಾತಿ ಪೈಲಾ ಮಿ ತೆ ಖೈನ ತುನೆ ಆಶಿರ್ವಾದ ಕರುಸ ಕೈನ ಕದ್ಯೊ. 5 ಇಸಾಕ ತಿನೊ ದಿಕ್ರೊ ಥಯಲ ಎಸಾವನೆ ಕದಲ ವಾತ ರೆಬೆಕ್ಕನ ಕಾನೆ ಪಡಿ. 6 ಎಸಾವ ಶಿಕಾರ ಕರಾನೆ ರಾನ್ಮಾ ಗಯೆಲ ಟೆಮ್ಮಾ ರೆಬೆಕ್ಕ ತಿನೊ ದಿಕ್ರೊ ಥಯಲ ಯಾಕೊಬನೆ ತಾರೊ ಬಾ ತಾರೊ ಭೈ ಥಯಲ ಎಸಾವನೆ. 7 ತು ಗೈನ ಶಿಕಾರ ಕರಿನ ಶಿಕಾರ ಕರಲ ಮಾಕ್ಹಕ್ಹು ಮಾರಾ ಖಾವನಾ ಹುತಿ ಚೊ಼ಕಾ ಅನ್ನೊ ಕರೈನ ಮನೆ ಖಾವನೆ ಸಿದ್ದ ಕರ ಮನೆ ಮೌತ ಆವಾತಿ ಪೈಲಾ ಮಿ ತುನೆ ಯಹೊವಾನಾ ಸನ್ನಿಧಿಮಾ ಆಶಿರ್ವಾದ ಕರುಸ ಕೈನ ಕವಾನು ಐಕ್ಯೊಸ. 8 ತಿನಾ ಹುತಿ ದಿಕ್ರಾ ತು ಮಾರಿ ವಾತನೆ ಕಾನದಿನ ಐಕಿನ ಮಾರಿ ಅಪ್ಪಣೆ ನಿಂಗತಜ಼಼ ಕರ. 9 ಬಕ್ರಾವೊನ ಹಿಂಡಮಾ ಗೈನ ಬೆ ಚೊ಼ಕಾ ರ‍್ಹಯೆಲ ಬಕ್ರಾವೊನ ಬಚ್ಚಾ಼ವೊನೆ ಬೆಗಿನ ಲಿನ ಆ ತಿವ್ನಾಕ್ಹು ತಾರಾ ಬಾನೆ ಪಸಂದ ರ‍್ಹಯೆಲ ಛೊಕು ಅನ್ನ ಮಿಜ಼ ತಯಾರ ಕರುಸ. 10 ತು ತೆ ಅನ್ನ ತಿನಾ ಕ್ಹಮೊ ಗೈನ ಖಾವಾನೆ ಘಾಲಿನ ದ್ಯು ಅಮ್ಮ ಕರ‍್ಯಾಮ ತೆ ಮರಾತಿ ಪೈಲಾ ತುನೆಜ಼ ಆಶಿರ್ವಾದ ಕರಸ ಕದಿ. 11 ತಿನಾಹುತಿ ಯಾಕೊಬ ತಿನಿ ಯಾ ರೆಬೆಕ್ಕನೆ ಮಾರೊ ಮ್ಹೊಟೊ ಬೈ ಥಯಲ ಎಸಾವ ಅಂಗ ಭರಿನ ಬಾಲೊ ಹೊಂದಿ ಲಿದ್ಯೊಸ. ಮಿ ನರಮ ಚಾ಼ಮ್ಡು ರ‍್ಹಯಲವಾಲೊ ವ್ಹೈ. 12 ತೆನೈಸೊ ಬಾ ಮನೆ ಮುಟ್ಟಿನ ದೆಕ್ಯೊಮ ಮಿ ತಿನೆ ಮೊಸ ಕರಲವಾಲೊ ವ್ಹೈ ಕೈನ ದಿಕ್ಹಿನ ಆಯೊಮ ಅಶಿರ್ವಾದತಿಬಿ ಕ್ಹರಾಪ ಹೊಂದಿಲ್ಯುಸ ಕದ್ಯೊ. 13 ತಿನಿ ಯಾ ತಿನೆ ದಿಕ್ರಾ ತೆ ತುನೆ ಕ್ಹರಾಪ ದಿದ್ಯೊಮ ತೆ ಕ್ಹರಾಪ ಮನೆ ರ‍್ಹವಾದೆ, ತು ಮಾರಿ ವಾತ ಐಕಿನ ಬಕ್ರಾವೊನಾ ಬಚ್ಚಾ಼ವೊನೆ ಲಿನ ಆ ಕೈನ ಕದಿ. 