2 Timotéo̱ 3

Xáne jaꞌñúú xa̱bo̱ gáꞌne ído̱ rí na̱ka̱-rayámba̱ numbaa

1 Gíꞌmaa máꞌ rí ma̱tha̱ya̱á ríge̱ꞌ mangaa: rí awúun mbiꞌi rí na̱ka̱-rayámba̱ numbaa, maphú gakhe̱ gáꞌne. 2 Numuu rí ma̱ju̱wá xa̱bo̱ tsí naxná-gajmiéjúún juya-mijná i̱ndo̱ó máꞌ ikhiin, tsí na̱ni̱gu̱ún mu̱guaꞌdáá mi̱ndaꞌkho, tsí nune̱-tsiꞌyá, tsí nu̱xu̱xí-mijná, tsí nuthan xkawe̱ꞌ numuu Ana̱ꞌlóꞌ, tsí najñaguun inuu anu̱ú, tsí tsíthan núma̱aꞌ la, tsí tsíne̱-mba̱a̱ Ana̱ꞌlóꞌ, 3 tsí na̱nguá iñáwíin a̱kui̱ín ene̱ xa̱bo̱, tsí na̱nguá ene̱ mba̱a̱ a̱kui̱ín, tsí nune̱-xuxtaa ga̱jma̱á numúú xa̱bo̱, tsí tsíyoo gúni̱ꞌñáá rí nune̱ rí xkawe̱ꞌ, tsí nune̱ rí mu̱míni̱í xa̱bo̱, tsí na̱nguá i̱ni̱gu̱ún rí máján. 4 Ma̱ju̱wá xa̱bo̱ tsí mu̱xna̱xíin a̱ngui̱ín, tsí na̱nguá i̱ndxa̱ꞌwa̱-mijná rí mune̱, tsí na̱ju̱mu̱ú rí phú gíꞌdoo numúú, tsí i̱tha̱án máꞌ na̱ni̱gu̱ún mune̱ rí nandúún ikhiin xó rí nandoo Ana̱ꞌlóꞌ. 5 Muthee̱n rí nune̱-mba̱a̱ Ana̱ꞌlóꞌ, xómáꞌ rí nuni̱i̱ masngájma rí na̱nguá gakon rí nuthee̱n. Ikhaa jngó ma̱xámbáxa̱a̱ꞌ gajmiáaꞌ xa̱bo̱ tsí xkuaꞌnii jaꞌñúú.