1 A̱ngui̱nꞌ, ríga̱ i̱mba̱ rí nandaxo̱ꞌ mu̱tha̱nꞌlaꞌ: gu̱tha̱n-jáñíílaꞌ Ana̱ꞌlóꞌ ga̱jma̱á numaxo̱ꞌ, kajngó ma̱dróꞌoo nacha̱ ajngóo Táta̱ ná i̱ꞌwá janíí jamí mu̱dri̱gú ne̱ xa̱bo̱ ga̱jma̱á gamaku, xómá rí ni̱drígúlaꞌ ne̱ ikháanꞌlaꞌ ga̱jma̱á gamaku. 2 Xúꞌkhue̱n máꞌ gu̱tha̱n-jáñíílaꞌ Ana̱ꞌlóꞌ rí ma̱ꞌne-jáwiáanꞌlóꞌ ná inúú xa̱bo̱ tsí ra̱májíin, numuu rí ra̱ꞌkhá mbá xúgíin xa̱bo̱ wéje̱ a̱kui̱ín ná inuu Jesukrísto̱. 3 I̱ndo̱ó máꞌ numuu rí jmbii Táta̱, ikhaa jngó ma̱ꞌnii̱ rí ma̱wajún-gúkuálaꞌ jamí ma̱ña̱wa̱nꞌlaꞌ inuu tsí ra̱májáan. 4 Jamí naꞌne jañii a̱kia̱nꞌxo̱ꞌ ná inuu Táta̱ rí ikháanꞌlaꞌ nu̱ne̱-mbáníílaꞌ máꞌ jamí mu̱ne̱-mbáníílaꞌ xóó rí ni̱xna̱-ñájwanlaꞌxo̱ꞌ. 5 Táta̱ Jesús gáꞌne rí ma̱ma̱ñalaꞌ rí ma̱galaꞌ ju̱ya̱-mijnálaꞌ xómá rí nandoo Ana̱ꞌlóꞌ jaꞌyalóꞌ, xúꞌkhue̱n máꞌ ga̱ꞌnii̱ rí ma̱ꞌngo̱o̱ a̱kia̱nꞌlaꞌ ná inuu jamínu̱ꞌ, xómá rí ni̱ꞌngo̱o̱ a̱kui̱in Krísto̱ ná inuu jamínu̱ꞌ.

6 A̱ngui̱nꞌ, ga̱jma̱á máꞌ numuu Tátiálóꞌ Jesukrísto̱ nu̱xna̱-ñájwanlaꞌxo̱ꞌ rí gu̱ne̱-janíí-mijnálaꞌ inuu jámba̱a̱ dxájwalóꞌ tsí ngrigo̱o̱ꞌ naskoo, jamí na̱nguá xtáa xómá naꞌthán gisngáá rí ni̱sngálaꞌxo̱ꞌ. 7 Numuu rí jmínáaꞌ máꞌ ikháanꞌlaꞌ ndu̱ya̱álaꞌ xáne jaꞌyoo ma̱juwalaꞌ kajngó mbu̱ya̱-ri̱dalaꞌxo̱ꞌ. Ikháanꞌxo̱ꞌ táꞌskaxo̱ꞌ nákhí nijuwaxo̱ꞌ ná majña̱ꞌlaꞌ, 8 ni máꞌ tóphóxo̱ꞌ xúgi̱í gaꞌwuun nimbáa. A̱ꞌkhue̱n gakon, ni̱ñajunxo̱ꞌ mi̱ndaꞌkho mbiꞌíí mbruꞌwíín jamí neꞌne níꞌnga̱ꞌxo̱ꞌ, kajngó mu̱xúne̱-gajmááxo̱ꞌ nimbáa tsí ikháanꞌlaꞌ ga̱jma̱á numuu rí ndaꞌyáxo̱ꞌ. 9 Ra̱ꞌkhá máꞌ numuu rí ra̱jáꞌyaxo̱ꞌ rí mu̱xníꞌtsaxo̱ꞌ, rí ndiyaxo̱ꞌ rí jmínáaꞌ máꞌ ikháanꞌxo̱ꞌ mu̱xna̱ꞌlaꞌ mbá xkri̱da kajngó mbu̱ya̱álaꞌ xáne jaꞌyoo ma̱juwalaꞌ. 10 Numuu rí nákhí juwaxo̱ꞌ a̱ꞌkhue̱n ga̱jma̱á nindxa̱ꞌlaꞌ, nu̱xna̱-ñájwanlaꞌxo̱ꞌ ríge̱ꞌ: «Xí mbáa tsíyoo gáñajun, ma̱xákuiꞌtsii̱ máꞌ mangaa».

11 Numuu rí nu̱dxawíínxo̱ꞌ rí mbá tikhuun tsí júwa̱ꞌ ná majña̱ꞌlaꞌ a̱ꞌkhue̱n, ngrigúu̱n naskúu̱n jamí tsíni̱i̱ nimbá ñajun, rí ngrigúu̱n nu̱xu̱ꞌdá-mijnée̱ ná gajmá rí jáꞌñúú i̱ꞌwíin. 12 Ikhiin xa̱bo̱ tsúꞌkhue̱n nu̱tha̱n-múꞌúúnxo̱ꞌ jamí nu̱xprígúúnxo̱ꞌ ga̱jma̱á numuu Tátiálóꞌ Jesukrísto̱, rí i̱ndo̱ó máꞌ gu̱ꞌgí-mijée̱ rí mu̱ñajwii̱n, kajngó mu̱guaꞌdáa̱ rí mu̱phi̱i̱. 13 Xómáꞌ ikháanꞌlaꞌ rá, a̱ngui̱nꞌ, ma̱xáꞌne níꞌnga̱ꞌlaꞌ rí nu̱ne̱laꞌ rí máján.

14 Xí mbáa tsíꞌne-mbánuu rí nu̱tha̱nxo̱ꞌ ga̱jma̱á majñu̱u̱ i̱yi̱i̱ꞌ ríge̱ꞌ, gu̱ya̱á májánlaꞌ tsáa ñajuu̱n, jamí ma̱xámbáxa̱ꞌlaꞌ ga̱jma̱á nindxu̱u̱, kajngó ma̱ti̱yu̱u̱ꞌ. 15 I̱ndo̱ó máꞌ numuu rí mu̱xúguaꞌdaa̱laꞌ xómá xa̱bo̱ sia̱nꞌ dríga̱ꞌlaꞌ, rí gu̱xpríguíi̱laꞌ xómá dxájwalóꞌ.

16 Jamí jmína̱a̱ꞌ máꞌ Táta̱ tsí naꞌne rí ma̱juwalóꞌ tsímáá, jámba̱ miꞌtsú gáxnálaꞌ rí tsímáá jamí asndo náá máꞌ rí naríga̱. Táta̱ gáxtáa ga̱jma̱á nindxa̱ꞌ mbá xúgiáanꞌlaꞌ.

17 Jmínu̱úꞌ ikhúúnꞌ, Páblo̱, na̱tháán ga̱jma̱á ñawúnꞌ rí na̱ra̱xáanꞌlaꞌ. Xkuaꞌnii na̱xnu̱u̱ ñawúnꞌ ikhúúnꞌ ná mbá xúgíí i̱yi̱i̱ꞌ rí na̱tháánlo̱ꞌ.

18 Tátiálóꞌ Jesukrísto̱ gáꞌne-tsakun-rámáaꞌlaꞌ mbá xúgiáanꞌlaꞌ. Xkuaꞌnii gáꞌne.*