1 Nandoꞌ rí ma̱gi̱da̱ꞌ idxa̱ꞌlaꞌ ríge̱ꞌ: phú gakhe̱ na̱ñajunlo̱ꞌ ga̱jma̱á numalaꞌ jamí ga̱jma̱á numúú tsí júwa̱ꞌ ná xuajen Laodiséa̱, xúꞌkhue̱n máꞌ ga̱jma̱á numúú i̱ꞌwíin tsí tsíne̱-nuwúúnlo̱ꞌ. 2 Na̱ñajun kajngó mbayáa la tsiakhe̱ a̱kia̱nꞌlaꞌ, xúꞌkhue̱n máꞌ ma̱juwalaꞌ mbá ꞌnduꞌ numuu rí nandalaꞌ ju̱ya̱-mijnálaꞌ, jamí asndo ma̱fraꞌa̱ꞌ májánlaꞌ mbá xúgíí rí ndaꞌyóo ma̱ma̱ñalaꞌ. Xkuaꞌnii kajngó mu̱ne̱-nuwiinlaꞌ awan drígo̱o̱ Ana̱ꞌlóꞌ rí i̱ndo̱ó máꞌ ikhaa̱ ni̱gi̱da̱ꞌ idxu̱u̱ nákhí wajyúú, tsí ñajuun máꞌ jmína̱a̱ꞌ Krísto̱. 3 Numuu rí mbá xúgíí rí gíꞌdoo guéño numuu rí ma̱ma̱ñalaꞌ jamí mbu̱ya̱álaꞌ, ríga̱ ngu̱ꞌwo̱o̱ ne̱ ga̱jma̱á nindxu̱u̱ Krísto̱. 4 Na̱tha̱nꞌlaꞌ ríge̱ꞌ kajngó nimbáa ma̱xáꞌne-nduwáanꞌlaꞌ ga̱jma̱á ajngáa mi̱nduwa rí mitsaan iwán. 5 Maske máꞌ na̱nguá xtáá a̱ꞌkhue̱n ga̱jma̱á nindxa̱ꞌlaꞌ, xtáá ga̱jma̱á majñu̱u̱ a̱kui̱nꞌ, jamí phú nadxu a̱kui̱nꞌ ído̱ na̱dxawuun rí mitsaan juwalaꞌ jamí rí wéje̱-gúkúu a̱kia̱nꞌlaꞌ ná inuu Krísto̱.

6 Ikháanꞌlaꞌ ni̱dríguíilaꞌ máꞌ Táta̱ Jesukrísto̱, ikhaa numuu rúꞌkhue̱n, ga̱juwalaꞌ xómá rí nandoo̱ ikhaa̱. 7 Ga̱wajún-gúkuálaꞌ jamí a̱gajáanꞌlaꞌ máꞌ xúꞌkhue̱n, xúꞌkhue̱n máꞌ mu̱xúni̱ꞌñáá-ranimba̱ꞌlaꞌ ju̱ya̱á rí niꞌsngáá Krísto̱ xómáꞌ rí waꞌsngálaꞌ. Gu̱rígu̱ulaꞌ máꞌ xúꞌkhue̱n gamaku inuu Ana̱ꞌlóꞌ.

8 Gu̱ña̱wa̱n-míjnálaꞌ inúú xa̱bo̱ tsí nandúún gúne̱-nduwáanꞌlaꞌ ga̱jma̱á ju̱mu̱ú xa̱bo̱ jamí ga̱jma̱á ajngáa michú rí mitsaan iwán. Numuu rí ikhii̱n nusngáa̱ rí mu̱ꞌne̱lóꞌ xómá rí nune̱ jayu xa̱bo̱ numbaa jamí gíñá ꞌguéen tsí nuthan-ñajun ná numbaa, jamí tsísngáa̱ rí mu̱ꞌne̱lóꞌ rí niꞌsngáá Krísto̱.

9 Numuu rí Krísto̱ ñajuun mbá xúgíí jayu rí ñajuun Ana̱ꞌlóꞌ. 10 Xómáꞌ ikháanꞌlaꞌ, káxáanꞌlaꞌ máꞌ ga̱jma̱á nindxu̱u̱ Krísto̱, numuu rí ikhaa̱ naꞌthán-ñájúu̱n mbá xúgíin xe̱ꞌ tsí nuthan-ñajun jamí mbá xúgíí tsiakhe̱. 11 Xúꞌkhue̱n máꞌ mangaa, ga̱jma̱á majñu̱u̱ ikhaa̱ ndi̱ya̱laꞌ tsina jndi. Ra̱ꞌkhá tsina jndi rí na̱gu̱ma ná xuyuu xa̱bo̱ ñajuun ríge̱ꞌ, rí tsina jndi ná ni̱ga̱taa rí na̱wa̱ꞌa̱ a̱kia̱nꞌlóꞌ rí mu̱ꞌne̱lóꞌ aꞌkhán ñajuun ne̱, jamí jmína̱a̱ꞌ máꞌ Krísto̱ nixnálaꞌ ne̱. 12 Ikháanꞌlaꞌ asndo xó rí waꞌdiáanꞌlaꞌ jaꞌnii nákhí rí waxúꞌdu-maꞌáanꞌlaꞌ ná awúun iya ga̱jma̱á numuu rí nanimba̱ꞌlaꞌ ju̱ya̱á Krísto̱. Xúꞌkhue̱n máꞌ mangaa, ndi̱ya̱a mbiꞌyalaꞌ ga̱jma̱á nindxu̱u̱ numuu rí ninimba̱ꞌlaꞌ ju̱ya̱á ski̱yu̱u̱ꞌ Ana̱ꞌlóꞌ, tsí neꞌne rí mbayáa̱ mbiꞌyuu̱.

