1 ಯಾಕೊಬತಿನಾ ಬಾನು ಪ್ರವಾಸ ರ‍್ಹಯಲ ಕಾನಾ ದೆಶಮಾ ಜಿವ್ನಾ ಕರಾಡ್ಯೊತೊ. 2 ಯಾಕೊಬನಿ ಕುಟುಂಬನಿ ಚರಿತ್ರ ಆ ವ್ಹೈ. ಯೊಸೆಫ 17 ವರಕ್ಹೊನೆ ಜಾಂಜಿಮಾನ ವ್ಹತೊ. ಬಕ್ರಾ ರಾಜುನು ತಿನು ಕಾಮ ವ್ಹತು. ತಿನಾ ಮ್ಹೊಟಾ ಭಾಯೊನಾ ಕ್ಹಾತೆ ಕದ್ಯಾಮ ಬಿಲ್ಹಾ ವರಿ ಜಿಲ್ಫಾ ತ್ಯುನೆ ಮಲ ಮಾನಾ ಕ್ಹಾತೆ ಯೊಸಫ ಬಕ್ರಾ ಚರಾತೊತೊ ತ್ಯುನೆ ಕುನಬಿ ಕೆಟ್ಟ ಕರ‍್ಯಾಮ ಯೊಸೆಫ ತಿನಾ ಬಾ ಕನ ಕತೊತೊ. 3 ಇಸ್ರಾಯೆಲ ಘನ್ನೊ ಗಡಿಯೊ ಥಯಲ ಟೈಮ್ಮಾ ಯೊಸೆಫ ಹುಟ್ಟಲ ಹುತಿ ಇಸ್ರಾಯೆಲ ತಿನಾ ಬಿಜಾ಼ ದಿಕ್ರಾವೊತಿಬಿ ಜಾ಼ಸ್ತಿ ಯೊಸೆಫನೆ ಮಯಾ ಕರ‍್ಯೊ. ಯಾಕೊಬ ತಿನಾ ದಿಕ್ರಾನೆ ಚೊ಼ಕು ರ‍್ಹಯಲ ಮ್ಹೊಟು ಅಂಗ್ಡು ಕರಿನೆ ದಿದ್ಯೊತೊ. 4 ತ್ಯುನಾ ಬಾನೆ ಯೊಸೆಫರ ಘನ್ನಿ ಮಯಾ ರ‍್ಹಯಲ ದೆಕಲ ಯೊಸೆಪನೆ ದ್ವೆಶ ಕರಾನು ಸುರು ಕರ‍್ಯಾ ತಿನಾ ಕ್ಹಾತೆ ಸಿದಾ ಬೊಲ್ತಾ ನ್ಹೊತಾ.

5 ಯಕ್ಕ ದಿನ್ನ ಯೊಸೆಫ ಖಾಸ ರ‍್ಹಯಲ ಕ್ಹಪನ ದೆಕ್ಯೊ. ಯೊಸೆಫ ದೆಕಲ ಕ್ಹಪನ ತಿನಾ ಮ್ಹೊಟಾ ಭಾಯೊನೆ ಕತಾಮಾ ತ್ಯುನೆ ತಿನೆ ವರಿ ಜಾಸ್ತಿ ದ್ವೆಶ ಕರ‍್ಯಾ. 6 ಯೊಸೆಫ ತ್ಯುನೊನೆ ಮನೆ ಯಕ್ಕ ಕ್ಹಪನ ಪಡ್ಯುಸ, ತೆ ಮಿ ತುಮೊನೆ ಕೌಸ. 7 ಅಪೆ ಕ್ಹಾರಾ ಖೆತರಮಾ ಘೌನಾ ಭಾರಾ ಭಾಂದಾಡ್ಯಾತಾ ತೆಳಾಮಾ ಮಾರೊ ಭಾರೊ ಉಟಿನ ಹುಬ್ರೈನ ಮಾರಾ ಭಾರಾನಾ ಸುತ್ತೆ ತುಮಾರಾ ಕ್ಹಾರಾ ಭಾರಾ ಉಟಿನ ಮಾರಾ ಭಾರಾನೆ ಅಡ್ಡ ಪಡ್ಯಾ ಕೈನ ಕದ್ಯೊ. 