Xa̱bo̱ Kolósa̱s 1

12 Xkuaꞌnii kajngó gagi a̱kia̱nꞌlaꞌ gúrígu̱ulaꞌ gamaku inuu Ana̱ꞌlóꞌ, numuu rí ikhaa̱ niꞌnii̱ rí ma̱goo mu̱drígú mangáanꞌlaꞌ rí maxnúu̱ xa̱bii̱ tsí júwa̱ꞌ ga̱jma̱á aguu rí gakon. 13 Ana̱ꞌlóꞌ ni̱gu̱wiáanꞌlóꞌ ná ñawúun tsí ra̱májáan, jamí ni̱kaa̱ jaguáa̱nꞌlóꞌ rí maꞌthán-ñájwanlóꞌ A̱dée̱ tsí phú nandoo̱ jaꞌyoo̱. 14 Ga̱jma̱á numuu̱ ikhaa̱ waꞌtse̱-ri̱ñáaꞌlóꞌ numuu rí nijáñuu̱,*1.14 Ríga̱ mbá tikhu i̱yi̱i̱ꞌ griégo̱ rí wayuu ná na̱nguá i̱ꞌkha̱ ajngáa ríge̱ꞌ: «numuu rí nijáñuu̱». xkuaꞌnii neꞌne mba̱a̱ a̱kui̱in Ana̱ꞌlóꞌ jaꞌyoo aꞌkhánlóꞌ.

I̱wa̱á gíꞌdoo numuu Krísto̱ inuu mbá xúgíí

15 Ga̱jma̱á majñu̱u̱ Krísto̱ nakujma xómá jaꞌnii jayu Ana̱ꞌlóꞌ, tsí na̱nguá iyoo mbu̱ꞌyáálóꞌ ga̱jma̱á idalóꞌ.

Ikhaa̱ xtáa̱ máꞌ nákhí xóó tágu̱ma-ku̱maa numbaa.

16 Ga̱jma̱á majñu̱u̱ ikhaa̱ ni̱gu̱ma-ku̱maa mbá xúgíí rí ríga̱,

ná mikhuíí jamí ná numbaa,

rí nakujma jamí rí tsíkujma mbu̱ꞌyáálóꞌ.

Ga̱nindxúu̱n thúngaa, xa̱bo̱ ñajun, xa̱bo̱ ede̱ o xe̱ꞌ tsí nuthan-ñajun mbo̱ꞌ.

Mbá xúgíí ni̱gu̱ma-ku̱maa ga̱jma̱á ski̱yu̱u̱ꞌ,

jamí drígo̱o̱ máꞌ ikhaa̱ ñajuun ne̱.

17 Xtáa̱ máꞌ ikhaa̱ nákhí rí ni̱gu̱ma-ku̱maa numbaa,

jamí ga̱jma̱á ski̱yu̱u̱ꞌ ikhaa̱ mbá xúgíí ne̱ ríga̱ mújúun.