14 ತೆಳಾಮಾ ಯಾಕೊಬ ಗೈನ ಬಕ್ರಾವೊನಾ ಬಚ್ಚಾ಼ವೊನೆ ಲೈನ ತಿನಿ ಯಾ ನೆ ದಿದ್ಯೊ.ರೆಬೆಕ್ಕ ತಿನಾ ಬಾನೆ ಪಸಂದ ರ‍್ಹಯೆಲ ಸ್ವಾದ ಅನ್ನ ತಯ್ಯಾರ ಕರಿ. 15 ಪಾಚಲ್ತಿ ರೆಬೆಕ್ಕ ತಿನಾ ಘರ್ಮಾ ರ‍್ಹಯಲ ತಿನಾ ಮ್ಹೊಟೊ ದಿಕ್ರೊ ಥಯಲ ಎಸಾವನಾ ಶ್ರೆಷ್ಠ ವಣ್ಣಾ ಲಿನ, ತಿನೊ ನ್ಹಾನೊ ದಿಕ್ರೊ ಥಯಲ ಯಾಕೊಬನೆ ಘಾಲಿ. 16 ತೆ ಬಕ್ರಾವೊನಾ ಬಚ್ಚಾ಼ವೊನಾ ಚಾಮಡಾನೆ ತಿನಾ ಹತೊನೆ ಬಿ ನುಣುಪ ಥಯಲ ಗರ್ದನನೆ ಬಿ ಸುತ್ತಿ. 17 ತೆ ಥಯಲ್ಪರ ತೆ ಸಿದ್ಧ ಕರಲ ಚೊ಼ಕು ಅನ್ನ ವರಿ ರೊಟ್ಲಾ ತಿನೊ ದಿಕ್ರೊ ಥಯಲ ಅಬ್ರಹಾಮನಾ ಹತ್ಮಾ ದಿದಿ. 18 ತೆ ತಿನಾ ಬಾ ಕನ ಗೈನ 'ಬಾ" ಕೈನ ಬಲಾತಾಮಾ, ತಿನೊ ಬಾ, ಸು ವ್ಹೈ ದಿಕ್ರಾ ತು ಕುನ ವ್ಹೈ? ಕೈನ ಪುಚ್ಯೊ. 19 ಯಾಕೊಬ ತಿನೆ ಮಿ ತಾರೊ ಮ್ಹೊಟೊ ದಿಕ್ರೊ ಥಯಕಲ ಎಸಾವ ವ್ಹೈ ತಾರಿ ಅಪ್ಪಣೆ ದಿದಲಜ಼ ಅನ್ನ ತಯ್ಯಾರ ಕರಿನ ಲಾಯೊಸ ಉಟಿನ ಬೈಟಿನ ಮಿ ಲಾಯೆಲ ಶಿಕಾರನು ಮಾಕ್ಹನು ಅನ್ನ ಖೈನ ಮನೆ ಆಶಿರ್ವಾದ ಕರ ಕೈನ ಕದ್ಯೊ. 20 ಇಸಾಕ ಸು ದಿಕ್ರಾ ಅಕ್ಲಾ ಭೆಗಿನ ಶಿಕಾರ ಕಿಮ ಮಳ್ಯು ಕೈನ ಪುಚ಼ತಾಮಾ ತೆ ತಾರೊ ಕ್ಹುದಾ ಥಯಲ ಯಹೊವಾ ತೆ ಮರಾ ಕ್ಹಾಮೊಜ಼ ಆಯೆನಿಂಗತ ಕರ‍್ಯೊ ಕದ್ಯೊ. 21 ಪಾಚಾ಼ತೊ ಇಸಾಕ ಯಾಕೊಬನೆ ಮಕನ ಆ ಮಿ ಮಾರಾ; ದಿಕ್ರಾನೆ ಮುಟ್ಟಿನ ಗ್ವತ್ತ ಕರಿಲ್ಯುಸ. ಮಿ ತುನೆ ಮುಟ್ಯುಮ ತು ಕ್ಹರಿಮಾಜ಼ ಮಾರೊ ದಿಕ್ರೊ ಎಸಾವಜ಼ ವ್ಹೈಸು ಕೈನ ತಿಳದಿಲ್ಯುಸ. ಕೈನ ಕದ್ಯೊ. 22 ತಿನಾಹುತಿ ಯಾಕೊಬ ತಿನೊ ಬಾಕನ ಇಸಾಕಕನ ಗಯೊ.ಇಸಾಕ ತಿನೆ ಮುಟ್ಟಿನ ತಾರೊ ಗಳೊ ಯಾಕೊಬನೊ ಗಳೊ ನಿಂಗತ ಛೆ. ತೆನೈಸೊ ತಾರಾ ಹತೊ ಯೆಸವಾನಾ ಹತೊ ನಿಂಗತ ಬಾಲೊಕ್ಹು ಭರಲ ಛೆ. 