8 ತ್ಯುನಾ ಭಾಯೊ ತು ರಾಜೊ಼ ಥೈನ ಹಮೊನೆ ಆಳಸಿ ಕೈನ ಅರ್ಥ ವ್ಹೈ ಕೈನ ತಾರಿ ವಿಚಾರ ವ್ಹೈ ಸು? ಕೈನ ಪ್ರಶ್ನೆ ಕರಿನ ತೆ ಕ್ಹಪನನಾ ಹುತಿ ತ್ಯುನೆ ತಿನೆ ವರಿ ಘನ್ನಾ ದ್ವೆಶ ಕರ‍್ಯಾ. 9 ತೆ ಥಯಲ್ಪರ ಯೊಸೆಫನೆ ಬಿಜೆಕ ಕ್ಹಪನ ಪಡ್ಯು ಎ ಕ್ಹಪನನಾ ಹುತಿ ತಿನಾ ಭಾಯೊಕನ ಕದ್ಯೊ. ಯೊಸೆಫ ತ್ಯುನೊನೆ ಮನೆ ಬಜೆಕ ಕ್ಹಪನ ಪಡ್ಯು ಸುರ‍್ಯೊ ಚ಼ಂದಪ್ಪಾ ವರಿ 11 ಚಿಕ್ಕಿಯೊ ಮನೆ ಅಡ್ಡ ಪಡಾನು ಮನೆ ದಿಕ್ಹ್ಯು ಕೈನ ಕದ್ಯೊ, 10 ಯೊಸೆಫ ಎ ಕ್ಹಪನನಾ ಹುತಿ ತಿನಾ ಬಾಕನ ಬಿ ಕದ್ಯೊ. ವರಿ ತಿನೊ ಬಾ ತಿನೆ ಭುಚ್ಕಾಡಿನೆ ಎ ಕೆವು ಕ್ಹಪನ ವ್ಹೈ? ಮಿ ತಾರಿ ಯಾಬಿ ವರಿ ತಾರಾ ಭಾಯೊ ತುನೆ ಅಡ್ಡ ಪಡಿಯೆಸ ಕೈನ ಬರೊಕ್ಹೊ ಕರ್ಸಿ ಸು? ಕೈನ ಪುಚ್ಯೊ. 11 ಯೊಸೆಫನಾ ಭಾಯೊನೆ ತಿಪರ ಸಂಗಟ ವರಿ ನಕ್ಕರ ಜಾಸ್ತಿ ಥೈ ತೆ ನೈಸೊ ಯೊಸೆಫನನೊ ಬಾ ತೆ ಕ್ಹಪನೊನಾ ಹುತಿ ಘಾಬ್ರೊ ಥೈನ ವಿಚಾರ ಕರಾಮಾ ಪಡಿ ಗಯೊ. 12 ಯಕ್ಕ ದಿನ್ನ ಯೊಸೆಫನಾ ಭಾಯೊ ತ್ಯುನಾ ಬಾನಾ ಬಕ್ರಾ ಕೈದಾನಾ ಹುತಿ ಶೆಕೆಮನೆ ಗಯಾ. 13 ಇಸ್ರಾಯೆಲ ಯೊಸೆಫನೆ ಶೆಕೆಮನೆ ಜಾ಼ ತಾರಾ ಭಾಯೊ ಮಾರಾ ಬಕ್ರಾವೊನೆ ಚ಼ರಾವಾಡಾಸ. ಕೈನ ಕದ್ಯೊ ಯೊಸೆಫ ಥಯು ಜೌ಼ಸ. ಕೈನ ಕದ್ಯೊ. 14 ಇಸ್ರಾಯೆಲ ತಾರಾ ಭಾಯೊನೆ ವರಿ ಬಕ್ರಾವೊನು ಕಿಮ ಛೆ ಕೈನ ಪುಚ್ಹಿನ ಐನ ಮನೆ ಕೆ. ಕೈನ ತಿನೆ ಹೆಬ್ರೊನನಿ ಕಣಿತೊ ಶೆಕೆಮ್ನೆ ವಳಾಯೊ. 