2 Timotéo̱ 1

Páblo̱ narígu̱u la gamaku inuu Ana̱ꞌlóꞌ

3 Mbámbá mbiꞌi na̱rmáꞌáan a̱kui̱nꞌ ja̱ya̱a̱ꞌ ído̱ rí na̱tha̱n-jáñuu Ana̱ꞌlóꞌ, mbiꞌíí mbruꞌwíín na̱rígu̱u gamaku ná inuu Ana̱ꞌlóꞌ ga̱jma̱á numaaꞌ. Ikhúúnꞌ jaꞌwu a̱kui̱nꞌ na̱ñajun ná inuu Ana̱ꞌlóꞌ xómá rí nene̱ táta̱-xi̱ꞌñúꞌ wajyúú. 4 Ído̱ na̱rmáꞌáan a̱kui̱nꞌ rí ni̱ta̱mbi̱ya̱ꞌ nákhí rí ni̱ꞌthángoo-mijnálóꞌ, naꞌne a̱kui̱nꞌ rí mba̱ya̱a̱ꞌ mbu̱júꞌ kajngó ma̱jni̱í rí gagi ná awúun a̱kui̱nꞌ gátha̱ne̱. 5 Na̱rmáꞌáan a̱kui̱nꞌ rí phú gakon rí wéje̱ a̱kia̱anꞌ ná inuu Ana̱ꞌlóꞌ, xómá rí ginii jayu ni̱we̱je̱ a̱kui̱in nána̱ xíñaaꞌ Lóida̱ ga̱jma̱á nániáaꞌ Euníse̱. Ikhaa jngó naꞌne jañii a̱kui̱nꞌ rí xkuaꞌnii máꞌ wéje̱ a̱kia̱anꞌ mangáánꞌ.