1 Ikhaa jngó, gu̱ni̱ꞌñáálóꞌ janíí gisngáá rí ginii jayu ni̱drígúlóꞌ ga̱jma̱á numuu Krísto̱, ga̱ma̱ñalóꞌ gisngáá rí i̱tha̱án tsída̱ꞌ ga̱jma̱á numuu̱ kajngó ma̱ꞌkhiáanꞌlóꞌ asndo ma̱ꞌne káxáanꞌlóꞌ. Ma̱xáthangáanꞌlóꞌ mu̱ꞌne̱-gajma̱a̱ mbu̱jwálóꞌ nakhúu rí ne̱ꞌne̱-gajma̱a̱lóꞌ máꞌ: rí ma̱thanga̱a a̱kia̱nꞌlóꞌ rí nu̱ꞌne̱lóꞌ rí na̱nguá gíꞌdoo numuu, jamí rí ma̱we̱je̱ a̱kia̱nꞌlóꞌ ná inuu Ana̱ꞌlóꞌ. 2 Nánguá máꞌ iꞌyóo rí mu̱ꞌne̱-gajma̱a̱lóꞌ gisngáá numuu rí mi̱xúꞌdu maꞌáanꞌlóꞌ ná awúun iya, numuu rí mu̱xkráma xa̱bo̱ ná idxa̱ꞌlóꞌ rí mune̱-tsakun-rámáa̱ꞌlóꞌ, numuu rí mbuya̱a mbiꞌñúú tsí nijáñúú, ni máꞌ numuu rí mbuyamíni̱í jámuu xa̱bo̱. 3 Ikhaa jngó, xí Ana̱ꞌlóꞌ nandoo, ma̱ma̱ñalóꞌ gisngáá rí i̱tha̱án tsída̱ꞌ ga̱jma̱á numuu Krísto̱.

4 Numuu rí xa̱bo̱ tsí mbóó miꞌtsú máꞌ nimbiꞌñúú neꞌne aguu Ana̱ꞌlóꞌ, nene̱-nuwii̱n máꞌ rí naxná Ana̱ꞌlóꞌ, jamí ni̱dri̱guíi̱ máꞌ Xu̱u̱ꞌ Ana̱ꞌlóꞌ. 5 Xúꞌkhue̱n máꞌ, ndiyáa̱ máꞌ rí ndasko̱ꞌ ajngáa rawuun Ana̱ꞌlóꞌ, nene̱-nuwii̱n máꞌ ski̱yu̱u̱ꞌ numbaa rí ni̱kú ma̱ꞌkha̱. 6 Xí nda̱wa̱á nune̱-tsíngua̱ꞌ-mijnée̱ ná inuu Ana̱ꞌlóꞌ, náxáxóo rí ma̱thanga̱a a̱kuíi̱n ná inuu Ana̱ꞌlóꞌ jamí ma̱gu̱ma-nuxii̱nꞌ mbu̱júꞌ, numuu rí asndo xómá rí nudujmaa̱ mbu̱júꞌ A̱dée Ana̱ꞌlóꞌ ná ixe̱ krúsi̱ jaꞌnii rí xkuaꞌnii, jamí nune̱-mati̱i̱ꞌ mbu̱júꞌ ná inúú xa̱bo̱.

7 Numuu rí ju̱ba̱ꞌ rí naꞌña̱a̱ iyoo ruꞌwa rí mbaꞌa nothon naxnúu, jamí najma̱a̱ rí mu̱pho̱ xa̱bo̱ tsí nu̱ñajun ná tsu̱du̱u̱ ne̱, Ana̱ꞌlóꞌ naꞌne-tsakun-rámaa ju̱ba̱ꞌ rúꞌkhue̱n. 8 Xómáꞌ ju̱ba̱ꞌ rí i̱ndo̱ó máꞌ iná tsuwan jamí iná ríꞌná najma̱a̱ ná inuu rá, nda̱a̱ numuu ríga̱ ne̱. Ana̱ꞌlóꞌ naxná-máꞌáan ne̱ jamí i̱ndo̱ó máꞌ gíꞌthu̱u̱n ne̱ rí mi̱kha ne̱.

