1 A̱ngui̱nꞌ, nákhí xúꞌkhue̱n ra̱khóo rí ma̱tha̱nꞌlaꞌ xómá xa̱bo̱ tsí xtáa Xu̱u̱ꞌ Ana̱ꞌlóꞌ ga̱jma̱á nindxu̱ún, rí ni̱tha̱nꞌlaꞌ xómá xa̱bo̱ tsí nune̱ rí nandúún máꞌ ikhiin, asndo xómá e̱je̱n ná inuu Krísto̱. 2 Ni̱xna̱ꞌlaꞌ gisngáá rí na̱nguá mingíjyúu, ikhaa rí xómá yaꞌdú jaꞌnii. Ra̱ꞌkhá gisngáá rí mingíjyúu ni̱xna̱ꞌlaꞌ, ikhaa rí xómá guma jaꞌnii, numuu rí xóó máꞌ tsíjmáaꞌlaꞌ gúpholaꞌ ne̱, ni máꞌ xóó tsíjmáaꞌlaꞌ xúge̱ꞌ. 3 Numuu rí xóó máꞌ nu̱ne̱laꞌ rí nune̱ xa̱bo̱ ná numbaa ríge̱ꞌ: naxígua̱ꞌlaꞌ, na̱tsa̱ña̱ꞌlaꞌ jamí nu̱xna̱-mijnálaꞌ. Á ra̱ꞌkhá nu̱ne̱laꞌ rí nune̱ xa̱bo̱ ná numbaa ríge̱ꞌ, jamí juwalaꞌ xómá júwa̱ꞌ i̱ꞌwíin xa̱bo̱ numbaa rí xkuaꞌnii rá. 4 Ído̱ rí mbáa naꞌthán: «Ikhúúnꞌ ñajunꞌ xa̱bi̱i Páblo̱», jamí i̱mba̱a̱ꞌ naꞌthán: «Ikhúúnꞌ ñajunꞌ xa̱bi̱i Apólo̱s», rúꞌkhue̱n iꞌthán rí xa̱bo̱ tsí nune̱ xómá nune̱ xa̱bo̱ ná numbaa ríge̱ꞌ ñajwanlaꞌ.

5 Ikhaa jngó, tsáa ñajuun Páblo̱ jamí Apólo̱s rá. I̱ndo̱ó máꞌ yumbée Ana̱ꞌlóꞌ ñajwanxo̱ꞌ, tsí ni̱mbáyálaꞌ rí ma̱nimba̱ꞌlaꞌ ju̱ya̱á Krísto̱. Jamí mbámbáa tsí ikháanꞌxo̱ꞌ neꞌne-mbánuu ñajun rí nijanáá ma̱ꞌne neꞌne Táta̱. 6 Ikhúúnꞌ ni̱dulo̱ꞌ, jamí Apólo̱s ni̱rmu̱juun, xómáꞌ Ana̱ꞌlóꞌ neꞌne rí ma̱gaja̱a̱. 7 Ikhaa jngó, nda̱a̱ máꞌ rí ñajuun tsí naꞌdu, ni máꞌ tsí na̱rmu̱juun. I̱ndo̱ó máꞌ Ana̱ꞌlóꞌ, tsí naꞌne rí ma̱gaja̱a̱, tsúꞌkhue̱n tsí phú gíꞌdoo numuu. 8 Mbéꞌtháán máꞌ gíꞌdoo numuu tsí naꞌdu ga̱jma̱á tsí na̱rmu̱juun, i̱ndo̱ó máꞌ numuu rí mbámbáa ma̱grui̱gúu gamaku xómá jaꞌyoo ñajun rí niꞌnii̱. 9 Numuu rí ikháanꞌxo̱ꞌ nu̱ñajunxo̱ꞌ ná inuu Ana̱ꞌlóꞌ, jamí ikháanꞌlaꞌ ñajwanlaꞌ xómá mbaa rí naꞌdu Ana̱ꞌlóꞌ, jamí xómá guꞌwá rí naꞌne Ana̱ꞌlóꞌ.

