1 Ga̱galaꞌ máꞌ xúꞌkhue̱n ju̱ya̱-mijnálaꞌ xómá ene̱ mbá guꞌwíin xa̱bo̱. 2 Jamí ma̱xámbumalaꞌ rí mu̱drígúunlaꞌ ná guꞌwálaꞌ xa̱bo̱ tsí naguwá i̱mba̱ janíí. Numuu rí xkuaꞌnii máꞌ nene̱ mbá tikhuun xa̱bo̱ nákhí wajyúú, ni máꞌ túyáa̱ rí ni̱drígúu̱n ánje̱l ná guꞌwúu̱n. 3 Ga̱rmáꞌáan a̱kia̱nꞌlaꞌ ju̱ñu̱ú tsí traꞌi̱in géjwa̱nꞌ, asndo xómá rí ikháanꞌ mangáanꞌlaꞌ traꞌáanꞌlaꞌ géjwa̱nꞌ gajmiálaꞌ. Xúꞌkhue̱n máꞌ ga̱rmáꞌáan a̱kia̱nꞌlaꞌ ju̱ñu̱ú tsí na̱gu̱ma-ngíníi, asndo xómá rí ikháanꞌ mangáanꞌlaꞌ na̱gu̱ma-ngínáaꞌlaꞌ ga̱jma̱á nindxúu̱n.

4 Xúgíin xa̱bo̱ tsí nida-mijná, guya-makuíi̱ xa̱bo̱ tsí ndiya̱a̱, jamí nimbáa ma̱xábóo ga̱jma̱á xa̱bo̱ tsí táyáa. Xómáꞌ tsí nubúún gajmíí xa̱bo̱ tsí túya̱a̱ rá, Ana̱ꞌlóꞌ maxúꞌdaa awan ga̱jma̱á numúu̱.

5 Ma̱xáni̱gua̱ꞌlaꞌ rí ma̱guaꞌdáálaꞌ mi̱ndaꞌkho. Ga̱juwalaꞌ gagi ga̱jma̱á rí guáꞌdáálaꞌ máꞌ, numuu rí jmína̱a̱ꞌ máꞌ Ana̱ꞌlóꞌ niꞌthán: «Ni miꞌtsú ma̱xáni̱ꞌñáaꞌ, ni máꞌ ma̱xáni̱ꞌñá-ti̱ga̱án».* 6 Ikhaa jngó, ma̱goo mu̱ꞌthánlóꞌ ga̱jma̱á mbá jañii a̱kia̱nꞌlóꞌ:

«Táta̱ ñajuun tsí nambáyíꞌ,

ikhaa jngó ma̱xámíñuꞌ.

Nda̱a̱ nitháan rí ma̱ꞌngo̱o̱ ma̱ꞌñiꞌ nimbáa xa̱bo̱ numbaa».

7 Ga̱rmáꞌáan a̱kia̱nꞌlaꞌ ju̱ñu̱ú xa̱bo̱ ede̱ tsí ndiya̱ ikhalaꞌ, tsí nithanlaꞌ ajngáa rawuun Ana̱ꞌlóꞌ. Gu̱ya̱xi̱ílaꞌ xáne nijúwe̱e̱ꞌ, jamí gu̱ya̱ri̱dáálaꞌ rí nini̱i̱ numuu rí ni̱we̱je̱ a̱kuíi̱n ná inuu Ana̱ꞌlóꞌ. 8 Ikhaa máꞌ rí ninindxu̱u̱ Jesukrísto̱ ri̱xi̱í, ikhaa máꞌ ñajuu̱n xúge̱ꞌ, jamí ikhaa máꞌ gánindxu̱u̱ jámuu.

9 Mu̱xúni̱ꞌñá-mijnálaꞌ rí ma̱gu̱ma-nduwáanꞌlaꞌ gáꞌne nimbá gisngáá rí ra̱ꞌkhá ajngóo Ana̱ꞌlóꞌ ñajuun. Numuu rí i̱wa̱á máꞌ máján rí a̱kia̱nꞌlóꞌ ma̱grui̱gú tsiakhe̱ ga̱jma̱á rí máján naxná Ana̱ꞌlóꞌ, xó rí mu̱ꞌne̱-mbáníílóꞌ xtángoo rí naꞌthán ga̱jma̱á numuu ganitsu, numuu rí xtángoo rúꞌkhue̱n ni miꞌtsú támbáñúú ne̱ tsí nu̱ne̱-mbáníí ne̱. 10 Waxnáxe̱ mbá tsi̱gi̱jña̱ꞌ ga̱jma̱á numalóꞌ ikháánꞌlóꞌ, jamí dxakuun tsí nu̱ñajun ná awúun guꞌwá dxákuun xtíin ra̱jáꞌñúú mu̱pho̱ tsi̱gi̱jña̱ꞌ rúꞌkhue̱n. 11 Numuu rí tsí jayá idxu̱ún dxakuun, na̱to̱ꞌo̱o̱ jayóo̱ iꞌdiúún xu̱kú ga̱jma̱á numuu aꞌkhán Ná rí I̱tha̱án Tsúꞌkhaa. Xómáꞌ xuñúú xu̱kú tsúꞌkhue̱n nakha ne̱ rixa̱á, ná na̱nguá júwa̱ꞌ xa̱bo̱. 12 Xkuaꞌnii máꞌ Jesús mangaa, nijáñuu̱ rixa̱á, ná rawuun xuajen, kajngó ma̱ꞌne-jaꞌwuu̱n xa̱bo̱ xuajen ga̱jma̱á iꞌdiuu̱. 13 Ikhaa jngó, gu̱ꞌgua̱lóꞌ mangáánꞌlóꞌ rixa̱á ñúꞌún gúxkama̱alóꞌ Jesús. Jamí ga̱ꞌngo̱o̱ a̱kia̱nꞌlóꞌ rí ma̱gu̱ma-matiáanꞌlóꞌ xómá rí ni̱gu̱ma-mati̱i̱ꞌ ikhaa̱. 14 Numuu rí ra̱ꞌkhá jámuu ꞌgí xuajen numbaa ná juwalóꞌ xúge̱ꞌ, ikhaa jngó guáꞌthi̱ínlóꞌ xuajen rí ni̱kú ma̱ri̱gá.