9 A̱ngui̱nꞌ, tsáanꞌ phú nandoꞌ ja̱ya̱ꞌlaꞌ, maske máꞌ phú gakhe̱ i̱tha̱nxo̱ꞌ rá, naꞌne jañii a̱kia̱nꞌxo̱ꞌ rí i̱tha̱án máꞌ máján rí gíꞌtha̱nꞌlaꞌ ikháanꞌlaꞌ, rí Ana̱ꞌlóꞌ ma̱ꞌne-jríñáaꞌlaꞌ. 10 Numuu rí ra̱ꞌkhá xa̱bo̱ tsí xkawi̱i̱ꞌ a̱kui̱in ñajuun Ana̱ꞌlóꞌ kajngó ma̱mbumuu̱ rí nu̱ne̱laꞌ. Na̱rmáꞌáan a̱kuii̱n rí ni̱snga̱jmálaꞌ rí nandalaꞌ ju̱yáa̱ nákhí rí ne̱ne̱-mba̱ꞌwi̱inlaꞌ xa̱bii̱, jamí nu̱ne̱-mba̱ꞌwii̱nlaꞌ máꞌ asndo xúge̱ꞌ. 11 I̱ndo̱ó máꞌ numuu rí nandaxo̱ꞌ rí mbámbáa tsí ikháanꞌlaꞌ gáꞌne ga̱jma̱á mbá jañii a̱kui̱in rí naꞌne, asndo mbiꞌi rí ndámba̱wóo, kajngó ma̱mba̱núu mbá xúgíí rí ga̱jma̱á mbá jañii a̱kia̱nꞌlaꞌ guáꞌthi̱ínlaꞌ. 12 Numuu nandaxo̱ꞌ rí ma̱xáꞌskalaꞌ, rí gu̱ya̱ri̱dáálaꞌ rí nune̱ xa̱bo̱ tsí wéje̱ a̱kui̱ín ná inuu Ana̱ꞌlóꞌ jamí mba̱a̱ a̱kui̱ín, ikhaa jngó nu̱dri̱guíi̱ rí nixuda-mina̱ꞌ Ana̱ꞌlóꞌ.

13 Nákhí rí Ana̱ꞌlóꞌ nixuda-mina̱ꞌ ga̱jma̱á nindxu̱u̱ Abraám, ndawa̱a̱ i̱mba̱a̱ꞌ tsí phú i̱tha̱án gíꞌdoo numuu ma̱ꞌne inuu rí naxuda-mine̱e̱ꞌ, kajngó nixuda-mine̱e̱ꞌ ga̱jma̱á numuu̱ máꞌ ikhaa̱. 14 Xáꞌnii niꞌthúu̱n Abraám: Na̱tha̱n-jmbaaꞌ rí maphú ma̱ne̱-tsakun-rámááꞌ jamí ma̱ne̱ rí maphú ma̱ꞌne mbaꞌiin xa̱bia̱aꞌ. 15 Jamí Abraám táꞌne níꞌngo̱o̱ rí ma̱gi̱ꞌthu̱u̱n, a̱ꞌkhue̱n ni̱grui̱guíi̱ rí nixuda-mina̱ꞌ Ana̱ꞌlóꞌ.

16 Ído̱ rí mbáa xa̱bo̱ numbaa naxuda-mina̱ꞌ rí ma̱ꞌne, naxuda-mine̱e̱ꞌ ná inuu i̱mba̱a̱ꞌ xa̱bo̱ tsí i̱wa̱á gíꞌdoo numuu xó rí ikhaa̱, kajngó ma̱gi̱ꞌdoo numuu ajngóo̱ jamí ma̱xáríga̱ xkujndu nda̱wa̱á. 17 Xkuaꞌnii máꞌ mangaa, ído̱ rí Ana̱ꞌlóꞌ ndiyoo rí masngájmúú tsí mu̱drígú rí nixuda-mine̱e̱ꞌ, rí ma̱xáriꞌkhuu̱ rí niꞌthée̱n ma̱ꞌnii̱, nixuda-mine̱e̱ꞌ ga̱jma̱á numuu̱ máꞌ ikhaa̱. 18 Ikhaa jngó ríga̱ a̱jma̱ rí tsíyoo ma̱xtiꞌkhuu jamí nimbá miꞌtsú ma̱xáꞌne-nduwa Ana̱ꞌlóꞌ ga̱jma̱á numuu rúꞌkhue̱n, rí niꞌthée̱n ma̱ꞌnii̱ jamí rí nixuda-mine̱e̱ꞌ ma̱ꞌnii̱. Ikhaa rúꞌkhue̱n phú mba̱a̱ tsiakhe̱ naxnálóꞌ tsáanꞌ na̱mbu̱jmalóꞌ ná inuu Ana̱ꞌlóꞌ jamí ga̱jma̱á mbá jañii a̱kia̱nꞌlóꞌ guáꞌthi̱ínlóꞌ rí maxnálóꞌ rí niꞌthée̱n. 19 Rí ga̱jma̱á mbá jañii a̱kia̱nꞌlóꞌ guáꞌthi̱ínlóꞌ naꞌne rí ma̱we̱je̱ gúkúu jamí ma̱we̱je̱ xa̱ꞌ nímia̱ꞌlóꞌ, xómá eꞌne ajwa̱nꞌ mixngaa rí ma̱we̱je̱ jayóo guꞌwá-rguwa ná iya a̱pha̱. Xúꞌkhue̱n máꞌ mangaa, rí ga̱jma̱á mbá jañii a̱kia̱nꞌlóꞌ guáꞌthi̱ínlóꞌ na̱to̱ꞌo̱o̱ ne̱ asndo ná awúun guꞌwá dxákuun rí ꞌgí ná mikhuíí. 20 Ikhín máꞌ ni̱to̱ꞌo̱o̱ Jesús ginii jayu ga̱jma̱á numalóꞌ, numuu rí ikhaa̱ jámuu ninindxu̱u̱ tsí jayá idxu̱ún dxakuun, xómá ninindxu̱u̱ Melkisedék.