13 Nákhí rí xóó túya̱laꞌ tsina jndi rúꞌkhue̱n, ikháanꞌlaꞌ asndo xó rí nijáñalaꞌ jaꞌnii ná inuu Ana̱ꞌlóꞌ ga̱jma̱á numuu aꞌkhánlaꞌ. Xómáꞌ xúge̱ꞌ rá, Ana̱ꞌlóꞌ neꞌne rí mbu̱ꞌyalóꞌ ga̱jma̱á nindxu̱u̱ Krísto̱ nákhí neꞌne mba̱a̱ a̱kuii̱n jaꞌyoo̱ mbá xúgíí aꞌkhánlóꞌ. 14 Numuu rí Ana̱ꞌlóꞌ nirngudi̱i i̱yi̱i̱ꞌ xtángoo rí naꞌne tsu̱da̱ꞌlóꞌ, rí naꞌthán rí gíꞌmáálóꞌ gidxóó. Ana̱ꞌlóꞌ nirngudi̱i gidxáwálóꞌ nákhí nindrákee̱ i̱yi̱i̱ꞌ gidxóó rúꞌkhue̱n ná ixe̱ krúsi̱. 15 Ana̱ꞌlóꞌ nirígúu ski̱ñu̱ú gíñá ꞌguéen jamí tsiakhe̱ ꞌguéen ga̱jma̱á majñu̱u̱ Krísto̱. Niríye̱e̱ꞌ gamakúún ná inúú xa̱bo̱ nákhí ni̱ꞌngo̱o̱ inúú ná ixe̱ krúsi̱.

16 Ikhaa jngó, ma̱xánimba̱ꞌlaꞌ xí mbáa xa̱bo̱ naꞌthánlaꞌ rí ra̱ꞌkhíin e̱ne̱laꞌ ga̱jma̱á numuu rí napholaꞌ o rí nawanlaꞌ, o numuu rí tsíne̱-ri̱ya̱aꞌlaꞌ ndxo̱o̱ go̱nꞌ nuxi̱i̱ꞌ o numuu rí tsíya̱-makuíílaꞌ mbiꞌi rí nduya̱a xu̱únꞌ xa̱bo̱ judío̱ mbo̱ꞌ. 17 Mbá xúgíí rúꞌkhue̱n ninindxu̱u̱ xtiꞌkhuu rí ni̱ꞌkha̱ nda̱wa̱á. Xómáꞌ tsí xtáa ñajuun Krísto̱. 18 Mu̱xúni̱ꞌñá-mijnálaꞌ rí muxna-maꞌáanꞌlaꞌ tsí nune̱ máꞌ ene̱ rí nu̱xrígú-mijná jamí nune̱-mbi̱in ánje̱l. Numuu rí ikhii̱n nuthee̱n ga̱jma̱á numuu rí ndiyáa̱ inu-mbiꞌíí, jamí nda̱a̱ jayu numuu rí nu̱xu̱xí-mijnée̱ ga̱jma̱á ju̱mu̱ú xa̱bo̱ numbaa. 19 Na̱nguá ku̱ra̱tun-mijnée̱ ga̱jma̱á nindxu̱u̱ Krísto̱, tsí ñajuun xa̱bo̱ Ede̱, tsí naxníꞌtsuu jamí naꞌne rí mu̱wa̱a mújúun mbá xúgíi xa̱bo̱, jamí naꞌnii̱ rí ma̱gaja̱a̱ xómá rí nandoo Ana̱ꞌlóꞌ.

20 Ikháanꞌlaꞌ nijáñalaꞌ ga̱jma̱á nindxu̱u̱ Krísto̱ jamí nijáwiáanꞌlaꞌ inúú mbá xúgíin tsiakhe̱ tsí nuthan-ñajun ná numbaa. Náá numuu kajngó rí xóó nu̱ni̱ꞌñá-mijnálaꞌ rí mi̱ꞌthán-ñájwanlaꞌ gáꞌne xtángoo ríge̱ꞌ róꞌ: 21 «Ma̱xátru̱gua̱ ríge̱ꞌ. Ma̱xéꞌtso rúꞌkhue̱n. Ma̱xáta̱xkajma rí ñúꞌún». 22 Gisngáá jamí xtángoo drígu̱ún xa̱bo̱ numbaa ñajuun rúꞌkhue̱n, jamí naꞌthán ne̱ ga̱jma̱á numuu rí ndámba̱ ído̱ rí najmaa. 23 Gakon máꞌ rí phú na̱ma̱ñúú xa̱bo̱ tsúꞌkhue̱n jaꞌnii ga̱jma̱á numuu xó rí nune̱-mba̱a̱ Ana̱ꞌlóꞌ, numuu rí nu̱xrígú-mijnée̱ jamí nuñíi̱ mi̱ndaꞌkho xuñúu̱. I̱ndo̱ó máꞌ numuu rí nda̱a̱ nitháan ski̱ñúu̱ꞌ rí ma̱wajún-ꞌthíi̱n aꞌkhán rí na̱ni̱gúu̱nꞌ muni̱i̱.