1 Ikhaa jngó, gu̱ni̱ꞌñáá-ru̱ne̱laꞌ mbá xúgíí inii rí xkawe̱ꞌ, mbá xúgíí inii rí mi̱nduwa. Ma̱xáꞌne a̱jma̱ inalaꞌ, ma̱xáxígua̱ꞌlaꞌ ni máꞌ mu̱xúne̱-xtutaalaꞌ ga̱jma̱á numúú xa̱bo̱. 2 Gu̱smijnálaꞌ mi̱ndaꞌkho xómá ene̱ e̱je̱n cháña̱ꞌ, rí mu̱wanlaꞌ yaꞌdú jaꞌwu, rí ñajuun ajngóo Ana̱ꞌlóꞌ. Kajngó ga̱jma̱á majñu̱u̱ ne̱ ikhaa ma̱gajáanꞌlaꞌ, jamí ma̱jríñáaꞌlaꞌ. 3 Numuu rí ndu̱ya̱álaꞌ máꞌ rí phú májáan a̱kui̱in Táta̱.

4 Gu̱xu̱ꞌmá-mijnálaꞌ ná inuu Krísto̱, numuu rí ikhaa̱ ñajuu̱n xómá itsí ndaꞌya rí támakúún xa̱bo̱ numbaa juyáá, xómáꞌ Ana̱ꞌlóꞌ niraꞌwíi̱ rí ma̱nindxu̱u̱ xómá itsí rí phú gíꞌdoo numuu. 5 Jamí ikháanꞌ mangáanꞌlaꞌ ñajwanlaꞌ xómá itsí ndaꞌya rí na̱gu̱ma ga̱jma̱á guꞌwóo Ana̱ꞌlóꞌ. Xkuaꞌnii kajngó ma̱nindxa̱ꞌlaꞌ dxakuun jaꞌwuun tsí nu̱xna̱xí tsi̱gi̱jña̱ꞌ rí na̱ni̱gu̱u̱ꞌ Ana̱ꞌlóꞌ ga̱jma̱á majñu̱u̱ Jesukrísto̱. 6 Ikhaa numuu rúꞌkhue̱n naꞌthán i̱yi̱i̱ꞌ ajngóo Ana̱ꞌlóꞌ mangaa:

«A̱gu̱ya̱álaꞌ rí na̱ꞌgí ná xuajen Sióón itsí ginii rí na̱ge̱ꞌe̱ ná nakhúu guꞌwá,

rí watraꞌwíí jamí phú gíꞌdoo numuu.

Tsí ma̱nimbo̱o̱ꞌ jaꞌyoo̱ ikhaa̱, ma̱xáthájwíin a̱kuii̱n».*

7 Xómáꞌ ikháanꞌlaꞌ, tsáanꞌ nanimba̱ꞌlaꞌ ju̱yáa̱, ndu̱ya̱álaꞌ rí ikhaa̱ phú gíꞌdoo numuu̱. Xómáꞌ tsí tsínimbu̱únꞌ juyáa̱ rá, ikhaa̱ ñajuu̱n xómá:

«Itsí rí ni̱ni̱ꞌñá-ti̱ga̱ xa̱bo̱ tsí nune̱ guꞌwá,

ikhaa ne̱ ninindxu̱u̱ itsí mba̱a̱ rí jayá ski̱yu̱u̱ꞌ rakhóo guꞌwá».*

8 Jamí xáꞌnii ka̱ma naꞌthán ná i̱yi̱i̱ꞌ ajngóo Ana̱ꞌlóꞌ mangaa:

«Mbá itsí rí ma̱ngráꞌiin jamí ma̱ꞌne rí ma̱xpátri̱gi̱in xa̱bo̱ gáꞌne».*

Nu̱xi̱ꞌnée̱ ído̱ tsíñúu̱ gúdxawíi̱n ajngóo Ana̱ꞌlóꞌ. Ikhaa máꞌ rúꞌkhue̱n ñajuun rí niꞌgí-mina̱ꞌ Ana̱ꞌlóꞌ rí ma̱gíꞌníi̱.