15 ಶೆಕೆಮ್ನೆ ವಾಟ ತಪ್ಪಿನ ಖೆತ್ರೊಮಾ ಭಟಕ್ತೊ ರ‍್ಹತಾಮಾ ತಿನೆ ದೆಕಲ ಯಕ್ಲೊ ಸು ಹುಡ್ಕಾಡ್ಯೊಸ? ಕೈ ಪುಚ್ಯೊ. 16 ಯೊಸೆಫ ಮಾರಾ ಭಾಯೊನೆ ಹುಡ್ಕಾಡ್ಯೊಸ.ತಿವ್ನೆ ಬಕ್ರಾ ಕಿಜಾ಼ ಚ಼ರಾವಾಡ್ಯಾಸ ಕೈನ ಪುಚ್ಯೊ. 17 ತಿನಾಹುತಿ ತೆ, ತ್ಯುನೆ ನ್ಹ್ಯಾಂತಾ ಗೈಪಡ್ಯಾ. ದೊತಾನನೆ ಗೈಯೆ ಕೈನ ತ್ಯುನೆ ಬೊಲ್ಲಿವಾನು ಮಿ ಐಕ್ಯೊ. ಕೈನ ಕದ್ಯೊ. ತಿನಾಹುತಿ ಯೊಸೆಫ ತ್ಯುನೊನೆ ಹುಡಕ್ತೊ ಗೈನ ತ್ಯುನೊನೆ ದೊತಾನಮಾ ದೆಕ್ಯೊ. 18 ಯೊಸೆಫನೆ ದುರ್ತಾ ದೆಕಿನ ತಿನಾ ಭಾಯೊ ತಿನೆ ಖಲಾಸ ಕರಾನೆ ವಿಚಾರ ಕರ‍್ಯಾ. 19 ತ್ಯುನೆ ಯಕ್ನಾ ಯಕ್ಕ ದೆಕೊ ಐಲೊ ಕ್ಹಪ್ನೊ ದೆಕಾಲೊ ಯೊಸೆಫ ಆವಾಡ್ಯೊಸ. 20 ತಿನೆ ಖಲಾಸರಾನೆ ಎಜ಼ ಕರೆಟ್ಟ ಟೈಮ ವ್ಹೈ. ತಿನೆ ಖಲಾಸ ಕರಿನ ಪಾನಿ ನೈಸೊ ಇರಮಾ ನಾಕಿನ ಕ್ರುರ ರ‍್ಹಯಲ ಜಾ಼ನ್ವರ ಯಕ್ಕ ತಿನೆ ಖೈಪಾಡ್ಯುಸ ಕೈನ ಅಪ್ನಾ ಬಾಮೆ ಕೈಯೆ ತೆಳಾಮಾ ತಿನಾ ಕ್ಹಪ್ನೊ ಕ್ಹಾರಾ ಕಿಮ ಖರಿ ಥಾವಸ ಕೈನ ದೆಕಿಯೆ ಕೈನ ಬೊಲ್ಲಿದ್ಯಾ. 21 ತೆ ಥಯಲ್ಪರ ತೆ ಯಕ್ಕ ಚೊ಼ಕ್ರಿ ಜ಼ನ್ನಿನ ತಿನೆ ದಿನಾ ಕೈನ ನಾಮ ಮ್ಹೆಲಿ. 22 ಪಾಚಲ್ತೊ ಕ್ಹುದಾ ರಾಹೆಳನೆ ಶೆ ಕರಿನ ತಿನಿ ಪ್ರಾಥನಾ ಐಕಿನ ತಿನೆ ಬಚ್ಚಾ ಥಾವಾ ವರಕ್ಹು ಕರ‍್ಯೊ. 23 ತೆ ಪೆಟೆ ರ‍್ಹೈನ ಪಟ್ಟಾನೆ ಜ಼ನ್ನಿನ, ಕ್ಹುದಾ ಮಪರ ರ‍್ಹಯಲ ಕಲಂಕ ಕಾಡಿಪಾಡ್ಯೊ. 24 ತೆ ನೈ ತೆ ಯಹೊವಾ ಮನೆ ವರಿ ಯಕ್ಕ ಪಟ್ಟೊ ದಿದ್ಯೊಸ. ಕೈನ ತಿನು ನಾಮ ಯೊಸೆಫ ಕೈನ ನಾಮ ಮ್ಹೆಲಿ.

