1 Maphú mbaꞌa miꞌtsú jamí mbaꞌa inii xáne rí Ana̱ꞌlóꞌ niꞌthán-múꞌúún táta̱-xi̱ꞌñálóꞌ wajyúú mbiꞌi ga̱jma̱á majñu̱ú tsí ni̱rawíjnga̱a ajngóo̱. 2 Xómáꞌ xúge̱ꞌ rá, rí inu máꞌ na̱ka̱-rayámba̱ numbaa, naꞌthán-máꞌánlóꞌ Ana̱ꞌlóꞌ ga̱jma̱á majñu̱u̱ A̱dée̱, tsí niꞌgíi̱ rí magu̱u mbá xúgíí rí ríga̱, jamí ga̱jma̱á majñu̱u̱ máꞌ ikhaa̱ neꞌne-ku̱maa̱ numbaa. 3 Ikhaa̱ nasngájmee̱ rí phú wáá rí ñajuun Ana̱ꞌlóꞌ, jamí xómá jaꞌnii jayu Ana̱ꞌlóꞌ xkuaꞌnii máꞌ jaꞌnii A̱dée̱ mangaa. Ikhaa̱ máꞌ naxnúu̱ rí ndaꞌyóo mbá xúgíí rí ríga̱ ná numbaa ga̱jma̱á ski̱yu̱u̱ꞌ ajngóo̱. Nákhí wámbo̱o̱ neꞌne-jaꞌwáa̱nꞌlóꞌ ga̱jma̱á iꞌdiuu̱, ni̱kaa̱ mikhuíí gági̱ꞌi̱i̱ ná ñawún mújúun Ana̱ꞌlóꞌ. 4 Ikhaa jngó, i̱tha̱án máꞌ mba̱a̱ A̱dée Ana̱ꞌlóꞌ inúú ánje̱l, numuu rí ikhaa̱ nijanáa̱ rí ma̱nindxu̱u̱ tsí phú i̱tha̱án gíꞌdoo numuu xó rí mbá xúgíi̱n ikhii̱n.

5 Numuu rí Ana̱ꞌlóꞌ nimbá miꞌtsú táꞌthúun nimbáa ánje̱l:

«Ikháánꞌ ñajwaanꞌ A̱ꞌdéꞌ.

Ikhúúnꞌ nanindxu̱ꞌ Ana̱a̱ꞌ asndo nákhí mbiꞌi ríge̱ꞌ».*

Ni máꞌ táꞌthée̱n ga̱jma̱á numuu nimbáa ánje̱l ríge̱ꞌ:

«Ikhúúnꞌ ma̱nindxu̱ꞌ Anu̱u̱,

jamí ikhaa̱ ma̱nindxu̱u̱ A̱ꞌdéꞌ».*

6 Jamí i̱mba̱ miꞌtsú niꞌthán Ana̱ꞌlóꞌ, nákhí rí nixúngua̱a̱ꞌ A̱dée̱ tsí ginii ná inuu numbaa:

«Gune̱-mba̱a̱ mbá xúgíin ánje̱l drígo̱o̱ Ana̱ꞌlóꞌ».*

7 Xáꞌnii iꞌthán Ana̱ꞌlóꞌ ga̱jma̱á numúú tsí ánje̱l:

«Ikhaa̱ naꞌnii̱ rí ánje̱l drígo̱o̱ ma̱nindxu̱ún gíñá,

naꞌnii̱ rí tsí nune̱ ñajuu̱n ma̱nindxu̱ún ri̱ꞌyu̱u̱ agu».*

8 Xómáꞌ tsí A̱dée̱ xáꞌnii iꞌthúu̱n:

«Táta̱ Mikhuíí, jámuu xtaꞌún narathán-ñájun,

jámuu nataxúꞌdaa májáanꞌ awan ga̱jma̱á nixí rí gída̱ꞌ ná ñawáanꞌ.

9 Na̱ni̱gua̱a̱ꞌ eꞌne rí máján jamí tsíni̱gua̱a̱ꞌ eꞌne rí xkawe̱ꞌ,

Ikhaa jngó Ana̱ꞌlóꞌ, tsí ñajuun máꞌ Ana̱a̱ꞌ ikháánꞌ, niraꞌwíi̱n rí ma̱nindxa̱a̱ꞌ Thúngaa,

jamí niꞌnii̱ rí ma̱ra̱xtaa i̱tha̱án gagi ikháánꞌ xó rí a̱ngia̱anꞌ».*

10 Jamí xáꞌnii ka̱ma naꞌthán ná i̱yi̱i̱ꞌ ajngóo Ana̱ꞌlóꞌ mangaa:

«Táta̱, nákhí rí ginii, ikháánꞌ nithane̱-ku̱maa ju̱ba̱ꞌ,

jamí ñawáanꞌ neꞌne-ku̱maa mbá xúgíí mikhu.

11 Mbá xúgíí rúꞌkhue̱n ma̱mbáa, xómáꞌ ikháánꞌ rá, jámuu xtaa.

Mbá xúgíí rúꞌkhue̱n ma̱ꞌne wayuu xómá xtíin.

12 Ma̱ta̱smi̱ga̱a ne̱ xómá xtíin,

jamí ma̱xtiꞌkhu̱u ne̱ xómá naxtiꞌkhu̱u xtíin.

Xómáꞌ ikháánꞌ rá, na̱nguá eꞌne wayaaꞌ,

jamí ni miꞌtsú ma̱xámba̱ mbiꞌyaaꞌ».*

13 Ana̱ꞌlóꞌ nimbá miꞌtsú táꞌthúun nimbáa ánje̱l:

«Araꞌún ná ñawún mújúnꞌ ge̱jyoꞌ,

asndo gáskuíji̱in xa̱bo̱ sia̱nꞌ dríga̱a̱ꞌ ná agoo nakhuáaꞌ».*

14 Numuu rí mbá xúgíin ánje̱l ñajúún xe̱ꞌ tsí nune̱ ñajuun Ana̱ꞌlóꞌ, waxúnguii̱nꞌ rí mu̱mbáñúu̱ tsí na̱ka̱-rajáwíin eꞌne Ana̱ꞌlóꞌ.