15 Ikhaa jngó, jámba̱ miꞌtsú gu̱xna̱xílóꞌ tsi̱gi̱jña̱ꞌ ná inuu Ana̱ꞌlóꞌ ga̱jma̱á majñu̱u̱ Jesús. Tsi̱gi̱jña̱ꞌ rúꞌkhue̱n ñajuun rí mu̱ꞌne̱-mba̱a̱lóꞌ ga̱jma̱á ajngáa rí nagájnuu ná rawanlóꞌ, jamí rí mu̱ꞌthánlóꞌ rí máján ga̱jma̱á numuu̱. 16 Ma̱xámbumalaꞌ rí mu̱ne̱laꞌ rí máján ni máꞌ rí mu̱mbáyú-mijnálaꞌ. Numuu rí tsi̱gi̱jña̱ꞌ rúꞌkhue̱n ñajuun rí na̱ni̱gu̱u̱ꞌ Ana̱ꞌlóꞌ.

17 Gu̱ne̱-mbáníílaꞌ rí nuthan xa̱bo̱ ede̱ tsí juya̱ ikhalaꞌ, jamí gu̱ni̱ꞌñá-mijnálaꞌ rí muxna-ñajwanlaꞌ. Numuu rí ikhii̱n tsíyaa̱ xúu̱nꞌ rí nu̱ña̱wa̱nꞌlaꞌ jamí wéje̱ inúu̱ rí mu̱xna̱xíi̱ ñajun rí nini̱i̱ ná inuu Ana̱ꞌlóꞌ. Ga̱nimba̱ꞌlaꞌ ju̱ñúu̱ kajngó gagi a̱kuíi̱n gúni̱i̱ ñajúu̱n, jamí mu̱xúni̱i̱ xkujndu, numuu rí nda̱a̱ rí gámbáyálaꞌ rúꞌkhue̱n.

18 Gu̱tha̱n-jáñíílaꞌ Ana̱ꞌlóꞌ ga̱jma̱á numaxo̱ꞌ, numuu rí ndu̱ya̱á májánxo̱ꞌ rí na̱nguá e̱ne̱xo̱ꞌ rí xkawe̱ꞌ, jamí nandaxo̱ꞌ rí ma̱juwa májánxo̱ꞌ ná inuu mbá xúgíí. 19 I̱wa̱á máꞌ na̱nda̱ꞌa̱ꞌlaꞌ rí mu̱tha̱n-jáñíílaꞌ Ana̱ꞌlóꞌ rí ma̱ꞌnii̱ rí ma̱ꞌgá gáya̱ꞌlaꞌ wapha.

20 Ana̱ꞌlóꞌ ñajuun tsí naꞌne rí ma̱juwalóꞌ tsímáá. Ikhaa̱ niꞌnii̱ rí mbayáa mbiꞌyuu Tátiálóꞌ Jesukrísto̱, waxtú mba̱a̱ tsí na̱ña̱wa̱nꞌlóꞌ tsáanꞌ xómá xu̱kú mogo̱ jaꞌñáaꞌlóꞌ, tsí ga̱jma̱á majñu̱u̱ iꞌdiuu neꞌne mbá awan jámuu ga̱jma̱á numalóꞌ. 21 Ana̱ꞌlóꞌ gáꞌne rí ma̱ma̱ñalaꞌ mu̱ne̱laꞌ mbá xúgíí inii rí máján, kajngó mu̱ne̱laꞌ rí nandoo̱. Xúꞌkhue̱n máꞌ ga̱ꞌnii̱ rí na̱ni̱gu̱u̱ꞌ ga̱jma̱á nindxa̱ꞌlaꞌ ga̱jma̱á majñu̱u̱ Jesukrísto̱, tsí jaꞌyoo rí ma̱gu̱ma-mba̱a̱ jámuu mbiꞌi. Xkuaꞌnii gáꞌne.

22 A̱ngui̱nꞌ, na̱tha̱n-jáñalaꞌ rí mu̱ne̱ gakhe̱ a̱kia̱nꞌlaꞌ rí mu̱drígúlaꞌ mbá lájwíin ajngáa tsixprígú ríge̱ꞌ rí ni̱tháán ma̱ꞌga ná inalaꞌ. 23 Nandoꞌ rí ma̱gi̱da̱ꞌ idxa̱ꞌlaꞌ rí dxájwalóꞌ Timotéo̱ nigájnaa̱ máꞌ géjwa̱nꞌ. Xí wapha máꞌ ni̱ꞌkhe̱e̱, ma̱ꞌgá gáya̱ꞌlaꞌ ga̱jmi̱ꞌ.

24 Gu̱ra̱xi̱inlaꞌ mbá xúgíin xa̱bo̱ ede̱ tsí juya̱ ikhalaꞌ, jamí mbá xúgíin xa̱bi̱i Ana̱ꞌlóꞌ. Tsí júwa̱ꞌ ná Itália̱ nu̱ra̱xáanꞌlaꞌ.

25 Ana̱ꞌlóꞌ gáꞌne-tsakun-rámáaꞌlaꞌ mbá xúgiáanꞌlaꞌ. Xkuaꞌnii gáꞌne.*