1 Rí mbá xúgíí rí naguwa ruꞌthánlóꞌ ñajuun ríge̱ꞌ: rí guaꞌdaalóꞌ mbáa tsí jayá idxu̱ún dxakuun tsí xkuaꞌnii, jamí ni̱gi̱ꞌi̱i̱ ná ñawún mújúun Ana̱ꞌlóꞌ ná mikhuíí. 2 Ikhaa̱ ñajuu̱n dxakuun ná awúun guꞌwá dxákuun drígo̱o̱ Ana̱ꞌlóꞌ rí phú ikhaa, rí tágu̱ma ga̱jma̱á ñawúún xa̱bo̱ numbaa, rí jmína̱a̱ꞌ máꞌ Ana̱ꞌlóꞌ nikúxe̱ ne̱.

3 Jámba̱a̱ tsí jayá idxu̱ún dxakuun ná numbaa ríge̱ꞌ, na̱gi̱ꞌi̱i̱ rí maxnáxi̱i̱ tsi̱gi̱jña̱ꞌ jamí xu̱kú tsí ma̱ja̱ñúú ná inuu Ana̱ꞌlóꞌ. Ikhaa jngó ndaꞌyóo rí Jesukrísto̱ ma̱gi̱ꞌdoo̱ tháan rí maxnáxi̱i̱ mangaa̱. 4 Xí ná numbaa ríge̱ꞌ xtáa̱ mangaa̱, ni ra̱ꞌkháa máꞌ dxakuun ñajuu̱n xúꞌkhue̱n rá, numuu rí júwa̱ꞌ máꞌ ná numbaa ríge̱ꞌ dxakuun tsí nu̱xna̱xí tsi̱gi̱jña̱ꞌ xómá naꞌthán xtángoo drígo̱o̱ Moisés. 5 Dxakuun tsí júwa̱ꞌ ná numbaa ríge̱ꞌ nu̱ñajun ná awúun xtiꞌkhuu jamí nákoo rí ríga̱ ná mikhuíí. Ga̱jma̱á numuu rúꞌkhue̱n waꞌtháán Moisés nákhí rí inu magíꞌdu̱u̱n ma̱ꞌnii̱ guꞌwá dxákuun xtíin: «A̱tia̱wa̱án lá rí ma̱tha̱ne̱ ne̱ xómá jaꞌnii xkri̱doo rí wasngájmaaꞌ ná inuu júba̱».* 6 Ikhaa jngó, i̱tha̱án máján ñajuun dxakuun rí naꞌne Jesús, xúꞌkhue̱n máꞌ naꞌthán-mbáa̱ numalóꞌ ná inuu Ana̱ꞌlóꞌ ga̱jma̱á majñu̱u̱ mbá awan rí i̱tha̱án máján, numuu rí gíꞌdoo nakhúu ne̱ ná tsu̱du̱u̱ rí i̱tha̱án máján nixuda-mina̱ꞌ Ana̱ꞌlóꞌ.

7 Xí numuu rí káxe̱ máꞌ awan rí nixná Ana̱ꞌlóꞌ nákhí rí ginii, ma̱xáꞌyóo máꞌ ma̱ꞌkha̱ i̱mba̱ awan xúꞌkhue̱n rá. 8 I̱ndo̱ó máꞌ numuu rí nákhí rí Ana̱ꞌlóꞌ niríñúú xa̱bo̱ Israél, xáꞌnii niꞌthúu̱n:

«Xáꞌnii iꞌthán Táta̱: Ma̱ga̱nú mbiꞌi

rí ma̱gúꞌdo̱ꞌ mbá awan nuxe̱ꞌ gajmíꞌ xa̱bi̱i Israél jamí xa̱bi̱i Judá.

9 Náxáꞌne xómá awan rí nigúꞌdo̱ꞌ gajmíꞌ táta̱-xi̱ꞌñálaꞌ wajyúú,

nákhí nimbáñúu̱ rí ma̱ga̱jnáa̱ ná Ejípto̱.

Numuu rí táta̱-xi̱ꞌñálaꞌ túne̱-mbáníi̱ awan rí nigúꞌdo̱ꞌ gajmíꞌ,

ikhaa jngó nánguá máꞌ nimakuꞌ mangúúnꞌ rí ma̱mbáñúu̱, xkuaꞌnii iꞌthán Táta̱.

10 Ikhaa numuu rúꞌkhue̱n, awan ríge̱ꞌ ma̱gúꞌdo̱ꞌ gajmíꞌ xa̱bi̱i Israél,

ído̱ gága̱nú mbiꞌi rúꞌkhue̱n, xkuaꞌnii iꞌthán Táta̱:

Ma̱gíwa̱nꞌ xtángoo drígo̱ꞌ ná awúun ju̱múu̱,

jamí ma̱tháán ne̱ ná awúun a̱kuíi̱n.

Ikhúúnꞌ ma̱nindxu̱ꞌ Anúu̱,

jamí ikhii̱n ma̱nindxúu̱n xa̱bo̱ xuajñuꞌ.

11 Jamí nimbáa náxáꞌsngóo dxájuu,

ni máꞌ nimbáa náxáꞌthúun dxíyo̱o̱: "Athane̱-nuwiin Táta̱".

Numuu rí mbá xúgíi̱n máꞌ mune̱-nuwúu̱n,

mbá xúgíin e̱je̱n jamí mbá xúgíin xa̱bo̱ buanuu.

12 Numuu rí ma̱ne̱ mba̱a̱ a̱kui̱nꞌ ja̱yo̱o̱ rí ra̱máján nini̱i̱,

jamí ni miꞌtsú náxármáꞌáan a̱kui̱nꞌ ja̱yo̱o̱ aꞌkhúu̱n ni máꞌ rí xkawe̱ꞌ nini̱i̱».*

13 Ído̱ naꞌthán Ana̱ꞌlóꞌ rí «awan nuxe̱ꞌ» ñajuun ríge̱ꞌ, naꞌthée̱n rí neꞌne wayuu máꞌ rí ginii. Xí neꞌne wayuu jamí níjmaa máꞌ rí ginii, inu máꞌ ma̱mbáa ne̱ xúꞌkhue̱n rá.