23 ತೆ ಯಾಕೊಬ ವ್ಹೈ ಕೈನ ಇಸಾಕನೆ ಗ್ವತ್ತ ಥಯು ನೈ. ಕಾ ಕದ್ಯಾಮ ತಿನಾ ಹತೊ ಇಸಾಕನಾ ಹತೊಪರ ರ‍್ಹಯಲ ಬಾಲೊ ನಿಂಗತ ವ್ಹತಾ. ತಿನಾಹುತಿ ಇಸಾಕ ಯಾಕೊಬನೆ ಆಶಿರ್ವಾದ ಕರ‍್ಯೊ. 24 ಇಸಾಕ ತಿನಿ ತು ಕ್ಹರಿಮಾಜ಼ ಮಾರೊ ದಿಕ್ರೊ ವ್ಹೈ ಸು? ಕೈನ ಪುಚ್ಯೊ ತಿನಾಹುತಿ ಯಾಕೊಬ ಮಿಜ಼ ವ್ಹೈ ಕೈನ ಕದ್ಯೊ. 25 ತೆಳಾಮಾ ಇಸಾಕ ಅನ್ನಲಿನ ಆಮಿ ಅನ್ನ ಖೈನ ತುನೆ ಆಶಿರ್ವಾದ ದ್ಯುಸ.ಕೈನ ಕದ್ಯೊ. ತಿನಾನಿಂಗತ ಯಾಕೊನ ತಿನೆ ಅನ್ನ ಲೈನ ದಿದ್ಯೊ ತೆ ಖೈನ ದ್ರಾಕ್ಷಿನೊ ರಕ್ಹ ಪಿದ್ಯೊ. 26 ಪಾಚಾ಼ತಾ ಇಸಾಕ ತಿನೆ ಮಕನ ಐನ ಮನೆ ಮಟ್ಟಿ ದೆ ಕೈನ ಕದ್ಯೊ. 27 ತಿನಾನಿಂಗತ ಯಾಕೊಬ ತಿಕನ ಗೈನ ತಿನೆ ಗಳೆ ಮಳ್ಯೊ. ಇಸಾಕ ತಿನಾ ವಣ್ಣಾವೊನಿ ಬಾಸ ದೆಕಿನ ತಿನೆ ಆಶಿರ್ವಾದ ದಿದ್ಯೊ. ಆಹಾ ಮಾರಾ ದಿಕ್ರಾನಿ ಬಾಸ ಯಹೊವಾ ಆಶಿರ್ವಾದ ದಿದಲ ಖೆತರನಿ ಬಾಸ ನಿಂಗತ ಛೆ. 28 ಕ್ಹುದಾ ತುನೆ ಹಬಾಳನು ಬರಪ ಘನ್ನಿ ಜಿಮಿನ ದಿನ ಅನಾಜ಼, ದ್ರಾಕ್ಷಾ ರಕ್ಹ ಘನ್ನು ದಿವಾದೆ. 29 ಮನಕ್ಹೊ ತುನೆ ಆರಾಧನಾ ಕರಾದೆ, ಜ಼ನಾಂಗೊ ತುನೆ ಅಧಿನ ಥಾವಾದೆ, ತಾರಾ ಭಾಯೊಪರ ತುಜ಼ ರಾಜ಼ ಕರ, ತಾರಿ ಯಾನಾ ಬಚ್ಚಾ಼ ತುನೆ ಅಡ್ಡ ಪಡಾದೆ, ತುನೆ ಕ್ಹರಾಪಲ ವಾಲಾನೆ ಕ್ಹರಾಪ ಲಾಗಾದೆ, ತುನೆ ಆಶಿರ್ವಾದ ದಿವಾಲಾನೆ ತಿನೆ ಆಶಿರ್ವಾದ ಮಳಾದೆ, ಕದ್ಯೊ.