9 Xómáꞌ ikháanꞌlaꞌ ñajwanlaꞌ xa̱bo̱ tsí niraꞌwíin Ana̱ꞌlóꞌ, dxakuun tsí nu̱ñajun ná inuu Thúngaa Mikhuíí, mbá numbaa ná júwa̱ꞌ xa̱bo̱ tsí jaꞌwuun, jamí xa̱bo̱ xuajñuu Ana̱ꞌlóꞌ ñajwanlaꞌ. Ana̱ꞌlóꞌ nindxaꞌwálaꞌ rí ma̱ga̱jnáaꞌlaꞌ ná mijína kajngó ma̱mbiꞌyalaꞌ aguu̱ rí phú mitsaan, jamí mu̱tha̱nlaꞌ rí phú wáá naꞌnii̱. 10 Rí nákhí wajyúú, tánindxa̱ꞌlaꞌ xa̱bo̱ xuajñuu Ana̱ꞌlóꞌ, xómáꞌ xúge̱ꞌ rá, xa̱bo̱ xuajñuu Ana̱ꞌlóꞌ ñajwanlaꞌ. Rí nákhí wajyúú, ndawa̱a̱ tsí niñáwíin a̱kui̱in jaꞌyalaꞌ, xómáꞌ xúge̱ꞌ rá, niñáwíin a̱kui̱in Ana̱ꞌlóꞌ jaꞌyalaꞌ.

11 A̱ngui̱nꞌ, tsáanꞌ phú nandoꞌ ja̱ya̱ꞌlaꞌ, na̱tha̱n-jáñalaꞌ xómá xa̱bo̱ tsí ra̱ꞌkhá xuajñúú ñajuun numbaa ríge̱ꞌ jamí xa̱bo̱ tsí nagóó-ranújngúún, rí mu̱xúne̱laꞌ rí nandoo xuyalaꞌ, numuu rí rúꞌkhue̱n na̱tsa̱ñu̱u̱ꞌ ga̱jma̱á nímia̱ꞌlaꞌ. 12 Máján gájuwalaꞌ ná majñu̱ú xa̱bo̱ tsí tsíne̱-nuwiin Ana̱ꞌlóꞌ. Xkuaꞌnii kajngó mbuyáa̱ rí máján nu̱ne̱laꞌ jamí mune̱-mba̱a̱ Ana̱ꞌlóꞌ ído̱ rí maxúꞌdaa̱ awan ga̱jma̱á numúú mbá xúgíin xa̱bo̱, maske máꞌ ikhii̱n nuthee̱n rí xkawe̱ꞌ e̱ne̱laꞌ rí xúge̱ꞌ.

13 Ga̱jma̱á numuu rí ndu̱ya̱-makuíílaꞌ Táta̱, gu̱ni̱ꞌñá-mijnálaꞌ rí muxna-ñajwanlaꞌ mbá xúgíin xa̱bo̱ ñajun: thúngaa, numuu rí ikhaa̱ jayée̱ idxu̱u̱ xuajen, 14 xa̱bo̱ ñajun tsí niskuíji̱in thúngaa, numuu rí ikhii̱n júwe̱e̱ꞌ kajngó mu̱drígú jamínu̱ꞌ xa̱bo̱ tsí nune̱ rí xkawe̱ꞌ jamí muthee̱n rí máján ga̱jma̱á numúú tsí nune̱ rí máján. 15 Numuu rí Ana̱ꞌlóꞌ nandoo rí mu̱ne̱laꞌ rí máján kajngó ma̱ꞌne-wíyuu rawúún tsí tsífruꞌu̱ún jamí júgoo inúú. 16 Ga̱juwalaꞌ xómá xa̱bo̱ tsí na̱nguá nithán-ñájúún, i̱ndo̱ó máꞌ numuu rí mu̱xúne̱-tsu̱di̱ílaꞌ rí ndawa̱a̱ tsí iꞌthán-ñajwanlaꞌ kajngó ma̱goo mu̱ne̱laꞌ rí xkawe̱ꞌ, rí ga̱juwalaꞌ xómá yumbée Ana̱ꞌlóꞌ. 17 Gu̱ya̱-makúúnlaꞌ mbá xúgíin xa̱bo̱. Ga̱galaꞌ ju̱ñu̱ú xa̱bi̱i Ana̱ꞌlóꞌ. Ga̱mi̱ꞌñálaꞌ ju̱ya̱á Ana̱ꞌlóꞌ. Gu̱ya̱-makuíílaꞌ thúngaa.

