1 Ikhaa jngó, ndaꞌyóo rí i̱tha̱án máꞌ mu̱ꞌgíi idxa̱ꞌlóꞌ kajngó mu̱dxawíín májánlóꞌ ajngáa rí ni̱dxawíínlóꞌ máꞌ, ra̱ꞌkhá ma̱ngra̱ꞌáanꞌlóꞌ jamba̱a̱ gáꞌne. 2 Ga̱rmáꞌáan a̱kia̱nꞌlóꞌ rí ajngáa rawuun Ana̱ꞌlóꞌ rí nithan ánje̱l nákhí wajyúú phú ni̱gi̱ꞌdoo numuu ne̱, jamí mbá xúgíin tsí tánimbu̱únꞌ jamí túne̱-mbáníí ne̱, ni̱dri̱guíi̱ jamínu̱ꞌ xómá phú jaꞌyoo. 3 Xí xkuaꞌnii, xáne lá gájríñáaꞌlóꞌ ikháánꞌlóꞌ ná inuu jamínu̱ꞌ, xí tsímakualóꞌ juꞌyáá rí phú mba̱a̱ naꞌne-jríñáaꞌlóꞌ Ana̱ꞌlóꞌ rá. Jmína̱a̱ꞌ máꞌ Táta̱ niꞌthán-ráꞌa ginii ga̱jma̱á numuu ríge̱ꞌ, jamí xkuaꞌnii máꞌ nithanlóꞌ nda̱wa̱á tsí ni̱dxawíín ne̱. 4 Mangaa máꞌ Ana̱ꞌlóꞌ niꞌthán ga̱jma̱á nindxúu̱n ikhii̱n rí gakon rúꞌkhue̱n, ikhaa jngó niꞌnii̱ mbaꞌa inii rí ndiyáá jamí nimakúún xa̱bo̱ eꞌne, jamí mangaa máꞌ mbaꞌa inii rí phú wáá ndiyáa̱. Xúꞌkhue̱n máꞌ Xu̱u̱ꞌ Ana̱ꞌlóꞌ nixnúu̱ mbámbáa xa̱bo̱ ñajun rí ma̱ꞌne kajngó ma̱ꞌne-mba̱a̱ Ana̱ꞌlóꞌ, xómá rí neꞌne a̱kui̱in Xu̱u̱ꞌ Ana̱ꞌlóꞌ.

5 Numuu rí Ana̱ꞌlóꞌ táskuíjii̱n ánje̱l muthan-ñajwíín numbaa rí ma̱ꞌkha̱, rí nuꞌthánlóꞌ numuu. 6 Xómá ka̱ma niꞌthán mbáa xa̱bo̱ ná i̱yi̱i̱ꞌ ajngóo Ana̱ꞌlóꞌ:

«Dí lá ñajuun guéño xa̱bo̱ numbaa kajngó phú gíwa̱a̱nꞌ a̱kia̱anꞌ eꞌne rá.

Jamí dí lá ñajuun a̱dée xa̱bo̱ numbaa kajngó phú naxná-gamiéjwaanꞌ eꞌne rá.

7 Nithane̱ rí wáa lájwíi̱n gáꞌne ná inúú ánje̱l,

nithane̱ rí ma̱gi̱ꞌdoo guéño numuu̱ jamí rí mi̱tiamakuíi̱.

Nitatsíñáa̱ rí maꞌthán-ñájuu̱n mbá xúgíí rí neꞌne-ku̱maa ñawáanꞌ.

8 Mbá xúgíí nithaꞌgí inuu̱ rí maꞌthán-ñájuu̱n».*

Xí «mbá xúgíí» nixúꞌdaa Ana̱ꞌlóꞌ ñawúu̱n rí maꞌthán-ñájuu̱n, rúꞌkhue̱n iꞌthán rí mbá xúgíí máꞌ iꞌthán-ñájuu̱n. Xómáꞌ xúge̱ꞌ, na̱nguá ikujma xóó xí ikhaa̱ iꞌthán-ñájuu̱n mbá xúgíí. 9 I̱ndo̱ó máꞌ nduꞌyáálóꞌ rí Jesús, tsí wáa lájwíin neꞌne ná inúú ánje̱l mbá wátha̱ wáa mbiꞌi, phú na̱gu̱ma-mba̱a̱ jamí nitiamakuíi̱ numuu rí phú nimínu̱u̱ꞌ jamí nijáñuu̱. Ana̱ꞌlóꞌ phú nandoo jaꞌñúú xa̱bo̱ kajngó niꞌnii̱ rí Jesús ma̱ja̱ñúu ga̱jma̱á numúu̱ mbá xúgíi̱n.