30 ಇಸಾಕ ಯಾಕೊಬನೆ ಆಶಿರ್ವಾದ ದಿದಲ್ಪರ ಯಾಕೊಬ ತಿನಾ ಬಾಕಂತೊ ಗಯಲ ಬರಬ್ಬರ ಎಸಾವ ಶಿಕಾರ ಕರಿನ ಆಯೊ. 31 ಎಸಾವ ತಿನಾ ಬಾನಾ ಪಸಂದ ರ‍್ಹಯಲ ತಿಮ್ಮಜ಼ ಖಾಸ ರ‍್ಹಯಲ ಅನ್ನ ತಯ್ಯಾರ ಕರಿನ ತಿನಾ ಬಾಕನ ಲಿನ ಗಯೊ. ತೆ ತಿನಾ ಬಾನೆ ಬಾ ಉಟ್ಟ ತಾರಾಹುತಿ ತಾರು ದಿಕ್ರೊ ಶಿಕಾರ ಕರಿನ ಮಾಕ್ಹ ಖೈನ ಮನೆ ಆಶಿರ್ವಾದ ದೆ ಕದ್ಯೊ. 32 ತಿನೊ ಬಾ ಇಸಾಕ ತು ಕುನ್ನ ವ್ಹೈ? ಕೈನ ತೆ ಪುಚ್ತಾ಼ಮಾ ತೆ ಮಿ ತಾರೊ ಮ್ಹೊಟೊ ದಿಕ್ರೊ ಎಸಾವ ವ್ಹೈ ಕೈನ ಕದ್ಯೊ. 33 ತೆಳಾಮಾ ಇಸಾಕ ಘನ್ನೊ ಭುಚ್ಕಿನ ಕಾಪ್ತೊ ತಿನೆ ತು ಆವಾತಿ ಪೈಲಾಜ಼ ಅನ್ನ ತಯ್ಯಾರ ಕರಿನ ದಿದಲ ಕುನ್ನ ವ್ಹೈ? ಮಿ ತೆ ಕ್ಹಾರು ಖೈನ ತಿನೆ ಆಶಿರ್ವಾದ ದಿದ್ಯೊಸ. ಹಮ್ನಾ ಮಿ ದಿದಲ ಆಶಿರ್ವಾದ ವಾಪಸ ಲಿವಾನೆ ಥಾತು ನೈ. 34 ಎಸಾವ ತಿನಾ ಬಾನಾ ವಾತೊ ಐಕಿನ ಘನ್ನೊ ದುಖಿ ಥಯೊ ವರಿ ಘನ್ನೊ ರೊತೊ ಎ ಬಾ ಮನೆ ಬಿ ಆಶಿರ್ವಾದ ದೆ ಕೈನ ಕತಾಮಾ ಇಸಾಕ ತಿನೆ, 35 ತಾರೊ ನ್ಹಾನೊ ಭೈ ಐನ ಮನೆ ಮೊಸ ಕರಿನ ತುನೆ ಮಳಾನೊ ಆಶಿರ್ವಾದ ತೆ ಪಡ್ದಿಲಿನ ಗಯೊ. 36 ತೆ ವಾತೆ ಎಸಾವ, ಯಾಕೊಬ ಕವಾನು ನಾಮ ತಿನೆ ಮಳಲ ನ್ಯಾಯ ನ್ಹವೈಸು? ಬೆ ಸಲಾ ಮನೆ ಮೊಸ ಕರ‍್ಯೊಸ, ಪೈಲಾ ಮಾರೊ ಪೈಲಾರತನಾನೊ ಹಕ್ಕ ಬಿ ಕಾಳಿಲಿದ್ಯೊ; ಹಮ್ನಾ ಐನ ಮನೆ ಮಳಾನೊ ಆಶಿರ್ವಾದ ತೆ ಕಾಳ್ಳಿದ್ಯೊಸ, ಕೈನ. ತಿನಾ ಬಾನೆ ಮಾರಾಹುತಿ ತುಕನ ಮನೆ ದಿವಾನಾ ಹುತಿ ಆಶಿರ್ವಾದಜ಼ ನತ್ತಿ ಸು? ಕೈನ ಪುಚ್ತಾ಼ಮಾ 37 ಇಸಾಕ ಮಾರಾ ದಿಕ್ರಾ ತಿನೆ ತುಪರ ಮಾಲಕ ಕೈನ ನೆಮಶ್ಯೊಸ ತಿನಾ ಭಾಯೊನೆ ತಿನಾ ಸೆವಕೊ ಕರಿನ ದಿದ್ಯೊಸ. ಅನಾಜ಼ ದ್ರಾಕ್ಷಾ ರಕ್ಹ ತಿನೆ ರಾಕಾನಾ ಹುತಿ ದಿದ್ಯೊಸ ದೆಕ. ಇಮ ರ‍್ಹತಾಮಾ ಮಿ ತಾರಾಹುತಿ ಸು ಕರು ಕದ್ಯೊ. 