10 Ikhúúnꞌ ni̱ꞌgí nakhúu guꞌwá rúꞌkhue̱n, ga̱jma̱á numuu rí phú májáan a̱kui̱in Ana̱ꞌlóꞌ ga̱jma̱á nindxu̱ꞌ, niꞌnii̱ rí ikhúúnꞌ ma̱nindxu̱ꞌ xómá xa̱bo̱ tsí phú na̱ma̱ñuu naꞌne guꞌwá, jamí i̱mba̱a̱ꞌ na̱ka̱-rakúxe̱ ná tsu̱du̱u̱ ne̱. I̱ndo̱ó máꞌ numuu rí mbámbáa gáꞌyoo xáne i̱ka̱-rakúxe̱ ná tsu̱du̱u̱ ne̱. 11 Numuu rí nimbáa ma̱xáxóo maꞌgí i̱mba̱ nakhúu, mixtiꞌkhu xó rí ꞌgí máꞌ. Nakhúu rí ꞌgí máꞌ ñajuun Jesukrísto̱. 12 Mbáa ma̱goo makúxe̱ ná tsu̱du̱u̱ nakhúu ríge̱ꞌ ga̱jma̱á ajwa̱nꞌ mo̱jmo̱ꞌ, ajwa̱nꞌ miꞌxá jamí itsí mitsaan, o ga̱jma̱á ixe̱, ra̱xa̱, o xto̱o̱ ska mbo̱ꞌ. 13 Ma̱kujma máꞌ xáne jaꞌnii ñajun rí neꞌne mbámbáa ído̱ gága̱nú mbiꞌi rí ma̱mba̱núu numuu ne̱ ga̱jma̱á agu. A̱ꞌkhue̱n ma̱kujma xáne jaꞌnii ñajun rí neꞌne mbámbáa, numuu rí ma̱nújngoo ne̱ ná awúun agu. 14 Xí tsíkha ñajun rí neꞌne mbáa tsí ni̱ka̱-rakúxe̱, a̱ꞌkhue̱n ma̱grui̱gúu̱ gamaku. 15 Jamí xí nakha ñajun rí neꞌne mbáa gáꞌne agu rá, phú mba̱a̱ ma̱ndáti̱go̱o̱. I̱ndo̱ó máꞌ ikhaa̱ ma̱jríya̱a̱ꞌ, xómá xa̱bo̱ tsí ga̱jma̱á kháan najríya̱a̱ꞌ ná awúun agu.

16 Ndu̱ya̱á májánlaꞌ máꞌ rí ikháanꞌlaꞌ ñajwanlaꞌ xómá guꞌwóo Ana̱ꞌlóꞌ, jamí Xu̱u̱ꞌ Ana̱ꞌlóꞌ xtáa ga̱jma̱á nindxa̱ꞌlaꞌ. 17 Xí mbáa naꞌne-gámba̱a la guꞌwóo Ana̱ꞌlóꞌ, Ana̱ꞌlóꞌ ma̱ꞌne-gámba̱a̱ tsúꞌkhue̱n. Numuu rí guꞌwóo Ana̱ꞌlóꞌ, rí ñajwanlaꞌ ikháanꞌlaꞌ, i̱ndo̱ó máꞌ Ana̱ꞌlóꞌ jaꞌyoo ne̱.

18 Nimbáa ma̱xáꞌne-nduwa-mina̱ꞌ. Xí mbáa na̱ju̱mu̱u̱ rí phú na̱ma̱ñuu ná numbaa ríge̱ꞌ, ga̱ꞌne-mine̱e̱ꞌ xómá xa̱bo̱ tsí tsíma̱ñuu mbá jayu, kajngó ma̱nindxu̱u̱ xa̱bo̱ tsí phú gakon rí na̱ma̱ñuu. 19 Numuu rí xa̱bo̱ tsí na̱ju̱mu̱ú rí phú na̱ma̱ñúú ná numbaa ríge̱ꞌ, najmiñúú tsúꞌkhue̱n ná inuu Ana̱ꞌlóꞌ. Xómá ka̱ma naꞌthán ná i̱yi̱i̱ꞌ ajngóo Ana̱ꞌlóꞌ: «Ana̱ꞌlóꞌ naguatuun xa̱bo̱ tsí na̱ju̱mu̱ú rí phú na̱ma̱ñúú ga̱jma̱á majñu̱u̱ rí na̱ma̱ñúu̱ máꞌ ikhii̱n».* 20 Jamí xáꞌnii ka̱ma naꞌthán ná i̱yi̱i̱ꞌ ajngóo Ana̱ꞌlóꞌ mangaa: «Táta̱ ndaꞌyoo rí nda̱a̱ mbá jayu numuu rí nu̱ndxa̱ꞌwa̱-mijná xa̱bo̱ tsí na̱ju̱mu̱ú rí phú na̱ma̱ñúú».* 21 Ikhaa jngó, nimbáa ma̱xákúxe̱-mina̱ꞌ ga̱jma̱á numúú xa̱bo̱ numbaa tsí nusngáá. Numuu rí ikháanꞌlaꞌ máꞌ jaꞌyalaꞌ mbá xúgíí: 22 ga̱nindxu̱u̱ Páblo̱, Apólo̱s, Pédro̱.* Ga̱nindxu̱u̱ numbaa, ga̱ꞌne rí juwalaꞌ ndu̱ya̱laꞌ, ga̱ꞌne rí ma̱ja̱ñálaꞌ, ga̱ꞌne rí ríga̱ xúge̱ꞌ, ga̱ꞌne rí ni̱kú máꞌ ma̱ri̱gá, mbá xúgíí jaꞌyalaꞌ ikháanꞌlaꞌ. 23 Jamí ikháanꞌlaꞌ ñajwanlaꞌ xa̱bi̱i Krísto̱, jamí Krísto̱ ñajuun xa̱bi̱i Ana̱ꞌlóꞌ.