10 Ana̱ꞌlóꞌ, tsí ga̱jma̱á numuu máꞌ ikhaa neꞌne-ku̱maa mbá xúgíí jamí ga̱jma̱á ski̱yu̱u̱ꞌ ríga̱ ne̱, nandoo̱ rí ma̱xtáa̱ gajmíi̱ mbaꞌiin i̱jii̱n ná mikhuíí. I̱ndo̱ó máꞌ numuu rí ndiꞌyóo rí ginii ma̱ꞌne káxi̱i̱ Jesús ga̱jma̱á majñu̱u̱ jamínu̱ꞌ, numuu rí ikhaa̱ ma̱ꞌne-jáwíi̱n. 11 Tsí na̱ka̱-raꞌne-jaꞌwu̱un xa̱bo̱ jamí tsí na̱gu̱ma-jaꞌwu̱un, mbáwíi máꞌ Anúu̱. Ikhaa jngó, tsíti̱yu̱u̱ꞌ Jesús naꞌthán rí ikhaa̱ ñajuu̱n dxájúún tsúꞌkhue̱n. 12 Xáꞌnii ka̱ma naꞌthán ná i̱yi̱i̱ꞌ ajngóo Ana̱ꞌlóꞌ:

«Ma̱thu̱ún a̱ngui̱nꞌ ga̱jma̱á numaaꞌ.

Ná majñu̱ú tsí na̱gi̱mbíin ma̱ne̱-mba̱ánꞌlo̱ꞌ».*

13 Jamí xáꞌnii iꞌthán ne̱ mangaa:

«Ikhúúnꞌ ma̱nimbo̱ꞌ ja̱yo̱o̱ ikhaa̱».*

Jamí naꞌthán ne̱ xóó:

«Ge̱jyoꞌ xtáá, gajmíꞌ e̱je̱n tsí nixníꞌ Ana̱ꞌlóꞌ».*

14 Ikhaa jngó, Jesús mangaa ninindxu̱u̱ xa̱bo̱ numbaa, numuu rí e̱je̱n tsúꞌkhue̱n ñajúún xa̱bo̱ numbaa. Xkuaꞌnii kajngó ndiyoo nijáñuu̱ jamí ga̱jma̱á majñu̱u̱ rí nijáñuu̱ ndiyoo neꞌne-gámbo̱o̱ ski̱yu̱u̱ꞌ gixa̱a̱, tsí nijanáá tsiakhe̱ rí ma̱gu̱díin xa̱bo̱. 15 Xúꞌkhue̱n máꞌ Jesús neꞌne-jáwíin mbá xúgíin tsí ga̱jma̱á numuu rí namíñúú rí ma̱ja̱ñúú, júwa̱ꞌ nune̱-mba̱ꞌwi̱i̱ gixa̱a̱. 16 Numuu táꞌkhe̱e̱ rí mambáñúu̱ ánje̱l, rí ni̱ꞌkhe̱e̱ mambáñúu̱ i̱ji̱in Abraám. 17 Ikhaa numuu rúꞌkhue̱n, ndiꞌyóo rí mbá xúgíi̱ jayu ma̱nindxu̱u̱ xómá jaꞌñúú a̱nguii̱n, kajngó ma̱goo ma̱nindxu̱u̱ tsí jayá idxu̱ún dxakuun, tsí jmbii jamí nañáwíin a̱kui̱in rí maxnáxe̱ tsi̱gi̱jña̱ꞌ ná inuu Ana̱ꞌlóꞌ. Xkuaꞌnii kajngó ma̱ꞌne mba̱a̱ a̱kui̱in Ana̱ꞌlóꞌ jaꞌyoo aꞌkhúún xa̱bo̱. 18 Jamí gíꞌdoo̱ tsiakhe̱ rí mambáñúu̱ tsí na̱gu̱ma-rájíin, numuu rí jmína̱a̱ꞌ máꞌ mangaa̱ nimínu̱u̱ꞌ jamí ndiyoo gixa̱a̱ gáꞌne-rájáa̱.