38 ಎಸಾವ ತಿನೆ ಎ ಮಾರಾ ಬಾ ತುಕನ ತೆ ಯಕ್ಕಜ಼ ಆಶಿರ್ವಾದ ವ್ಹತು ಸು? ಬಾ ಮನೆಬಿ ಆಶಿರ್ವಾದ ದ್ಯು. 39 ಕೈನ ಕತೊ ರೊತೊ ತಿನೊ ಬಾ ಇಸಾಕ ಸಾರವುಳ್ಳ ಜಿಮಿನ ಹಬಾಳಮಾತು ಪಡಾನು ಠಾರ ರ‍್ಹವಾನಿ ಜ಼ಗಾ ತಾರು ನಿವಾಸ ರ‍್ಹವಸ. 40 ತು ಚಾಕಾಕ್ಹು ಜಿವ್ನಾ ಕರ್ಸಿ ತಾರಾ ನ್ಹಾನಾ ಭೈನೆ ಸೆವಕ ಥೈನ ರ‍್ಹಸಿ ವರಿಬಿ ತು ತಾಳಮೆ ಮಿರ್ತಾಮಾ ತುಪರ ಗಾಲಲ ವಜ್ಜು಼ ನಾಕಿ ಪಾಡಸಿ ಕೈನ ಕದ್ಯೊ. 41 ಬಾ ಯಾಕೊಬನೆ ಕರಲ ಆಶಿರ್ವಾದಕ್ಹು ಎಸಾವನ ಯಾಕೊಬನೆ ಕದರೈನ ತಿನಾ ಮನಸ್ಮಾ ಬಾನಾ ಹುತಿ ತ್ರಾಸ ಖಾವಾನು ಟೈಮ ನಜಿಕ ಆಯೊ ತೆಳಾಮಾ ಮಾರೊ ನ್ಹಾನೊ ಭೈ ಥಯಲ ಯಾಕೊಬನೆ ಖಲಾಸ ಕರುಸ ಕೈನ ಕೈಲಿದ್ಯೊ. 42 ಮ್ಹೊಟೊ ದಿಕ್ರೊ ಥಯಲ ಎಸಾವ ಕದಲ ವಾತ ರೆಬೆಕ್ಕನೆ ಗ್ವತ್ತ ಥಾತಾಮಾ ತೆ ತಿನೊ ನ್ಹಾನೊ ದಿಕ್ರೊ ಥಯಲ ಯಾಕೊಬನೆ ಬಲೈನ ತಿನೆ ದೆಕ ತಾರೊ ಮ್ಹೊಟೊ ಭೈ ಥಯಲ ಎಸಾವ ತುನೆ ಖಲಾಸು ಕರುಸ ಕೈನ ವಿಚಾರ ಕರಲ ತಿನು ಸಂಗಟ ಇಜ್ಜೈ ಲಿವಸ. 43 ತಿನಾಹುತಿ ಎ ಮಾರಾ ದಿಕ್ರಾ ಮಾರಿ ವಾತ ಐಕ ತು ಉಟಿನ ಹಾರನ ಗಾಮ್ಮಾ ರ‍್ಹಯಲ ಮಾರೊ ಭೈ ಥಯಲ ಲಾಬಾನಕನ ನ್ಹಾಟಿನ ಗೈನ ದಕ್ಹಾ ದಿನ್ನ 44 ಕದ್ಯಾಮ ತಾರಾ ಭೈನಿ ಶಿಟ್ಟ ಗಯೆಲಕ್ಕಾ ತಿಕನ ರ‍್ಹೆ 45 ತಾರೊ ಭೈ ತು ಕರಲ ಇಕ್ಹರಿನ ತಿನಿ ಉತ್ರಲಪರ ಮಿ ತುನೆ ಬಲೈಲ್ಯುಸ ಮಿ ಯಕ್ಕಜ಼ ದಿನ್ಮಾ ಜೈ಼ವೈ ಲಿವಾನೆ ಶಾನೆ ಜೈ ಲ್ಯು? 46 ರೆಬೆಕ್ಕ ಇಸಾಕನೆ ಇತ್ತಿಯವಾಲಾ ಥಯಲ ಬಾಕ್ಡಿಯೊಮಾನಾಹುತಿ ಮನೆ ಬೆಜ್ಜಾರ ಥಯು. ಯಾಕೊಬ ಎ ದೆಶವಾಲಾಮಾನಿ ಛೊಕ್ರಿನೆ ಇನಿಲಿನ ಹೈ ಹಿತ್ತಿನಿ ಬಾಕ್ಡಿನೆ ಹಿವಾ ಕರಿಲಿದ್ಯೊಮ ಮಿ ಜಿವ್ತಿ ರ‍್ಹವಾನು ಸು ಉಪಯೊಗ ಸು ಛೆ?