25 ಯೊಸೆಫ ಹುಟ್ಟಲ್ಪರ ಯಾಕೊಬ ಲಾಬಾನನೆ ಮಿ ಹಮ್ನಾ ಮಾರಾ ಸ್ವಂತ ಗರೆ ಜಾ಼ವಾನೆ ಅನುಮತಿ ದೆ, 26 ಮಾರಿಯೊ ಬಾಕ್ಡಿಯೊನೆ ಬಚ್ಚಾ಼ವೊನೆ ಮನೆ ದೆ ಮಿ ತಾರಿ ಸೆವೆ ಕರಿನ ತ್ಯುನೊನೆ ಗಳಸಿ ಲಿದ್ಯೊಸ. ಮಿ ತುನೆ ಚೊ಼ಕಿ ಸೆವೆ ಕರ‍್ಯೊಸ ಕವಾನು ತುನೆ ಗ್ವತ್ತ ಛೆ. ಕೈನ ಕದ್ಯೊ. 27 ಲಾಬಾನ ತಿನೆ ಮಿ ಕವಾನು ಐಕ ಯಹೊವಾ ತಾರಿಕ್ಹು ಮನ ಆಶಿರ್ವಾದ ದಿದ್ಯೊಸ ಕವಾನು ಮನೆ ಗ್ವತ್ತ ಛೆ. 28 ಕೆ ಮಿ ತುನೆ ಕೆಕ್ಲೊ ಪಗಾರ ದ್ಯು? ತು ಕದಲ ತೆಕ್ಲು ದ್ಯುಸ ಕೈನ ಕದ್ಯೊ. 29 ಯಾಕೊಬ ಮಿ ತಾರಾ ಹುತಿ ತ್ರಾಸ ಖೈನ ಕಾಮ ಕರ‍್ಯೊಸ ಕವಾನು ತುನೆ ಗ್ವತ್ತ ಛೆ. ಮಿ ತಾರಾ ಬಕ್ರಾವೊನೆ ದೆಕ್ರಾಣಕಿ ಕರಲ ಹುತಿ ತೆ ಜಾಸ್ತಿ ಥಯಾಸ. 30 ಮಿ ಆತಾಮಾ ಬಕ್ರಾ ದಕ್ಹಾಜ಼ ವ್ಹತಾ. ಹಮ್ನಾತೊ ತುಕನ ಘನ್ನಾ ಬಕ್ರಾ ಛೆ. ಮಿ ತಾರಾಹುತಿ ಕರಲ ಕ್ಹಾರಾನೆ ಯಹೊವಾ ಆಶಿರ್ವಾದ ದಿದ್ಯೊಸ. ಮಿ ಖುದ್ದನಾ ಹುತಿ ಕಾಮ ಕರಾನು ಟೈಮ ಛೆ ಮಾರಾ ಸ್ವಂತ ಘರೆ ಜಾ಼ವಾನೆ ಟೈಮ ಛೆ ಕದ್ಯೊ. 31 ಲಾಬಾನ ತಿಮ ರ‍್ಹಯೊಮ ಮಿ ತುನೆ ಸು ದ್ಯು ಕೆ ಕೈನ ಪುಚ್ಯೊ. ಯಾಕೊಬ ತು ಮನೆ ಸುಜ಼ ದ್ಯು ನಕೊ ತು ಮಾರಾಹುತಿ ಯಕ್ಕ ಕಾಮ ಕರ‍್ಯೊಮ ಬಸ್ಸ, ಪ್ಹರಿನ ಮಿ ತಾರಾ ಬಕ್ರಾವೊನೆ ರಾಕುಸ. 32 ತೆ ಸುವೈ ಕದ್ಯಾಮ ಹಮ್ನಾಜ಼ ಮಿ ತಾರಾ ಬಕ್ರಾವೊನಾ ಗುಂಪಮಾ ಗೈನ ಬಕ್ರಾವೊಮಾ ಚಿಕ್ಕಿಯೊ ವರಿ ಮಚ್ಚ ರ‍್ಹಯಲ ಬಕ್ರಾವೊಮಾ ಕಾಳಾ ರ‍್ಹಯಲ ಬಕ್ರಿಯೊಮಾ ಚಿಕ್ಕಿಯೊ ವರಿ ಮಚ್ಚ ರ‍್ಹಯಲ ಜು಼ದಾ ಕರುಸ ತೆ ಮಾರೊ ಪಗಾರ ವ್ಹೈ. 33 ಇಮ್ಮ ರ‍್ಹಯಮ ಅಗಲ್ಯಾ ದಿನೊಮಾ ಮಾರಾ ಪಗಾರಾನಾ ಹುತಿ ತುಕನ ಆತಾಮಾ ಮಿ ರ‍್ಹಯಲ ಕ್ಹರಿಕ್ಹು ಮನೆ ಸಾಕ್ಷಿ ಥಾವಸ. ಬಕ್ರಿಯೊಮಾ ಚಿಕ್ಕಿಯೊ ವರಿ ಮಚ್ಚ ರ‍್ಹಯಲ ರ‍್ಹಯುಮ ಬಕ್ರಾಮಾ ಕಾಳಾ ನೈಸೊ ಮಕನ ಮಳ್ಯಾಮ ತೆ ಚೊ಼ರಿ ಕರ‍್ಯೊಸ ಕೈನ ಕೌ ನೈ ಕದ್ಯೊ. 34 ತೆ ವಾತೆ ಲಾಬಾನ ಮಿ ತೆ ವಾತೆ ಮಿ ವಪ್ಪಿಲಿದ್ಯೊಸ ತು ಕದಲ ತಿಮ್ಮಜ಼ ಅಪೆ ಕರಿಯೆ ಕದ್ಯೊ. 35 ತೆ ದಿನೆ ಲಾಬಾನ ಚಿಕ್ಕಿಯೊ ರ‍್ಹಯಲ ಕ್ಹಾರಾ ಬಕ್ರಿಯೊನಾ ಬಚ್ಚಾ ವರಿ ಬಕ್ರಿಯೊ ಕಾಳಾ ಬಕ್ರಾ ಜು಼ದಾ-ಜು಼ದಾ ಕರ‍್ಯೊ. ಲಾಬಾನ ತಿನಾ ಪಟ್ಟಾವೊನೆ ತೆ ಬಕ್ರಾವೊನೆ ದೆಕ್ರಾಣಕಿ ಕರಾನೆ ಕದ್ಯೊ. 36 ತಿನಾಹುತಿ ತಿನಾ ಪಟ್ಟಾ ಚಿಕ್ಕಿಯೊ ರ‍್ಹಯಲ ತ್ಯುನಾ ಕ್ಹಾತೆ ಬಿಜೆಕ ಜ಼ಗಾಕನ ಗಯಾ ತ್ಯುನೆ ತನ್ನ ದಿನ್ನ ಲಕ್ಕಾ ಪ್ರಯಾಣ ಕರ‍್ಯಾ ಯಾಕೊಬ ತ್ಯಾ ರ‍್ಹೈನ ಉಗ್ರಲ ಕ್ಹಾರಾವೊನೆ ದೆಕ್ರಾಣಕಿ ಕರಾನು ಶುರು ಕರ‍್ಯೊ.