18 Ikháanꞌlaꞌ, yumbáá tsí nu̱ñajunlaꞌ guꞌwáá, gu̱ya̱-makúúnlaꞌ tsí ñajúún ña̱ꞌñalaꞌ. Gu̱ya̱-makúu̱nlaꞌ, ra̱ꞌkhá máꞌ i̱ndo̱ó tsí májáan a̱kui̱ín jamí gamakuun, rí asndo tsí xkawi̱i̱ꞌ máꞌ a̱kui̱ín mangaa. 19 Numuu rí mbá rí máján ñajuun ná inuu Ana̱ꞌlóꞌ xí mbáa tsí nda̱a̱ aꞌkhúun na̱ꞌngo̱o̱ a̱kui̱in namínu̱u̱ꞌ, maske máꞌ ndaꞌyoo̱ mújúu̱n rí naꞌnii̱ rí nandoo Ana̱ꞌlóꞌ. 20 Xí mbáa na̱ꞌngo̱o̱ a̱kui̱in mamínu̱u̱ꞌ ga̱jma̱á numuu rí ra̱máján neꞌne, náá lá rí phú wáá rúꞌkhue̱n rá. Jamí xí mbáa na̱ꞌngo̱o̱ a̱kui̱in mamínu̱u̱ꞌ ga̱jma̱á numuu rí naꞌne rí máján rá, rúꞌkhue̱n rí máján ná inuu Ana̱ꞌlóꞌ. 21 Ikhaa máꞌ numuu rúꞌkhue̱n nindxaꞌwálaꞌ Ana̱ꞌlóꞌ, numuu rí nimínu̱u̱ꞌ máꞌ Krísto̱ mangaa ga̱jma̱á numalaꞌ. Xkuaꞌnii niꞌgíi̱ mbá xkri̱da rí mbu̱ya̱-ri̱dáálaꞌ kajngó xkuaꞌnii máꞌ gúne̱ mangáanꞌlaꞌ.

22 «Ikhaa̱ táꞌnii̱ nimbá aꞌkhán,

jamí ni miꞌtsú táꞌthée̱n rí mi̱nduwa».*

23 Nákhí rí Krísto̱ nithán-xkawíi̱ꞌ ene̱ xa̱bo̱, ikhaa̱ táriꞌñúu̱ ga̱jma̱á ajngáa xkawe̱ꞌ. Nákhí rí xtáa̱ namínu̱u̱ꞌ, tsíꞌne-míñúu̱ xa̱bo̱ rí mu̱míníi̱ ga̱jma̱á numuu rí nuñíi̱, a̱ꞌkhue̱n gakon niniña-mine̱e̱ꞌ ná ñawúun Ana̱ꞌlóꞌ tsí naxudaa mújúun awan ga̱jma̱á numúú xa̱bo̱. 24 Jmína̱a̱ꞌ máꞌ Krísto̱ ni̱ka̱ jagu̱u̱ aꞌkhánlóꞌ ná inuu ixe̱ krúsi̱, kajngó náxájuwalóꞌ rí mu̱ꞌne̱lóꞌ aꞌkhán, rí ma̱juwalóꞌ rí mu̱ꞌne̱lóꞌ rí máján. Krísto̱ ni̱gu̱ma-jámbi̱yíi̱ꞌ kajngó ikháanꞌlaꞌ ma̱ꞌni̱i a̱kia̱nꞌlaꞌ. 25 Numuu rí ikháanꞌlaꞌ ninindxa̱ꞌlaꞌ xómá xu̱kú mogo̱ tsí ni̱ngra̱ꞌiin jamba̱a̱. Xómáꞌ xúge̱ꞌ rá, niguwa̱aꞌlaꞌ inuu tsí na̱ña̱wa̱nꞌlaꞌ, ikhaa máꞌ tsí nayaxe̱-ra̱ꞌmúu mbiꞌyalaꞌ.