ರೊಮಾಪುರ 6

2 ಕ್ಹರಿಜ಼ ನೈ! ಅಪೆ ಅಪ್ನಾ ಪಾಚ಼ಲ್ಯಾ ಪಾಪನಿ ಜಿವ್ನಾನಾ ಪಾಲೆ ಮರಿ ಗಯಾಸ. ತಿಮ್ಮ ರ‍್ಹಯಾಮ, ಅಪೆ ಪಾಪಮಾಜ಼ ಜಿವ್ನಾ ಕರಾನು ಕಿಮ್ಮ ಸಾದ್ಯ ಛೆ? 3 ಅಪೆ ಬಾಪ್ತಿಸ್ಮ ಕರಲೆತಾಮಾ, ಕ್ರಿಸ್ತಮಾ ಪಾಲ ಲಿವಾಲಾ ಥಯಾ ಕವಾನು ತುಮೆ ಇಕ್ಹರಿ ಪಡ್ಯಾ ಸು? ಅಪ್ನಿ ಬಾಪ್ತಿಸ್ಮಕ್ಹು ತಿನಾ ಮರಣಮಾ ಪಾಲ ಲಿವಾಲಾ ಥಯಾ. 4 ತಿಮ್ಮ ರ‍್ಹತಾಮಾ, ಅಪೆ ಬಾಪ್ತಿಸ್ಮ ಕರಲೆತಾಮಾ, ಅಪೊನೆ ಕ್ರಿಸ್ತನಾ ಕ್ಹಾತೆ ಸಮಾದಿ ಥೈ ವರಿ ಅಪೆ ತಿನಾ ಮರಣಮಾ ಪಾಲ ಲಿವಾಲಾ ಥಯಾ. ಅಪೆ ಜಿವ್ತಾ ಥೈನ ಉಟಿನ ನಯಿ ಜಿವ್ನಾ ಕರು ಕೈನ ಅಪೊನೆ ಕ್ರಿಸ್ತ ಕ್ಹಾತೆ ಸಮಾದಿ ಥೈ. ಕ್ರಿಸ್ತ ಬಾನಿ ಅದ್ಬುತ ಕರಾನಿ ತಾಕತಕ್ಹು ಮರ‍ಲವಾಲಾವೊಮಾತೊ ಜು಼ವ್ತೊ ಥೈನ ಆಯಲ ನಿಂಗತ ಅಪೆಬಿ ಜಿವ್ತಾ ಥೈನ ಆಯಾಸ.

5 ಕಿಮ್ಮ ಅಪೆ ಕ್ರಿಸ್ತ ಮರಣನಾ ಪಾಲ ಥಯಾಸ ತಿಮ್ಮಜ಼ ತೆ ಜಿವ್ತೊ ಥೈನ ಆಯಲ ನಿಂಗತ ಅಪೆಬಿ ಜಿವ್ತಾ ಥೈನ ಆಯಲ ತಿನಾ ಪಾಲಮಾ ಮಳ್ಯಾ. 6 ಅಪ್ನಿ ಜು಼ನ್ನಿ ಜಿವಿತ ಕ್ರಿಸ್ತನಾ ಕ್ಹಾತೆ ಶಿಲುಬಿಪರ ಮರಿ ಗೈಸ ಕವಾನು ಅಪೊನೆ ಗ್ವತ್ತ ಛೆ. ಅಪ್ನಿ ಪಾಪನಿ ಚಾಳಿಕ್ಹು ಅಪೊಪರ ಕಯೊ ಅದಿಕಾರ ರ‍್ಹೌ ನೈ ಕೈನ ಅಪೆ ಅಗಾ ಪಾಪನಾ ಗುಲಾಮೊ ಥೈನ ರ‍್ಹೌ ನೈ ಕೈನ ಇಮ್ಮ ಥಯು. 7 ಪಾಪನಾ ಪಾಲೆ ಮರಲವಾಲೊ ಪಾಪನಾ ಹತ್ಮಾತೊ ಛೊಡೈಲಿದ್ಯೊಸ.